“Pfulani Matihlo Mi Tlhariha!”

 1. I mpsini leswi Yesu a nga byela vapostolo va yena mayelana ni masiku ya wugamu, naswona a va basopise ka yini?

NA KU sale masikunyana leswaku Yesu a dlayiwa, 4 wa vapostolo va yena va mu yelile va fika va mu vutisa va ku: “Xi ta va xihi xikombiso . . . xa ku hela ka misava?” (Mat. 24:3) Phela swi nga yendleka vapostolo va Yesu a va lava ku tiva swaku Yerusalema ni tempele a swi ta helisiwa nkama muni. Se, Yesu ka nhlamulu ya yena, a nga va byelanga ntsena hi ku helisiwa ka Yerusalema ni tempele kambe a tlhele a va byela hi ku helisiwa ka misava ya Sathana. Yena a tlhele a va byela swaku: “Loko ku li siku la kona kumbe nkama wa kona, a swi tiviwi hi munhu, hambi ku li tintsumi le tilweni kumbe N’wana a va swi tivi, kambe swi tiviwa hi Papayi.” Yesu a game a va basopisa swaku va fanele va ‘tshama na va rindzile’ va tlhela va ‘pfula matihlo.’ — Marku 13:32-37.

 2. Hi mhaka muni Vakreste lava a va tshama Yerusalema a swi lava va ‘pfula matihlo’?

² Vakreste va Vayuda va minkama ya vapostolo a vo to pona ntsena loko va tshama na va pfule matihlo. Yesu a byele vapostolo va yena leswi a swi ta va pfuna ku vona swaku Yerusalema a a li kusuhi ni ku helisiwa. Yena a te: “Loko mi vona doropa la Jerusalema na li rhendzeliwe hi masonchwa, swi tiveni swaku nkama wa ku lovisiwa ka lona wu kusuhi.” Phela Yesu a ngo yo va byela ntsena swaku va ‘pfula matihlo’ leswaku va vona swilo leswo na swi yendlela kambe a tlhele a va byela leswi a va fanele va swi yendla leswaku va ponisiwa, ku nga ku ‘baleka va ya ka tinhava’. (Luk. 21:20, 21) Naswona lava va nga yingisa xitsundzuxu lexo, va ponisiwile nkama Varoma va nga helisa Yerusalema.

 3. Hi ta vona yini ka nhlokomhaka leyi?

³ Hi hanya ka masiku ya wugamu ya misava leyi ya Sathana, naswona ku nga li khale yi ta helisiwa. Hi mhaka leyo, i swinene kuva hi tama hi ‘pfula matihlo’ hi tlhela hi tlhariha. Se, ka nhlokomhaka leyi hi ta vona swaku hi nga swi kotisa ku yini ku ringanisela nkama lowu hi vonaka swilo swi yendleka misaveni, hi nga yendla yini swaku hi tivonela naswona hi nga wu tirhisisa ku yini nkama wa hina hi ndlela ya wutlharhi.

 4. Hi mhaka muni swi li swa lisima ku lava ku tiva leswi yendlekaka misaveni?

⁴ I swa lisima kuva hi tiva swaku swilo leswi yendlekaka misaveni swi li hetisisa ndjhani wuprofeta leli nga ka Bibele. Hi xikombiso, Yesu a hi byele hi swilo leswi hi pfunaka ku vona swaku misava leyi ya Sathana a yi ta helisiwa siku muni. (Mat. 24:3-14) Mupostolo Pedru na yena a hi byele swaku hi tshama na hi pfule matihlo kuva hi vona ku hetiseka ka wuprofeta leswaku hi ta tiyisa lipfumelo. (2 Ped. 1:19-21) Naswona buku la wugamu la Bibele li sungula hi marito lawa: “Marito lawa ma tlhamusela minchumu leyi Yesu Kreste a yi paluxaka, leyi Xikwembu xi nga mu komba yona swaku a komba vatirhi va xona, minchumu leyi ku ngo yo sala kutsongo swaku yi yentxeka.” (Nhla. 1:1) Se, swa twala ku navela ku tiva leswi yendlekaka misaveni ni ku tlhela hi bula hi swona ni van’wani.

