Pimisa Hi Minkateko Ya Nkama Lowu Taka

1-2. Nyikela xikombiso xa leswi hi nga swi tirhisisaka xiswona leswi nga ka Swivuriso 4:25.

PIMISA hi swikombiso leswi: Makwerhu wansati lweyi a nga guga a pimisa hi swilo swa swinene leswi nga mu humelela khale. Hambileswi a nga ni swikarhatu swa swinyingi swoswi, a tama a yentxa leswi a nga swi kotaka ka ntirho wa Yehovha. (1 Kor. 15:58) Siku ni siku a zama ku pimisa na a li misaveni leyimpsha ni vanhu lava a va rhandzaka. Makwerhu mun’wana wansati a khumbuka swaku a tshame a kwatisiwa hi makwerhu mun’wana kambe a nga mu vekeli xiviti. (Kol. 3:13) Kasi makwerhu mun’wana wanuna wa swi khumbuka swidjoho swa yena leswi a nga swi yentxa ka nkama lowu nga hundza kambe a lwela ku tirhela Yehovha hi ku tshembeka. — Pis. 51:10.

² I mpsini leswi vamakwerhu lava va fanaka hi swona? Hinkwavu va swi khumbuka leswi nga va yentxekela khale kambe a va tshameli ku pimisa hi swona. Ku hambana ni leswo, va tshama na va “langute phambeni.” Va pimisa hi swilo leswi nga ta yentxeka ka nkama lowu taka. — Lerha Swivuriso 4:25.

 3. Hi mhaka muni hi fanele hi tshama na hi “languti phambeni” hi pimisa hi swilo leswi nga ta humelela ka nkama lowu taka?

³ Hi mhaka muni swi li swa lisima ku tshama na hi “langute phambeni”, hi pimisa hi leswi nga ta humelela ka nkama lowu taka? Ku fana ni leswi munhu a kalaka a nga swi koti ku famba kahle loko a tshamela ku languta ndzhaku, na hina a hi nge swi koti ku mu tirhela kahle Yehovha loko hi tshamela ku pimisa hi swilo leswi nga hi humelela ka nkama wu nga hundza. — Luk. 9:62.

 4. Hi ta djondza hi yini ka nhlokomhaka leyi?

⁴ Ka nhlokomhaka leyi, hi ta vona 3 wa minchumu leyi nga hi yentxaka hi tshamela ku pimisa hi swilo leswi nga hundza. 1) Ku navela swaku wutomi la hina li tlhela li fana ni leswi a li tshamise xiswona khale, 2) ku veketela xiviti ni 3) ku titwa nandzu ku tlula mpimu. Hi ta vona swaku Bibele li nga hi pfunisa ku yini swaku hi nga tshameli ku pimisa hi swilo ‘swa le ndzhaku’ kambe hi lwela ku pimisa hi swilo ‘leswinga le mahlweni’. — Filp. 3:13.

 5. Eklesiasta 7:10, yi hi basopisa ka yini?

⁵ Lerha Eklesiasta 7:10. Vona swaku ndzimana leyi a yi vuli swaku swi bihile ku vula swaku: “Hi mhaka muni khale minchumu a yi li kahle?” Hikusa ku khumbuka swilo swa swinene i nyiko leyi taka hi ka Yehovha. Ku hambana ni leswo, ndzimana leyi yi li: “U nga hlayi swaku: ‘Hi mhaka muni khale minchumu a yi yampsa ku tlula swoswi?’” Hi marito man’wana, lexi nga biha i ku fananisa swiyimu leswi a hi li ka swona khale ni leswi hi nga ka swona swoswi, hi gama hi tibyela swaku a khale a swi yampsa ku tlula swoswi.

 6. Hi mhaka muni swi nga li swinene ku pimisa swaku khale a swilo a swi yampsa ku tlula swoswi? Nyikela xikombiso.

⁶ Hi mhaka muni ku nga li wutlhari ku pimisa swaku wutomi la hina a li yampsa khale ku tlula swoswi? Loko hi yentxa leswo hi ta khumbuka swilo swa swinene leswi nga hi yentxekela khale hi gama hi yentxa ingaku a ku nga na swilo swa ku biha. Hi xikombiso, vona leswi nga humelela Vayisrayele va khale. A nkama va nga huma Gibita a va hlwelanga ku khohlwa swaku a va hanya ku vava ka tiku leliya. A va pimisa hi swakudla swa swinene leswi a va li na swona. Va te: “Hi xuva tihlampfi leti a hi dla hi mahala aGibita, mapepinu, makhalavatla, tinyala, tinyala ta makamba ni xinyalana!” (Tinhl. 11:5) Indje hikakunene swilo leswi a va swi “dla hi mahala”? Ihim. Vayisrayele va hakele ku vava hikusa a va xanisiwa hi leswi a va li swikarawa a Gibita. (Ekso. 1:13, 14; 3:6-9) Va game va khohlwa swaku a va xaniseka Gibita. A va pimisa hi swakudla swa kahle leswi a va li na swona va tshika ku pimisa hi swilo swa swinene leswi Yehovha a nga va yentxela swona. Phela leswo a swi mu tsakisanga Yehovha. — Tinhl. 11:10.

