NHLOKOMHAKA YA DJONDZO 40
‘Ku Tisa Vanhu Va Vanyingi Ku Lulameni’
“Lava tisaka vanhu va ku tala ku lulameni va ta phatima ku fana ni tinyeleti hi masiku ni masiku.” — DAN. 12:3.
LISIMU 151 A Vafi Vata Pfuxiwa
LESWI HI NGA TA SWI DJONDZAa
1. Hi yini minchumu ya ku tsakisa leyi nga ta yentxeka ka nkama wa Mfumu wa Kreste wa 1.000 wa Malembe?
SWI TA tsakisa hintamu ku vona vanhu lani misaveni na va pfuxiwa ku feni hi nkama wa Mfumu wa Kreste wa 1.000 wa Malembe. Hinkwavu lava nga feliwa hi vanhu lava va rhandzaka va va xuva hintamu. Yehovha na yena wa va xuva. (Yobo 14:15) Pimisa hi leswi vanhu va nga ta tsakisa xiswona loko va vona lava va rhandzaka va pfuxiwa. Hi lani se hi nga djondza hi kona ka nhlokomhaka leyi nga hundza, “lava ku lulama,” ku nga lava mavito ya vona ma nga tsaliwa ka buku la wutomi, va ta pfuxiwa swaku va “kuma wutomi.” (Mint. 24:15; Yoh. 5:29) Swi nga yentxeka lava hi va rhandzaka va tekela ku pfuxiwa na ka ha li ku hundza Armajedoni.b Naswona, “lava kalaka va nga lulamanga,” ku nga lava nga fa na va nga djondzanga hi Yehovha, “va ta pfukela ku yavanyisiwa.”
2-3. a) Hi ku ya hi Esaya 11:9, 10, hi wini ntirho wa wukulu lowu nga ta yentxiwa? b) Hi ta bula hi yini ka djondzo leyi?
2 Hinkwavu lava nga ta pfuxiwa swi ta lava va djondzisiwa. (Esa. 26:9; 61:11) Hi mhaka leyo, ku ta va ni ntirho wa wukulu wa ku djondzisa wa ku a wu se tshama wu va kona. (Lerha Esaya 11:9, 10.) Hi mhaka muni swi ta lava va djondzisiwa? Lava ku kala va nga lulamanga, loko va pfuxiwa swi ta lava va djondza hi Yesu Kreste, Mfumu wa Xikwembu, nkutsulu, vito la Xikwembu va tlhela va djondza swaku Yehovha hi yena lweyi a nga ni mfanelo ya ku fuma. Hambi hi lava va ku lulama lava nga ta pfuxiwa swi ta lava va djondzisiwa hi leswi Yehovha a lavaka ku swi yentxa hi misava, leswi va nga fa na va nga swi tivi. Phela van’wana va vona, va fe hambi hi Bibele li nge se hela ku tsaliwa. Va ku lulama ni va ku kala va nga lulamanga va ta va ni swa swinyingi swa ku swi djondza.
3 Ka djondzo leyi hi ta bula hi swivutiso leswi landzelaka: Ntirho wa ku djondzisa lowu nga ta va kona wu ta yentxisiwa ku yini? Ntirho lowu wa ku djondzisa, wu ta va pfunisa ku yini lava ku lulama ni lava ku kala va nga lulamanga swaku mavito ya vona ma tsaliwa hi ku helela ka buku la wutomi? Tinhlamulu ta swivutiso leswi i ta lisima hintamu ka hina namuntlha. Hilani hi nga ta swi vona hi kona, wuprofeta la Daniyele ni la Nhlawutelo li ta hi pfuna ku swi twisisa kahle leswi nga ta yentxeka loko lava nga fa va ta pfuxiwa. A hi rhangeni hi ku bula hi wuprofeta la ku tsakisa leli nga ka Daniyele 12:1, 2.
