Mareferensiya ya Xibukwana xa Minhlanganu ya Mahanyelo ni Ntirhu
5 KUYA KA 11 KA MARÇO
XUMA XINGA KA RITU LA XIKWEMBU | MATEWU 20-21
“Mani na Mani Lweyi Alavaka Kuva Lwenkulu Axikarhi ka N’wina Afanele Kuva Mutirheli wa N’wina”
xifanisu ka nwtsty
Ndhawini ya vuxaviselo kumbe bazara
Mabazara man’wana, yofana ni lelikombiwaka ka xifanisu lexi, amakumeka switaratwini. Ndlela leyi vaxavisi avaveka ha yona swilo leswi avaswixavisa ayinonon’wisa mafambela. Swin’wana swa swilo leswi aswixavisiwa akuli swibya leswitirhisiwaka makaya, swibya leswiyendliweke hi vumba, swibya swa kudurha leswiyendliweke hi vhidru ni matsavu kumbe mihandzu leyahakukhayiwaka masin’wini. Tani hi leswi nkameni lowuya akungali ni majelera, vanhu avasindziseka kuya bazara siku ni siku. Loko vali seniya, avatolovela kutwa mahungu ka vaxavisi kumbe vaxavi van’wana; Aswitolovekile kukuma vatsongwana vali kutlangeni kumbe vanhu lavapfumalaka mintirhu vali karhi vanyimela kutholiwa. Yesu ahanyise munhu abazara naswona Pawulo achumayele kona. (Min 17:17) Kuhambana na vona, vatsali ni Vafarisi lava avatibyela avarhandza kuvoniwa ni kuxowetiwa hi vanhu atindhawini tofana ni leti.
minhlamuselu yodjondza ha yona ka nwtsty ya Matewu 20:20, 21
Mamani wa vana va Zebediya: Kuvuliwa mamani wa vapostola Yakobo na Yohane, lweyi swingayendlekaka ave titiya wa Yesu. Hikuya hi wurunguli la Marka, vapostola lava hi vona vangatshinelela Yesu. Hambileswi kunga mamani wa vona Salome avakombelelaka, xikombelo lexi xita hi ka vona. — Mt 27:55, 56; Mr 15:40, 41; Yh 19:25.
un’wana avokweni la wena la xinene un’wanyana ka lela ximatsi: Maritu lawa mayimela switshamu ni matimba ya kulawula, kambe kutshama xineneni kuyimela xitshamu lexihlawulekeke ngopfu. — Ps 110:1; Min 7:55, 56; Rhm 8:34.
minhlamuselu yodjondza ha yona ka nwtsty ya Matewu 20:26, 28
mutirheli: Makhambi manyingi, Bibele litirhisa ritu la Xigriki lelinge di·aʹko·nos leswaku likombetela ka munhu lweyi angakarhaliki kutitsongohatela kutirhela van’wana. Latirhisiwa loko kuvulavuliwa hi Yesu (Rhm 15:8), hi vatirheli va Kreste (1Ko 3:5-7; Kl 1:23) hi vapfunisi va madoda (Flp 1:1; 1Ti 3:8), hi switirhi (Yh 2:5, 9) ni hi vatirheli va mfumu (Rhm 13:4).
Lavetela Xuma xa Moya
minhlamuselu yodjondza ha yona ka nwtsty ya Matewu 21:9
hakonghela, akuponisiwe: Hi kukongoma livula “Hozana”. Ritu la Xigriki lelihundzuluxeliweke liva “Hozana”, lita hi ka lin’wana la Xiheveru lelivulaka “akuponisiwe, hakhongela” kumbe “akuponisiwe, hakombela”. Ka ndzimana leyi litirhiseliwa kukhongotela Xikwembu leswaku xiponisa kumbe kupfuna kuhlula; lingahahlaya leswi: “hakombela, ponisa . . . ” Hi kufamba ka nkama lisungule kutirhisiwa loko kukhongeliwa kumbe kudzunisiwa Yehovha. Hi Xiheveru, ritu leli likumeka ka Tipisalema 118:25, kunga yin’we ya Tipisalema ta Hallel, leyi ayiyimbeleliwa hi nkama wa Paseka. I xivangelo xolexo xingayendla leswaku mata miyanakanywini ya lavangamavula ka nkama wolowo. Xikwembu xihlamule xikombelo xoponisa N’wana wa Davhida hi kumupfuxa kufeni. Ka Matewu 21:42, Yesu atsahe Tipisalema 118:22, 23 atlhela ahlamusela leswaku ayihetiseka ka Mesiya.
