“U Ta Va Na Mina Paradesini”

 1. I mpsini leswi Yesu a nga swi byela xigevenga lexiyani a xi li tlhelweni ka yena? (Luka 23:39-43)

YESU ni swigevenga leswi a swi li matlhelweni ka yena, a va twa ku vava nkama lowu a va ya va fa. (Luk. 23:32, 33) Leswi swigevenga leswiyani swi nga poyilela Yesu, swa tikomba swaku swona a swi nga li vadjondzisiwa va yena. (Mat. 27:44; Marku 15:32) Kambe xigevenga xin’we xi game xi txintxa. Xona xi te: “Yesu, ni khumbuki loko u nghena ka Mfumu wa wena.” Yesu a xi hlamula a ku: “Na ku tshembisa namuntlha, u ta va na mina Paradesini.” (Lerha Luka 23:39-43.) A xi kona xi kombisaka swaku xigevenga lexiyani a xi mu yingisile Yesu nkama na a chumayela hi Mfumu wa Xikwembu. Naswona Yesu a nga zanga a xi byela swaku a va ta va xikan’we matilweni loko a ta sungula ku fuma. (Mat. 4:17) Leswi Yesu a a vulavula hi swona a ku li Paradesi leyi nga ta va kona ka nkama lowu taka lani misaveni. Hi mhaka muni hi vula leswo?

 2. I yini lexi kombisaka swaku xigevenga lexiyani a xi tisolile a xi li Muyuda?

² Xigevenga lexiyani xi nga tisola swi nga yendleka a xi li Muyuda. Hi mhaka muni hi hlaya leswo? Hi mhaka xona xi byele xigevenga lexin’wani xi ku: “A wu xi chavi Xikwembu leswi na wena u khatisiwaka ku fana na yena ke”? (Luk. 23:40) Phela Vayuda a va gandzela Xikwembu xin’we, kambe vanhu va matiko man’wani a va gandzela swikwembu swaswinyingi. (Ekso. 20:2, 3; 1 Kor. 8:5, 6) Loko swigevenga leswiyani a swi nga li Vayuda, xigevenga lexiyani ina xi vutise leswi: “A wu swi chavi swikwembu ke?” Xin’wanyani hi leswaku Yesu Kreste a a nga rhumeliwanga ka vanhu va ku kala va nga li Vayuda, kambe yena a a rhumeliwe ka “tinyempfu leti nga lahleka ta yindlo ya Israyele.” (Mat. 15:24) Vayisrayele a va swi tiva swaku Xikwembu xi ta pfuxa lava nga fa, funtshi swi nga yendleka xigevenga lexiyani na xona a xi yi tiva mhaka leyi. Naswona marito lawa xi nga ma vula ma kombisa swaku xona a xi swi pimisa swaku Yehovha a ta pfuxa Yesu leswaku a ya va hosi ka Mfumu wa Xikwembu. Naswona swi nga yendleka a xi kholwa swaku na xona a xi ta pfuxiwa hi Xikwembu.

 3. I mpsini leswi xigevenga lexiyani xi nga swi pimisa nkama Yesu a nga vulavula hi Paradesi, naswona hi mhaka muni hi vula leswo? (Genesa 2:15)

³ Leswi xigevenga lexiyani a xi li Muyuda, swi nga yendleka a xi swi tiva swaku Adamu na Evha va ve kona ni swaku Yehovha a a va veke ka Paradesi. Hi mhaka leyo, a nkama Yesu a nga vulavula hi Paradesi, swi tikomba xi pimisile hi ndhawu ya ku xonga lani misaveni. — Lerha Genesa 2:15.

 4. Leswi Yesu a nga byela xigevenga lexiyani xa ku tisola swi fanele swi hi yendla hi pimisa yini?

⁴ Leswi Yesu a nga swi byela xigevenga lexiyani, swi fanele swi hi yendla hi pimisa hi leswi wutomi li nga ta tshamisa xiswona aParadesi. Phela hi nga djondza swinyingi hi Paradesi, hi ku vona leswi a wu li xiswona mfumu wa Hosi Solomoni. Naswona leswi Yesu a mu tlulaka Solomoni, Mfumu wa yena wu ta tisa minkateko yayinyingi. Bibele li vula swaku yena ni lava va nga ta fuma na yena, va ta yendla swaku misava hinkwayu yi va Paradesi. (Mat. 12:42) Se lava va “tinyempfu tin’wana”, va fanele va lava ku tiva leswi va faneleke va swi yendla swaku va hanya Paradesini. — Yoh. 10:16.