“LAVA NGA YETLELA KA WUTHULU LA MISAVA VA TA PFUXIWA”
4-5. Daniyele 12:1 yi vula swaku ku ta yentxeka yini ka nkama wa wugamu?
4 Lerha Daniyele 12:1. Buku la Daniyele, li vulavula hi minchumu leyi nga ta yentxeka hi ku landzelelana ka nkama wa wugamu. Hi xikombiso, Daniyele 12:1 yi hlaya swaku Yesu Kreste, ku nga “Hosi ya yikulu leyi yi nyimelaka vanhu va [Xikwembu] a ta suka a nyima.” Lin’wana la wuprofeta leli li sungule ku hetiseka hi 1914 nkama Yesu a nga vekiwa swaku a va Hosi ya Mfumu wa Xikwembu.
5 Daniyele a tlhele a byeliwa swaku Yesu “a ta suka a nyima” ka “nkama wa ku karhata wa ku a wu se tshama wu va kona ku sukela tiko li va kona ku ta fikela nkama wolowo.” A nkama wolowo “wa ku karhata” i “nhlomulu wa wukulu” lowu ku vulavuliwaka hi wona ka Matewu 24:21. Ku va Yesu a suka a nyima swi vula swaku a ta lwela vanhu va Xikwembu loko nhlomulu wa wukulu se wu helile, ka nyimpi ya Armajedoni. Loko buku la Nhlawutelo li vulavula hi vanhu lava Yesu a nga ta va lwela li li i “xitshungu xa xinyingi” lexi ‘humaka hi ka nhlomulu wa wukulu.’ — Nhla. 7:9, 14.
6. Ku ta yentxeka yini loko se xitshungu xa xinyingi xi ta va xi ponile nhlomulu wa wukulu? Tlhamusela. (Vona ni “Swivutiso Swa Valerhi” leswi nga ka Murindzi lweyi, leswi vulavulaka hi lava nga ta pfuxiwa swaku va hanya lani misaveni.)
6 Lerha Daniyele 12:2. Ku ta yentxeka yini loko se xitshungu xa xinyingi xi ta va xi ponile nhlomulu wa wukulu? Khale a hi twisisa swaku Daniyele 12:2 yi vulavula hi ku pfuxeliwa ku ya hanya tilweni, kumbe ku kula ka ntirho wa ku chumayela lowu a wu tsimbisiwile hi 1918.c Kambe swoswi hi twisisa swaku ndzimana leyi yi vulavula hi ku pfuxiwa ka vafi loku nga ta va kona ka misava ya nyuwani. Hi mhaka muni hi vula leswo? Rito leli nge “wuthulu la misava” la tirhisiwa ni ka Yobo 17:16 kambe na li vulavula hi “Sirha.” Leswo swi hi yentxa hi twisisa swaku Daniyele 12:2 yi vulavula hi ku pfuxiwa ka vafi loku nga ta yentxeka loko masiku ya wugamu ni Armajedoni se swi hundzile.
7. a) Swi vula yini kuva van’wana va pfuxeliwa ku kuma “wutomi la ku kala li nga heli”? b) Hi mhaka muni Bibele li vula swaku ku pfuxiwa koloko i “ku pfuxiwa ka ku yampsa”?
7 Daniyele 12:2 li vula yini loko li ku van’wana va ta pfuxeliwa ku kuma “wutomi la ku kala li nga heli”? Leswo swi vula swaku ka 1.000 wa malembe, lava nga ta sungula ku djondza hi Yehovha kumbe lava nga ta tama va djondza hi Yehovha va tlhela va mu yingisa, hi wugamu va ta kuma wutomi la ku kala li nga heli. (Yoh. 17:3) Koloko ku ta va “ku pfuxiwa ka ku yampsa” ku tlula ku pfuxiwa ka vafi loku nga yentxeka ka nkama lowu nga hundza. (Heb. 11:35) Hi mhaka muni? Hi mhaka vanhu lava nga pfuxiwa ka nkama lowu nga hundza va tlhele va fa.
