“Vito la Wena Ali Basisiwe”

1-2. Hi tihi timhaka letihi tsakisaka kudjondza ha tona?

MHAKA ya lisima leyihi khumbaka namuntlha i kubasisiwa ka vito la Yehovha ni kulweliwa ka wuhosi la yena. Hina Timboni ta Yehovha haswi rhandza kudjondza hi mhaka leyi. Phela aku na kuhambana ka kubasisiwa ka vito la Yehovha ni kulweliwa ka wuhosi la yena.

² Hinkwerhu haswi tiva swaku vito la Yehovha li fanele li basisiwa. Naswona haswi tiva swaku vanhu va fanele vaswi tiva swaku aku na hosi yin’wana ya kuyampsa kutlula Yehovha. Timhaka leti ta timbirhi i ta lisima hintamu.

 3. I mpsini swi patsekaka ka vito la Yehovha?

³ Vito la Yehovha li patsa swilo hinkwaswu leswi khumbaka Xikwembu xa hina kupatsa ni mafumela ya yena. Hi mhaka leyo loko hi vula swaku kubasisa vito la Yehovha i swa lisima kutlula hinkwaswu hiva na hi vula swaku aku na mufumi wa kuyampsa kutlula Yehovha. Vito la Yehovha li fambisana ni mafumela ya yena tani hi Hosi ya matimba hinkwawu. — Vona kwadru lelinge: “Kubasisiwa ka Vito la Yehovha ni Kulweliwa ka Wuhosi la Yena.”

 4. I mpsini leswi Tipisalema 135:13 yiswi vulaka hi vito la Xikwembu naswona hi swini swivutiso leswingata hlamuliwa ka djondzo leyi?

⁴ Vito la Yehovha li hambanile ni mavito man’wani. (Lerha Tipisalema 135:13.) Hi mhaka muni vito la Yehovha li li la lisima? Li nchimisisiwe kuyini akusunguleni? Xikwembu xi li basisisa kuyini vito la xona? Naswona hinga yendla yini leswaku hi pfunisa kuli basisa? Ahi voneni tinhlamulu ta swivutiso leswi.

 5. I mpsini leswi vanhu vanga tivutisaka swona loko va twa swaku vito la Xikwembu li lava kubasisiwa?

⁵ “Vito la wena ali basisiwi.” (Mat. 6:9, NM) Yesu a vule swaku kubasisiwa ka vito la Yehovha i xin’we xa minchumu ya lisima leyi hi faneleke hiyi khongelela. A alava ku vula yini hi leswo? Kubasisa nchumu i kuxisusa nsila. Van’wana vangaha tivutisa swaku hi mhaka muni vito la Yehovha li lava kubasisiwa nakuve li base hi khale? Akuva hi hlamula xivutiso lexi hi fanele hi twisisa leswi vito li vulaka swona.

 6. I yini lexi yendlaka vito liva la lisima?

⁶ Loko kuvulavuliwa hi vito a kuvuliwi leswi vanhu vaku vitanisaka xiswona kumbe leswi vito la wena li tsalisiwaka xiswona. Bibele li li: “Swa yampsa kuva ni vito lelinene kutlula tshomba.” (Swi. 22:1; Ekl. 7:1) Hi mhaka muni vito li li la lisima? Hi mhaka loko kuvulavuliwa hi vito kuvuliwa ndhuma leyi munhu anga na yona ni leswi vanhu vaswi pimisaka hi yena. Hi mhaka leyo leswi vito li tsalisiwaka xiswona ni leswi vanhu vali vitanisaka xiswona ahi swa lisima ngopfu. Lexinga xa lisima hintamu hi leswi vanhu vaswi pimisaka hi n’winyi wa lona.

 7. Vanhu vali nchimisise kuyini vito la Xikwembu?

⁷ Loko vanhu va hembela Yehovha va yendla swaku van’wana va pimisa swa kubiha hi yena, leswo swi nchimisa vito la yena. Mavunhwa ya kusungula lawa manga nchimisa vito la Xikwembu ma vuliwe ajaradi la Edeni. Ahi voneni leswi hingaswi djondzaka ka leswinga yendleka.

