Tinhlayo

13 Yehovha a byela Moxe a ku: 2 “Rhuma vavanuna va ya kambela tiko la Kanana, leli ni li nyikaka Vayisrayele. U ta rhuma wanuna mun’we ka lixaka ha lin’we, lweyi a nga murhangeli+ xikarhi ka vona.”+

3 Kutani Moxe a va rhuma va sukela mananga ya Parani+ hi ku landza leswi Yehovha a nga swi vula. Vavanuna lava hinkwavu a va li varhangeli va Vayisrayele. 4 Mavito ya vona hi lawa: Ka lixaka la Rubeni, Xamuwa n’wana wa Zakuri; 5 ka lixaka la Simiyoni, Xafati n’wana wa Ori; 6 ka lixaka la Yuda, Kalebe+ n’wana wa Yefune; 7 ka lixaka la Isakara, Igali n’wana wa Yosefa; 8 ka lixaka la Efrayimi, Oxeya+ n’wana wa Nuni; 9 ka lixaka la Benjamini, Paliti n’wana wa Rafu; 10 ka lixaka la Zebuloni, Gadiyeli n’wana wa Sodi; 11 ka lixaka la Yosefa,+ ku nga lixaka la Manasi,+ Gadayi n’wana wa Susi; 12 ka lixaka la Dani, Amiyeli n’wana wa Gemali; 13 ka lixaka la Aseri, Seturi n’wana wa Mikayele; 14 ka lixaka la Naftali, Nahibi n’wana wa Vhofisi; 15 ka lixaka la Gadi, Gewele n’wana wa Maki. 16 Lawa i mavito ya vavanuna lava Moxe a nga va rhuma swaku va ya kambela tiko. Kutani Moxe a chula Oxeya n’wana wa Nuni swaku i Yoxuwa.*+

17 Nkama Moxe a nga va rhuma swaku va ya kambela tiko la Kanana a va byele leswi: “Fambani mi ya Negebi, kutani mi khwela ka ndhawu leyi yi nga ni tintshava.+ 18 Mi fanele mi vona swaku tiko li tshamise ku yini,+ mi vona swaku vanhu va kona va ni matimba kumbe a va na wona, i vatsongo kumbe i vanyingi, 19 mi vona swaku tiko i linene kumbe li tale hi swa ku biha, ni swaku madoropa lawa va tshamaka ka wona ma ni matende kumbe ma ni mimuru. 20 Mi tlhela mi kamba swaku tiko li nonile kumbe a li nonanga,+ ni swaku ku ni minsinya kumbe a yi kona. Mi fanele mi tiya nhlana+ naswona mi khaya mihandzu yin’wani ya tiko.” A ku li nkama wa ku tshovela mawuvha lawa ma rhangaka ma wupfa.+

21 Se va famba va ya kambela tiko, va sukela mananga ya Zini+ anze va ya fika Reyobo+ akusuhi ni Lebo-Amati.*+ 22 Nkama va nga ya Negebi, va fike Hebroni,+ lomu a ku tshama Ayimani, Xexayi na Talmayi+ vana va Anaki.+ Phela doropa la Hebroni li rhange li yakiwa ka 7 wa malembe na ku nge se yakiwa doropa la Zowani la le Gibita. 23 Nkama va nga fika ka Nkova wa Exikoli,+ va tseme ligadja leli a li ni xitxatxa xin’we xa mawuvha, lexi nga rhwaliwa hi vavanuna vambirhi hi nhonga, ku patsa ni ma romã ni makuwa.+ 24 Va chule ndhawu yoleyo swaku i Nkova wa Exikoli*+ hi mhaka ya leswi Vayisrayele va nga tsema xitxatxa xa mawuvha kolanu.

25 Nkama ku nga hela 40 wa masiku,+ va game va vuya hi ku kambeleni ka tiko. 26 Va tlhelele ka Moxe na Aroni ni ka Vayisrayele hinkwavu amananga ya Parani, le Kadexi.+ Va fike va byela vanhu leswi va nga swi vona ni ku va komba mihandzu ya tiko. 27 Kutani va byela Moxe va ku: “Hi nghenile ka tiko leli u nga hi rhuma ka lona, vhela li tale hi leiti ni wulombe+ naswona mihandzu ya kona hi leyi.+ 28 Kambe vanhu lava tshamaka ka tiko leliyani va ni matimba naswona ni madoropa ya kona ma ni mimuru yayikulu hintamu. Hi tlhele hi vona ni vana va Anaki kolanu.+ 29 Vaamaleki+ va tshama ka tiko la Negebi,+ se Vaheti, Vayebusi+ ni Vaamori+ va tshama ka ndhawu ya tintshava, kasi Vakanana+ va tshama kusuhi ni lwandle+ atlhelweni ka Yordani.”

30 Se Kalebe a zama ku rhulisa vanhu lava a va nyime phambheni ka Moxe, a ku: “A hi fambeni swoswi, phela hi ta li teka li va la hina, hi ta hlula.”+ 31 Kambe vavanuna lava a va fambe na yena va ku: “A hi nge swi koti ku lwa ni vanhu lavayani hikusa va ni matimba ku hi tlula.”+ 32 Se va tama va byeletela Vayisrayele swilo swa ku biha+ hi tiko leli va nga li kambela va ku: “Tiko leli hi nga li kambela, i tiko la ku chavisa, a hi nge poni naswona vanhu hinkwavu lava hi nga va vona va ni matimba naswona va lehe hintamu.+ 33 Hi vone ni Manefilimi, vana va Anaki+ vatukulu va Manefilimi, phela a hi tivona hi fana ni mintete ka vona, na vona a va hi vonisa swoleswo.”