8. Swi vula yini kuva van’wana va pfuxeliwa ku “tekeliwa hansi ni ku nyenyiwa hi masiku ni masiku”?
8 A hi hinkwavu lava nga ta pfuxiwa lava nga ta pfumela ku djondzisiwa. Wuprofeta la Daniyele li vula swaku van’wana va ta pfuxeliwa ku “tekeliwa hansi ni ku nyenyiwa hi masiku ni masiku”. Leswi va nga ta kala va nga yingisi, mavito ya vona ma nga ta tsaliwa ka buku la wutomi funtshi va nga ta li kuma wutomi la ku kala li nga heli. Kambe va ta “nyenyiwa hi masiku ni masiku,” leswi vulaka swaku va ta helisiwa. Daniyele 12:2 yi vulavula hi leswi nga ta yentxekela lava nga ta pfuxiwa hi ku ya hi leswi va nga ta swi yentxa loko se va pfuxiwile.d (Nhla. 20:12) Van’wana va ta kuma wutomi la ku kala li nga heli, kasi van’wana a va nga ta li kuma.
KU PFUNA VANHU SWAKU VA VA VA KU LULAMA
9-10. a) Ku ta yentxeka yini loko se ku hundze nkama wa ku karhata? b) I vamani lava nga ta “phatima ku fana ni ku phatima ka le tilweni”?
9 Lerha Daniyele 12:3. Ku ta yentxeka yini loko se ku hundze “nkama wa ku karhata”? Daniyele 12:3 yi hi byela leswi nga ta yentxeka loko se ku hundze nhlomulu wa wukulu.
10 I vamani lava nga ta “phatima ku fana ni ku phatima ka le tilweni”? Nhlamulu hi yi kuma ka marito ya Yesu lama nga ka Matewu 13:43 leyi nge: “Hi nkama wolowo lava ku lulama va ta phatima ngopfu ku fana ni dlambu ka Mfumu wa Papayi wa vona.” Ka ndzimana leyi, Yesu a a vulavula hi vana va Mfumu ku nga vatotiwa lava nga ta fuma na yena matilweni. (Mat. 13:38) Se Daniyele 12:3 yi nga ha va yi vulavula hi vatotiwa ni ntirho lowu va nga ta wu yentxa ka Mfumu wa Kreste wa 1.000 wa Malembe.
Yesu ni lava 144.000 va ta kongomisa ntirho wa ku djondzisa lowu nga ta yentxiwa ka nkama wa 1.000 wa malembe (Vona paragrafu 11)
11-12. Hi wini ntirho lowu lava 144.000 va nga ta wu yentxa ka nkama wa 1.000 wa malembe?
11 Swi ta kotekisa ku yini swaku vatotiwa va ‘tisa vanhu va vanyingi ku lulameni’? Vatotiwa va ta tirhisana na Yesu swaku va rhangela ntirho wa wukulu wa ku djondzisa lowu nga ta yentxiwa ku ringana 1.000 wa malembe. Lava va 144.000 a va ngo to va tihosi ntsena kambe va ta tlhela va va vaprista. (Nhla. 1:6; 5:10; 20:6) Hi mhaka leyo, va ta pfuna matiko swaku ma hanyisiwa. Leswi swi vula swaku va ta pfuna vanhu swaku hi kutsongokutsongo va tlhela va hetiseka. (Nhla. 22:1, 2; Ezek. 47:12) Lowu ku ta va nkama wa ku tsakisa hintamu ka vatotiwa!
12 I vamani ‘vanhu va vanyingi’ lava nga ta tisiwa ku lulameni? Hi lava nga ta pfuxiwa ni lava nga ta pona Armajedoni ku patsa ni swivanana leswi nga ta psaliwa ka misava ya nyuwani. Loko se ku hele 1.000 wa malembe, vanhu hinkwavu lani misaveni va ta va se va hetisekile. Se, mavito ya vona ma ta tsaliwa nkama muni ka buku la wutomi swaku ma nga ha timiwi ku fana ni loko ma tsaliwe hi kaneta?
