Se U Lunghile Swaku U Tinyiketela Ka Yehovha?

1-2. I mpsini leswi munhu a faneleke a swi yendla na a nge se tsakamisiwa?

NDZENI ka 5 wa malembe lawa ma nga hundza ku tsakamisiwe kolomu ka 1 milhão wa vanhu swaku va va Timboni ta Yehovha. Ku tala ka vanhu volavo va fana na Timotiya lweyi a nga djondzisiwa ntiyiso hi Yehovha ku sukela na wa ha li mutsongo. (2 Tm. 3:14, 15) Kasi van’wani ka vanhu volavo va nga tsakamisiwa va djondze ntiyiso na se va li vakulu. Hi xikombiso, wansati mun’wani a djondze Bibele ni Timboni ta Yehovha a tlhela a tsakamisiwa na a ni 97 wa malembe.

² Loko u djondzeliwa Bibele kumbe vapsali va wena va li Timboni, indjhe u pimisa hi ku tsakamisiwa? Loko u pimisa hi leswo, i swinene hintamu. Kambe na u nge se tsakamisiwa u fanele u tinyiketela ka Yehovha. Nhlokomhaka leyi yi ta tlhamusela swaku swi vula yini ku tinyiketela ka Yehovha. Yi ta tlhela yi ku pfuna ku vona swaku hi mhaka muni u nga fanelanga u chava ku tinyiketela ka Yehovha u tlhela u tsakamisiwa loko se u lunghile.

I YINI KU TINYIKETELA?

 3. Nyikela swikombiso leswi nga ka Bibele swa vanhu lava a va tinyiketelile ka Yehovha.

³ Ka Bibele ku va munhu a tinyiketelile swi vula kuva a nyikele wutomi la yena swaku a tirhela Yehovha. Hi xikombiso, a Vayisrayele a va tinyiketelile ka Yehovha, kambe ku ni van’wani lava a va tinyiketelile hi ndlela ya ku hlawuleka. Hi xikombiso, Aroni a a ni “marka wa ku kwetsima” wa ku tinyiketela; ku nga xixapani xa ku phatima xa woru lexi a xi li ka xifunengeto xa nhloko. Xixapani xolexo a xi kombisa swaku Aroni a a tinyiketelile swaku a yendla ntirho wa ku hlawuleka hileswi a a li muprista wamukulu ka tiko la Israyele. (Lev. 8:9) Vanaziri na vona a va tinyiketelile hi ndlela ya ku hlawuleka ka Yehovha. A rito leli nge “Munaziri,” hi Xiheberu li vula munhu “Lweyi A Nga Langiwa” kumbe “Lweyi A Nga Hambanisiwa Ni Van’wani.” Se a ku ni minawu leyi Vanaziri a va fanele va yi yingisa, ya ku Vayisrayele lavan’wani a va nga boheki ku yi yingisa hi ku ya hi leswi a swi tsaliwe ka Nawu. — Tin. 6:2-8.

 4. a) Hi swini swilo swin’wani leswi lweyi a lavaka ku tinyiketela ka Yehovha a faneleke a swi yendla? b) Swi vula yini ku titshika? (Vona mufoto.)

