Nehemiya

9 Hi diya 24 ka wheti ya wu 7, Vayisrayele va hlengeletanile; a va nga dli nchumu naswona a va yambale mpahla ya masaka, funtshi a va ticheletela misava ka tinhloko.+ 2 Se Vayisrayele va tihambanisa ni vanhu hinkwavu va matiko man’wani+ kutani va nyima va vula swidjoho swa vona ni swa vapapayi va vona.+ 3 Se va sekeleka ka ndhawu leyi a va li ka yona va lerha buku ya Nawu+ wa Yehovha Xikwembu xa vona hi rito la ku tlakuka, anze ku hela mawora manharhu; kasi mawora laman’wani ya manharhu, a va vula leswi va nga swi yendla va tlhela va tisola ka swona ni ku khizamela Yehovha Xikwembu xa vona.

4 Kutani Yexuwa, Bani, Kadimiyeli, Xebaniya, Bunini, Xerebiya,+ Bani na Kenani va nyima henhla ka palku+ la Valevhi, va khongela ka Yehovha Xikwembu xa vona hi rito la ku tlakuka. 5 Se Yexuwa, Kadimiyeli, Bani, Axabiniya, Xerebiya, Odiya, Xebaniya na Petahiya lava va nga Valevhi va ku: “Sukani mi nyima, dzunisani Yehovha Xikwembu xa n’wina masiku hinkwawu.+ A va dzunise vito la wena leli phatimaka, leli nga tlakuka ku tlula ku dzunisiwa hinkwaku.

6 “Hi wena Yehovha ntsena;+ u yendle matilo, tilo la matilo ni hinkwaswu leswi nga ka wona, misava ni hinkwaswu leswi nga ka yona, lwandle ni hinkwaswu leswi nga ka lona. Hinkwaswu ka swona swi hlayisiwa hi wena, hinkwaswu leswi nga tilweni swa ku khizamela. 7 Hi wena Yehovha Xikwembu xa ntiyiso, lweyi a nga langa Abramu+ u gama u mu humesa aUra+ le Kalidiya, u mu chula swaku i Abrahamu.+ 8 U swi vonile swaku i munhu wa ku tshembeka,+ kutani u yendle ntwananu na yena wa ku mu nyika tiko la Vakanana, Vaheti, Vaamori, Vaperezi, Vayebusi ni Vagirgaxa swaku a ta li siyela vana* va yena+ naswona u hetisisile switshembiso swa wena hikusa wena u lulamile.

9 “U ku vonile ku hlupheka ka vavhovho va hina le Gibita,+ u tlhela u twa xirilo xa vona ka Lwandle la Ku Pshuka. 10 U yendle swikombiso ni masingita swaku u khatisa Faru ni vatirhi va yena hinkwavu ni vanhu hinkwavu va tiko la yena,+ hikusa u swi vonile swaku a va hlupha+ vanhu va wena. U tiyendlele vito ku sukela ka siku lolelo anze namuntlha.+ 11 U yendle swaku lwandle li yavana hi xikarhi, swaku va tlulela lwandle ka ndhawu ya ku woma,+ lava a va va txatxa u va txukumete ndzeni ka lona ku fana ni ribye leli txukumetiwaka ka lwandle leli nga kwata.+ 12 Ninhlikanhi a wu va rhangela hi rhefu lalikulu, kasi niwusiku hi ndzilu wawukulu swaku u va komba ndlela leyi va faneleke va famba hi yona.+ 13 U vulavule na vona ka Ntshava ya Sinayi+ na u li tilweni+ u va nyika switsundzuxu swaswinene, minawu ya ku tshembeka, ni hinkwaswu leswi u swi lavaka.+ 14 U va djondzise ku hlonipha siku la wena la ku kwetsima la Savata,+ naswona hi ku tirhisa mutirheli wa wena Moxe u va nyike minawu u tlhela u va byela hinkwaswu leswi u swi lavaka. 15 Nkama va nga biwa hi ndlala u va nyike pawu leli taka hi le tilweni,+ naswona u va nyike mati lama humaka hi le ka ribye swaku va tima torha,+ u tlhele u va byela leswaku va nghena va teka tiko leli u nga funga swaku u ta va nyika lona.

16 “Kambe vavhovho va hina va tiwomise tinhloko.+ Va ve swipandza nhloko,+ a va yi yingisanga minawu ya wena. 17 Va yale ku yingisa+ naswona a va yi khumbukanga mintirho ya wena ya ku hlamalisa leyi u nga va yendlela yona, kambe va ve swipandza nhloko va gama va tilangela murhangeli swaku va tlhelela awukaraweni le Gibita.+ Kambe wena u Xikwembu lexi nga lunghekela ku rivalela, u ni ntwelawusiwana ni timpsalu, u hlwela ku kwata naswona u ni lirhandzu lalikulu,+ funtshi a wu va tshikanga.+ 18 Hambi nkama va nga tiyendlela xifaniso xa xihon’wani,* va tlhela va ku: ‘Lexi i Xikwembu xa wena lexi nga ku humesa aGibita,’+ va yendla minchumu ya yinyingi leyi kombisaka xidelelo, 19 a wu va tshikanga mananga hi mhaka ya timpsalu ta wena tatikulu.+ Rhefu lalikulu a li sukanga henhla ka vona ninhlikanhi swaku u va rhangela ndleleni, hambi ndzilu wawukulu a wu sukanga niwusiku swaku u va voningela ka ndlela leyi va faneleke va famba hi yona.+ 20 U va nyike moya wa wena wa ku kwetsima* swaku va va ni wutlharhi,+ a wu va tsonanga mana ya wena+ naswona u va nyike mati nkama va nga twa torha.+ 21 U va nyike swakudla mananga ku ringana 40 wa malembe.+ A va pfumalanga nchumu. Mpahla ya vona a yi hlakalanga+ funtshi minenge ya vona a yi zanga yi pfimba.