 8. I mpsini leswi Adamu na Evha avaswi tiva naswona leswo swingahi yendla hi tivutisa yini?

⁸ Adamu na Evha avaswi tiva swaku vito la Xikwembu i Yehovha naswona ava tiva ni swilo swin’wana swa lisima hi yena. Hi xikombiso avaswi tiva swaku Yehovha hi yena angava tumbuluxa, ava nyika ndhawu ya kusaseka ya kutshama ka yona a tlhela ava tlhanganisa va va nuna na nsati. (Gen. 1:26-28; 2:18) Kambe hingaha tivutisa leswi: Injhe va tinyike nkama wa kupimisa hi hinkwaswu leswi Yehovha aava yendlele swona? Avamu rhandza Yehovha hikakunene ni kumu khensa hi hinkwaswu leswi angava nyika swona? Tinhlamulu ta swivutiso leswo ti vonekile a nkama vanga ringiwa hi nala wa Xikwembu.

 9. Hikuya hi Genesa 2:16, 17 ni 3:1-5 i mpsini leswi Yehovha angaswi byela Adamu na Evha naswona xivutiso xa Sathana xiva yendle va pimisa yini hi Yehovha?

⁹ Lerha Genesa 2:16, 17 ni 3:1-5. Hi kutirhisa nyoka Sathana a vutise Evha a ku: “Impela Xikwembu xi te ami fanelanga midla mihandzu leyinga ka minsinya hinkwayu ya jaradi?” Sathana a yendle xivutiso lexo swaku a hembela Yehovha naswona Evha a sungule kupimisa swa kubiha hi yena. Xikwembu axiva byele swaku vanga dla mihandzu ya minsinya hinkwayu kambe axiva tsimbise nsinya wun’we ntsena. Adamu na Evha ava nyikiwe minxaka yayinyingi ya mihandzu leswaku vati dlela. (Gen. 2:9) Yehovha i Xikwembu lexi hananaka kambe akuni nsinya wun’we lowu Yehovha anga tsimbisa Adamu na Evha kuwudla. Xivutiso xa Sathana axiva yendla va pimisa swaku Xikwembu xa tsonana. Swinga yendleka Evha a tivutise leswi: ‘Injhe Xikwembu axoni tsona minchumu ya kunandzika?’

10. Sathana ali nchimisise kuyini vito la Xikwembu naswona kugame kuhumelela yini?

¹⁰ A nkama Sathana angamu vutisa xivutiso lexo, Evha awahamu yingisa Yehovha. A hlamule Sathana hi kuhlaya leswi Yehova aava byele swona. A tlhele amu byela swaku avanga fanelanga vawu khumba nsinya lowuyana. Evha aaswi tiva swaku loko vangaxi yingisi Xikwembu avata fa. Kambe Sathana a te: “kuvula ntiyiso mingata fa.” (Gen. 3:2-4) Sathana se aangaha djikadjiki lani se awo nchimisa vito la Xikwembu hi kubyela Evha swaku Yehovha i muhembi. Hi kuyendla leswo Sathana a ve davulosi kumbe muhembi. Evha a kanganyisiwile hi kuhelela ava a kholwa ka Sathana. (1 Tim. 2:14) A tshembe hintamu Sathana kutlula Yehovha. Leswo swi yendle swimu vevukela kuyendla xiboho xa kukala angamu yingisi Yehovha. Kunga kudla handzu lowu Yehovha angamu byela swaku anga tshuki awu dla. Adamu na yena a game a yendla leswi fanaka. — Gen. 3:6.

11. I mpsini leswi Adamu na Evha ava fanele vaswi yendla, kambe va yendle yini?

¹¹ Pimisanyana hi leswi Evha a afanele aswi byela Sathana. Aata ku: “Wena aniku tivi, ni tiva Yehovha Papayi wa mina, namu rhandza funtshi namu tshemba, a nyike mina ni nuna wa mina hinkwaswu leswi hinga na swona. Hova mani wena u vulavulaka kubiha hi yena? Suka la.” Yehovha aata tsaka hintamu loko a twa n’wana wa yena lweyi amu rhandzaka na a vula marito ya kufana ni lawa! (Swi. 27:11) Kambe Adamu na Evha avangamu rhandzi Yehovha. Hi mhaka leyo va tsandzekile kuvhikela swaku vito la Xikwembu li nchimisiwa.