⁴ Loko u tinyiketela ka Yehovha u pfumela ku va mulandzeli wa Yesu Kreste naswona ku yendla ku rhandza ka Yehovha ku va nchumu wa lisima hintamu ka wutomi la wena ku sukela hi nkama lowu u nga tinyiketela hi wona. Kambe i mpsini swin’wani leswi u faneleke u swi yendla loko u tinyiketela? Yesu Kreste a te: “Lweyi a lavaka ku ni landzela, a a titshiki”. (Mat. 16:24) Hi Xigriki, rito leli nge ‘ku titshika’ li nga ha vula “ku yala ku yendla leswi u swi lavaka.” Phela loko hi tinyiketela ka Yehovha, hi yala ku yendla swilo hinkwaswu leswi lwisanaka ni ku rhandza ka yena. (2 Ko. 5:14, 15) Leswo swi patsa ku yala ku yendla “mintirho ya nyama” ya ku fana ni ku yendla wuntunga la swa masangu. (Gal. 5:19-21; 1 Ko. 6:18) Kambe ku nga va swaku ku yingisa minawu ya Yehovha hileswi u nga tinyiketela ka yena swi yendla swaku wutomi la wena li karhata? Ihim. Loko u mu rhandza Yehovha u tlhela u tiyiseka swaku u yingisa minawu ya yena swi ta ku pfuna, a swi nga ta ku karhatela ku mu yingisa. (Ps. 119:97; Esa. 48:17, 18) Makwerhu mun’wani lweyi vito la yena ku nga Nicholas, loko a vulavula hi mhaka leyi a vule leswi: “U nga vona minawu ya Yehovha ku fana ni magradi ya djele lawa ma ku pfalelaka ku yendla leswi u swi lavaka, kumbe u vona minawu ya Yehovha ku li magradi lawa ma ku vhikelaka ka tinghonyama leti ti lavaka ku ku hahlulela!”

 5. a) A munhu a tinyiketelisa ku yini ka Yehovha? b) Hi kwini ku hambana ka ku tinyiketela ni ku tsakamisiwa? (Vona mufoto.)

⁵ Kasi a munhu a tinyiketelisa ku yini ka Yehovha? Loko munhu a tinyiketela a hamba xikhongelo a tshembisa Yehovha swaku a ta gandzela yena ntsena wutomi la yena hinkwalu naswona a ku yendla ku rhandza ka Yehovha ku ta va kona ka lisima ku tlula swilo hinkwaswu. Phela ka xikhongelo xolexo a munhu a tshembisa Yehovha swaku a ta mu rhandza ‘hi mbilu ya yena hinkwayu, hi wutomi la yena hinkwalu, hi mimpimiso ya yena hinkwayu ni hi matimba ya yena hinkwawu.’ (Mar. 12:30) Kambe ku ni ku hambana ka ku tinyiketela ni ku tsakamisiwa. Loko munhu a tinyiketela a bula na Yehovha ntsena, kambe loko se a tsakamisiwa a va a komba vanhu hinkwavu swaku a tinyiketelile ka Yehovha. A ku tinyiketela i nchumu wa ku kwetsima hintamu naswona Yehovha a nyimela swaku munhu lweyi a nga tinyiketela a hetisisa xitshembiso lexi a nga xi yendla. — Ekl. 5:4, 5.

HI MHAKA MUNI U FANELE U TINYIKETELA KA YEHOVHA?

 6. I ntxini lexi faneleke xi yendla munhu a lava ku tinyiketela ka Yehovha?

⁶ Xivangelo xa lisima hintamu lexi faneleke xi ku yendla u tinyiketela ka Yehovha i lirhandzu leli u nga na lona hi yena. Phela lirhandzu lolelo li fanele li va la ntiyiso; li seketeliwa ka “wutivi la ntiyiso” ni wutlharhi leli u nga na lona hi Yehovha, ku nga swilo hinkwaswu leswi u nga swi djondza hi Yehovha leswi nga yendla swaku lirhandzu la wena hi yena li tama li kula. (Kol. 1:9) Nkama na u djondza Bibele, u twisise swaku 1) Yehovha a kona hikakunene, 2) Bibele i rito la yena ni swaku 3) a tirhisa nhlengeletanu ya yena swaku a yendla ku rhandza ka yena.

 7. I yini leswi hi faneleke hi swi yendla na hi nge se tinyiketela?

⁷ Vanhu lava se va nga tinyiketela ka Yehovha va fanele va yi tiva kahle minawu leyi nga ka Bibele naswona minkama hinkwayu va tinyimisela ku hanya hi ku pfumelelana na yona. Va tlhela va chumayela van’wani hi swilo leswi va kholwaka ka swona leswi nga ka Bibele. (Mat. 28:19, 20) Vanhu volavo lava se va nga tinyiketela ka Yehovha, minkama hinkwayu va ya va tinyimisela ku gandzela Yehovha ntsena. Se wena ke, u titwa ku fana ni vanhu volavo va nga tinyiketela ka Yehovha? Phela loko u mu rhandza Yehovha u ta tinyiketela ka yena u tlhela u tsakamisiwa hileswi u mu rhandzaka; ku nga li leswaku u tsakisa vapsali va wena kumbe lweyi a ku djondzisaka Bibele kumbe hileswi vanghanu va wena se va nga tsakamisiwa.

