Namuntlha, Yehovha a nga ha tirhisa maxaka ya hina, vanghanu va hina kumbe madoda swaku ma hi pfuna. Kambe hambileswo, loko hi karhatekile hintamu minkama yin’wani hi nga lava ku tshama hi li hoxe. Ku titwisa xileswo a swi bihanga. Swoswi, a hi voneni leswi hi nga swi yendlaka swaku hi pfuneka ka leswi Yehovha a hi yendlelaka swona swaku a hi tiyisa loko hi kumana ni swikarhatu. U nga tihambanisi ni vanhu van’wani. Phela loko hi tihambanisa ni vanhu van’wani, hi ta tshamela ku pimisa hi hina ntsena ni swikarhatu leswi hi kumanaka na swona, hi tlhela hi nga yendli swiboho swaswinene. I ntiyiso swaku minkama yin’wani hi nga ha lava ku tshama hoxe, ngopfungopfu loko ku humelele nchumu lexi nga hi vavisa hintamu. Kambe a hi fanelanga hi tolovela ku tshama na hi li hoxe, hi fambela kule ni vanhu van’wani. Phela Yehovha a nga ha tirhisa maxaka ya hina, madoda kumbe van’wani leswaku va hi pfuna. Se loko hi fambela kule ni vanhu lava, swi ta hi karhatela ku vona Yehovha loko a hi pfuna. Hi mhaka leyo, u nga fambeli kule ni vanhu van’wani. Va voni na va li ndlela leyi Yehovha a yi tirhisaka swaku a ku pfuna. — Swiv. 17:17; Esa. 32:1, 2. Murindzi 01/24 paj. 24 mapar. 12-13

Vanaziri a va nga fanelanga va tsemeta misisi. Ku yendla leswo, a swi ta kombisa swaku va tinyiketele ka Yehovha hi ku helela. Lexi twisaka ku vava, hi leswaku ku ve ni nkama lowu Vayisrayele va nga nyima ku hlonipha ni ku pfuna Vanaziri. Swilo leswi, swi kombisa leswaku a swi lava Vanaziri va tiya nhlana leswaku va hetisisa mintirho ya vona ni ku tlhela va nga fani ni vanhu van’wani. (Amo. 2:12) Vanhu va vanyingi va swi vona swaku hi hambanile na vona hikusa na hina hi yingisa Yehovha. Phela swi lava hi nga chavi swaku hi byela vakolega va hina axikola kumbe antirhweni swaku hi Timboni ta Yehovha. Funtshi leswi xiyimu xa misava xi yaka xi biha swi ya swi tika hintamu ku hanya hi minawu ya Bibele ni ku tlhela hi chumayela mahungu ya ku tsakisa ka van’wani. (2 Tm. 1:8; 3:13) Minkama hinkwayu khumbuka swaku mbilu ya Yehovha ya tsaka, loko na hi nga chavi hi tinyimisela ku kala hi nga fani ni vanhu lava va kalaka va nga mu tirheli. — Swiv. 27:11; Mal. 3:18. Murindzi 02/24 paj. 16 par. 7; paj. 17 par. 9

Vona leswi vamakwerhu va bandla leli a li li Roma a va tshamise xiswona. Van’wani a va li Vayuda lava va nga kula na va tiva Nawu wa Moxe, kasi van’wani a va nga li Vayuda kambe a va li va matiko man’wani, se vanhu lava a va hambane swinene ni Vayuda. Vakreste van’wani a va li swikarawa, kasi van’wani a va nga li swikarawa naswona swi nga yendleka a ku ni lava a va ni swikarawa. Se va swi kotise ku yini ku kulisa lirhandzu la vona hambileswi a va li vanhu va ku hambana? Mupostolo Pawulo a va kutxe swaku va ‘yamukelana’. A a vula yini mupostolo Pawulo hi marito lawa? A rito leli li nga hundzuluxeliwa li va ‘ku yamukelana’, li vula ku yamukela vanhu van’wanyani hi ndlela ya kahle, ku nga ha va kaya ka wena kumbe leswaku va va vanghanu va wena. Hi xikombiso mupostolo Pawulo a byele Filimoni leswaku a yamukela Onezimu lweyi a a li xikarawa xa yena lexi a xi balekile. (Flm. 17) Naswona Prisila na Akila va yamukele Apolosi lweyi a a nga tivi swa swinyingi hi ta ntsakamiso wa Yesu. Vona ‘va muke na yena va ya mu pfuna’. (Min. 18:26) Vakreste va nkama wa vapostolo a va pfumelelanga swaku ku hambana loku a va li na kona ku yendla leswaku va yavana. Ku hambana ni leswo, a va yamukelana. Murindzi 07/23 paj. 6 par. 13