Timboni Ta Yehovha I Vakreste Va Ntiyiso?

Hina Timboni ta Yehovha ha kholwa swaku hi Vakreste va ntiyiso. Hi mhaka muni hi kholwa? Ka djondzo leyi, hi ta vona swaku leswi hi swi kholwaka hi swi kuma kwini, hi mhaka muni hi ni vito leli nge Timboni ta Yehovha, naswona hi swi kombisisa ku yini swaku ha rhandzana.

1. Leswi Timboni ta Yehovha ti swi kholwaka swi seketeliwa ka yini?

Yesu a te: “Rito la [Xikwembu] i ntiyiso.” (Yohani 17:17) Ku fana na Yesu hinkwaswu leswi Timboni ta Yehovha ti swi kholwaka swi ka Rito la Xikwembu. Vona swaku Timboni ta Yehovha ti swi yentxisa ku yini leswo ku sukela khale. Kolomuyani ka lembe la 1870 ntlawa wa wutsongo wa vanhu va sungule ku kambisisa kahle ntiyiso wa Bibele, a va lava ku twisisa leswi Bibele li swi djondzisaka. Loko va twisisa nchumu xa nyuwani ka Bibele a va kholwa ka xona hambiloko xi hambanile ni leswi tikereke a ti swi djondzisa. Va game va sungula ku byela van’wana hi leswi a va swi djondza.a

2. Hi mhaka muni hi ni vito leli nge Timboni ta Yehovha?

Yehovha a vula swaku lava va mu gandzelaka i timboni ta yena hikusa va byela van’wani ntiyiso hi yena. (Vaheberu 11:4–12:1) Hi xikombiso, ka minkama ya khale Xikwembu xi byele vanhu va xona xi ku: “N’wina mi timboni ta mina.” (Lerha Esaya 43:10.) Yesu a vitaniwe tani hi “Mboni ya ku Tshembeka.” (Nhlawutelo 1:5) Hi mhaka leyo ku sukela hi 1931 hi sungule ku tirhisa vito leli nge Timboni ta Yehovha, naswona ha tsaka hi ku va ni vito leli.

3. Timboni ta Yehovha ti li kombisisa ku yini lirhandzu ku fana na Yesu?

Yesu a a va rhandza hintamu vadjondzisiwa va yena, lakakuva a a va vona na va li va ndjangu wa yena. (Lerha Marku 3:35.) Hi ku fana, Timboni ta Yehovha i ndjangu wun’we lowu twananaka misaveni hinkwayu, hi mhaka leyo hinkwerhu hi vamakwerhu. (Filimoni 1, 2) Nakambe hi yingisa nawu lowu nge: “Rhandzani vamakwerhu hinkwavu.” (1 Pedru 2:17) Timboni ta Yehovha ti kombisa lirhandzu hi tindlela ta ku hambanahambana, ta ku fana ni ku pfuna vamakwerhu va misava hinkwayu loko va lava ku pfuniwa.

DJONDZA SWIN’WANA

4. Hi kholwa leswi swi nga ka Bibele

Yehovha a vule swaku a hi ta twisisa ntiyiso lowu nga ka Bibele. Lerhani Daniyele 12:4, mi gama mi bula hi swivutiso leswi landzelaka:

• I mpsini leswi a swi ta yentxeka loko vanhu va Xikwembu va ya va kambisisa Bibele?

Vona leswi vadjondzi van’wana va Bibele ku patsa na Charles Russell a va li djondzisa swona Rito la Xikwembu. Sixtirani VHIDIYO, mi gama mi bula hi xivutiso lexi landzelaka.

VHIDIYO: A Ntiyiso Wa Bibele Wu Tlhele Wu Kumiwa (7:45)

• Ka vhidiyo leli, Charles Russell ni Vadjondzi van’wana va Bibele a va li djondzisa ku yini Bibele?

Indje a wu swi tiva?

Minkama yin’wana ha yampsisa leswi hi swi kholwaka. Hi mhaka muni? Hikusa Xikwembu xi hi pfuna ku twisisa ntiyiso lowu nga ka Bibele hi kutsongokutsongo, ku fana ni loko dlambu li ya li voninga hi kutsongokutsongo. (Lerha Swivuriso 4:18.) I ntiyiso swaku Bibele a li txintxi kambe loko hi ya hi swi twisisa ku yampsa leswi li swi vulaka hi yampsisa leswi hi swi kholwaka.