 8. I yini xi nga ku pfunaka swaku u tinyiketela ka Yehovha? (Tipisalema 116:12-14)

⁸ Swin’wani swi nga ku pfunaka swaku u tinyiketela ka Yehovha i ku va u pimisa hi hinkwaswu leswi a nga ku yendlela swona. (Lerha Tipisalema 116:12-14.) Bibele li vula swaku “nyiko yin’wani ni yin’wani yayinene, ni nyiko yin’wani ni yin’wani ya ku hetiseka” yi ta hi ka Xikwembu. (Yak. 1:17) Phela nyiko yayikulu leyi Xikwembu xi nga hi nyika yona hina vanhu, i ku va xi rhumele N’wana wa xona Yesu Kreste swaku a ta fela swidjoho swa hina. Pimisa hi leswi lifu la Yesu li ku pfunisaka xiswona. Phela li yendla swaku swi koteka swaku u va ni wunghanu la le kusuhi na Yehovha, u tlhela u va ni ntshembo wa ku hanya wutomi la ku kala li nga heli. (1 Yo. 4:9, 10, 19) Se ku tinyiketela ka Yehovha i ndlela ya ku mu khensa u tlhela u kombisa swaku wa swi khensa swilo hinkwaswu leswi a nga ku yendlela swona. (Det. 16:17; 2 Ko. 5:15) A lisima la swilo swoleswo leswi Yehovha a nga hi nyika swona la kombisiwa ka djondzo 46, pontu 4, ka buku leli nge Tikhorisi Hi Wutomi La Ku Kala Li Nga Heli leyi patsaka ni vhidiyo leli nga ni nhlokomhaka leyi nge Nyika Xikwembu Nyiko Ya Wena.

SE U LUNGHEKILE SWAKU U TINYIKETELA U TLHELA U TSAKAMISIWA?

 9. I mpsini leswi u faneleke u swi khumbuka na u nge se tinyiketela?

⁹ U nga ha pimisa swaku a wu se fika nkama wa leswaku u tinyiketela ka Yehovha u tlhela u tsakamisiwa. Swi nga yendleka swa ha lava u txintxa swin’wani ka wutomi la wena swaku swi fambisana ni minawu ya Yehovha ya mahanyela kumbe swa ha lava u tiyisa lipfumelo la wena ka Yehovha. (Kol. 2:6, 7) Kambe khumbuka swaku a vanhu va kulisa wunghanu la vona na Yehovha hi tindlela ta ku hambana. A hi majovhem hinkwawu ma tinyiketelaka ka Yehovha ka ntanga yoleyi ya yin’we. Zama ku twisisa swaku i mpsini leswi u faneleke u swi txintxa swaku u kota ku tsakamisiwa, kambe na u nga tifananisi ni vanhu van’wani. — Gal. 6:4, 5.

10. U nga yendla yini loko u vona swaku a wu se lunghekela ku tinyiketela u tlhela u tsakamisiwa? (Vona ni kwadru leli nge “U Kulisiwa Hi Vapsali Lava Nga Timboni?”)

¹⁰ Loko u vona swaku a wu se lunghekela kuva u tinyiketela ka Yehovha, u nga godoli! Tama u pimisa hi yona mhaka leyo. Khongela ka Yehovha u mu kombela swaku a ku pfuna ka minzamu leyi u yi yendlaka ya ku txintxa mahanyelo ya wena leswaku u kota ku tinyiketela ka yena. (Filp. 2:13; 3:16) Phela tiyiseka swaku Yehovha a ta xi yingisa a tlhela a xi hlamula xikhongelo xa wena. — 1 Yo. 5:14.

HI MHAKA MUNI VAN’WANI VA KANAKANA KU TINYIKETELA VA TLHELA VA TSAKAMISIWA?