N’wana wa Davhida: Kuva vatirhise maritu lawa swikomba leswaku avakholwa leswaku Yesu aali wa lixaka la Davhida ni leswaku yena aali Mesiya.
jy paj. 244 par. 4-6
Nsinya wa Nkuwa Wutirhiseliwa Kudjondzisa Mhaka ya Lipfumelo
Hayini Yesu awomise nsinya wa nkuwa? Ahlamusele xivangelo xa kona loko aku: ‘Nitiyisile nili ka n’wina, loko ntsena mili ni lipfumelo naswona mingakanakani, amingeyendli leswi niswiyendleke ka nkuwa lowu ntsena, kambe niloko mobyela ntshava leyi miku, ‘Simuka utihoxa elwandle,’ switayendleka. Kutani swilo hinkwaswu leswi miswikombelaka hi xikhongelo mili ni lipfumelo, mitaswikuma.’ (Matewu 21:21, 22) Hi kuvula maritu lawa, aali karhi aphindha leswi aaswivulile masikundzhaku malunghana ni kuva ni lipfumelo lokota kurhurhisa ntshava. — Matewu 17:20.
Hikolaho, hi kuwomisa nsiya wa nkuwa, Yesu aalava kudjondzisa valandzeli vakwe a xilaveko xa kuva ni lipfumelo ka Xikwembu. Avule aku: ‘swilo hinkwaswu leswi miswikhongelelaka ni kuswikombela, vanani ni lipfumelo la leswaku ana se miswiyamukelile hi xiviri, kutani mitaswikuma.’ (Marka 11:24) Hakunene leyi i djondzo ya lisima ka vadjondzisiwa hinkwavu va Yesu! Djondzo leyi yifike hi nkama ka vapostola va Yesu tani hileswi avatatlhangana ni swikarhatu swikulu. Ku ni kuyelana kun’wana axikarhi ka kuwomisiwa ka nsinya wa nkuwa ni lipfumelo.
Kufana ni nsinya lowu wa nkuwa, tiku la Israyele ali ni wukanganyisi. Vanhu va tiku leli avali ka wuxaka la ntwanano ni xikwembu naswona avatikomba ingi valandzela minawu ya xona. Hambiswilitanu, tiku hinkwalu litikombise lipfumala lipfumelo ni mihandzu leyinene. Vatiye vayala N’wana wa Xikwembu! Hi kuva awomise nsinya wa nkuwa, lowu awungaveki mihandzu, Yesu aakombisa leswi aswitahumelela ka Vaisrayele hikwalaho ka kukala kuveka mihandzu ni kupfumala lipfumelo ka vona.
12 KUYA KA 18 KA MARÇO
XUMA XINGA KA RITU LA XIKWEMBU | MATEWU 22-23
“Yingisa Minawu Yimbirhi Leyinga Yikulu Kutlula Hinkwayu”
minhlamuselu yodjondza ha yona ka nwtsty ya Matewu 22:37
mbilu: Hi ndlela yofanekisela, hakanyingi ritu lelinge mbilu livula leswi munhu anga xiswona ndzenindzeni. Loko litirhisiwa swin’we ni maritu lamange “moya-xiviri” ni ‘miyanakanyu’, li ni nhlamuselu wa lona loxe. Lingavula ndlela leyi munhu atitwaka hi yona kumbe swilo leswi aswinavelaka. Maritu lamanharhu (mbilu, moya-xiviri ni miyanakanyu) ama na hlamuselo lowuhambaneke ngopfu, kambe matirhisiwa hi wunharhu ka wona leswaku makombisa xilaveku lexikulu xorhandza Xikwembu hi kuhelela.
