DJONDZO 59
U Nga Swi Kota Ku Tiyisela Loko U Hluphiwa
Hambi swo hlwela, Vakreste hinkwavu va ta kanetiwa ni ku hluphiwa. Se leswo swi fanele swi hi chavisa?
1. Hi mhaka muni hi fanele hi nyimela ku hluphiwa?
Bibele li li: “Hinkwavu lava navelaka ku hanya hi ku tirhela Xikwembu na va li vadjondzisiwa va Kreste Yesu, na vona va ta hluphiwa.” (2 Timotiyu 3:12) Yesu a hluphiwile hikusa a a nga tipeti ka swilo swa misava leyi ya Sathana. Leswi na hina hi kalaka hi nga tipeti ka swilo swa misava leyi, a swi hi hlamalisi loko hi hluphiwa hi mimfumu ni tinhlengeletanu ta wukhongeli. — Yohani 15:18, 19.
2. Hi nga tilunghiselelisa ku yini swaku hi tiyisela loko hi hluphiwa?
I swa lisima kuva hi mu tshemba hintamu Yehovha na ka ha li swoswi. Tinyiki nkama wa ku khongela u tlhela u lerha Bibele siku ni siku. Tlhela u ya mintlhanganwini nkama ni nkama. Loko u maha leswo u ta kuma ntamu wa ku tama u tiyisela na u nga chavi nchumu, hambiloko u hluphiwa hi maxaka kumbe hi vanhu van’wana. Mupostolo Pawulo lweyi a nga hluphiwa hintamu a vule leswi: “Yehovha i mupfuni wa mina; a ni nge chavi nchumu.” — Vaheberu 13:6.
Swin’wana swi nga hi pfunaka swaku hi nga chavi i ku va kona ka ntirho wa ku chumayela nkama ni nkama. Ku chumayela swa hi pfuna swaku hi mu tshemba hintamu Yehovha hi tlhela hi nga va chavi vanhu. (Swivuriso 29:25) Loko hi titoloveta ku chumayela swoswi na hi nga chavi nchumu, swi ta hi pfuna ku tama hi chumayela hambiloko mfumu wu zama ku hi tsimbisa. — 1 Vatesalonika 2:2.
3. Swi hi pfunisa ku yini ku tiyisela loko hi hluphiwa?
A nga kona lweyi a rhandzaka ku hluphiwa, kambe loko hi tiyisela ku hluphiwa, lipfumelo la hina li ta tiya. Loko hi tshinela kusuhi na Yehovha, hi ta swi vona swaku wa hi pfuna loko hi nga ha swi koti ku tiyisela. (Lerha Yakobo 1:2-4.) Yehovha a twa ku vava loko a hi vona na hi hlupheka kambe a tsaka hintamu loko hi tiyisela. Bibele li li: “Loko mi yentxa swa swinene mi gama mi xanisiwa kutani mi tiyisela, Xikwembu xa tsaka hi leswo.” (1 Pedru 2:20) Loko hi tshama na hi tshembekile, Yehovha a ta hi hakela hi ku hi nyika wutomi la ku kala li nga heli ka misava ya nyuwani, lani hi nga ta mu gandzela na hi nga ha hluphiwi hi munhu. — Matewu 24:13.
DJONDZA SWIN’WANA
Vona swaku swi nga kotekisa ku yini ku tirhela Yehovha hi ku tshembeka hambiloko u hluphiwa, ni minkateko leyi u nga ta yi kuma hi ku yentxa leswo.
4. U nga swi kota ku tiyisela loko u hluphiwa hi maxaka ya wena
Yesu a a swi tiva swaku a hi minkama hinkwayu maxaka ya hina ma nga ta swi tsakela swaku hi tirhela Yehovha. Lerhani Matewu 10:34-36, mi gama mi bula hi xivutiso lexi landzelaka:
I mpsini leswi maxaka ma nga swi mahaka loko munhu a sungula ku tirhela Yehovha?
Swaku u vona xikombiso xa leswo, sixtirani VHIDIYO, mi gama mi bula hi xivutiso lexi landzelaka.
A wu ta maha yini loko xaka, kumbe munghanu wa wena a zama ku ku tshikisa ku tirhela Yehovha?