11. Yehovha a nga hi pfunisa ku yini swaku hi tama hi tshembeka ka yena?

¹¹ Vanhu van’wani lava nga lunghekela ku tinyiketela ka Yehovha swaku va tsakamisiwa, va nga ha kanakana ku yendla leswo. Vona va nga ha chava ku yendla xidjoho xaxikulu ivi va susiwa bandleni. Se loko na wena u titwisa xileswo, tiyiseka swaku Yehovha a ta ku nyika hinkwaswu leswi u swi lavaka leswaku “u famba hi ndlela leyi fanelaka ka yena ni ku mu tsakisa hi ku helela.” (Kol. 1:10) Yena a ta tlhela a ku nyika matimba ya ku yendla leswi nga swinene. Ha swi tiva leswo hikusa yena wa va pfuna vanhu van’wanyani leswaku va tama va tshembeka ka yena. (1 Ko. 10:13) Hi mhaka leyo, loko ku fanisiwa vanhu lava va tamaka va va kona amabandleni, i vatsongo lava va susiwaka. Leswo swi kombisa swaku Yehovha wa va pfuna vanhu va yena swaku va tama va tshembeka ka yena.

12. U nga yendla yini swaku u nga yendli xidjoho xaxikulu?

¹² Leswi hi nga ni xidjoho, hinkwerhu hi nga ha ringeka ku yendla swilo swa ku biha. (Yak. 1:14) Kambe a swaku hi ta swi yendla swilo swoleswo swa ku biha kumbe a hi nga ta swi yendla swi le ka hina; hikusa a xiboho xa ndlela leyi hi faneleke hi hanya hi yona xi le ka hina. Hambileswi vanhu van’wani va vulaka swaku a hi nge swi koti ku tikhoma loko hi ringeka ku yendla swilo swa ku biha, a hi ntiyiso leswi va swi vulaka. Hambi ko humelela nchumu xin’wani ni xin’wani lexi hi kutxaka ku yendla swilo swa ku biha, hina hi nga swi kota ku tikhoma. Kambe leswaku leswo swi koteka, hi fanele hi tinyika nkama wa ku lerha ni ku pimisa hi leswi hi swi lerhaka ka Bibele nkama ni nkama; hi khongela siku ni siku; hi nga lovhi mintlhanganwini hi tlhela hi chumayela vanhu van’wani. Loko hi yendla leswo, hi ta swi kota ku hetisisa xitshembiso lexi hi xi yendlaka ka Yehovha nkama lowu hi tinyiketelaka. Xin’wani lexi hi faneleke hi xi khumbuka hileswaku Yehovha minkama hinkwayu a ta hi pfuna. — Gal. 5:16.

13. Hi djondza yini ka xikombiso xa Yosefa?

¹³ Leswi nga ta ku pfuna ku tama u tshembeka ka Yehovha i ku tiva leswi u nga ta swi yendla na ndzingo wu nge se fika. Bibele li vulavula hi vanhu va ku hambanahambana lava na vona va nga yendla swoleswo hambileswi a va nga hetisekanga. Hi xikombiso, nsati wa Potifaru a a tshamela ku byela Yosefa swaku a yetlela na yena, kambe leswi yena a a swi tiva leswi a a fanele a swi yendla a nga zanga a pfumela. Bibele li vula leswaku loko nsati wa Potifaru a zama ku sindzisa Yosefa swaku a yetlela na yena, yena a te: “Ni nga swi kotisa ku yini ku yendla swilo swa ku biha swa ku fana ni leswo, ni djohela Xikwembu ke?” (Gen. 39:8-10) Leswo swi kombisa swaku Yosefa se a a swi tiva swaku i mpsini leswi a a ta swi yendla na xiyimu xolexo xi nge se fika. Leswo swi yendle swaku a nga weli ka xidjoho.