KU RINGIWA KA WUGAMU
13-14. Leswaku vanhu va ku hetiseka va kuma wutomi la ku kala li nga heli va fanele va yentxa yini?
13 Khumbuka swaku kuva munhu a hetisekile a swi vuli swona swaku se a ta li kuma wutomi la ku kala li nga heli. Pimisa hi Adamu na Evha. Vona a va hetisekile, kambe a swi lava va yingisa Yehovha swaku va kota ku kuma wutomi la ku kala li nga heli. Kambe xa ku biha xa kona a va mu yingisanga. — Rom. 5:12.
14 Ku ta yentxeka yini hi vanhu lani misaveni loko se ku ta va ku hele 1.000 wa malembe? Hinkwavu va ta va se va hetisekile. Ku nga va swaku vanhu hinkwavu va ta nyima ni wuhosi la Yehovha hi masiku ni masiku? Kumbe va ta tekelela Adamu na Evha lava kalaka va nga mu yingisanga Yehovha hambileswi a va hetisekile? A hi voneni tinhlamulu ta swivutiso leswi.
15-16. a) Vanhu va ta swi kombisa nkama muni swaku va nyima na Yehovha ni wuhosi la yena? b) Ku ta yentxeka yini loko ku kambeliwa ka wugamu se ku helile?
15 Sathana a ta pfaleliwa ku ringana 1.000 wa malembe. Hi nkama wolowo, a nga ha ta swi kota ku hambukisa vanhu. Kambe loko se 1.000 wa malembe ma helile, a ta chunsiwa funtshi hi nkama wolowo a ta yentxa hinkwaswu leswi a nga swi kotaka swaku a hambukisa vanhu va ku hetiseka. Hi nkama wolowo, vanhu hinkwavu va ku hetiseka va ta nyikiwa nkama wa ku kombisa swaku va li hlonipha vito la Yehovha ni wuhosi la yena. (Nhla. 20:7-10) Leswi va nga ta swi yentxa loko Sathana a va ringa, swi ta kombisa swaku mavito ya vona ma fanela ku tsaliwa hi ku helela ka buku la wutomi kumbe ihim.
16 Bibele li tlhela li vula swaku ku ta va ni vanhu lava nga ta kala va nga tshembeki ku fana na Adamu na Evha. Ku ta yentxeka yini hi vanhu volavo? Nhlawutelo 20:15 yi li: “Lweyi vito la yena li kalaka li nga tsaliwanga ka buku ya wutomi a txukumeteliwe ka ndhawu leyi ku pfurhaka ndzilu.” Phela vanhu volavo va ku kala va nga yingisi va ta dlayiwa swa wugamu. Kambe ku tala ka vanhu va ta swi kota ku tiyisela loko va ringiwa ka wugamu, funtshi mavito ya vona ma ta tsaliwa hi ku helela ka buku la wutomi.
LESWI NGA TA YENTXEKA KA “MASIKU YA WUGAMU”
17. I mpsini leswi ntsumi yi nga byela Daniyele swaku a swi ta yentxeka ka masiku ya hina? (Daniyele 12:4, 8-10)
17 Swi tsakisa hintamu ku pimisa hi leswi nga ta yentxeka ka nkama lowu taka. Hambileswo, ntsumi yi tlhele yi byela Daniyele swilo swa lisima leswi a swi ta yentxeka ka “masiku ya wugamu” lawa hi hanyaka ka wona. (Lerha Daniyele 12:4, 8-10; 2 Tim. 3:1-5) Ntsumi yi byele Daniyele yi ku: “Wutivi la ntiyiso li ta tala.” Phela ko va vanhu va Xikwembu ntsena lava a va ta twisisa wuprofeta leli hi ku helela. Ntsumi yi tlhele yi vula swaku hi nkama wolowo, “lava yentxaka swa ku biha va ta tama va swi yentxa naswona a va nge twisisi nchumu; kambe lava ku tlhariha va ta twisisa.”