Lerhani Tipisalema 27:10 na Marku 10:29, 30. Loko mi gama ku lerha ndzimana ha yin’we, bulani hi xivutiso lexi landzelaka:
Leswi tindzimana leti ti swi tshembisaka swi nga ku pfunisa ku yini loko maxaka kumbe vanghanu va wena va zama ku ku tshikisa ku tirhela Yehovha?
5. U nga tshiki ku gandzela Yehovha hambiloko u hluphiwa
Leswaku hi nga tshiki ku gandzela Yehovha hi fanele hi nga chavi loko van’wana va zama ku hi tshikisa. Sixtirani VHIDIYO, mi gama mi bula hi xivutiso lexi landzelaka.
Swikombiso leswi hi nga swi vona ka vhidiyo swi ku pfunisa ku yini swaku u nga chavi?
Lerhani Mintirho 5:27-29 na Vaheberu 10:24, 25. Loko mi gama ku lerha ndzimana ha yin’we, bulani hi xivutiso lexi landzelaka:
Hi mhaka muni swi li swa lisima ku tama hi gandzela Yehovha hambiloko mfumu wu hi tsimbisa ku ya mintlhanganwini kumbe ku chumayela?
6. Yehovha a ta ku pfuna swaku u tiyisela
Timboni ta Yehovha ta tintanga hinkwatu, ti tama ti tirhela Yehovha hi ku tshembeka hambiloko ti hluphiwa. Swaku u vona leswi pfunaka vamakwerhu lava, sixtirani VHIDIYO. Mi gama mi bula hi xivutiso lexi landzelaka.
I mpsini swi nga pfuna Timboni leti nga kombisiwa ka vhidiyo swaku ti tiyisela?
Lerhani Varoma 8:35, 37-39 na Vafilipiya 4:13. Loko mi gama ku lerha ndzimana ha yin’we, bulani hi xivutiso lexi landzelaka:
Tindzimana leti ti ku tiyisekisa ndjani swaku u nga swi kota ku tiyisela mindzingo hinkwayu?
Lerhani Matewu 5:10-12, mi gama mi bula hi xivutiso lexi landzelaka:
Swi kotekisa ku yini ku tsaka hambiloko u hluphiwa?
Vanhu va vanyingi lava gandzelaka Yehovha va swi kota ku tiyisela loko va kanetiwa. Na wena u nga swi kota!
VAN’WANA VA LI: “A ni nge swi koti ku tiyisela loko ni hluphiwa.”
Hi tini tindzimana leti nga pfunaka munhu lweyi a pimisaka leswo?
LESWI HI NGA SWI DJONDZA
Yehovha a yi vona yi li ya lisima minzamu leyi hi yi yentxaka swaku hi mu tirhela hambiloko hi hluphiwa. Hi ku pfuniwa hi yena, hi nga swi kota ku tiyisela!
Ku kambela leswi hi nga swi djondza
Hi mhaka muni Vakreste va fanele va nyimela ku hluphiwa?
U nga yentxa yini na ka ha li swoswi swaku u tilunghiselela ku hluphiwa?
I yini lexi nga ta ku pfunaka ku tiyiseka swaku u nga swi kota ku tirhela Yehovha hambiloko u kumana ni mindzingo?
LOKO U LAVA KU TIVA SWIN’WANA
Vona swaku Yehovha a li pfunise ku yini djaha lin’wana swaku li tama li tiyisela hambileswi li nga khomiwa li ya djele hi mhaka leswi li nga yala ku ya awusonchweni.
Vona leswi nga pfuna nuna na nsati swaku va tama va tirhela Yehovha hi ku tshembeka hambileswi a va kanetiwa.
Vona leswi u nga swi yentxaka swaku u tiyisela ku hluphiwa na u nga chavi nchumu.
“Tilunghiseleli Swoswi Leswaku Uta Kota Kutiyisela loko U Xanisiwa” (Murindzi wa Julho wa 2019)
Hi mhaka muni hi nga fanelanga hi hlamala loko maxaka ya hina ma hi kaneta? Hi nga maha yini swaku hi hanyisana hi ku rhula na wona hi tlhela tshama na hi tshembekile ka Yehovha?
“‘A Ndzi Tisanga Ku Rhula, Kambe Ndzi Tise Banga’” (Murindzi wa Outubro wa 2017 hi Xitsonga)