Tama U Kombisa “Wumunhu La Nyuwani” Hambiloko Se U Tsakamisiwile

 1. I yini lexi kongomisaka wumunhu la hina?

HINKWERHU hi fanele hi lwela ku va ni wumunhu leli tsakisaka Yehovha. Kambe leswaku hi va ni wumunhu lolelo, hi fanele hi va ni mapimiselo ya manene hikusa wumunhu la hina li kongomisiwa hi leswi hi swi pimisaka. Hi xikombiso, loko hi tshamela ku pimisa swilo swa ku biha, hi ta va ni mavulavulelo ya ku biha hi tlhela hi yentxa swilo swa ku biha. (Efe. 4:17-19) Kambe loko hi va ni mapimiselo ya manene, hi ta vulavula swilo swa swinene hi tlhela hi yentxa swilo leswi nga ta tsakisa Papayi wa hina Yehovha.  — Gal. 5:16.

 2. Hi swini swivutiso leswi hi nga ta swi hlamula ka nhlokomhaka leyi?

² Hilani se hi nga swi vona hi kona ka nhlokomhaka leyi nga hundza, minkama yin’wana swi nga yentxeka hi pimisa swilo swa ku kala swi nga li swinene. Kambe hi nga swi kota ku langa ku tshika ku hanya hi swilo swa ku biha leswi hi swi pimisaka. Phela nchumu wa lisima lowu munhu a faneleke a wu yentxa swaku a hlivila wumunhu la khale na a nge se tsakamisiwa, i ku tshika ku yentxa swilo ni ku vulavula swilo swa ku biha leswi Yehovha a swi nyenyaka. Funtshi leswaku munhu a tsakisa Yehovha hi ku helela a fanele a ‘yambala wumunhu la nyuwani.’ (Kol. 3:10) Hi mhaka leyo, ka nhlokomhaka leyi hi ta hlamula swivutiso leswi nge: I yini “wumunhu la nyuwani”? Naswona hi nga li yambalisa ku yini wumunhu la nyuwani hi tlhela hi tama hi va na lona?

 3. Hi ku ya hi Vagalatiya 5:22, 23, munhu lweyi a nga ni “wumunhu la nyuwani” a tshamise ku yini?

³ Lweyi a nga ni “wumunhu la nyuwani” a pimisa a tlhela a yentxa swilo leswi Yehovha a swi rhandzaka. A tlhela a pfumelela swaku mihandzu ya moya wa ku kwetsima yi kongomisa mapimiselo ya yena ni leswi a swi yentxaka. (Lerha Vagalatiya 5:22, 23.) Hi xikombiso, munhu yelweyo a rhandza Yehovha ni vanhu van’wana. (Mat. 22:36-39) A tama a tsaka hambiloko a kumana ni swikarhatu. (Yak. 1:2-4) I munhu wa ku rhula. (Mat. 5:9) A va lehisela mbilu vanhu van’wana. (Kol. 3:13) A rhandza ku yentxa swilo swa swinene. (Luk. 6:35) Leswi a swi yentxaka swi kombisa swaku a ni lipfumelo la ku tiya. (Yak. 2:18) A tama a rhula hambiloko vanhu van’wana va mu kwatisa, naswona wa tikhoma loko a kumana ni mindzingo. — 1 Kor. 9:25, 27; Tito 3:2.

 4. Hi ku ya hi Vagalatiya 5:22, 23, hi mhaka muni swi nga koteki ku kombisa mihandzu ya moya wa ku kwetsima hi wun’we ha wun’we?

⁴ Leswaku hi va ni wumunhu la nyuwani, swi lava hi kombisa mihandzu hinkwayu ya moya wa ku kwetsima leyi nga ka Vagalatiya 5:22, 23 ni leyi nga ka tindzimana tin’wana.b Phela mihandzu ya moya wa ku kwetsima a yi fani ni mpahla leyi hi yi yambalaka hi yin’we hi yin’we, hikusa a wu nge swi koti ku kombisa handzu wun’we wa moya wa ku kwetsima na u nga yi kombisi yin’wana. Hi xikombiso, loko u mu rhandza munhu mun’wana, u ta mu lehisela mbilu u tlhela u mu yentxela swilo swa swinene. Loko u li munhu wa munene, u ta tiveka hansi u tlhela u tikhoma.