moya-xiviri: Kumbe “swilo hinkwaswu leswivumbaka munhu.”
miyanakanyu: kumbe matimba ya kupimisa. Munhu afanele atirhisa matimba yakwe ya kupimisa leswaku adjondza hi Yehovha ni kukulisa lirhandzu lakwe hi yena. (Yh 17:3, Nhlamuselo ya le hansi ka nwt; Rhm 12:1) Matsalwa ya Xiheveru matirhisa maritu lamange ‘mbilu, moya-xiviri ni matimba’ ka buku ya Deterenoma 6:5. Hambiswilitanu, loko Matewu atshaha maritu ya ndzimana leyi ka buku yakwe, angatirhisanga ritu lelinge “matimba” kambe atirhise ritu lin’wana la Xigriki lelihundzuluxeliwaka liva ‘miyankanyu’. Ku ni swivangelo swinyingi leswingahavaka swiyendle leswaku kutirhisiwa maritu lamahambaneke. Xivangelo xosungula kungahava hileswi Xiheveru xa khale axingali na ritu leli hi kukongoma livulaka “miyanakanyu”. Hambiswilitanu, nhlamuselo wa lona awukatsiwa ka ritu la Xiheveru lelinge “mbilu”, lelifanekiselaka leswi munhu anga swona ndzeni, kukatsa ni ndlela leyi atitwaka ha yona, leswi aswipimisaka, leswimususumetelaka kuyen dla swilo ni mavonela ya yena. (Dt 29:4; Ps 26:2; 64:6; Vona minhlamuselu yodjondza ha yona ya ndzimana leyi, leyivulavulaka hi mbilu.) Hikola ka leswo, lomu matsalwa ya Xiheveru matirhisaka ritu lelinge “mbilu”, matsalwa ya Xigriki lamavitaniwaka Septuagint matolovela kutirhisa ritu la Xigriki lelinga ni mongo lowufananka ni ‘miyankanyu’. (Gn 8:21; 17:17; Swiv 2:10; Esa 14:13) Xivangelo xin’wana lexingahavaka xiyendle Matewu atirhisa ritu la Xigriki lelihundzuluxeliwaka ‘miyanakanyu’ matshan’wini ya “matimba”, kungahava hileswi ritu la Xiheveru lelihundzuluxeliwaka “matimba [kumbe “matimba ya wutomi”, Nhlamuselo ya le hansi ka nwt]” lingahavaka ni minhlamuselo yimbirhi. Lingahavula ntamu lowu munhu anga na wona kumbe wuswikoti loyanakanyisisa. Hambileswi hingaxitiviki xivangelo xova kutirhisiwa maritu lamahamabaneke, mongo wa wona wahipfuna kutwisa leswiyendleke vatsali va Tiyevangeli vatirhisa maritu lamahambaneke loko vatshaha Deteronoma 6:5.
minhlamuselu yodjondza ha yona ka nwtsty ya Matewu 22:39
Xa wumbirhi: Nhlamulu yokongoma leyinyikeliweke hi Yesu ka Vafarisi yitsaliwile ka buku la Matewu 22:37. Hambiswilitanu, ayengetele swin’wana kutlula leswi avutisiweke hi kutshaha nawu wa wumbirhi. (Lv 19:18) Hi kuyendla leswo, akombise leswaku aswingekoteki kuvulavula hi wun’we ungapatsanga lowun’wana hikuva minawu leyimbirhi i tshinya la matsalwa hinkwawu ya Xiheveru. — Mt 22:40.
