Djondzisa Vana Va Wena Hi Ku Tirhisa Leswi Yehovha A Nga Swi Yendla

 1. I mpsini leswi vapsali va swi lavaka hintamu?

VAPSALI, ha swi tiva swaku mi swi lava hintamu ku pfuna vana va n’wina swaku va mu tiva va tlhela va mu rhandza Yehovha. Kambe leswi yena a nga munhu lweyi a nga ni muzimba wa ku kala wu nga voneki, i mpsini mi nga swi yendlaka kuva mi pfuna vana va n’wina kuva va swi vona swaku yena i munhu wa hikakunene va tlhela va va vanghanu va yena? — Yak. 4:8.

 2. Vapsali va nga va djondzisisa ku yini vana va vona hi wumunhu la Yehovha?

² Nchumu wa lisima lowu vapsali va nga wu tirhisaka swaku va pfuna vana va vona ku va kusuhi na Yehovha, i ku djondza Bibele na vona. (2 Tim. 3:14-17) Kambe Bibele li tlhela li vulavula hi nchumu wun’wani lowu vapsali va nga wu tirhisaka leswaku va djondzisa vana va vona hi Yehovha, ku nga ntumbuluku. Ka buku la Swivuriso ku vulavuliwa hi mupsali lweyi a byelaka n’wana wa yena leswaku a nga rivali wumunhu la Yehovha, leli hi nga li vonaka ka ntumbuluku. (Swi. 3:19-21) Se ka djondzo leyi, hi ta vona tindlela tin’wani leti vapsali va nga tirhisaka hi tona ntumbuluku swaku va djondzisa vana va vona hi Yehovha.

 3. Vapsali va nga va pfunisa ku yini vana va vona?

³ Bibele li hlaya swaku ‘wumunhu la Xikwembu la ku kala li nga voneki, matimba ya xona ya ku kala ma nga heli ni leswaku xona i Xikwembu hikakunene, swa voniwa ka minchumu leyi xi nga yi yentxa.’ (Rom. 1:20) Se ha tiyiseka swaku n’wina vapsali ma swi rhandza ku huma mi famba mi beliwa hi moya ni vana va n’wina. Se, tirhisani nkama wolowo kuva mi pfuna vana va n’wina va djondza hi wumunhu la Yehovha ka leswi va swi vonaka. Naswona ka mhaka leyi hi ta vona swaku mi nga djondza yini ka xikombiso xa Yesu.

 4. Yesu a swi tirhisise ku yini leswi Yehovha a nga swi yendla kuva a djondzisa vadjondzisiwa va yena? (Luka 12:24, 27-30)

⁴ Khambi lin’wani Yesu Kreste a tirhise swinyenyani leswi vitaniwaka matlhugwani ni swiluva leswi vitaniwaka makhon’wa kuva a djondzisa vadjondzisiwa va yena a mhaka ya lisima swinene. (Lerha Luka 12:24, 27-30.) Hi mhaka muni Yesu a tirhise swilo leswi? Hi mhaka lava a va mu yingisa a va swi tiva kahle swilo leswi naswona swi nga yendleka nkama lowu a a vulavula na vona a ku ni matlhugwani lawa a ma haha henhla funtshi ka ndhawu leyi a va li ka yona a ku ni swiluva. Se Yesu Kreste a vulavule na vona, swi nga yendleka na a swi kombetela swilo leswi. Kambe i mpsini leswi yena a a lava ku va djondzisa swona? A a lava ku va djondzisa swaku leswi Yehovha a swi hlayisaka swiluva leswiya a tlhela a hlayisa matlhugwani lawaya, a a nga ta tsandzeka kuva a va hlayisa vona vanhu lava va mu tirhelaka.

 5. I minchumu yini leyi vapsali va nga yi tirhisaka swaku va djondzisa vana va vona hi Yehovha?

⁵ Vapsali, mi nga mu tekelelisa ku yini Yesu Kreste nkama mi djondzisaka vana va n’wina ke? Mi nga mu tekelela hi ku byela vana va n’wina minchumu leyi mi yi rhandzaka ka leswi Yehovha a nga swi yendla. Hi xikombiso, mi nga va byela xiharhi lexi mi xi rhandzaka kumbe planta leli mi li rhandzaka. Mi nga tlhela mi va byela swaku xiharhi xolexo kumbe planta lolelo li mi djondzisa yini hi Yehovha. Loko se mi yendle leswo mi nga gama mi va vutisa swaku hi lini planta leli vona va li rhandzaka kumbe xiharhi lexi vona va xi rhandzaka. Phela loko mi tirhisa planta kumbe xiharhi lexi vana va n’wina va xi rhandzaka swi ta va vevukela swaku va mi yingisela nkama mi va tlhamuselaka swaku leswo swi va djondzisa yini hi Yehovha.