 5. U pimisa swaku wutomi li ta tshamisa ku yini aParadesini?

⁵ Loko u pimisa hi Paradesi, u pimisa swaku wutomi li ta tshamisa ku yini? Swi nga yendleka u pimisa hi jardim la ku xonga la ku fana ni Edeni. (Gen. 2:7-9) Funtshi swi nga yendleka swi ku khumbukisa marito ya Mikiya lawa ma vulaka leswi mayelana ni vanhu va Xikwembu: ‘Mun’wani ni mun’wani a ta tshama ka nsinya wa yena wa mawuvha.’ (Miki. 4:3, 4) Bibele li tlhela li vula swaku ku ta va ni swakudla swaswinyingi. (Pis. 72:16; Esa. 65:21, 22) Se, tivoni na u tshame ka jardim funtshi na u dla swakudla swa ku nandzika. Funtshi tivoni na u beliwa hi moya wa ku pepa wa minsinya ni maflori. Tlhela u pimisa na u ni vanghanu, maxaka funtshi ni lava nga ta pfuxiwa, na mi bula mi tlhela mi hleka. Hinkwaswu leswi a hi norho; hikakunene swi ta yendleka kola misaveni. Naswona hi ta tlhela hi tikhorisa hi ntirho lowu hi wu tsakelaka.

 6. Hi ta yendla yini aParadesi? (Vona mufoto.)

⁶ Yehovha a hi yendle na hi tsakela ku tikhorisa hi ntirho lowu hi wu yendlaka. (Ekl. 2:24) Phela ka Mfumu Wa 1.000 Wa Malembe Wa Kreste hi ta va ni mintirho yayinyingi swinene hikusa lava nga ta pona ka nhlomulu wawukulu, ni lava nga ta pfuxiwa va ta va ni swilo swaswinyingi leswi va nga ta swi lava, swa ku fana ni mpahla, swakudla ni ndhawu ya ku tshama ka yona. Se hinkwaswu leswo swi kombisa swaku hi ta tirha hintamu swinene kambe swi ta tsakisa! Ku fana ni Adamu na Evha lava a va fanele va yendla misava yi va Paradesi, na hina hi ta va ni ntirho wa lisima wa ku txintxa misava leyi yi va Paradesi. Wa tipimisa na u djondzisa vanyingi va lava nga ta pfuxiwa kuva va tiva Yehovha ni xikongomelo xa yena ni ku tlhela u pfuna vanhu lava nga tshembeka ka Yehovha, na Yesu a nge se va kona kuva va tiva leswi nga gama swi yendleka?

 7. Hi nga tiyiseka hi yini, naswona hi mhaka muni?

⁷ Hi nga tiyiseka swaku aParadesi hi ta hanya hi ku rhula, wutomi li ta tsakisa, swilo swi ta famba hi ndlela ya kona funtshi hi ta va ni hinkwaswu leswi hi swi lavaka. Lexi hi kholwisaka hi leswo i xikombiso xa leswi nga yendleka ka mfumu wa Solomoni. Se a hi djondzeninyana hi leswi mfumu wa Solomoni a wu tshamise xiswona kuva hi ta vona swaku misava yi ta tshamisa ku yini aParadesi.

 8. Marito lama nga ka Tipisalema 37:10, 11, 29 ma hetisekise ku yini ka mfumu wa Solomoni? (Vona “Swivutiso Swa Valerhi” ka Murindzi lweyi.)