12. a) I mpsini leswi Sathana angaswi yendla kuva Evha a sungula kukanakana? b) I mpsini leswi Adamu na Evha vangaswi yendla?

¹² Hilaha hingaswi vona ha kona, Sathana a yendle swaku Evha a sungula kukanakana swaku Yehovha i Papayi wa munene kumbe ihim. Hi mhaka leyo Adamu na Evha avamu nyimelelanga Yehovha nkama anga hembeliwa hi Sathana. Leswo swi yendle leswaku va yingisa Sathana va fularhela Papayi wa vona. Ni namuntlha Sathana waha tirhisa mayendlela lama fanaka. A dumela Yehovha hi kunchimisa vito la yena. Vanhu lava kholwaka ka mavunhwa ya Sathana va gama va yala kuseketela Mfumu wa Xikwembu.

13. Hikuya hi Ezekiyele 36:23, i mpsini leswi Bibele hinkwalu li vulavulaka hi swona?

¹³ Yehovha anga khondli mavoko a tshika valala va yena va nchimisa vito la yena. Bibele lihi byela leswi Yehovha angaswi yendla akuva a kombisa leswaku swilo hinkwaswu swa kubiha leswi Sathana angaswi vula a Edeni hi yena ahi ntiyiso. (Gen. 3:15) Hingaha vula swaku Bibele hinkwalu li kombisa swaku Yehovha ata basisa vito la yena hi kutirhisa mfumu wa yena. N’wana wa yena hi yena ata vaka Hosi ka Mfumu wolowo. Ata yendla swaku amisaveni kuva ni kurhula ni kululama. Bibele lihi pfuna kutwisisa leswi Yehovha aswi yendlaka akuva a basisa vito la yena. — Lerha Ezekiyele 36:23.

14. Yehovha ali basisise kuyini vito la yena kusukela aEdeni?

¹⁴ Sathana a yendle hinkwaswu leswi angaswi kota kuva a sivela kuhetiseka ka kurhandza ka Yehovha, kambe a tsandzekile. Bibele li vulavula hi leswi Yehovha angaswi yendla naswona li kombisa leswaku i Papayi wa lirhandzu ni Hosi yayinene kutlula hinkwatu. Kuvula ntiyiso, leswi Sathana ni hinkwavu lavamu seketelaka vangaswi yendla swi twise Yehovha kuvava. (Pis. 78:40) Kambe leswaku Yehovha a lulamisa mhaka a tirhise wutlharhi, a lehisa mbilu ni kululama. A tlhele a kombisa matimba ya yena hi tindlela ta kutala. Xa lisima ngopfu a kombisa lirhandzu la yena ka hinkwaswu leswi aswi yendlaka. (1 Yoh. 4:8) Minkama hinkwayu Yehovha a lwela ku basisa vito la yena.

15. Sathana ali nchimisisa kuyini vito la Yehovha swoswi naswona kuhumelela yini hi mhaka leswo?

¹⁵ Sathana aha nchimisa vito la Yehovha kufikela ni swoswi. A zama kuyendla vanhu va kanakana swaku Yehovha ani matimba hinkwawu, wululami, wutlhari, ni lirhandzu. Hi xikombiso, Sathana a zama kukholwisa vanhu swaku Yehovha ahi yena anga yendla swilo hinkwaswu. Naswona lava kholwaka swaku Xikwembu xi kona, Sathana a zama kuva yendla va pimisa swaku minawu ya xona ya karhata naswona ayi kahle. A djondzisa vanhu swaku Yehovha ani mbilu ya kubiha naswona a hisa vanhu hi ndzilu. Vanhu lava kholwaka ka mavunhwa lawo va talisa kuyala kufumiwa hi Yehovha. Loko Sathana ahali kona ata tama a nchimisa vito la Yehovha naswona ata zama ku kuyendla ungamu seketeli Yehovha. Wena utaku yini?