 6. Hi nga djondza yini ka xikombiso xa mamani wa Christopher?

⁶ A swi bohi kuva vapsali va djondza hintamu hi xiharhi kumbe planta leli va lavaka ku li tirhisa swaku va djondzisa vana va vona hi Yehovha. Hambi Yesu a nga tlhamuselanga swaku swinyenyani leswi vitaniwaka matlhugwani a swi dlisa ku yini ni leswaku swiluva leswi vitaniwaka makhon’wa a swi kulisa ku yini. A yo va komba ntsena swilo leswiyani a gama a va byela leswi va nga swi djondzaka hi Yehovha. Se swa fana na n’wina vapsali, a swi lavi mi tlhamusela swilo swa ku tala, hambileswi minkama yin’wanyani vana va n’wina va nga ha lavaka ku tiva minchumu ya ku yenta. Kambe ku vula nchumu wun’we wawutsongo ntsena kumbe ku hamba swivutiso swa yenela. Hi xikombiso, twana leswi Christopher a swi vulaka hi leswi mamani wa yena a a tirhisa leswi Yehovha a nga swi yendla swaku a va djondzisa hi Yehovha nkama a va ha li vatsongo. Yena a li: “Loko hi li kusuhi ni tintshava, mamani a a tolovela ku hlaya a ku: ‘Wa ti vona tintshava letiya! I tikulu funtshi ti xongile haswo? Swi kombisa swaku Yehovha wa hlamalisa haswo?’ Loko hi li kusuhi ni lwandle a a vula leswi: ‘Wa ma vona magandlati lawaya, wa wu vona ntamu lowu lwandle li nga na wona? Yehovha a ni ntamu haswo?’ Marito lawayani yamatsongo ma hi khumbe mbilu swinene.”

 7. U nga mu pfunisa ku yini n’wana wa wena swaku yena hi yexe a djondza hi Yehovha ka ntumbuluku?

⁷ Nkama lowu n’wana wa wena a ya ka a kula, u nga ha mu pfuna swaku yena hi yexe a djondza hi wumunhu la Yehovha hi ku va a txuvukisela ka ntumbuluku. U nga ha bula ni n’wana wa wena hi nchumu xin’we lexi Yehovha a nga xi yendla, u gama u mu vutisa swaku i mpsini leswi yena a swi djondzaka hi Yehovha. Nkama lowu u mu yingiselaka loko a ku hlamula u nga ha hlamalisiwa hi tinhlamulu ta yena. — Mat. 21:16.

 8. Vayisrayele lava a va li vapsali, a va pfulekeliwe hi nkama wa ku yendla yini loko va yendza ni vana va vona?

⁸ Ankameni wa Vayisrayele, Yehovha a a byele vapsali swaku va fanele va djondzisa vana va vona hi minawu ya Yehovha ‘loko va famba.’ (Det. 11:19) Ka tindlela tinyingi leti a ti li kona aIsrayele, a ku tale hi swiharhi ni swiluva swa ku hambanahambana. Se a nkama lowu vapsali a va yendza, va famba lomu va ya ka kona, loko va hundza hi tindlela toleto a va ni nkama wawunene wa ku va va djondzisa vana va vona hi ku tirhisa swilo leswi a va swi vona. Na n’wina vapsali, mi nga tirhisa swiyimu swa ku fana ni leswi swaku mi djondzisa vana va n’wina hi Yehovha. A hi voneni swikombiso swa vapsali van’wani lava va nga zama ku yendla swoleswo.