⁸ Davhida a tsale hi leswi wutomi a li ta tshamisa xiswona loko vanhu va fumiwa hi hosi yayinene ni ya wutlharhi. (Lerha Tipisalema 37:10, 11, 29.) Marito lama nga ka Tipisalema 37:11 hi tolovela ku ma lerhela van’wani ansin’wini loko hi vulavula hi Paradesi. Marito lawa ma hetisekile nkama lowu a ku fuma Hosi Solomoni, kambe ma ha ta tlhela ma hetiseka ka nkama lowu taka. Hi mhaka muni hi tiyiseka hi leswo? Hi vula leswo hikusa Yesu Kreste a tlhele a phata marito wolawo na a kombetela ka nkama lowu taka ka Dixkursu la yena la le Nhaveni. (Mat. 5:5) Kasi wutomi a li tshamise ku yini nkama lowu a ku fuma Hosi Solomoni? Hi nkama wolowo, vanhu a va tikhorisa hi ntsaku, va hanya hi ku rhula naswona tiko ‘a li tale hi wulombe ni leiti.’ Xikwembu a xi te: “Loko mi tama mi ni yingisa . . . , ni ta yendla leswaku mi hanya hi ku rhula, naswona a xi kona lexi nga ta mi chavisa.” (Lev. 20:24; 26:3, 6) Hinkwaswu leswi swi yendlekile nkama lowu a ku fuma Hosi Solomoni aIsrayele. (1 Tikro. 22:9; 29:26-28) Xin’wani xa ku tsakisa i xa leswaku a ku nga ta va ni vanhu va ku biha. (Pis. 37:10) Se swa tikomba swaku marito lama nga ka Tipisalema 37:10, 11, 29 ma hetisekile nkama lowu nga hundza; hi mhaka leyo, ha tiyiseka swaku ma ta hetiseka ni ka nkama lowu taka.

 9. I yini leswi hosi ya xisati ya le Xeba yi nga swi vula hi mfumu wa Hosi Solomoni?

⁹ Nkama hosi ya xisati ya le Xeba yi nga twa swaku swilo a swi famba kahle ka mfumu wa Solomoni, yi yile aYerusalema swaku yi ya tivonela hi yoxe hambileswi yona a yi tshama kule. (1 Tiho. 10:1) Hi ku hlamalisiwa hi leswi minchumu a yi tshamise xiswona, yona yi te: “Leswi ni nga swi twa ka tiko la mina hi mintirho ya wena ni leswi u nga tlharihisa xiswona i ntiyiso. . . . Va katekile vanhu va wena, va katekile ni vatirhi va wena lava nyimaka phambheni ka wena nkama ni nkama, va yingisela wutlharhi la wena!” (1 Tiho. 10:6-8) Leswi swilo a swi tshamise xiswona ka mfumu wa Solomoni i xikombiso xa leswi minchumu yi nga ta va xiswona loko Yesu a ta fuma misava.

10. Hi kwini ku hambana ka Yesu na Solomoni?

¹⁰ Yesu wa mu tlula Solomoni hi tindlela hinkwatu. Hi xikombiso, Solomoni a a li munhu wa ku kala a nga hetisekanga lweyi a nga yendla swihoxo swaswinyingi leswi nga gama swi yendla vanhu va Xikwembu va hlupheka. Ku hambana na yena, Yesu i hosi ya ku hetiseka leyi kalaka yi nga phazami. (Luk. 1:32; Heb. 4:14, 15) Hambileswi a nga ringiwa hi tindlela ta ku hambanahambana, Yesu a tshame na a tshembekile ka Yehovha. Leswo swi kombisa swaku Yesu a nge te tshuka a djoha kumbe ku yendla nchumu lexi nga ta vavisa vanhu lava a va fumaka. Impela ku ta va nkateko wawukulu ku fumiwa hi Hosi ya ku tshamisa xileswi.

11. I vamani lava nga ta fuma na Yesu?

¹¹ Yesu a nge te fuma yexe, a ta fuma ni lava 144.000 lava nga ta mu pfuna swaku ku rhandza ka Yehovha ku yendliwa lani misaveni. (Nhla. 14:1-3) Phela lava nga ta fuma na Yesu va tiyisele swikarhatu swaswinyingi nkama na va li misaveni, hi mhaka leyo va ta hi twisisa ku yampsa. Kambe kahle-kahle, i mpsini leswi va nga ta swi yendla seniyani?

