Loko hi tiyiseka swaku Yehovha wa hi rhandza naswona a na hina minkama hinkwayu, Sathana a nge swi koti ku hi chavisa. Hi xikombiso, lweyi a nga tsala Tipisalema 118 a kumane ni swikarhatu swa swinyingi. A a ni valala va vanyingi, van’wana a va hloniphiwa hintamu tikweni (tindzimana 9, 10). Minkama yin’wana a kumane ni swikarhatu swa swikulu (ndzimana 13). Naswona Yehovha a mu layile (ndzimana 18). Hambileswo, mutsali wa buku leli a yimbelele a ku: “A ni nge chavi nchumu.” A a swi tiva swaku hambileswi Yehovha a nga mu laya, a a mu rhandza. Lweyi a nga tsala buku leli la Tipisalema, a a nga kanakani swaku Yehovha a ta mu pfuna, ku nga na mhaka swaku a kumana ni xikarhatu xa ku tshamisa ku yini ka wutomi la yena. (Ps. 118:29) A hi kanakani swaku Yehovha a rhandza hinkwerhu. Ku tiyiseka ka hina ku ta hi pfuna kuva hi hlula minchumu leyi yinharhu: 1) Ku chava swaku a hi nge te swi kota ku wundla ndjangu wa hina, 2) ku chava vanhu ni 3) ku chava ku fa. Murindzi 06/22 mapar. 14-15 mapaj. 3-4

Hi fanele hi tiyiseka swaku ku gandzela Yehovha hi swona swa lisima ka wutomi la hina. Leswi Yehovha a nga Muyentxi wa hina, swa mu fanela kuva hi mu gandzela. (Nhl. 4:11; 14:6, 7) Hi mhaka leyo, hi fanele hi mu gandzela hi ndlela leyi Yena a yi lavaka, ku nga “hi moya wa ku kwetsima ni ntiyiso.” (Yoh. 4:23, 24) Hi lava swaku moya wa ku kwetsima wu li wona lowu hi kongomisaka ka wugandzeli la hina, leswaku li fambisana ni ntiyiso lowu nga ka Rito la Xikwembu. Hi nga kombisa swaku ku gandzela Yehovha i swa lisima ka wutomi la hina hambiloko hi hanya ka matiko lawa ntirho wa hina wu tsimbisiwaka. Swoswi ku ni ku tlula 100 wa vamakwerhu lava va nga petiwa djele hi leswi va nga Timboni ta Yehovha. Kambe vamakwerhu lava, a va tshiki ku khongela, va djondza Bibele ni ku chumayela van’wana na va tsakile. Phela hambiloko hi hluphiwa hi nga tsaka hi ku tiva swaku Yehovha a na hina ni swaku a ta hi hakela. — 1 Pe. 4:14. Murindzi 10/22 paj. 9 par. 13

Ka buku hinkwalu la Swivuriso Yehovha a nyikela switsundzuxu leswi swi tirhaka minkama hinkwayu. Vona swikombiso swimbirhi. Ku sungula tsaka hi leswi u nga na swona. Swivuriso 23:4, 5 li hi nyika xitsundzuxu lexi: “U nga tikarhateli ku va ni male ya yinyingi. . . . hikusa yi mila timpapa ku fana ni gama ivi yi haha yi ya matilweni.” Hambileswo, leswi hi swi vonaka namuntlha hi swaku vanhu va ku ganya ni swisiwana va yentxa hinkwaswu va nga swi kotaka swaku va va ni male ya yinyingi. Hi mhaka leyo, minkama ya ku tala va yentxa minchumu leyi chimisaka vito la vona, va nga ha twanani ni van’wani va tlhela va tivangela mavabyi. (Swiv. 28:20; 1 Tm. 6:9, 10) Xa wumbirhi, rhanga hi ku pimisa na u nge se vulavula. Loko hi nga tivoneli, leswi hi swi vulaka swi nga ha vavisa vanhu van’wani. Swivuriso 12:18 yi li: “Marito lawa munhu a ma vulaka na a nga pimisanga ma tlhava ku fana ni xipada, kambe lirimi la lava ku tlhariha la hanyisa.” Hi yentxa swaku ku va ni ku rhula loko hi nga tshameli ku hleva hi swihoxo swa van’wani. — Swiv. 20:19. Murindzi 10/22 paj. 21 par. 14; paj. 22 mapar. 16-17