 9. U djondza yini ka xikombiso xa makwerhu Punitha na Katya?

⁹ Makwerhu Punitha lweyi a nga mamani naswona a tshamaka ka doropa lalikulu aÍndia, a li: “Hi ni maxaka ma tshamaka antlhaveni, se loko hi ya hi ya ma pfuxela, hi vona wu li nkama wawunene wa ku va hi pfuna vana va hina ku djondza hi Yehovha hi ku txuvukisela ntumbuluku. Ni tsumbule swaku vana va mina va swi twisisa kahle leswi Yehovha a nga swi yendla loko va nga li lomu doropeni ka ku tala hi mimovha ni vanhu.” Vapsali, vana va n’wina swi nga yendleka va nga wu khohlwi nkama lowu mi wu hetaka na vona na mi beliwa hi moya ka ndhawu ya ku xonga. Makwerhu Katya wa le Moldávia a li: “Hinkwaswu leswi ni nga swi hanya awutsongwanini la mina ka wutomi la mina, leswi ni kalaka ni nga swi khohlwi anze swoswi, i nkama lowu ni nga wu heta ni vapsali atintlhaveni. Na va khensa hileswi va nga ni djondzisa hi lisima la ku va ni nyima ni txuvukisela leswi Yehovha a nga swi yendla ni ku vona swaku swona swi ni djondzisa yini hi yena.”

10. I mpsini leswi vapsali va nga swi yendlaka loko swi va karhatela ku yendza va ya ka ndhawu yin’wani? (Vona kwadru leli nge: “Leswi Nga Pfunaka Vapsali.”)

¹⁰ I mpsini leswi u nga swi yendlaka loko ku li swaku a swi ku vevukeli kuva u yendza u ya ka ndhawu yin’wani leyi vana va wena va nga kotaka ku vona minchumu yayinyingi leyi Yehovha a nga yi yendla? Amol lweyi a tshamaka Índia a vula leswi: “Lomu hi tshamaka kona, vapsali va tirha mawora yamanyingi, ku yendza u ya ka ndhawu yin’wanyani swa dura. Hambileswo hi tolovela ku nyima hala henhla ka prediyu kumbe hi ya ka ndhawu leyi nga ni jardim la ku xonga lani vana va hina va swi kotaka ku vona minchumu leyi Yehovha a nga yi yendla ivi va djondza hi wumunhu la yena. Se na wena mupsali loko u swi txuvukisisa kahle swi nga yendleka lani u tshamaka kona ku ni ndhawu ya le kusuhi leyi vana va wena va nga vonaka minchumu yinyingi leyi Yehovha a nga yi yendla, ya ku fana ni swiluva, swinyenyani, swiharinyana swaswitsongo kumbe swin’wanyani. (Pis. 104:24) Karina lweyi a tshamaka aAlemanha na yena a vula leswi: “Mamani wa mina wa swi rhandza swiluva, se a nkama na na ha li mutsongo, loko hi famba hi beliwa hi moya xikan’we, a a tolovela ku ni komba swiluva swa ku xonga.” Vapsali, mi nga tlhela mi tirhisa ni mavhidiyo ni mabuku lawa nhlengeletanu yi nga ma yendla lawa ma vulavulaka hi leswi Yehovha a nga swi yendla leswaku mi djondzisa vana va n’wina. Ku nga na mhaka swaku u tshama kwini na wena u nga swi kota ku pfuna vana va wena swaku va tsakela leswi Yehovha a nga swi yendla. Swoswi a hi voneni swilo leswi u nga swi djondzisaka vana va wena hi Yehovha hi ku tirhisa ntumbuluku.

11. Vapsali va nga va pfunisa ku yini vana va vona kuva va vona lirhandzu la Yehovha?

¹¹ Wena mupsali, u nga ha tirhisa ndlela leyi swiharhi swi hlayisaka hi yona vana va swona leswaku u komba vana va wena leswaku Yehovha a ni lirhandzu. (Mat. 23:37) U nga ha tlhela u va komba ku hambanahambana ka masasekela ya swilo. Karyna lweyi se hi nga bula hi yena a li: “Nkama a ni famba ni beliwa hi moya na mamani, minkama yayinyingi a a ni nyimisa a ni komba maflori a tlhela a ni tlhamusela ku hambanahambana ka wona, a gama a bula na mina hi swaku maflori lawayani ma li kombisa ku yini lirhandzu la Yehovha. Hambi hi swoswi na swi rhandza ku ma txuvukisisa kahle maflori, ku hambanahambana ka wona, ku saseka ni tikori ta wona.”