12. Va ta yendla yini lava 144.000?

¹² Yesu ni lava 144.000 va ta va ni ntirho wawunyingi wa ku tlula Solomoni. Phela Solomoni a wo fuma ka tiko lin’we, kambe Yesu ni lava 144.000 va ta fuma vanhu vavanyingi amisaveni hinkwayu. Hikakunene ntirho wa vona a wu nga ta va matlangwani!

13. Hi wini ntirho lowu lava 144.000 va nga ta va na wona?

¹³ Ku fana na Yesu, lava 144.000 va ta va vaprista ni tihosi. (Nhla. 5:10) A nkama Vayisrayele a va landzela Nawu wa Moxe, vaprista a va ni ntirho wa lisima wa ku pfuna vanhu swaku va nga khomiwi hi mavabyi ni ku tlhela va va pfuna swaku va kulisa wunghanu la vona na Yehovha. Se leswi a Nawu wu nga ‘ndzhuti wa swilo leswi taka,’ swa tikomba swaku Yesu ni lava 144.000 va ta pfuna vanhu leswaku va hanya kahle va tlhela va va pfuna swaku va va kusuhi na Yehovha. (Heb. 10:1) A hi swi tivi swaku loko lava 144.000 se va ta va tihosi ni vaprista atilweni va ta hi kongomisisa ku yini na hi li lani misaveni. Kambe ha swi tiva swaku Yehovha a ta hi nyika nkongomiso lowu hi wu lavaka loko hi ta fika aParadesi. — Nhla. 21:3, 4.

14. Indjhe lava “tinyempfu tin’wana” ni vamakwavu va Kreste va tirhisana? Tlhamusela.

¹⁴ Yesu a vule swaku lava a va ta fuma na yena i “ntlhambi wa wutsongo.” (Luk. 12:32) A tlhele a vulavula hi ntlawa wun’wani lowu a nga wu vitana “tinyempfu tin’wana.” Mintlawa leyimbirhi ya tirhisana swoswi yi tlhela yi twanana, naswona ya ha ta tama yi tirhisana loko misava yi ta va Paradesi. (Yoh. 10:16) Kambe ku hambana i ka leswaku ka nkama lowu taka lava “ntlhambi wa wutsongo” va ta va na va li tilweni, kasi lava “tinyempfu tin’wana” va ta va ni ntshembo wa ku tikhorisa hi wutomi la ku kala li nga heli lani misaveni. I mpsini leswi lava “tinyempfu tin’wana” va faneleke va swi yendla swaku va faneleka ku hanya aParadesi?

15. a) Lava “tinyempfu tin’wana” va nga va seketelisa ku yini lava nga totiwa? b) U nga xi tekelelisa ku yini xikombiso xa makwerhu lweyi a nga ka mufoto? (Vona mufoto.)

¹⁵ Xigevenga lexi xi nga tisola a xi vanga ni nkama wa ku komba Yesu swaku xa swi khensa leswi a nga xi yendlela swona. Kambe hina va “tinyempfu tin’wana” hi nga swi kombisa swaku ha mu khensa Yesu hi leswi a nga hi yendlela swona. Hi xikombiso, hi nga swi kombisa swaku ha mu rhandza hi ku tirhisana kahle ni lava nga totiwa. Phela leswaku hi ta ponisiwa swi ta ya hi leswi hi va khomisaka xiswona vamakwavu va Kreste. (Mat. 25:31-40) Xin’wani hi nga xi yendlaka, i ku pfuna vamakwavu va Kreste ka ntirho wa ku chumayela ni wa ku yendla vadjondzisiwa. (Mat. 28:18-20) Leswaku hi yendla leswo, hi lava ku ma tirhisa kahle mabuku ya ku djondzisa hi wona, ya ku fana ni buku leli nge: Tikhorisi. Se, loko u nga na xidjondzo, yendla minzamu ya ku sungula xidjondzo xa Bibele hilani u nga kotaka hi kona.

