Tiyisela Na U Nga Chavi Loko U Hluphiwa

Vakreste hinkwavu va ta kanetiwa va tlhela va hluphiwa naswona leswo swi nga yendleka na hi nga swi nyimelanga. Se, ku nga va leswaku hi fanele hi chava loko leswo swi yendleka?

1. Hi mhaka muni swi nga hi hlamalisi loko hi hluphiwa?

Bibele li li: “Hinkwavu lava navelaka ku hanya hi ku tinyiketela ka Xikwembu na va li vadjondzisiwa va Kreste Yesu, na vona va ta hluphiwa.” (2 Timotiya 3:12) Phela lexi a xi yendla swaku Yesu a hluphiwa hileswi a a nga tipatsi ni vanhu va misava ya Sathana. Hilani ku fanaka, leswi hina hi kalaka hi nga tipatsi ni vanhu va misava leyi, a swi hi hlamalisi loko hi hluphiwa hi mimfumu ni wukhongeli la misava leyi. — Yohani 15:18, 19.

2. Hi nga yendla yini swoswi leswi nga ta hi pfuna ku tiyisela loko hi ta hluphiwa?

Hi fanele hi ya hi mu tshemba hintamu Yehovha na ka ha li swoswi. Tinyiki nkama wa ku khongela ni ku lerha Bibele siku ni siku, u va kona mintlhanganwini nkama ni nkama. Loko u yendla leswo, u ta va ni ntamu wa ku tama u tiyisela ku hluphiwa, hambiloko u hluphiwa hi maxaka ya wena. Mupostolo Pawulo lweyi a nga tiyisela ku hluphiwa a te: “Yehovha i mupfuni wa mina; a ni nge chavi nchumu.” — Vaheberu 13:6.

Xin’wani xi nga hi pfunaka ku kala hi nga chavi, i ku va kona ka ntirho wa ku chumayela nkama ni nkama. Ku chumayela swi ta hi pfuna ku ya hi mu tshemba hintamu Yehovha swi tlhela swi hi pfuna ku kala hi nga chavi vanhu. (Swivuriso 29:25) Loko hi nga chavi ku chumayela swoswi, hi ta va na hi lunghekile swaku hi tama hi chumayela hambiloko mimfumu yo tshuka yi tsimbisa ntirho wa hina wa ku chumayela. — 1 Vatesalonika 2:2.

3. Hi pfunekisa ku yini loko hi tiyisela ku hluphiwa?

A nga kona lweyi a rhandzaka ku hluphiwa, kambe loko hi tiyisela ku hluphiwa, lipfumelo la hina li ya li tiya hintamu. Naswona wunghanu la hina na Yehovha na lona li ya li kula hikusa hi vona leswi Yehovha a hi pfunisaka xiswona ngopfungopfu loko hi titwa ingi a ha ha na matimba ya ku tiyisela. (Lerha Yakobe 1:2-4.) Yehovha wa vaviseka loko a hi vona hi hlupheka, kambe a tsaka hintamu loko a hi vona na hi tiyisela. Bibele li li: “Loko mi yendla swaswinene mi gama mi xanisiwa kutani mi tiyisela, Xikwembu xa tsaka hi leswo.” (1 Pedru 2:20) Yehovha a tshembisa swaku lava va tiyiselaka ku hluphiwa anze magamu, a ta va nyika wutomi la ku kala li nga heli ka misava leyi hi nga ta kala hi nga ha hluphiwi. — Matewu 24:13.

DJONDZA SWIN’WANI

4. U nga swi kota ku tiyisela hambiloko u hluphiwa hi ndjangu wa wena

Yesu a a swi tiva swaku a hi hinkwavu ka ndjangu wa hina lava a va ta tsaka loko va hi vona hi tirhela Yehovha. Lerhani Matewu 10:34-36, mi gama mi bula hi xivutiso lexi landzelaka:

• I mpsini leswi ndjangu wu nga ha swi yendlaka loko munhu a tiyendlela xiboho xa ku tirhela Yehovha?

VHIDIYO: Yehovha A Hi Yamukelile (5:13)

• A wu ta yendla yini loko mun’we ka ndjangu wa wena kumbe munghanu wa wena a nga tsaki hi ku ku vona na wu tirhela Yehovha?