14. Hi nga yendla yini swaku hi nga weli ka xidjoho?

¹⁴ Hi nga mu tekelelisa ku yini Yosefa? Xin’wani hi nga xi yendlaka swaku hi tekelela Yosefa i ku va hi pimisa hi leswi hi nga swi yendlaka na ndzingo wu nge se fika. Hi fanele hi djondza ku hantla hi yala loko hi ringeka ku yendla swilo leswi Yehovha a swi nyenyaka hi tlhela hi nga tami hi pimisa hi swona. (Ps. 97:10; 119:165) Loko hi yendla leswo swi ta hi vevukela ku kala hi nga yendli xidjoho, hikusa se hi ta va hi xi tiva xa ku xi yendla.

15. U nga swi kombisisa ku yini swaku u lava ku tirhela Yehovha hi mbilu ya wena hinkwayu? (Vaheberu 11:6)

¹⁵ Swi nga yendleka u tiyiseka swaku lowu i ntiyiso u tlhela u swi lava ku tirhela Yehovha hi mbilu ya wena hinkwayu, kambe ka ha ni nchumu lexi ku sivelaka swaku u tinyiketela u tlhela u tsakamisiwa. Se loko ku li swona swi yendlekaka ka wena, ku pimisa hi marito lawa Hosi Davhida a nga ma vula swi nga ku pfuna. Yena a te: “Ni kambisise, wena Xikwembu xanga, u tiva mbilu ya mina. Ni kambisise, u tiva mimpimiso ya mina leyi karhatekaka. Vona loko ku ni ndlela ya ku biha ndzeni ka mina, u ni fambisa ka ndlela leyi kalaka yi nga na magamu.” (Ps. 139:23, 24) Minzamu leyi u yi yendlaka swaku u tinyiketela u tlhela u tsakamisiwa yi kombisa swaku wa swi lava ku tirhela Yehovha hi mbilu hinkwayu, se Yehovha a ta ku katekisa hi mhaka ya leswo. — Lerha Vaheberu 11:6.

TAMA U VA KUSUHI NA YEHOVHA

16-17. Lava nga kulisiwa hi vapsali lava nga Timboni ta Yehovha va nga yendla yini swaku va tshinela ka Yehovha? (Yohani 6:44)

¹⁶ Yesu a vule swaku hinkwavu lava nga ka nhlengeletanu ya Yehovha, hi yena Yehovha a nga va koka swaku va nghena ka yona. (Lerha Yohani 6:44.) Phela leswo swa tsakisa, hikusa swi lava ku vula swaku Yehovha a vone nchumu xaxinene ka wena; hi leswo swi nga mu yendla a ku kokela ka yena. Bibele li tlhela li vula swaku mun’wani ni mun’wani lweyi a tirhelaka Yehovha, i “tshomba la yena la lisima.” (Det. 7:6) Phela na wena Yehovha a ku vonisa xileswo.

¹⁷ Loko u kulisiwa hi vapsali lava nga Timboni, u nga ha pimisa swaku Yehovha a nga yo ku kokela ka yena, kambe u le ka nhlengeletanu ya yena hileswi vapsali va wena va nga Timboni. Kambe Bibele li li: “Tshinelani ka Xikwembu kutani na xona xi ta tshinela ka n’wina.” (Yak. 4:8; 1 Tik. 28:9) Leswo swi lava ku vula swaku loko wena u yendla xan’wanchumu swaku u tshinela ka Xikwembu, na xona xi ta tshinela ka wena. Phela ka Yehovha wena u wa lisima ku nga li hileswi u nga n’wana wa Timboni. Se loko u tshinela ka yena, a ta yendla leswi buku ya Yakobe 4:8 yi swi vulaka. — Vona ni 2 Vatesalonika 2:13.

18. I mpsini leswi hi nga ta djondza hi swona ka nhlokomhaka leyi taka? (Tipisalema 40:8)

¹⁸ Loko u tinyiketela ka Yehovha u tlhela u tsakamisiwa, u ta va u tekelela Yesu; hikusa Yesu a a tinyimisele ku yendla hinkwaswu leswi Yehovha a a mu byela swona. (Lerha Tipisalema 40:8; Heb. 10:7) Ka nhlokomhaka leyi taka hi ta bula hi swaku i mpsini leswi nga ku pfunaka ku tama u tirhela Yehovha hi ku tshembeka loko se u tsakamisiwile.