16. I mpsini leswi hingaswi yendlaka leswi Adamu na Evha vanga tsandzeka kuswi yendla?

¹⁶ Yehovha a pfumelela vanhu va kukala vanga hetisekanga akuva va pfunisa kubasisa vito la yena. Wena ungaswi kota kuyendla leswi Adamu na Evha vanga tsandzeka kuswi yendla. Hambi leswi hi hanyaka ka misava leyinga tala hi vanhu lava nchimisaka vito la Yehovha, hingaswi kota kuli basisa hi kubyela vanhu ntiyiso wa leswaku Yehovha wa kwetsima, a lulamile i munene funtshi ani lirhandzu. (Esa. 29:23) Hingaswi kota kuseketela Mfumu wa Xikwembu. Hingaswi kota kupfuna vanhu kuva va twisisa leswaku kova Mfumu wa Xikwembu ntsena lowunga tisaka kululama wu tlhela wu yendla swaku kuva ni kurhula ni kutsaka la misaveni. — Pis. 37:9, 37; 146:5, 6, 10.

17. Yesu a yendle yini swaku vito la Yehovha li tiviwa?

¹⁷ Loko hi basisa vito la Yehovha, hi tekelela xikombiso xa Yesu Kreste. (Yoh. 17:26) Yesu a djondzise vanhu vito la Yehovha a tlhela ava byela leswi Yehovha anga tshamisa xiswona. Hi xikombiso, Vafarisi ava djondzisa vanhu swaku Yehovha a ni mona, wa karhata, anga na mhaka ni vanhu funtshi anga tsetseleli. Kambe Yesu ava phikile hi kupfuna vanhu kuvona swaku Papayi wa yena a ni mhaka ni vanhu, a lehisa mbilu, a ni lirhandzu funtshi wa rivalela. Kambe a pfune vanhu kuva va tiva Papayi wa yena hi kutekelela wumunhu la yena ka swiyendlo swa yena swa siku ni siku. — Yoh. 14:9.

18. Hinga yendla yini kuva hi kombisa swaku swilo swa kubiha leswi vanhu vaswi vulaka hi Yehovha ahi ntiyiso?

¹⁸ Kufana na Yesu, na hina hinga byela vanhu leswi hiswi tivaka hi Yehovha hi kuva djondzisa swaku Yehovha i Xikwembu xa lirhandzu ni xaxinene. Loko hi yendla leswo hiva hi basisa vito la Yehovha hi kuli kwetsimisa ka mimpimiso ni timbilu ta vanhu. Na hina hingamu tekelela Yehovha hambileswi hi kalaka hinga hetisekanga. (Efe. 5:1, 2) Hinga kwetsimisa vito la Yehovha hi mavulavulelo ni mahanyelo ya hina. Loko hi pfuna vanhu kuva va tiva ntiyiso hi Yehovha hiva hi lwela vito la yena.b Hi tlhela hi kombisa swaku vanhu va kukala vanga hetisekanga vangaswi kota kutshama na va tshembekile. — Yobo 27:5.

19. Hikuya hi Esaya 63:7, hi fanele hi vulavula ngopfu hi yini loko hi djondzisa vanhu?

¹⁹ Kuni swin’wana leswi hingaswi yendlaka kuva kubasisiwa vito la Yehovha. Loko hi djondzisa vanhu Bibele hi vulavula ngopfu hi wuhosi la Yehovha, hiva byela swaku Yehovha hi yena anga ni mfanelo ya kufuma swilo hinkwaswu. I swa lisima kuva hiva djondzisa minawu ya Yehovha kambe a xa lisima hintamu i kuva pfuna kurhandza Yehovha Papayi wa hina ni kuva va tshembeka ka yena. Hi mhaka leyo hi fanele hi vulavula ngopfu hi wumunhu la Yehovha. (Lerha Esaya 63:7.) Loko hi yendla leswo hita va hiva pfuna kurhandza Yehovha ni kumu yingisa na swi suka mbilwini.

20. Hita djondza yini ka nhlokomhaka leyi landzelaka?

²⁰ Kambe hinga tiyisekisa kuyini swaku mahanyela ya hina ni leswi hiva djondzisisaka xiswona vanhu switava pfuna kuva vamu tiva kahle Yehovha? Nhlokomhaka leyi landzelaka yita hlamula xivutiso lexi.