22 “U va nyike mimfumu ni vanhu, va yi teka yi va ya vona,+ kutani va teka ni tiko la Sihoni,+ ku nga tiko la hosi ya Exiboni+ ni tiko la Ogi+ hosi ya Baxani. 23 U yendle swaku va va ni vana va vanyingi ku fana ni tinyeleti ta le tilweni.+ U gama u va nyika tiko leli u nga tshembisa vavhovho va vona swaku va tshama ka lona.+ 24 Kutani vana va vona va nghena va teka tiko;+ u hlule lava a va tshama ka tiko lolelo ku nga Vakanana,+ hi ku va nyiketa ka voko la vona, u nyiketa tihosi ni vanhu va tiko lolelo, swaku va va yendla leswi va swi lavaka. 25 Se va teka madoropa lama nga ni mimuru,+ masimu ya ku nona,+ tiyindlo leti nga tala hi minchumu hinkwayu yayinene, swihlovo leswi va nga swi kuma na swi txeliwile, masimu ya mawuvha, masimu ya mawolivhera+ ni minsinya ya mihandzu ya mixakaxaka. Kutani va dla va xurha, va tlhela va kuluka va tikhorisa swinene hi wunene la wena lalikulu.

26 “Kambe a va ku yingisanga, va ku djikelile,+ va wu be hi makatla Nawu wa wena. Va dlaye vaprofeta va wena lava a va va ba ndleve swaku va tlhelela ka wena, va yendle swilo swa swinyingi leswi kombisaka ku delela.+ 27 Hi mhaka ya leswi va nga swi yendla, u va nyikete ka valala va vona+ lava a va va tikisela wutomi.+ Nkama a va li ka mahlomulu a va khongela ka wena naswona a wu va twa na u li tilweni; leswi u nga ni timpsalu tatikulu a wu va rhumela lava nga ta va ponisa ka valala va vona.+

28 “Kambe hi ku hantlisa loko se u va pfunile, a va tlhela va djoha,+ kutani u va nyiketa ka voko la valala va vona, lava a va va tikisela wutomi.*+ Kambe a va gama va tlhelela ka wena va kombela swaku u va pfuna+ naswona a wu va twa na u li tilweni, u va ponisa hi ku phindhaphindha hi mhaka ya timpsalu ta wena tatikulu.+ 29 Hambiloko u va khumbukisa swaku va yingisa Nawu wa wena va tiwomise tinhloko, a va swi yingisanga leswi u swi lavaka; va djohile hi ku kala va nga yingisi minawu ya wena,+ leyi lweyi a yi yingisaka a nga ta kuma wutomi.+ Kambe va ve swipandza nhloko, funtshi va yale ku yingisa. 30 U va lehisele mbilu+ malembe ya manyingi ni ku va khumbukisa hi moya wa wena wa ku kwetsima hi ku tirhisa vaprofeta, kambe va yale ku yingisa. Hi wugamu u va nyikete ka vanhu va matiko.+ 31 Leswi u nga ni timpsalu tatikulu a wu va helisanga+ kumbe ku va tshika, hikusa u Xikwembu xa ntwelawusiwana ni timpsalu.+

32 “Wena Xikwembu xa hina, Xikwembu lexikulu xa matimba ni lexi hloniphekaka, lexi nga hlayisa ntwananu wa xona naswona xi nga ni lirhandzu lalikulu,+ hi pfune ka swikarhatu swa hina hinkwaswu leswi hi kumanaka na swona, ku patsa ni tihosi ta hina, varhangeli va hina,+ vaprista va hina,+ vaprofeta va hina,+ vavhovho va hina ni vanhu va wena hinkwavu ku sukela ka nkama wa tihosi ta Asiriya+ anze namuntlha. 33 U ve wamunene ka hinkwaswu leswi nga hi humelela hikusa u tshembekile; kambe lava nga yendla swa ku biha hi hina.+ 34 Tihosi ta hina, varhangeli va hina, vaprista va hina ni vavhovho va hina, a va wu yingisanga Nawu wa wena hambi ku yingisa hinkwaswu leswi u swi lavaka kumbe switsundzuxu swa wena leswi u nga va nyika swona. 35 A va ku tirhelanga+ naswona a va tshikanga mintirho ya vona ya ku biha, hambi hi nkama lowu a ku fuma tihosi ta vona ni hi nkama lowu a swi va fambela kahle hi mhaka ya swilo swaswinene leswi u nga va nyika swona ku patsa ni tiko lalikulu la ku nona. 36 Se namuntlha hi swikarawa,+ hi swikarawa ka tiko leli u nga li nyika vavhovho va hina swaku va dla mihandzu ya lona ni minchumu ya lona yayinene. 37 Swakudla swa swinyingi leswi tshoveliwaka ka tiko leli swi dliwa hi tihosi leti hi fumaka hi mhaka ya swidjoho swa hina.+ Ta hi* fuma ti tlhela ti swi tirhisa ku rhandza swifuyu swa hina, phela ha xaniseka swinene.

38 “Hi mhaka ya swilo leswi hinkwaswu, hi yendla ntwananu+ lowu nga tsaliwa hansi naswona varhangeli va hina, Valevhi va hina ni vaprista va hina va wu karimbarile ku komba swaku i wa ntiyiso.”+