 5. Swi vula yini ku “pimisa ku fana na Kreste” naswona hi mhaka muni hi fanele hi djondza hi wutomi la Yesu? (1 Vakorinto 2:16)

⁵ Lerha 1 Vakorinto 2:16. Leswaku hi va ni wumunhu la nyuwani “hi fanele hi pimisa ku fana na Kreste.” Leswi vulaka swaku hi fanele hi tiva leswi Yesu a a pimisisa xiswona ni leswi a a swi yentxa hi tlhela hi mu tekelela. Ku fana ni leswi xipelhu xa ku basa xi swi kombisaka hi ku helela leswi munhu a nga tshamisa xiswona, Yesu na yena a li kombisa hi ku helela wumunhu leli Yehovha a nga na lona. (Heb. 1:3) Nkama hi yaka hi pimisa ku fana na Yesu, hi ta yentxa leswi a a swi yentxa, hi tlhela hi tekelela wumunhu la yena. — Filp. 2:5.

 6. Hi swini swilo swinharhu leswi hi faneleke hi swi khumbuka nkama hi zamaka ku va ni wumunhu la nyuwani?

⁶ Hi nga swi kota ku tekelela xikombiso xa Yesu? Phela hi nga ha pimisa leswi: ‘Yesu a a hetisekile, se a ni nge swi koti ku mu tekelela hi ku helela.’ Loko u titwisa xileswo, khumbuka leswi: Xa ku sungula, u yentxiwe na u fana na Yehovha na Yesu. Se loko u swi lava u nga swi kota ku va tekelela. (Gen. 1:26) Xa wumbirhi, moya wa ku kwetsima wa Yehovha i wukulu ku tlula swilo hinkwaswu. Se Yehovha a nga tirhisa wona swa ku a ku pfuna ku yentxa swilo swaku a wu nga ta swi kota ku swi yentxa hi matimba ya wena. Xa wunharhu, Yehovha a nga nyimeli swaku u kombisa mihandzu ya moya wa ku kwetsima hi ku helela. Phela Yehovha a veke 1.000 wa malembe swaku vanhu lava nga ni ntshembo wa ku hanya ka misava ya nyuwani va nga ha vi ni xidjoho. (Nhla. 20:1-3) Lexi Yehovha a xi lavaka ka hina, i ku va hi zama ku mu tekelela hi tlhela hi tshemba swaku a ta hi pfuna.

 7. I yini leswi hi nga ta swi kambisisa swoswi?

⁷ Hi nga mu tekelelisa ku yini Yesu? Swoswi hi ta kambisisa 4 wa mihandzu ya moya wa ku kwetsima. Naswona hi ta vona swaku hi nga djondza yini ka handzu wun’wana ni wun’wana wa moya wa ku kwetsima lowu Yesu a nga wu kombisa. Hi ta tlhela hi vona swivutiso leswi nga hi pfunaka ku tikambela swaku hi kwini lani hi nga yampsisaka kona.

 8. Yesu a li kombisise ku yini lirhandzu?

⁸ Yesu a yentxe hinkwaswu leswi a nga swi kota swaku a komba Yehovha leswaku wa mu rhandza ni swaku a rhandza vanhu. (Yoh. 14:31; 15:13) Ndlela leyi Yesu a a hanya hi yona nkama na a li lani misaveni, a yi kombisa swaku a va rhandza hintamu vanhu. Hi xikombiso, siku ni siku Yesu a a komba vanhu swaku wa va rhandza hambi lava a va mu nyenya. A a va komba swaku wa va rhandza hi ku va chumayela hi Mfumu wa Xikwembu. (Luk. 4:43, 44) Yesu a tlhele a kombisa swaku wa xi rhandza Xikwembu ni vanhu hileswi a nga pfumela ku hluphiwa swaku a hi fela. Hi mhaka ya leswi Yesu a nga hi fela, hinkwerhu hi nga va ni wutomi la ku kala li nga heli.