 5. I mpsini leswi hi faneleke hi swi yendla, naswona i mpsini leswi hi kalaka hi nga fanelanga hi swi yendla? (Vona mafoto ka pajina 15.)

⁵ Loko hi bula ni vanhu hi wuprofeta la Bibele, a hi fanelanga hi vhumbata swaku i mpsini swi nga ta landzela ndzhaku ka leswo, hikusa leswo swi nga vanga ku yavana ka bandla la Wukreste. Hi xikombiso, loko hi tshuka hi twa swaku tihosi ti teke xiboho xa ku karhi, lexi nga ta yendla swaku ku hela mhaka ya ku karhi kumbe ku va ni ku rhula, a hi fanelanga hi fikelela magamu ya leswaku swoleswo swi hetisisa wuprofeta leli nga ka 1 Vatesalonika 5:3, kambe minkama hinkwayu hi fanele hi tshama na hi tiva swaku swilo leswi swa ha ku humesiwaka swoswi swi vula yini hi mhaka leyi. Se loko hinkwaswu leswi hi swi vulaka swi fambisana ni leswi nhlengeletanu ya Yehovha yi swi vulaka, swi ta yendla swaku hi va ni ku twanana bandleni hi tlhela hi va ni mimpimiso ya ku fana. — 1 Kor. 1:10; 4:6.

 6. Hi djondza yini ka 2 Pedru 3:11-13?

⁶ Lerha 2 Pedru 3:11-13. Mupostolo Pedru a hi pfune ku ringanisela nkama lowu hi kambisisaka wuprofeta la Bibele. Yena a vule swaku hi fanele hi ‘nyimela siku la Yehovha ni ku tlhela hi gayela hi lona.’ Hi marito lawa a a nga lavi ku vula swaku hi fanele hi hlotahlota swaku Armajedoni yi ta fika siku muni, kambe a a lava ku vula swaku na ha ha yi nyimela ‘hi fanele hi basa hi tlhela hi yentxa minchumu leyi kombisaka swaku ha tshembeka ka Xikwembu.’ (Mat. 24:36; Luk. 12:40) Leswo swi lava ku vula swaku hi fanele hi va ni mahanyelo yamanene lawa ma tsakisaka Xikwembu, hi tlhela hi xi tirhela hileswi hi xi rhandzaka. Lexi nga hi pfunaka ku yendla leswo i ku tshama na hi tivonela.

 7. Hi nga swi kombisisa ku yini swaku ha tivonela? (Luka 21:34)

⁷ Yesu a ngo yo byela vadjondzisiwa va yena swaku va tshama va pfule matihlo ka leswi a swi yendleka misaveni ntsena, kambe a tlhele a va byela swaku va tivonela. Ka buku la Luka 21:34 (lerha) a te: “Tivoneleni”, leswi vulaka swaku a va fanele va fambela kule ni swilo leswi a swi ta wonha wunghanu la vona na Yehovha va tlhela va tivonela ka swona. Loko va yendla leswo a va ta tama va va vanghanu va Yehovha. — Swi. 22:3; Yuda 20, 21.

 8. Pawulo a byele Vakreste swaku va yendla yini?

⁸ Na yena Pawulo a byele Vakreste swaku va tivonela. Hi xikombiso, a byele Vakreste va le Efeza a ku: “Tshamani na mi pfule matihlo leswaku mi nga fambi ku fana ni vanhu va ku kala va nga tlharihanga, kambe mi famba ku fana ni vanhu va ku tlhariha.” (Efe. 5:15, 16) Se na hina hi fanele hi yendla leswi fanaka hikusa Sathana a lwa hi matimba swaku a dlaya wunghanu la hina na Yehovha. Se, hi nga tivhikela ka mintlhamu hinkwayu ya Sathana loko hi ‘twisisa leswi Yehovha a swi lavaka.’ — Efe. 5:17.