Walikwenu kumbe munhukuloni: Ritu la Xigriki lelihundzuluxeliwaka “walikwenu kumbe munhukuloni”, leli hi kukongoma livulaka “muyakelani”, lipatsa vanhu hinkwavu lava munhu atirhisanaka na vona, kungali vayakelani ntsena — Lk 10:29-37; Rhm 13:8-10.
minhlamuselu yodjondza ha yona ka nwtsty ya Matewu 22:40
Nawu . . . Vaprofeta: Ritu lelinge “Nawu” liyimela mabuku ya Genesa kuya ka Deteronoma, kasi a ritu lelinge “Vaprofeta” liyimela mabuku hinkwawu ya wuprofeta ya Xiheveru. Hikolaho, loko maritu lamambirhi mapatsiwa mayimela Matsalwa hinkwawu ya Xihevreu. — Mt 7:12; 22:40; Lk 16:16.
swititshege: Ka ndzimana leyi, a ritu la Xigriki leli hi kukongoma livulaka “kutitshega” litirhisiwa hi ndlela yofanekisela, kuvula “kuseketeliwa”. Hi ndlela leyi, Yesu akombise leswaku matsalwa hinkwawu ya Xiheveru maseketeliwe ka lirhandzu. — Rhm 13:9.
Lavetela Xuma xa Moya
minhlamuselu yodjondza ha yona ka nwtsty ya Matewu 22:21
swilo swa Khezari eka Khezari: ka nhlamulu leyi ya Yesu ni ka wurunguli leliyelanaka la Marka 12:17 na Luka 20:25, kova kola ntsena kuvulavuliwaka hi mufumi lweyi wa Murhoma. Swilo swa Khezari swipatsa kuhakela rhesa, kukomba xichavu lexipimiweke ni kutitsongohata ka lavanga ni wulawuli. — Rhm 13:1-7.
swilo swa Xikwembu eka Xikwembu: leswi swipatsa wugandzeli leliheleleke lihumaka hi le ndzenindzeni ka mbilu, kurhandza Yehovha hi matimba ya hina hinkwawu ni kumuyingisa hi kuhelela. — Mt 4:10; 22:37, 38; Min 5:29; Rhm 14:8.
minhlamuselu yodjondza ha yona ka nwtsty ya Matewu 23:24
lavawungulaka nyonyorhi kumbe nsuna kambe vamintaka kamela: Ka swihari swa kunyama leswi aswitiviwa hi Vaisrayeli, a tinsuna atili ka ntlawa wa swiharhi leswitsanana kasi makamela amali ka ntlawa wa swiharhi leswikulu ngopfu. (Lv 11:4, 21-24) Yesu avulavula hi ndlela yofanekisela aku a varhangeli va wukhongeli vahluta swilu leswi vaswiphuzaka leswaku hi kuya hi Nawu, vanganyamisiwe hi nsuna. Hi tlhelo lin’wana, avangahloniphi timhaka letikulu ta Nawu, leswi aswifananisiwa ni kuminta Kamela.
19 KUYA KA 25 KA MARÇO
XUMA XINGA KA RITU LA XIKWEMBU | MATEWU 24
“Tshama Uhitekile Amasikwini Lawa ya Wugamu”
it-1-T paj. 120 par. 9
Lirhandzu
lirhandzu la votala litahola. Loko Yesu adjondzise vadjondzisiwa vakwe hi swilo leswi aswitayendleka, akombise leswaku a lirhandzu (a ga’pe) la vanyingi lava avatibyela leswaku vakholwa ka Xikwembu alitahola. (Mt 24:3, 12) Mupostola Pawulu avule leswaku ka masiku ya wugamu lawa amahatafika, a vanhu avatava “varhandzi va male”. (2Tm 3:1, 2) Kutani swakoteka ku munhu atshika kuhanya hi matshinya ya minawu naswona atshika lirhandzu lelinene lihola. Leswi swikombisa leswaku i swinene kuyanakanyisisa hi matshinya ya minawu ya Ritu la Xikwembu ni kuhanya mayelanu na wona leswaku hikulisa lirhandzu la hina ka Xikwembu hitlhela hilikombisa awuton’wini la hina. — Ef 4:15, 22-24.
w99 11/15 paj. 19 par. 5
Xana Watihetisisa Tinfanelo ta Wena Hinkwatu ka Xikwembu?