5. Hi hanya hi ku yelana ni leswi vito la hina li vulaka swona

VHIDIYO: Vito Leli Hi Fanelaka (2:40)

• Hi mhaka muni vito leli nge Timboni ta Yehovha li hi fanela?

Hi mhaka muni Yehovha a lange vanhu swaku va va timboni ta yena? A va langile hikusa a va ta kombisa swaku hi yena Xikwembu xa ntiyiso, hikusa vanhu va vulavula mavunhwa hi yena. Vona mavunhwa mambirhi lawa va ma vulaka.

Wukhongeli lin’wana li djondzisa vanhu va lona swaku va fanele va tirhisa swifaniso loko va gandzela Xikwembu, kambe swoleswo i ntiyiso? Lerhani Levhitika 26:1, mi gama mi bula hi swivutiso leswi landzelaka:

• I ntiyiso swaku Xikwembu xi lava hi xi gandzela hi ku tirhisa swifaniso? Yehovha a titwisa ku yini loko hi tirhisa swifaniso?

Vafundhisi van’wana va djondzisa swaku Yesu i Xikwembu, kambe swoleswo hi ntiyiso? Lerhani Yohani 20:17, mi gama mi bula hi swivutiso leswi landzelaka:

• Yesu ni Xikwembu i munhu mun’we?

• U titwisa ku yini hi ku tiva swaku Yehovha a rhume Timboni ta yena swaku ti chumayela ntiyiso hi yena ni N’wana wa yena?

6. Ha rhandzana

Bibele li fananisa Vakreste ni swirho wa miri wa munhu. Lerhani 1 Vakorinto 12:25, 26, mi gama mi bula hi swivutiso leswi landzelaka:

• Vakreste va ntiyiso va fanele va yentxa yini loko vamakwerhu va hlupheka?

• U vone yini ka lirhandzu leli Timboni ta Yehovha ti nga na lona?

Loko Timboni ta Yehovha ta tiko lin’wana ti hlupheka Timboni ta Yehovha ta misava hinkwayu ti ti pfuna hi ku hantlisa. Swaku u vona xikombiso, sixtirani VHIDIYO. Mi gama mi bula hi xivutiso lexi landzelaka.

VHIDIYO: Xidzedze Lexi Xi Vuliwaka Matthew Xi Hlasele Tiko La Haiti (5:29)

• Timboni ta Yehovha ti li kombisisa ku yini lirhandzu loko ku humelela tinghozi?

LESWI HI NGA SWI DJONDZA

Timboni ta Yehovha i Vakreste va ntiyiso. Hi ndjangu wa misava hinkwayu lowu gandzelaka Xikwembu hi ku tirhisa Bibele, hi tlhela hi djondzisa ntiyiso hi Yehovha ka vanhu van’wana.

Ku kambela leswi hi nga swi djondza

• Hi mhaka muni hi ni vito leli nge Timboni ta Yehovha?

• Hi li kombisa ku yini lirhandzu?

• U vona swaku Timboni ta Yehovha i Vakreste va ntiyiso?

LOKO U LAVA KU TIVA SWIN’WANA

Vona swin’wana hi leswi swi nga hi yentxekela.

Timboni Ta Yehovha — Ti Ni Lipfumelo, Xiyenge 1: Ku Huma Ka Munyama (1:00:53)

Vona tidjondzo tin’wana ta mavunhwa leti ti nga tsumbuliwa hi Timboni ta Yehovha.

Vanhu Va Xikwembu Va Dzunisa Vito La Xona (7:08)

Vona tinhlamulu ta swivutiso leswi vanhu van’wana va tolovelaka ku swi yentxa hi Timboni ta Yehovha.

“Swivutiso Leswi Vanhu Va Tolovelaka Ku Swi Yentxa Hi Timboni Ta Yehovha” (Pajina la site la jw.org)

Stephen a a nyenya vanhu va lixaka lin’wana naswona a a lwisana na vona. Vona swaku a txintxe hi mhaka muni nkama a nga tiva Timboni ta Yehovha.

“Vutomi Bya Mina A Byi Ya Byi Nyanya Ku Biha” (Murindzi wa 1 ka Julho wa 2015 hi Xitsonga)