 7. I mpsini leswi nga pfuna makwerhu mun’we wansati leswaku a nga tshameli ku pimisa hi swilo leswi nga humelela khale?

⁷ Hi nga yentxa yini swaku hi nga tshameli ku pimisa hi swilo leswi nga humelela khale? Vona xikombiso xa makwerhu wansati lweyi a nga sungula ku tirha aBetele la Brooklyn hi 1945. Hi ku famba ka nkama a game chada ni makwerhu lweyi na yena a a tirha Betele, va gama va tirha xikan’we malembe ya manyingi. Hi 1976, nuna wa yena a sungule ku vabya. Makwerhu lweyi a li nuna wa yena a nkama na a li kusuhi ni ku fa a mu byeli leswi a a fanele a sala a swi yentxa loko se a file. A te: “Mina na wena hi ve ni wutomi la ku tsakisa. Phela a hi vanyingi va swi kumaka leswo. Hambileswi u nga ta tama u swi khumbuka swilo swa swinene leswi nga hi yentxekela kambe u nga tshameli ku pimisa hi swona. Hambi u twa ku vava, hi ku famba ka nkama swi ta hundza. U nga pfumeleli swilo swa ku biha leswi nga ku yentxekela swi ku heta ntamu. Kambe tsaka hi minkateko leyi hi nga yi kuma hi ku tirhela Yehovha na hi li xikan’we. . . . Phela ku kota ku khumbuka swilo leswi i nyiko leyi taka hi ka Yehovha.” Marito lawa makwerhu lweyi a nga byeliwa hi nuna wa yena ma tsakisa hikakunene!

 8. Hi mhaka muni swi li swinene loko hi nga tshameli ku pimisa hileswi swi nga hi humelela khale?

⁸ Makwerhu lweyi, a swi landzile leswi a nga byeliwa hi nuna wa yena. A tirhele Yehovha hi ku tshembeka anze a fa na a ni 92 wa malembe. Na a nga se fa a te: “Loko ni pimisa hi 63 wa malembe lawa ni nga ma heta ka ntirho wa nkama hinkwawu, ni vona swaku hikakunene ni ve ni wutomi la ku tsakisa. Hikusa lexi ni yentxaka ni tsaka hintamu i ku tiva swaku ni ni vamakwerhu abandleni naswona hi ni ntshembo wa ku hanya xikan’we a paradesi ka nkama lowu taka hi tlhela hi tirhela Yehovha Muvumbi wa hina hi lani ku nga heliki.”b Hi nga djondza swa swinyingi ka makwerhu lweyi, hileswi a a tshamela ku pimisa hi Yehovha ni switshembiso swa yena.

 9. Hi lani swinga kombisiwa hi kona ka Levhitika 19:18, swi nga hi karhatela ku rivalela munhu loko swi te yini?

⁹ Lerha Levhitika 19:18. Minkama yinyingi swa hi karhatela ku rivalela munhu loko a hi djohelile, ngopfu ngopfu loko a li munghanu, xaka kumbe makwerhu abandleni. Hi xikombiso, makwerhu mun’we a tshama a lumbetiwa hi makwerhu mun’wana abandleni swaku a mu yiveli mali. Hi ku famba ka nkama makwerhu lwiyani a swi tsumbulile swaku a hi yena a nga mu yivela a tlhela a mu kombela rivalelo. Kambe makwerhu lweyi va nga mu lumbeta a a kwati hintamu funtshi a a tshamela ku pimisa hi swona. Wena ke, u tshama u titwa ku fana ni makwerhu lweyi? Phela loko a swo yentxekela hina leswo, wun’wani nkama a swi ta hi karhatela ku rivalela makwerhu lweyi.

10. I mpsini leswi nga hi pfunaka swaku hi nga veketeli xiviti?

¹⁰ I mpsini leswi nga hi pfunaka swaku hi nga veketeli xiviti? Xa ku sungula, khumbuka swaku Yehovha a vona swilo hinkwaswu. Wa swi vona leswi hi yentxekelaka ni loko hi lumbetiwa hi swilo swaku a hi swi yentxanga. (Hev. 4:13) A nga tsaki loko a hi vona na hi hlupheka. (Esa. 63:9) Naswona a tshembisa swaku a ta helisa ku hlupheka hinkwaku. — Nhla. 21:3, 4.