 9. Hi nga yendla yini swaku hi twisisa leswi Yehovha a swi lavaka?

⁹ Bibele a li hi byeli hinkwaswu leswi nga wonhaka wunghanu la hina na Yehovha. Hi mhaka leyo, minkama yin’wani swi nga ha lava hi teka xiboho na ku nga na nawu wa ku kongoma ka Bibele mayelana ni mhaka ya kona; se leswaku hi yendla xiboho xaxinene hi fanele hi twisisa “leswi Yehovha a swi lavaka.” Hi nga yendla leswo hi ku lerha Bibele siku ni siku hi tlhela hi gayela hi leswi hi swi lerhaka. Se, nkama hi yaka hi twisisa kahle leswi Yehovha a swi lavaka ni “ku pimisa ku fana na Kreste,” hi ta va “vanhu va ku tlhariha” naswona hambiloko ku nga na nawu wa ku kongoma ka mhaka yoleyo hi ta swi kota ku yendla leswi tsakisaka Yehovha. (1 Kor. 2:14-16) Minkama yin’wani swi nga ha hi vevukela ku vona swilo leswi nga wonhaka wunghanu la hina na Yehovha, kambe minkama yin’wanyani swi nga ha karhata.

10. I mpsini leswi hi faneleke hi fambela kule na swona?

¹⁰ Swin’wani leswi hi faneleke hi tivonela ka swona i ku tlanga hi ku gangisana, ku dakwa, makolo, mavulavulelo ya nhlambha, ku sixtira mafilmi ya tinyimpi, pornografiya ni swilo swa ku fambelana ni swoleswo. (Pis. 101:3) Nala wa hina Davulosi a zama tindlela ta kuva a wonha wunghanu la hina na Yehovha. (1 Ped. 5:8) Se, hi fanele hi tivonela hikusa yena a nga hi yendla hi va vanhu va ku tibyela, va wukwele, va ximbilwambilwani, va ku kala va nga tshembeki, va wunavenave ni va ku vekelana xiviti. (Gal. 5:19-21) A ku sunguleni swi nga ha tikomba swi nga li swa nchumu. Kambe loko hi nga yendli nchumu, swi nga ha kula swi za swi hi wonha, ku fana ni limintsu leli nga ni vhenenu leli nga ha yendlaka swaku leswi nga matlhelweni ka lona swi nga kuli kahle. — Yak. 1:14, 15.

11. Hi wini ntlhamu lowu hi faneleke hi tivonela ka wona naswona hi mhaka muni?

¹¹ Ku ni ntlhamu wun’wani lowu nga tumbela, ku nga vanghanu va ku biha. Hi xikombiso, a hi nge wena u tirha ni munhu lweyi a kalaka a nga li Mboni ya Yehovha, kambe leswi u lavaka ku mu komba swaku Timboni ta Yehovha i vanhu va kahle u ni xinghanu na yena naswona u mu khoma kahle. Se, u nga ha pfumela ku dla na yena loko a ku rhamba, kambe ndzhaku ka nkamanyana u tivona se na u dla na yena siku ni siku. Minkama yin’wani munhu yelweyo a nga ha sungula ku vulavula swilo swa ku kala swi nga basanga. Ku sunguleni u nga ha vhikavhika mabulu wolawo, kambe hi ku fambanyana ka nkama u nga ha ya u ma tolovela u nga ha na mhaka na wona, lakakuva siku lin’wani loko a ku rhamba swaku u ya dla xa ku karhi ndzhaku ka ntirho u pfumela; se leswo swi nga ha yendla swaku u ya u fana ni munhu yelweyo u hetaka nkama na yena. I ntiyiso swaku hi lava ku va vanhu va kahle naswona hi lava ku khoma vanhu hi ndlela yayinene, kambe hi fanele hi khumbuka swaku a wumunhu la hina li nga ha txintxa loko hi tshama ni vanhu lava kalaka va nga hanyi hi minawu ya Yehovha. (1 Kor. 15:33) Loko hi tivonela hilani Yesu a nga hi basopisa hi kona, a hi nga ta wa ka ntlhamu wolowo. (2 Kor. 6:15) Ku tivonela ku nga ha yendla leswaku hi vona nghozi na ya ha li lee, se hi baleka hi fambela kule na yona.

