Varoma

1 Hi mina Pawulo, xikarawa xa Kreste Yesu. Ni vitaniwe ku va mupostolo naswona ni langiwile swaku ni ta chumayela mahungu ya ku tsakisa ya Xikwembu,+ 2 lawa xi nga ma tshembisa khale ka Matsalwa ya ku kwetsima hi ku tirhisa vaprofeta va xona. 3 Mahungu lawa ma vulavula hi N’wana wa xona lweyi a nga psaliwa lani misaveni na a huma ka lixaka la Davhida.+ 4 Swa tikomba swaku i N’wana wa xona+ hikusa xi tirhise moya wa xona wa ku kwetsima swaku xi mu pfuxa ka lava nga fa,+ yena Yesu Kreste Hosi ya hina. 5 Hi ku tirhisa yena, Xikwembu xi hi kombe timpsalu tatikulu. Yesu a ni langile ku va mupostolo+ swaku ni ta pfuna vanhu hinkwavu vamatiko+ va va ni lipfumelo ni ku yingisa, va tlhela va hlonipha vito la yena. 6 Na n’wina mi kontiwa axikarhi ka vona hikusa mi rhambiwile swaku mi ta landzela Yesu Kreste. 7 Karta* leli li ya ka hinkwavu lava rhandziwaka hi Xikwembu lava nga Roma, lava nga langiwa ku va vanhu va ku kwetsima:

Ni navela swaku mi va ni timpsalu tatikulu ni ku rhula leswi taka hi ka Xikwembu Papayi wa hina ni le ka Hosi Yesu Kreste.

8 Xa ku sungula, ni khensa Xikwembu xa mina hi vito la Yesu Kreste hi mhaka ya n’wina hinkwenu, hikusa ku vulavuliwa hi lipfumelo la n’wina misaveni hinkwayu. 9 Naswona Xikwembu lexi ni xi tirhelaka hi mbilu ya mina hinkwayu hi ku chumayela mahungu ya ku tsakisa hi N’wana wa xona, xa swi tiva swaku ni tshamela ku vulavula hi n’wina ka swikhongelo swa mina.+ 10 Ni khongelela swaku loko swi koteka naswona ku li ku rhandza ka Xikwembu ni swi kota ku mi yendzela. 11 Hikusa ni navela ku mi vona swaku ni ta mi nyika nyiko leyi taka hi ka Xikwembu, leswaku lipfumelo la n’wina li ta tiya; 12 kumbe leswaku hi ta tiyisana+ hi lipfumelo la n’wina ni hi lipfumelo la mina.

13 Kambe vamakwerhu, ni lava mi swi tiva swaku minkama ya yinyingi a ni tinyimisele ku ta ka n’wina. A ni lava ku vona swaku ku chumayela ka mina kolanu, ku gamise ku yini ku fana ni le ka matiko man’wani. 14 Ni ni xikweneti ka Vagriki ni le ka vanhu va matiko man’wani,* ka va ku djondzeka ni ka lava kalaka va nga djondzekanga; 15 se ni tinyimisele ku chumayela mahungu ya ku tsakisa ni le ka n’wina koseno aRoma.+ 16 Hikusa a ni na tingana hi mahungu ya ku tsakisa;+ phela i matimba ya Xikwembu ya ku ponisa vanhu hinkwavu lava nga ni lipfumelo,+ ku sungula hi Vayuda+ ku ya fika ni ka Vagriki.+ 17 Hikusa lava nga ni lipfumelo va swi vona swaku Xikwembu xi kombisa ku lulama ka xona hi ku tirhisa mahungu ya ku tsakisa, naswona leswo swi tiyisa lipfumelo la vona+ hilaha swi nga tsaliwa hi kona: “Kambe lweyi wa ku lulama a ta hanya hi mhaka ya lipfumelo.”+

18 Hikusa ku sukela kole tilweni, Xikwembu xi kombisile ku kwata ka xona+ ka vanhu lava kalaka va nga xi yingisi, lava sivelaka vanhu ku tiva ntiyiso.+ 19 Va fanele va xi tiva Xikwembu hikusa xi va kombe mintirho ya xona ya yinyingi.+ 20 Phela wumunhu la xona la ku kala li nga voneki, matimba ya xona ya ku kala ma nga heli+ ni leswaku xona i Xikwembu hikakunene,+ swa voniwa ka leswi xi nga swi tumbuluxa+ lakakuva a va nge swi koti ku tinyimelela. 21 Hambileswi a va xi tiva Xikwembu, a va xi dzunisanga leswi xi nga Xikwembu naswona a va xi khensanga. Kambe va pimise swa ku kala swi nga pfuni nchumu naswona timbilu ta vona ta ku kala ti nga tlharihanga a ti twisisanga nchumu.*+ 22 A va ku va tlharihile kuve va txintxe va va swiphunta. 23 Va tshike ku hlonipha Xikwembu lexi kalaka xi nga fi, va ya hlonipha swifaniso leswi fanaka ni vanhu lava faka, ni swinyanyani, ni swiharhi leswi nga ni 4 wa minenge ni swiharhi leswi fambaka hi khwirhi.+

24 Hi mhaka leyo, Xikwembu xi va tshikile va yendla ku navela ka timbilu ta vona xi tlhela xi va pfumelela ku yendla minchumu ya chaka swaku va chakisa muzimbha wa vona. 25 Va tshike ntiyiso wa Xikwembu hi mhaka ya mavunhwa; va tshike ku gandzela Lweyi a nga yendla swilo hinkwaswu, lweyi a dzunisiwaka hi masiku ni masiku, va ya gandzela swilo leswi nga yendliwa va tlhela va swi tirhela. Amen. 26 Hi leswo swi nga yendla Xikwembu xi va tshika va navela swa masangu hi ndlela leyi danisaka,+ hikusa vavasati lava nga xikarhi ka vona va tshike ku famba masangu ni vavanuna, kambe va famba masangu ni vavasati ntsena;*+ 27 hi ku fana, ni vavanuna va tshike ku famba masangu ni vavasati ntsena,* kambe va hisiwa hi ku navela ka ku biha; vavanuna va yetlela ni vavanuna,+ va yendla manyala ya ku chavisa. Kutani va ta khatisiwa hi ku helela hi ku ya hi xidjoho xa vona.+

28 Leswi va nga vona swaku a swi nga fanelanga ku tiva Xikwembu, xi va tshike va pimisa swa ku biha, va yendla swa ku kala swi nga fanelanga.+ 29 Va tale hi swilo hinkwaswu leswi kalaka swi nga lulamanga,+ wubihi ni makwanga.*+ Va tale hi wukwele,+ ku dlaya,+ ku phikizana, ku xengana+ ni mona.+ Va ni mahlevo,* 30 i valumbeti,+ va nyenya Xikwembu, i varhuketeli, va titlakusa, va tibyela, va yendla maplanu* ya swilo leswi nga ni khombo, a va yingisi vapsali,+ 31 a va twisisi,+ a va hetisisi leswi va nga swi tshembisa, a va na lirhandzu naswona a va na timpsalu. 32 Va wu tiva kahle nawu wa ku lulama wa Xikwembu wa leswaku vanhu lava yendlaka swilo swa ku fana ni leswo va faneliwa hi lifu;+ kambe a vo tama va swi yendla ntsena, va tlhela va seketela ni lava swi yendlaka.