Lerhani Tipisalema 27:10 ni Marka 10:29, 30. Loko se mi lerhile ndzimana ya ku sungula, bulani hi xivutiso mi gama mi yendla swa ku fana ni ka ndzimana leyin’wani:

• A xitshembiso lexi xi nga ku pfunisa ku yini ku kala u nga chavi loko u kanetiwa hi maxaka ya wena kumbe vanghanu va wena?

5. Tama u tirhela Yehovha hambiloko u kanetiwa

VHIDIYO: Kombisa Xivindzi Hambiloko U Hluphiwa (6:27)

• Swikombiso leswi u nga swi vona ka vhidiyo swi li tiyisisa ku yini lipfumelo la wena?

Lerhani Mintirho 5:27-29 ni Vaheberu 10:24, 25. Loko se mi lerhile ndzimana ya ku sungula, bulani hi xivutiso mi gama mi yendla swa ku fana ni ka ndzimana leyin’wani:

• Hi mhaka muni swi li swa lisima hintamu ku tama hi tirhela Yehovha hambiloko mintlhanganu ya hina ni ntirho wa ku chumayela swi tsimbisiwa?

6. Yehovha a ta ku pfuna swaku u tiyisela

VHIDIYO: Yehovha A Ta Ni Nyika Ntamu (3:40)

• Ka vhidiyo, i mpsini swi nga pfuna vamakwerhu lava swaku va tiyisela?

Lerhani Varoma 8:35, 37-39 ni Vafilipiya 4:13. Loko se mi lerhile ndzimana ya ku sungula, bulani hi xivutiso mi gama mi yendla swa ku fana ni ka ndzimana leyin’wani:

• A ndzimana leyi yi ku pfunisa ku yini kuva u kholwa swaku swa koteka ku tiyisela mindzingo hinkwayu?

Lerhani Matewu 5:10-12, mi gama mi bula hi xivutiso lexi landzelaka:

• I ntxini xi nga ku yendlaka u tsaka hambiloko u hluphiwa?

LESWI HI NGA SWI DJONDZA

Yehovha a yi nyika lisima minzamu leyi hi yi yendlaka swaku hi mu tirhela hambiloko hi hluphiwa. Hi ku pfuniwa hi yena hi nga swi kota ku tama hi tiyisela!

Ku kambela leswi hi nga swi djondza

• Hi mhaka muni Vakreste va nga fanelanga va hlamala loko va hluphiwa?

• I mpsini leswi u nga swi yendlaka swoswi leswaku u ta kota ku tiyisela loko u ta hluphiwa?

• Hi mhaka muni u nga tiyisekaka swaku swa koteka ku tirhela Yehovha hambiloko u hluphiwa?

LOKO U LAVA KU TIVA SWIN’WANI

Vona swaku Yehovha a mu pfunise ku yini makwerhu mun’wani leswaku a tiyisela nkama a nga petiwa djele hi mhaka ya ku kala a nga tipeti ka politika.

Tiyisela Hambiloko U Hluphiwa (2:34)

Vona swaku Yehovha a va pfunise ku yini nuna na nsati swaku va tiyisela ku hluphiwa ku ringana malembe ya manyingi.

Ku Tirhela Yehovha Hi Nkama Wa Swikarhatu (7:11)

Vona swaku u nga swi kotisa ku yini ku tiyisela na u nga chavi loko u hluphiwa.

“Tilunghiseleli Swoswi Leswaku Uta Kota Kutiyisela loko U Xanisiwa” (Murindzi wa Julho wa 2019)

Vona swaku hi mhaka muni swi nga fanelanga swi hi hlamalisa loko vanhu va ndjangu wa hina va hi kaneta. U tlhela u vona swaku u nga yendla yini swaku ku tama ku va ni ku rhula, u tlhela u tama u tshembeka ka Yehovha loko u kanetiwa hi maxaka ya wena.

“A Ndzi Tisanga Ku Rhula, Kambe Ndzi Tise Banga” (Murindzi wa Outubro wa 2017 hi Xitsonga)