12. Vapsali va nga va pfunisa ku yini vana va vona ku vona wutlharhi la Yehovha? (Tipisalema 139:14) (Vona mufoto.)

¹² Pfunani vana va n’wina kuva va vona swaku Yehovha a ni wutlharhi. Phela a ku na munhu lweyi a nga tlhariha ku tlula Yehovha. (Rom. 11:33) Hi xikombiso mi nga tlhamusela vana va n’wina swaku a mati wolawa ma nga kona lwandle hi wona ma gamaka ma psha ma ya hamba marhefu, loko marhefu se ma talile tilweni ku gama ku na mpfula. (Yobo 38:36, 37) Mi nga ha bula hi leswi muzimba wa hina wu nga yendlisiwa xiswona. (Lerha Tipisalema 139:14.) Papayi mun’wani lweyi a vitaniwaka Vladimir a swi yendlile leswo, yena a hlaya leswi: “Siku lin’wani n’wana wa hina a a famba hi basikeni, a gama a wa a tivavisa. Kambe loko se ku hundze masikunyana xilondza lexiyani a xi holile. Se mina ni nsati wa mina hi tirhise leswi nga yendleka kuva hi mu komba a wutlharhi la Yehovha. Hi xikombiso hi mu tlhamusele swaku phela leswi Yehovha a nga wu yendlisa xiswona muzimba wa hina, loko hi tivavisa wona hi woxe wu gama wu tlhela wu hola. Leswo a swi yendleki ka minchumu leyi vanhu va yi yendlaka. Hi mu byele swaku hi xikombiso loko movha wu gadlana ni movha wun’wani indjhe wu nga tilunghisa ke? Leswo swi mu pfunile n’wana wa hina kuva a vona swaku impela Yehovha a tlharihile.”

13. Vapsali va nga va pfunisa ku yini vana na vona kuva va vona matimba ya Xikwembu? (Esaya 40:26)

¹³ Yehovha a hi rhamba swaku hi txuvuka tinyeleti leti nga matilweni hi gama hi pimisa hi matimba lawa a nga na wona. (Lerha Esaya 40:26.) Se na wena u nga byela vana va wena va txuvuka tilweni va pimisa hi tinyeleti leti nga kona. Ku yendla leswo swi pfune makwerhu Tingting wa le Taiwan nkama na a ha li mutsongo. Yena a vula leswi: “Khambi lin’wani mamani a ni tekile a ni yisa handle ka doropa, lani a ni swi kota ku ti vona kahle tinyeleti. Hi nkama wolowo vakolega va le xikolweni ka mina a va tshamela ku ni sindzisa swaku ni yendla minchumu leyi Yehovha a kalaka a nga yi lavi. Se a ni pimisa swaku a ni nge te swi kota ku tshembeka ka Yehovha. Mamani a ni byele swaku ni pimisa hi ntamu lowu Yehovha a nga wu tirhisa swaku a yendla tinyeleti leti nga matilweni. A tlhele a ni byela swaku Yehovha a nga tirhisa ntamu wolowu wa wun’we swaku a ni pfuna ku hlula mindzingo leyi a ni kumana na yona. Loko se ni vuyile kaya a ni tinyimisele ku tama ni kulisa wunghanu la mina na Yehovha ni tlhela ni tshembeka ka yena.”

14. Vapsali va nga va djondzisisa ku yini vana va vona swaku Yehovha i Xikwembu xa ku tsaka?

¹⁴ Swilo leswi Yehovha a nga swi yendla swi kombisa swaku yena i Xikwembu xa ku tsaka funtshi a lava swaku na hina hi tsaka. Hi xikombiso, vasiyentixta va tsumbule swaku swiharhi swinyingi swi swi rhandza hintamu ku tshama na swi tlangatlanga, hambi hi swinyenyani kumbe tihlampfi. (Yobo 40:20) U tshama u va vona vana va wena na va hlekelela hi ku vona swiharhi na swi tlangatlanga? Kumbe xingove na xi hlongolisa bola kumbe swimbyanyani na swi lumalumana? Loko u tshuka u vona n’wana wa wena a tsaka a tlhela a sungula ku hlekelela loko a vona swiharhi na swi yendla leswi, swi ngo yini u londzovota nkama wolowo swaku u mu djondzisa swaku Yehovha Xikwembu lexi hi xi tirhelaka i Xikwembu xa ku tsaka? —  1 Tim. 1:11.