 9. Ku fana na Yesu, hi nga swi kombisisa ku yini swaku ha va rhandza vanhu van’wana?

⁹ Hi nyiketele wutomi la hina ka Yehovha hi tlhela hi tsakamisiwa hileswi hi mu rhandzaka hintamu Yehovha Papayi wa hina. Naswona ku fana na Yesu, hi fanele hi mu komba Yehovha swaku ha mu rhandza hi ndlela leyi hi hanyisanaka hi yona ni vanhu van’wana. Mupostolo Yohani a vule leswi: “Lweyi a kalaka a nga mu rhandzi makwavu lweyi a mu vonaka, a nge swi koti ku rhandza Xikwembu lexi a kalaka a nga se tshama a xi vona.” (1 Yoh. 4:20) Hi fanele hi tivutisa leswi: ‘Ku nga va swaku na va rhandza vanhu van’wana? Ni hanyisana kahle ni vanhu van’wana hambiloko vona va nga ni rhandzi? Lirhandzu leli ni nga na lona, li ni yentxa ni tirhisa nkama ni male ya mina swaku ni djondzisa van’wana hi Yehovha? Ni tinyimisele ku tama ni chumayela mahungu ya ku tsakisa hambiloko vanhu va vanyingi va nga nyimi na mina? Ni nga swi kota ku chumayela hi tindlela tin’wana?’ — Efe. 5:15, 16.

10. Yesu a swi kombisise ku yini swaku a a li munhu wa ku rhula?

¹⁰ Yesu a a li munhu wa ku rhula naswona loko vanhu van’wana va mu yentxela swilo swa ku biha, a a nga va tlheliseli hi swa ku biha. Kambe a nga gamelanga lanu! Yesu a a yentxa ku rhula ni vanhu van’wana naswona a a djondzisa vanhu swaku va lulamisa timhaka ta vona leti a ti va yentxa va nga twanani. Hi xikombiso, Yesu a byele vadjondzisiwa va yena swaku loko va lava ku tama va va ni wunghanu la linene na Yehovha, va fanele va sungula hi ku lunghisa timhaka ni vamakwavu va vona. (Mat. 5:9, 23, 24) Funtshi hi ku phindhaphindha Yesu a pfune vadjondzisiwa va yena swaku va tshika ku holova hi ku lava ku tiva swaku i mani wa mukulu xikarhi ka vona. — Luk. 9:46-48; 22:24-27.

11. U nga yentxa yini swaku u hanyisana hi ku rhula ni van’wana?

¹¹ Ku hanya hi ku rhula ni van’wana a swi vuli ku kala hi nga va holovisi ntsena, kambe hi fanele hi va va ku sungula hi yentxa ku rhula na vona, hi tlhela hi pfuna vamakwerhu swaku va lunghisa timhaka ta vona. (Filp. 4:2, 3; Yak. 3:17, 18) Hi nga tivutisa leswi: ‘Ni tinyimisele ku yentxa hinkwaswu ni nga swi kotaka swaku ni hanyisana hi ku rhula ni vanhu van’wana? Loko makwerhu a ni kwatisa, ku nga va swaku ni mu vekela xiviti? Ni nyimela swaku van’wana va ta va ta yentxa ku rhula na mina, kumbe hi mina wa ku rhanga ni ya lulamisa timhaka hambi ku li vona va nga ni kwatisa? Loko swi koteka, na va pfuna van’wana swaku va lulamisa timhaka ta vona leswaku va hanyisana hi ku rhula?’