Malunghana ni masiku ya wugamu, Yesu avule aku: “Hikuva hilaha masiku ya Nowa amali ha kona, ni masiku ya wukona la N’wana wa munhu matava tanu. Hikuva kukota leswi avali xiswona amasikwini wolawo ya le mahlweni ka ndhambi, vadya, vanwa, vavanuna vateka ni vavasati vahlomisiwa kumbe kuchadisiwa, kufikela siku leli Nowa angheneke ha lona angalaveni; nileswi vangalemukangiki nchumu kufikela loko ndhambi yifika yivakukula hinkwavu, switava tanu ni hi wukona la N’wana wa munhu.” (Matewu 24:37-39) Aswihoxanga kudya ni kunwa loko munhu apimela, naswona muchadu i lulamiselo la Xikwembu. (Genesa 2:20-24) Kambe loko hivona leswaku hitikarhatela ntsena hi mintirhu ya siku ni siku, hifanela hikhongela hi mhaka leyi. Yehovha angahipfuna kurhangisa Mfumu wakwe, kuyendla leswinene ni kuhetisisa tinfanelo ta hina ka yena. — Matewu 6:33; Varhoma 12:12; 2 Vakorinto 13:7.
jy paj. 259 par. 5
Vapostola Vakombela Xikombisu
Yesu avula leswaku vadjondzisiwa vatafanela kutshama vaxalamukile, vatshama vahitekile ni kutshama valunghile. Leswaku avakomba lisima la xitsundzuxu lexi, avabyela xifanisu xin’wana lexinge: “Kambe tivani nchumu wun’we, leswaku loko n’wini wa yindlu aativa nkarhi lowu khamba alitata ha wona, aatava ahitekile angapfumelanga leswaku yindlu ya yena yingheneliwa. Hikwalaho na n’wina tshamani milunghekile, hikuva N’wana wa munhu atata hi nkarhi lowu mingawuyehleketiki.” — Matewu 24:43, 44.
Lavetela Xuma xa Moya
minhlamuselu yodjondza ha yona ka nwtsty ya Matewu 24:8
switlhavi swa maxangu: Hi Xigriki, a ritu leli hi kukongoma lihlamusela kuvava lokukulu loku wansati akutwaka loko aphuluka. Lana litirhisiwa kuvula kukarhateka, kuvava ni muxaka hinkwawu wa mahlomulu. Kambe lingahavula leswaku loko nhlomulu lowukulu wuvuliwaka ka Matewu 24:21 wungasefika, a kukarhateka ni maxangu switaya swiyengeselana. Leswi swifana ni loko wansati alava kuphuluka; a kuvava loku akutwaka kuya kuyengeselana.
minhlamuselu yodjondza ha yona ka nwtsty ya Matewu 24:20
hi wuxika: aswitakarhata kuyendza, kukuma swakudya ni ka kutshama hikolaho ka mpfula leyikulu, ndhambi ni xirhami. — Ezr 10:9, 13.
hi siku la Savata: Amigangeni yofana ni Yudiya aswitatika kuva munhu afamba mpfhuka woleha ni kurhwalarhwala minchumu, naswona tinyangwa ta doropa atipfaliwa hikolaho ka swinawanawani leswi aswifambisana ni siku la Savata. — Vona Min 1:12 ni Xibukwana Xo Pfuneta Ku Djondza Rito La Xikwembu, ka xiyenge 16-A.