16. I yini leswi hi nga swi yendlaka swoswi swaku hi tilunghiselela ku hanya aParadesini?

¹⁶ A swi lavi hi nyimela ku fika Paradesi swaku hi hanyisa xileswi Yehovha a swi lavisaka xiswona. Hambi swoswi swi lava hi yendla hinkwaswu hi nga swi kotaka swaku hi tshembeka ka mavulavulelo ya hina, ka leswi hi swi yendlaka hi tlhela hi pimela ka swilo hinkwaswu. Swi lava hi tshembeka ka Yehovha, ka lweyi hi nga chada na yena, ni ka vamakwerhu abandleni. Hi tlhela hi yendla hinkwaswu leswi hi nga swi kotaka kuva hi kombisa swaku ha tilunghiselela swaku hi hanya aParadesi. Phela loko hi swi kota ku hanya hi minawu ya Yehovha swoswi ka misava ya ku biha, swi ta hi vevukela ku hanya hi yona loko se hi li seniyani aParadesini. Vona nhlokomhaka leyi nge “Indjhe Se U Lunghile Swaku U Kuma ‘Tshomba La Misava’?” leyi kumekaka ka Murindzi yelweyi.

17. Hi mhaka muni hi nga fanelanga hi godola hi mhaka swidjoho leswi hi nga swi yendla khale?

¹⁷ Leswi hi kalaka hi nga hetisekanga, minkama yin’wani hi nga ha godola hi mhaka swidjoho leswi hi nga swi yendla khale. Kambe Yehovha a lava swaku hi nga tshameli ku tisola ku tlula mpimu hi mhaka swidjoho hi nga swi yendla khale. Hambileswo a hi fanelanga hi djoha hi maxivomu na hi tibyela swaku Yehovha a ta hi rivalela hikusa Yesu a hi felile. (Heb. 10:26-31) Kambe loko hi djoha, leswi hi faneleke hi swi yendla i ku tisola, hi kombela madoda swaku ma hi pfuna hi tlhela hi txintxa. Loko hi yendla leswo Yehovha a ta hi rivalela. (Esa. 55:7; Mint. 3:19) A hi khumbukeni marito lawa Yesu a nga ma byela Vafarisi, lama nge: “A ni telanga ku ta vitana lava ku lulama, kambe ku ta vitana vadjohi.” (Mat. 9:13) Phela lifu la Yesu li ni matimba ya ku hlampsa swidjoho swa hina hinkwaswu.

18. AParadesi u ta navela ku bula hi yini ni xigevenga lexiyani xi nga tisola?

¹⁸ Indjhe wa tivona wena na u li Paradesi, na u bula ni xigevenga lexi a xi li tlhelweni ka Yesu? Phela hi wumbirhi ka n’wina mi ta swi tlangela hintamu leswi Yesu Kreste a nga mi yendlela swona. Swi nga yendleka wena u ta xi vutisa swaku i mpsini swi nga yendleka nkama Yesu na a fa hi kutsongokutsongo ni swaku xi titwise ku yini nkama Yesu a nga hlamula xikombelo xa xona. Naswona swi nga yendleka xona xi ta ku vutisa swaku swi ve ndjhani ku hanya ka masiku ya wugamu ya misava leyi ya Sathana. Phela swi ta nandziha swinene ku djondza Bibele ni vanhu va ku fana ni lavo! — Efe. 4:22-24.

19. I mpsini swi nga ta yendla swaku wutomi aParadesi li tsakisa? (Vona mufoto wa pajina la ku sungula.)

¹⁹ A wutomi aParadesi li ta tsakisa. Hi ta va ni swilo swaswinyingi swa ku swi yendla hi tlhela hi hanya ni vanhu lava swi tsakisaka ku hanya na vona. Naswona xaxikulu ku tlula hinkwaswu, hi ta ya hi mu tiva kahle Papayi wa hina Yehovha hi tlhela hi tikhorisa hi minkateko ya yena. Minkama hinkwayu hi ta va ni swaswinyingi swa ku swi djondza hi yena ni leswi a nga swi yendla. Loko nkama wu ya wu famba hi ta ya hi mu rhandza hintamu Yehovha. Impela hi mu rhandza hintamu Yehovha na Yesu hi mhaka leswi va nga hi nyika ntshembo wa ku hanya hi masiku aParadesi!