12. Yesu a va kombise ku yini timpsalu van’wana?

¹² Yesu a a va khoma kahle vanhu van’wanyana. (Mat. 11:28-30) Yesu a a va komba timpsalu vanhu van’wana hambiloko swiyimu swi karhata. Hi xikombiso, loko wansati wa Mufenisiya a kombele Yesu swaku a mu dahela n’wana wa yena, Yesu a rhange hi ku yala, kambe nkama lowu wansati lwiyani a nga kombisa lipfumelo la likulu, Yesu a game a mu komba timpsalu a tlhela a mu dahela n’wana. (Mat. 15:22-28) Phela hambileswi Yesu a nga va komba timpsalu vanhu van’wana, a nga tshikanga ku va laya loko swi laveka. Minkama yin’wana, a swi lava a va komba timpsalu hi ku va laya. Hi xikombiso, nkama Pedru a nga zama ku tsimbisa Yesu swaku a yentxa ku rhandza ka Yehovha, Yesu a laye Pedru na a voniwa hi vadjondzisiwa van’wana. (Marku 8:32, 33) Phela Yesu a nga yentxanga leswo swaku a danisa Pedru, kambe a a lava ku djondzisa Pedru ni vapostolo lavan’wana swaku va tiveka hansi. Swi nga ha yentxeka Pedru a danile, kambe a pfunekile.

13. Hi nga ti kombisisa ku yini timpsalu?

¹³ Leswaku hi va komba timpsalu vanhu lava hi va rhandzaka, hi fanele hi va laya hi ku kongoma. Kambe loko hi va laya, hi fanele hi tirhisa Bibele ku fana na Yesu. Va kombi timpsalu vamakwerhu. Tiyiseka swaku va swi lava ku yentxa swilo swa swinene, naswona leswi va rhandzaka Yehovha, va ta ku yingisa loko u va pfuna. Tivutisi leswi: ‘A ni chavi ku laya makwerhu loko ni mu vona na a yentxa swilo swa ku biha? Loko ni lava ku pfuna makwerhu, ni vulavula na yena hi ndlela yayinene kumbe ni vulavula na ni kwatile? I yini lexi ni yentxaka ni lava ku pfuna makwerhu? Ku nga va swaku ni mu laya hi leswi ni nga kwatisiwa hi leswi a nga swi yentxa kumbe hi mhaka ya leswi ni mu rhandzaka?’

14. Yesu a va yentxelise ku yini swilo swa swinene vanhu van’wana?

¹⁴ Yesu a a ngo tiva swa swinene ntsena, kambe a a tlhela a va yentxela swilo swa swinene vanhu van’wana. Leswi a a mu rhandza hintamu Papayi wa yena Yehovha, minkama hinkwayu a a yentxa leswi nga swinene swaku a mu tsakisa. Munhu lweyi a yentxelaka swa swinene vanhu van’wana, a yentxa hinkwaswu leswi a nga swi kotaka swaku a va pfuna. Phela a swi yenelanga ku tiva swilo swa swinene leswi hi faneleke hi swi yentxa, kambe hi fanele hi tekela ku swi yentxa hi xivangelo xa xinene. Kambe hi nga ha tivutisa leswi: ‘Ku nga va swaku swa koteka ku yentxa swilo swa swinene na hi nga na swivangelo swa swinene?’ Ina, swa koteka. Hi xikombiso, Yesu a vulavule hi vanhu lava a va rhandza ku pfuna swisiwana hi ku lava ku voniwa. Leswi va nga swi yentxa i swinene kambe ka Yehovha a hi swa nchumu. — Mat. 6:1-4.

15. Hi nga va yentxelisa ku yini swilo swa swinene van’wana hi ndlela leyi nga ta tsakisa Yehovha?

¹⁵ Hi nga va yentxela swilo swa swinene vanhu van’wana hi ndlela leyi nga ta tsakisa Yehovha, loko hi nga swi yentxi hi ku lava ku pfuneka. Tivutisi leswi: ‘Loko ni tiva swa swinene, ni tekela ku swi yentxa, naswona i yini lexi ni yentxaka ni lava ku va yentxela swilo swa swinene vanhu van’wana?’