26 KA MARÇO KUYA KA 1 KA ABRIL
XUMA XINGA KA RITU LA XIKWEMBU | MATEWU 25
“Tshamani Mirindzile”
Lavetela Xuma xa Moya
w15 15/3 paj. 26 par. 7
Seketela Vamakwavu va Kreste hi Kutshembeka
Namuntlha hixitwisisa kahle xifanisu xa timbuti ni tinyempfu. Malungana ni lava kuvulavuliweke hi vona, Hosi Yesu hi yena anga “N’wana wa Munhu”. Lavavitaniweke “vamakwerhu”, kuvuliwa vavanuna ni vavasati lavangatotiwa hi moya wokwetsima leswaku vayafuma na Yesu hi le matilweni. (Rhm. 8:16, 17) A ‘tinyempfu’ ni “timbuti” tiyimela vanhu va matiku hinkwawu, lava ku avatotiwanga hi moya wokwetsima. A Nkama wa kuyavanyisiwa wutafika lini xana ke? Vanhu vatayavanyisiwa kuheleni ka nhlomulu lowukulu lowu se wunga kusuhi. Kutava xihi xivangelo xa kuyavanyisiwa tani hi nyempfu kumbe tani hi mbuti? Kutaya hi leswi munhu angatava aswiyedlile ka vamakwavu lavatotiweke va Kreste, lavahasaleke amisaveni. Hatsaka hi leswi Yehovha angahipfuna kutwisisa katsongotsongo xifanisu lexi ni leswiyelanaka swinga ka Matewu 24 ni 25, hikuva misava leyi yitahela swoswinyana!
w09 15/10 paj. 16 par. 16-18
“N’wina Mi Vanghanu va Mina”
Wena unga ni ntshembo wa kuhanya amisaveni na ufumiwa hi mfumu wa Xikwembu, ungavaseketelisa kuyini vamakwavu va Yesu? Ahivoni swilo swinharhu leswi ungaswiyendlaka. Xa kusungula, chumayela mahungu lamanene hi mbilu ya wena hinkwayu. Yesu arhume vamakwavu leswaku vachumayela amisaveni hinkwayu. (Mat. 24:14) Kambe namuntlha, vamakwavu va Yesu lavahasaleke amisaveni, avangeswikoti kuyendla ntirhu lowu lowukulu hi voxe. Hi kakunene, loko tinyempfu letin’wana tichumayela, tivapfuna kuyendla ntirhu wa vona wokwetsima. Kufana na Yesu Kreste, Ntlawa wa Nandza Wotshembeka ni Wotlhariha wutlangela swinene hi mbilu nseketelo lowu.
Xa wumbirhi, seketela ntirhu wa kuchumayela hi kuhumesa minyikelo. Yesu akhutazile vadjondzisiwa vakwe kutirhisa ‘lifuwu lelingalulamangiki’ leswaku vatiyendlela vanghanu. (Luka 16:9) Leswi aswivuli leswaku hingaxava wunghana la Yehovha na Yesu. Kambe loko hiseketela Mfumu wa Xikwembu hi kutirhisa male ya hina kumbe swilo swin’wana leswi hinga na swona, hikomba wunghanu ni lirhandzu la hina ka vona “hi swiendlo ni ntiyiso”, kungali hi maritu ntsena. (1 Yohane 3:16-18) Swoleswo hiswiyendla loko hichumayela, hihumesa minyikelo leswaku hipfuna kuyaka ni kuhlayisa tindhawu ta wugandzeli ni ntirhu wa kuchumayela amisaveni hinkwayu. Hambi minyikelo ya hina yili yinyingi kumbe yitsongo, loko hinyikela na hitsakile, Yehovha na Yesu vayitsakela. — 2Ko. 9:7
Xa wunharhu, pfumela kukongomisiwa hi madoda abandleni. Madoda lawa mavekiwe hi moya wokwetsima lowukongomisiwaka hi Yesu. (Ef. 5:23) Mupostola Pawulu ate: ‘Yingisani lavarhangelaka axikarhi ka n’wina naswona mititsongohata’. (Hv. 13:17) Kambe leswi hivonaka swihoxo swa madoda ya bandla, un’wani nkama, hingasungula kumasola loko mahilaya ivi swihikarhatela kumayingisa. Hambiswilitanu, Yesu Kreste, anga Nhloko ya bandla, waswitsakela kutirhisa vavanuna lava, vokala kuhetiseka. Kutani leswi hiyangulisaka xiswona loko hilayiwa hi madoda abandleni swingayendla leswaku hiva vanghanu va Yesu kumbe hiva valala. Hikomba leswaku hamurhandza Kreste loko hirivalela swihoxo swa madoda hitlhela himayingisa na hitsakile.