Vahi Pfunisa Kuyini Vadjikelezi?

Ka Matsalwa ya Wukreste ya Xigriki, kuvulavuliwa swinene hi Barnaba na mupostola Pawulo. Ava yendzela mabandla ya nkameni wa vapostola tani hi vadjikelezi. Hi mhaka muni? Hikusa ava karhateka swinene hi wuxaka la Vakrestekuloni na Yehovha. Pawulo a vule swaku a alava ‘kutlhela a ya yendzela vamakwerhu’ kuva a vona swaku va kahle. Ava tinyimisele kufamba makilometru ya kutala swinene swaku vayava tiyisa. (Mintirho 15:36) Kutani hi swoleswo vadjikelezi vaswi navelaka ka hina namuntlha.

Vahi tiyisa. Mudjikelezi mun’wana ni mun’wana a vonelela kolomuyani ka 20 wa mabandla. Bandla ha lin’we ali yendzela kambirhi hi lembe naswona a heta vhiki loko a fika. Hinga pfuneka swinene hi xiperiyensiya xa vona ni vasati va vona. Loko va fika mabandleni, va zama kutiva hinkwavu — vampsha ni lava kuleke. Naswona vaswi rhandza kufamba na hina kuchumayeleni ni le ka lava hiva djondzisaka Bibele. Naswona vadjikelezi lava, va yendla mayendzo ya wurisi ni madoda ya bandla ni kutlhela va veka wukaneli la kutsakisa amintlhanganwini ni le masembleya swaku vahi tiyisa. — Mintirho 15:35.

Va ni mhaka na hina. A vadjikelezi va ni mhaka swinene ni wu- xaka leli bandla linga na lona na Yehovha. Va yendla mintlhanganu ni madoda ni vapfunisi va bandla swaku va kambela nhluvuku wa bandla ni kuva nyika swileleto leswiva pfunaka kuhetisisa kahle mintirho ya vona. Va tlhela va pfuna vapfuli va ndlela swaku vawu yendla kahle ntirho wa vona. Nakambe vaswi rhandza kutiva lavahaku fikaka ni nhluvuku lowu vawu yendlaka ntiyisweni. Vamakwerhu lava, hi kuswi rhandza va tinyiketela tani hi ‘vanakulorhi lava tirhisanaka na hina swaku vahi pfuna’. (2 Vakorinto 8:23) Hi fanele hi tekelela lipfumelo ni kutinyiketela ka vona ka Xikwembu. — Vaheveru 13:7.

• Hi mhaka muni vadjikelezi va yendzela mabandla?

• Mangaku pfunisa kuyini mayendzo ya vona?