Swivutiso Swa Valerhi

A ku na nchumu ka Bibele kumbe ka buku lin’wana xi kombisaka swaku leswo swi tshame swi yentxeka.

Leswi ndzimana leyi yi nga tshamisa xiswona ka Mabibele manyingi, swi yentxa swaku vanhu va pimisa swaku ka nkama wa Pawulo ku ni lava a va tsakamisiwa hi mhaka lava nga fa. Hi xikombiso, Mabibele man’wana ma li: ‘Loko vafi vangapfuki nikutsongo, swipfuna yini kutsakamisiwa hikolaho ka vona ke?’

Se swoswi vona leswi vanhu van’wana lava tivaka Bibele va nga swi vula. Dotori Gregory Lockwood a vule swaku “a ku na nchumu ka Bibele kumbe ka xitoriya xi kombisaka swaku ku ni munhu lweyi a nga tsakamisiwa hi mhaka lweyi a nga fa.” Hi ku fana, Gordon Fee lweyi a nga Mudjondzisi a tsale swaku “a ku na nchumu ka Bibele kumbe ka buku lin’wana xi vulavulaka hi matsakamiselo lawa.” A tlhele a vula swaku “a swi se tshama swi tsaliwa ka Testamente Leyimpsa naswona a ku na lexi kombisaka swaku swi tshama swi yentxiwa a minkameni ya Pawulo, hambiloko se vapostolo va file.”

Bibele li kombisa swaku Yesu a byele vadjondzisiwa va yena a ku: ‘Fambani ka tinxaka hinkwatu, mivayendla vadjondzisiwa va mina, mivakhuvula . . . mivadjondzisa kuhlayisa hinkwaswu leswi nimibyeleke swona.’ (Mat. 28:19, 20) Loko munhu a lava ku tsakamisiwa a fanele a djondza hi Yehovha na Yesu, a kholwa ka vona a tlhela a va yingisa. Munhu lweyi se a nga fa a nge swi koti ku swi yentxa leswo naswona a swi nge koteki swaku a yentxeliwa hi munhu lweyi a ha hanyaka.  — Ekl. 9:5, 10; Yoh. 4:1; 1 Kor. 1:14-16.

Pawulo a a lava ku vula yini?

Vanhu van’wana lava a va tshama aKorinto a va vula swaku vafi a va nga ta pfuxiwa. (1 Kor. 15:12) Pawulo a va kombile swaku mavonelo ya vona a ma nga li manene. A yentxise ku yini? A tlhamusele swaku siku ni siku a a ‘langutana ni lifu’ kambe a a kholwa swaku loko a fa a a ta tlhela a pfuxiwa leswaku a ya hanya matilweni ku fana na Yesu.  — 1 Kor. 15:30-32, 42-44.

Vanhu va Korinto a va fanele va swi tiva swaku ku va mutotiwa a swi vula swaku a va ta kumana ni mindzingo siku ni siku va tlhela va fa ivi va pfuxiwa leswaku va ya hanya matilweni. Loko se va tsakamisiwile “ka Yesu Kriste” a swi fana ni loko va tsakamisiwile “kufeni ka yena.” (Rhom. 6:3) Leswo swi vula swaku ku fana na Yesu a va ta kumana ni swikarhatu va tlhela va fa, hi kona se a va ta pfuxiwa leswaku va ya hanya matilweni.

Loko se ku hundze malembe mambirhi na Yesu a tsakamisiwile, a byele 2 wa vapostolo va yena a ku: “Mitakhuvuliwa hi kukhuvula loku nikhuvuliwaka hakona”. (Marka 10:38, 39) Lani, Yesu a a nga vulavuli hi ku tsakamisiwa, kambe a a lava ku va byela swaku ku tshembeka ka yena ka Xikwembu a ku ta yentxa swaku a dlayiwa. Pawulo a te: ‘Leswi kunene hixanisekaka na yena, swivula leswaku hitakwetsimisiwa na yena.’ (Rhom. 8:16, 17; 2 Kor. 4:17) Se, na vona a va fanele va fa va ta kota ku pfuxiwa leswaku va ya hanya matilweni.

Leswi Pawulo a nga swi vula a swi fanele swi vekisiwa xileswi: “Lava tsakamisiwaka kuva va ta fa, va ta yentxa yini ke? Loko ku li swaku lava nga fa a va nga ta pfuxiwa, hi mhaka muni va tsakamisiwa kuva va ta fa?”