Lifu La Yesu La Hi Ponisa

Hina ha djoha, hi hlupheka hi tlhela hi fa hi mhaka leswi Adamu na Evha va kalaka va nga xi yingisanga Xikwembu.a Kambe ha ha ni ntshembo hi mhaka leswi Yehovha a nga nyikela N’wana wa yena Yesu Kreste swaku a ta hi huluxa ka xidjoho ni lifu. Bibele li djondzisa swaku Yesu a file leswaku a hi kutsula. A nkutsulu i male leyi hakeliwaka leswaku ku ponisiwa munhu. Yesu a hakele hi wutomi la yena la ku hetiseka. (Lerha Matewu 20:28.) Leswi Yesu a a nga na xidjoho a swi ta koteka swaku a hanya wutomi la ku kala li nga heli lani misaveni, kambe a hi pfulele ndlela swaku hi tlhela hi kuma hinkwaswu leswi Adamu na Evha va nga swi luza. Lifu la Yesu li tlhela li kombisa leswi Yehovha na Yesu va hi rhandzisaka swona. Djondzo leyi yi ta ku pfuna swaku u kombisa ku khensa leswi Yesu a nga ku yendlela swona.

1. Lifu la Yesu li nga hi pfunisa ku yini namuntlha?

Hina hi vadjohi hi mhaka leyo hi yendla swilo swa swinyingi leswi mu kwatisaka Yehovha. Kambe hi mhaka leswi Yesu a nga hi fela swa koteka swaku hi rivaleliwa, kambe leswaku hi rivaleliwa hi fanele hi tisola hikakunene ka swilo swa ku biha leswi hi nga swi yendla, hi kombela Yehovha swaku a hi rivalela hi vito la Yesu hi tlhela hi tinyimisela ku kala hi nga phindhi swidjoho swa hina. Loko hi yendla leswo, hi ta va ni wunghanu la ku tiya na Yehovha. (1 Yohani 2:1) Bibele li li: “Kreste a fe kan’we swi helela kolanu, a fela swidjoho swa lava kalaka va nga lulamanga, leswaku a mi yisa ka Xikwembu.” — 1 Pedru 3:18.

2. Lifu la Yesu li ta hi pfunisa ku yini ka nkama lowu wu taka?

Yehovha a rhumele Yesu swaku a ta nyikela wutomi la yena la ku hetiseka “swaku lweyi a pfumelaka ka [Yesu] a nga helisiwi kambe a kuma wutomi la ku kala li nga heli.” (Yohani 3:16) Hi mhaka leswi Yesu a nga nyikela hi wutomi la yena, Yehovha a ta helisa wubihi hinkwalu leli veke kona hi mhaka ku kala ku yingisa ka Adamu. Leswi vulaka swaku lava va kombisaka lipfumelo ka lifu la Yesu va ta tikhorisa hi wutomi la ku kala li nga heli ka misava leyi nga paradesi. — Esaya 65:21-23.

DJONDZA SWIN’WANI

3. Lifu la Yesu la hi ponisa ka xidjoho ni lifu

VHIDIYO: Ha Yini Yesu A File? — Xiyenge 1 (2:01)

• I mpsini leswi Adamu a nga swi luza hi mhaka leswi a kalaka a nga xi yingisanga Xikwembu?

Lerhani Varoma 5:12, mi gama mi bula hi xivutiso lexi landzelaka:

• Xidjoho xa Adamu xi hi khumbise ku yini?

Lerhani Yohani 3:16, mi gama mi bula hi xivutiso lexi landzelaka:

• Hi mhaka muni Yehovha a rhumele N’wana wa yena swaku a ta lani misaveni?

1. Adamu a a nga na xidjoho, kambe a tshike ku yingisa Xikwembu. Leswo swi yendle swaku vanhu hinkwavu va va xi xidjoho va tlhela va fa

2. Yesu a a nga na xidjoho funtshi a yingise Xikwembu. Leswo swi hi pfulele ndlela ya ku kuma wutomi la ku kala li nga heli na hi nga ha na xidjoho

4. Lifu la Yesu li pfuna vanhu hinkwavu

VHIDIYO: Ha Yini Yesu A File? — Xiyenge 2 (2:00)

• Swi kotekisa ku yini swaku lifu la munhu mun’we li pfuna vanhu hinkwavu?

Lerhani 1 Timotiya 2:5, 6, mi gama mi bula hi xivutiso lexi landzelaka:

• Adamu a a li wanuna wa ku hetiseka kambe hi mhaka ya xidjoho xa yena vanhu hinkwavu va djoha va tlhela va fa. Yesu na yena a a li wanuna wa ku hetiseka. Se swi kotekisa ku yini swaku lifu la yena li va “nkutsulu wa vanhu hinkwavu”?

5. Nkutsulu i nchumu wa lisima lowu Yehovha a nga ku nyika wona

Nkutsulu i nchumu wa lisima ka vanghanu va Yehovha. Hi xikombiso, lerhani Vagalatiya 2:20, mi gama mi bula hi xivutiso lexi landzelaka:

• Mupostolo Pawulo a swi kombisise ku yini swaku nkutsulu i nchumu wa lisima lowu Yehovha a nga mu nyika wona?

Ku djoha ka Adamu ku yendle swaku vanhu hinkwavu va fa. Kambe Yehovha a nyikele wutomi la N’wana wa yena swaku vanhu va kuma wutomi la ku kala li nga heli.

Nkama u lerhaka tindzimana leti landzelaka, pimisa hi ku vava loku Yehovha a nga ku twa nkama a nga vona N’wana wa yena na a hlupheka. Lerhani Yohani 19:1-7, 16-18, mi gama mi bula hi xivutiso lexi landzelaka:

• U titwisa ku yini hi leswi Yehovha na Yesu va nga ku yendlela swona?

LESWI HI NGA SWI DJONDZA

Hi mhaka lifu la Yesu swa koteka swaku Yehovha a hi rivalela xidjoho, naswona swa koteka swaku hi kuma wutomi la ku kala li nga heli.

Ku kambela leswi hi nga swi djondza

• Hi mhaka muni Yesu a file?

• Wutomi la Yesu la ku hetiseka li nga swi kotisa ku yini ku ponisa vanhu hinkwavu?

• Lifu la Yesu li nga ku pfunisa ku yini?

LOKO U LAVA KU TIVA SWIN’WANI

Djondza swaku hi mhaka muni kuva Yesu a nyikele hi wutomi la yena la ku hetiseka swi vitaniwa swaku i nkutsulu.

“Lifu La Yesu Li Nga Va Ponisisa Ku Yini ‘Vanhu Va Vanyingi’?” (Nhlokomhaka leyi nga ka site la jw.org)

Vona swaku hi fanele hi yendla yini leswaku hi ponisiwa.

“Yesu A Hi Ponisisa Ku Yini?” (Nhlokomhaka leyi nga ka site la jw.org)

Ku nga va swaku Yehovha wa hi rivalela swidjoho hambi swi li swikulu?

“Tinhlamulu Ta Swivutiso Swa Bibele” (Murindzi wa 1 ka Maio wa 2013)

Vona swaku ku djondza hi lifu la Yesu swi mu pfunise ku yini wanuna mun’wani swaku a txintxa mahanyelo ya yena.

“A Ndza Ha Ri Hlonga Ra Madzolonga” (Nhlokomhaka leyi nga ka site la jw.org hi Xitsonga)