11. Loko hi rivalela van’wana swi hi pfuna hi yini?

¹¹ Xin’wana lexi hi faneleke hi xi khumbuka i swaku ku rivalela van’wana swi nga hi pfuna. Makwerhu lwiyani a nga lumbetiwa ku yiva mali a swi vonile leswo. Hi ku famba ka nkama a susile xiviti lexi a a li na xona. A swi vonile swaku loko hi rivalela van’wana, Yehovha na yena a ta hi rivalela. (Mat. 6:14) A a swi tiva swaku leswi va nga mu yentxela swona a swi nga li swinene kambe a swi voni swi yampsa swaku a mu rivalela makwerhu lwiyani. Hi mhaka leyo, makwerhu lweyi a tame a tsaka ka ntirho lowu a a wu yentxela Yehovha.

12. Hi djondza yini ka 1 Yohane 3:19, 20?

¹² Lerha 1 Yohane 3:19, 20. Minkama yin’wana hinkwerhu hi nga ha titwa nandzu. Hi xikombiso, vanhu van’wana va titwa nandzu hi leswi va nga swi yentxa na va nga se djondza ntiyiso. Kasi van’wana va titwa nandzu hi leswi va nga swi yentxa na se va tsakamisiwile. (Rhom. 3:23) I ntiyiso swaku hi lava ku yentxa swilo swa swinene, kambe ‘hinkwerhu hi ni swihoxo leswotala’. (Yak. 3:2; Rhom. 7:21-23) Hambileswi hi kalaka hi nga swi rhandzi ku titwa nandzu, minkama yin’wana swi nga hi pfuna. Hi mhaka muni? Hikusa ku titwa nandzu swi yentxa munhu a lunghisa swihoxo swa yena a tlhela a tinyimisela ku kala a nga ha phindi leswi a nga swi yentxa. — Hev. 12:12, 13.

13. Hi mhaka muni hi fanele hi tivonela swaku hi nga titwi nandzu ku tlula mpimu?

¹³ Minkama yin’wana hi nga ha titwa nandzu ku tlula mpimu. Leswo swi vula ku titwa nandzu hambiloko se hi tisolile ka swidjoho swa hina naswona Yehovha a hi rivalelile. Phela ku titwisa xileswo a hi swinene. (Pis. 31:10; 38:3, 4) Hi mhaka muni swi nga li swinene? Vona xikombiso xa makwerhu mun’wana wansati lweyi a a titwa nandzu hi swidjoho swa yena swa khale. A te: “Ni vona swaku ku yentxa minchumu ya yinyingi ka ntirho wa Yehovha a swi pfuni nchumu hikusa a ni nga ta ponisiwa.” Vanhu vanyingi va titwa ku fana ni makwerhu lweyi. Hi mhaka leyo, hi fanele hi tivonela swaku Sathana a nga hi phasi hi ntlhamu lowu wa ku titwa nandzu ku tlula mpimu, hikusa Sathana wa tsaka loko hi tshika ku tirhela Yehovha, hi khohlwa swaku Yehovha wa ha tama a hi rhandza. — Fananisa na 2 Vakorinto 2:5-7, 11.

14. Hi nga swi tivisa ku yini swaku Yehovha a lava ku hi rivalela?

¹⁴ Kambe hi nga ha tivutisa leswi: ‘Ni nga swi tivisa ku yini swaku Yehovha a ni rivalelile hikakunene?’ Loko u za u hamba xivutiso lexi swi komba swaku Yehovha a nga ku rivalela. Ka malembe lama nga hundza ku vuliwe leswi ka revhixta la Murindzi: “Minkama yin’wana hi nga ha phindha phindha ku yentxa xidjoho xolexi xa xin’we hi mhaka swilo leswi a hi swi yentxa na hi nge se na tirhela Yehovha. . . . Kambe u nga heli ntamu. U nga pimisi swaku xidjoho xa wena a xi rivaleleki, hikusa hi leswi Sathana a lavaka swaku u pimisa swona. Akuva u titwa nandzu swi kombisa swaku u nga swi kota ku txintxa naswona Yehovha a nga ku rivalela. Tiveki hansi, u khongela ka Yehovha u kombela swaku a ku rivalela. Mu kombeli, a ku pfuna ku basisa lipfalu la wena u tlhela u nga ha phindi xidjoho xa wena. Ku fana ni n’wana lweyi nkama ni nkama a yaka ka papayi wa yena a ya kombela ku pfuniwa ka mhaka yoleyi ya yin’we, na wena tama u kombela Yehovha swaku a ku pfuna. Yehovha a ta ku pfuna hikusa i Papayi wa lirhandzu.”c

15-16. Van’wana va titwise ku yini a nkama va nga vona swaku Yehovha a va rivalelile hikakunene?