16. Leswaku hi tama hi va ni wumunhu la nyuwani, hi fanele hi yentxa yini siku ni siku naswona hi mhaka muni?

¹⁶ Phela ku yambala wumunhu la nyuwani a swi gameli ka ku tsakamisiwa. Kambe loko se hi li yambalile, hi fanele hi tama hi li hlayisa. Hi nga yentxa leswo hi ku va siku ni siku hi kombisa mihandzu ya moya wa ku kwetsima wa Xikwembu. Yehovha i Xikwembu xa matimba hinkwawu funtshi a nga hi pfuna hi ku tirhisa moya wa yena wa ku kwetsima. (Gen. 1:2) Se loko hi ni moya wa ku kwetsima, hi ta kota ku yentxa leswi Yehovha a swi lavaka. Hi xikombiso, Yakobo a vule leswi: “Lipfumelo la ku kala li nga na mintirho li file.” (Yak. 2:26) Phela hi nga vula swa ku fana hi mihandzu ya moya wa ku kwetsima wa Xikwembu. Nkama hi kombisaka mihandzu ya moya wa ku kwetsima hi kombisa swaku moya wa ku kwetsima wa Xikwembu wa tirha ka hina.

17. Hi fanele hi yentxa yini loko hi tshuka hi tsandzeka ku kombisa wumunhu la nyuwani?

¹⁷ Hambi Vakreste lava se i nga khale na va tsakamisiwile, minkama yin’wana swi nga va karhatela ku kombisa mihandzu ya moya wa ku kwetsima wa Xikwembu. Xa lisima hintamu, i ku kala va nga godoli. Pimisa hi xikombiso lexi: Loko wo handzukeliwa hi mpahla ya nyuwani leyi u yi rhandzaka hintamu, ku nga va swaku a wu ta tekela ku yi txukumeta? I ntiyiso swaku a wu nge yi txukumeti. A wu ta yentxa hinkwaswu leswi u nga swi kotaka swaku u yi lunghisa u tlhela u zama ku kala u nga ha yi handzuli. Phela leswo swa fana ni ku yambala wumunhu la nyuwani. Loko u tshuka u tsandzeka ku kombisa timpsalu, ku lehisela mbilu munhu mun’wana kumbe ku mu komba swaku wa mu rhandza, u nga godoli. Mu kombeli rivalelo kuva mi hanyisana hi ku rhula u tlhela u tinyimisela ku kala u nga ha phindhi ka nkama lowu taka.

18. I yini leswi u nga tiyisekaka hi swona?

¹⁸ Swi hi tsakisa hintamu ku tiva swaku hi ni xikombiso xa Yesu swaku hi xi tekelela. Phela loko hi zama ku tekelela ndlela leyi Yesu a a pimisa hi yona, swi ta hi vevukela ku yentxa swilo leswi Yesu a a swi yentxa, swi tlhela swi hi pfuna swaku hi tama hi va ni wumunhu la nyuwani. Ka nhlokomhaka leyi, hi djondze hi 4 wa mihandzu ya moya wa ku kwetsima wa Xikwembu. Swi ngo yini u tinyika nkama wa ku kambela mihandzu yin’wana ya moya wa ku kwetsima wa Xikwembu ni swaku u nga yi kombisisa ku yini? U nga ha ya ka Nkongomiso Wo Endla Ndzavisiso Wa Timbhoni Ta Yehovha, ka nhlokomhaka leyi nge “Mahanyelo Ya Vakreste” u gama u ya lani ku nge “Mihandzu Ya Moya” (hi Xitsonga). Tiyiseka swaku loko u zama ku va ni wumunhu la nyuwani u tlhela u li hlayisa, Yehovha a ta ku pfuna swaku u tama u va na lona.