15. I mpsini leswi nga pfunaka vapsali ku tiva leswi nga ka timbilu ta vana va vona? (Swivuriso 20:5) (Vona mufoto.)

¹⁵ Minkama yin’wani swa va karhatela vapsali ku tiva swikarhatu leswi vana va vona va kumanaka na swona. Loko swi ku u li ka xiyimu xolexo, swi lava u yendla leswi u nga swi kotaka swaku u tiva leswi nga ka mimpimiso ya vana va wena. (Lerha Swivuriso 20:5.) Vapsali van’wani va tsumbule leswaku swa vevuka kuva vana va hlaya leswi va nga na swona mbilwini loko va li xikan’we va beliwa hi moya. Hi mhaka muni? Hi mhaka hi nkama wolowo a ku na minchumu yinyingi leyi yi va kavanyetaka. Papayi mun’wani wa le Taiwan lweyi vito la yena ku nga Masahiko a tlhamusela leswi: “Ni tsumbule swaku loko ni teka vana va mina hi famba hi ya beliwa hi moya, ku nga ha va ku khwela tintshava kumbe hi famba praia, vona va titwa na va pepile. Se leswo swi yendla leswaku swi vevuka kuva ni tsumbula leswi vona va nga na swona timbilwini ta vona.” Katya lweyi se hi nga bula hi yena, na yena a hlaya leswi: “Loko se hi vuyile hi xikolweni, mamani a a ni teka hi ya jardim. Ka ndhawu liyani a swi ni vevukela ku mu byela leswi a swi ni yendlekela axikolweni ni leswi a swi ni karhata.”

16. I mpsini leswi mindjangu yi nga swi yendlaka swaku yi hungata yi tlhela yi tsaka nkama lowu yi vonaka leswi Yehovha a nga swi yendla?

¹⁶ Loko mindjangu yi tinyika nkama wa ku tikhorisa hi leswi Yehovha a nga swi yendla, leswo swi ta yendla swaku va tsaka va tlhela va hungata, funtshi swi ta yendla swaku va ya va rhandzana hintamu. Phela Bibele li vula swaku ku ni “nkama wa ku hleka” ni “nkama wa ku txina.” (Ekl. 3:1, 4) Yehovha a yendle tindhawu ta ku xonga lani misaveni, leti loko hi li ka tona hi nga yendlaka minchumu leyi hi yi rhandzaka. Hi xikombiso, mindjangu yayinyingi ya swi rhandza ku ya ma praia, ku ya vona tintshava. Vatsongwani van’wani va swi rhandza ku tsutsumatsutsuma jardim, va vona swiharhi swa ku xonga, va hlambela a praia kumbe ka minambu. Ku ni swilo swaswinyingi leswi mi nga swi yendlaka swaku mi tikhorisa hi leswi Yehovha a nga swi yendla.

17. Hi mhaka muni vapsali va fanele va tirhisa ntumbuluku swaku va djondzisa vana va vona hi Yehovha?

¹⁷ Ka misava ya nyuwani vapsali ni vana va ta tikhorisa swi phela hi swilo leswi Yehovha a nga swi yendla. Hi xikombiso a va nga ha ta chava swiharhi, funtshi hambi hi swiharhi a swi nga ha ta hi chava. (Esa. 11:6-9) Leswi hi nga ta hanya nkama wa ku kala wu nga heli hi ta tikhorisa hintamu hi leswi Yehovha a nga swi yendla. (Pis. 22:26) Kambe a swi lavi swaku n’wina vapsali mi nyimela misava ya nyuwani leswaku mi sungula ku djondzisa vana va n’wina hi ku tirhisa leswi Yehovha a nga swi yendla. Hambi swoswi mi nga swi tirhisa swilo leswo kuva mi va djondzisa hi Yehovha. Loko mi yendla leswo swi nga yendleka va ta titwa ku fana na Hosi Davhida lweyi a nge te: “Oho Yehovha, a ku na nchumu xin’wani lexi nga fanisiwaka ni mintirho ya wena.” — Pis. 86:8.