¹⁵ Ku tala ka vanhu va Yehovha va tiyisiwile hi ku tiva swaku Yehovha a va rivalelile. Hi xikombiso, malembenyana ma nga hundza makwerhu mun’wana a pfuniwile hi xiperiyensiya a nga xi kuma ka tinhlokomhaka leti nge: “Ntiyisu Wucinca Wutomi la Vanhu.” Ka xiperiyensiya xa kona, makwerhu a a kombisa swaku a a nga kholwi swaku Yehovha wa mu rhandza hi mhaka swilo swa ku biha leswi a nga swi yentxa khale. A heti malembe na a titwisa xileswo hambi nkama a nga tsakamisiwa. Kambe a nkama a nga pimisa hi leswi lifu la Yesu li hi pfunisaka xiswona a swi vonile swaku Yehovha wa mu rhandza.d

¹⁶ Xiperiyensiya lexi xi mu pfunise ku yini makwerhu lweyi a a xi lerha? A te: “A nkama na ni li mutsongo a ni lwela ku tshika ku sixtira ponografiya kambe swoswinyana ni tlheli ni sungula ku li vona. Ni gami ni ya kombela ku pfuniwa hi madoda ya bandla funtshi na lwa na swona. Madoda ma ni pfunile ku vona swaku Yehovha wa ni rhandza funtshi a lava ku ni rivalela. Kambe minkama yin’wana ni titwa na ni nga li wa nchumu ni tlhela ni vona ingaku Yehovha a nga ni rhandzi. Ku lerha xiperiyensiya xa makwerhu lweyi swi ni pfunile hikakunene. Swoswi na swi vona swaku loko ni pimisa swaku Yehovha a nge ni rivaleli swi fana ni loko ni swi tekela hansi leswi Yehovha a nga swi yentxa swaku a hi ponisa hi ku tirhisa lifu la Yesu. Ni khatluli pajina la lani a ku tsaliwe kona xiperiyensiya lexi, swaku ni ta kota ku lerha ni tlhela ni pimisa hi xona loko ni titwa na ni nga li wa nchumu.”

17. I mpsini leswi nga pfuna Pawulo swaku a nga titwi nandzu ku tlula mpimu?

¹⁷ Swiperiyensiya swa ku fana ni leswi swi hi khumbukisa leswi nga humelela mupostolo Pawulo. Na a nga se va Mukreste a a li mudjohi wa mukulu. Phela Pawulo a a swi khumbuka leswi a nga swi yentxa kambe a a nga tshameli ku pimisa hi swona. (1 Tim. 1:12-15) A a kholwa swaku Yehovha a nga mu rivalela hi ku tirhisa lifu la Yesu naswona a a swi vona swaku ku ponisiwa hi lifu la Yesu a ku li nyiku ya yikulu. (Gal. 2:20) Hi mhaka leyo Pawulo a a nga tshameli ku titwa nandzu ku tlula mpimu. Kambe a a lwela ku tirhela Yehovha hi ku yentxa hinkwaswu leswi a a swi kota.

18. Hi djondze yini ka nhlokomhaka leyi?

¹⁸ Hi djondze yini ka nhlokomhaka leyi? 1) Ku khumbuka swilo swa swinene leswi nga hi yentxekela i nyiku leyi taka hi ka Yehovha. Kambe swilo swa swinene hintamu, hi leswi hi nga ta va na swona ka nkama lowu taka a misaveni leyimpsha. 2) Vanhu van’wana va nga hi twisa ku vava kambe loko hi va rivalela hi ta kota ku tama hi tirhela Yehovha. 3) Ku titwa nandzu hintamu swi nga hi sivela ku tirhela Yehovha na hi tsakile. Hi mhaka leyo, ku fana na Pawulo, hi fanele hi kholwa swaku Yehovha a hi rivalelile.

19. Hi swi tivisa ku yini swaku a misaveni leyimpsha a hi nga ta xaniseka hi swilo leswi nga humelela khale?

¹⁹ Hi ni ntshembo wa ku kuma wutomi la ku kala li nga heli. Loko se hi li misaveni leyimpsha a hi nga ha ta khumbuka swilo swa ku biha leswi nga hi yentxekela. Bibele li li: “Swilo leswinga hundza aswingete khumbukiwa.” (Esa. 65:17) Pimisa hi leswi: Swoswi vanhu va vanyingi va gugile na va tirhela Yehovha, kambe a misaveni leyimpsha va ta tlhela va va majovhem. (Yobo 33:25) Hi nga pfumeleleni swilo leswi nga humelela khale swi hi heta ntamu. Ku hambana ni leswo a hi pimiseni hi leswi nga ta yentxeka ka misava leyimpsha ni leswi hi nga swi yentxaka swoswi swaku na hina hi va kona.