12. I mpsini leswi vadjondzisiwa va Yesu a va fanele va swi yendla na va nyimela ku helisiwa ka Yerusalema?

¹² Yesu a nga byelanga vadjondzisiwa va yena swaku va khondla mavoko va nga yendli nchumu va nyimela Yerusalema leswaku a helisiwa. Yena a va nyike ntirho. A va rhume leswaku va chumayela mahungu ya ku tsakisa “aJerusalema ni le tikweni hinkwalu la Yudiya ni le Samariya ku ya fika ni le ka magamu ya misava.” (Mint. 1:6-8) A ntirho lowu a wu nga li matlangwana naswona vona va wu tirhise kahle nkama wa vona hi ku yendla ntirho lowu hi ku hiseka.

13. Hi mhaka muni hi fanele hi wu tirhisa kahle nkama wa hina? (Vakolosa 4:5)

¹³ Lerha Vakolosa 4:5. Leswaku hi tivonela, hi fanele hi swi vona swaku hi wu tirhisisa ku yini nkama wa hina. Hi mhaka muni hi fanele hi yendla leswo? Hikusa hinkwerhu hi nga ha humeleliwa hi ‘swilo swa ku kala hi nga swi nyimelanga’. (Ekl. 9:11) Kola na kola hi nga tshuka hi fa.

14-15. Hi nga swi kombisa ku yini swaku hi wu tirhisa kahle nkama wa hina? (Vaheberu 6:11, 12) (Vona mufoto ka pajina 18.)

¹⁴ Hi nga wu tirhisa kahle nkama wa hina hi ku yendla leswi tsakisaka Yehovha ni ku tiyisa wunghanu la hina na yena. (Yoh. 14:21) Hi fanele hi ‘tiya, hi nga tsekatsekisiwi, hi tshama na hi ni swa swinyingi swa ku swi yentxa ka ntirho wa Hosi.’ (1 Kor. 15:58) Se loko hi yendla leswo, hambi ho fa kumbe misava leyi ya Sathana yi helisiwa, a hi nga ta tilaya hikusa hi ta va hi wu tirhise kahle nkama wa hina. — Mat. 24:13; Rom. 14:8.

¹⁵ Namuntlha Yesu wa ha tama a kongomisa vadjondzisiwa va yena ka ntirho wa ku chumayela mahungu ya ku tsakisa amisaveni hinkwayu. Ka nkama wa vapostolo, Yesu a va tshembisile leswaku a a ta va na vona naswona ni namuntlha wa ha xi hetisisa xitshembiso lexo. Se yena hi ku tirhisa nhlengeletanu ya Yehovha wa hi trenara a tlhela a hi nyika leswi hi swi lavaka leswaku hi djondzisa vanhu van’wani. (Mat. 28:18-20) Se hina hi ta va hi yendla xiyenge xa hina hi ku hiseka ka ntirho lowu wa ku chumayela ni wa ku djondzisa van’wani, ni ku tama hi tlhariha hi tlhela hi ‘pfula matihlo’ na ha ha nyimela swaku Yehovha a helisa misava leyi ya Sathana. Loko hi landzela leswi nga ka Vaheberu 6:11, 12, hi ta tiya hi ku ndee ka ntshembo wa hina “anze ku fika magamu”. — Lerha.

16. U tinyimisele ku yendla yini?

¹⁶ Yehovha se a veke siku ni nkama leswaku a helisa misava leyi ya Sathana. Loko siku li fika, a nge te phazama a ta hetisisa hinkwaswu leswi a nga hi tshembisa swona. I ntiyiso swaku minkama yin’wani hi nga ha pimisa swaku a ku helisiwa ka misava leyi ka hlwela, kambe a siku la Yehovha a li nge te xwela. (Hab. 2:3) Hi mhaka leyo, a hi tameni hi ‘rindzela Yehovha Xikwembu lexi ponisaka.’ — Miki. 7:7.