18. Ku nga li khale ku ta yentxeka yini hi lava yentxaka swilo swa ku biha?
18 Namuntlha, swi tikomba ingi vanhu lava yentxaka swa ku biha a va khatisiwi. (Mal. 3:14, 15) Kambe ku nga li khale, Yesu a ta va yavanyisa ku fana ni loko a hambanisa timbuti ka tinyempfu. (Mat. 25:31-33) Lava yentxaka swa ku biha a va nga ta pona ka nhlomulu wa wukulu, funtshi a va nga ta pfuxiwa swaku va hanya ka misava ya nyuwani. Mavito ya vona a ma nga ta va kona ka “buku la xitsundzuxu” leli ku vulavuliwaka hi lona ka Malakiya 3:16.
19. Swoswi i nkama wa ku hi yentxa yini naswona hi mhaka muni? (Malakiya 3:16-18)
19 Swoswi i nkama wa ku hi kombisa swaku hina a hi kona xikarhi ka vanhu lava yentxaka swilo swa ku biha. (Lerha Malakiya 3:16-18.) Swoswi i nkama wa ku Yehovha a hlengeleta ‘vanhu va yena va ku hlawuleka’ kumbe lava va yentxaka leswi swi mu tsakisaka. Phela ha swi lava ku va xikarhi ka vanhu volavo.
Swi ta tsakisa ndjhani ku vona Daniyele ni vanhu hinkwavu lava hi va rhandzaka va pfuxiwa ka misava ya nyuwani! (Vona paragrafu 20)
20. I mpsini leswi Daniyele a nga tshembisiwa swona, naswona hi mhaka muni u swi navela ku vona xitshembiso xolexo xi hetiseka?
20 Swoswi hi hanya ka nkama wa ku tsakisa, kambe nkama wa ku hlamalisa hintamu wa ha li ku teni. Ku nga li khale, hi ta vona ku helisiwa ka swilo hinkwaswu swa ku biha. Hi ta tlhela hi vona ku hetiseka ka marito lawa Yehovha a nga ma byela Daniyele a ku: “U ta humula kambe u ta pfuka u kuma tshomba la wena a ku heleni ka masiku.” (Dan. 12:13) Wa swi navela ku vona Daniyele ku patsa ni varhandziwa va wena lava nga fa va pfuxiwa? Loko u swi navela, u nga tshiki ku tshama u tshembekile. Loko u yentxa leswo, vito la wena li ta tsaliwa ka buku la wutomi li tlhela li nga ha susiwi.
LISIMU 80 ‘Ringa U Vona Swaku Yehovha i Munene’
a Nhlokomhaka leyi yi ta hi pfuna ku yampsisa matwisiselo lawa a hi li na wona hi ntirho wa wukulu wa ku djondzisa lowu nga ta yentxiwaka ka nkama lowu taka lowu tlhamuseliwaka ka Daniyele 12:2, 3. Hi ta vona swaku wuprofeta leli li ta hetiseka nkama muni ni swaku i vamani lava li va khumbaka. Hi ta tlhela hi vona swaku ntirho lowu wa ku djondzisa wu ta va pfunisa ku yini vanhu swaku va lunghekela ku ringiwa ka wugamu loku nga ta va kona loko Mfumu wa Kreste wa 1.000 wa Malembe se wu helile.
b Swi nga yentxeka ku pfuxiwa ka vafi ku ta sungulela ka vanhu lava nga gamesa ku fa na va tshembekile ka masiku ya wugamu, swi gama swi fambisa swoleswo anze ka munhu lweyi a nga va wa ku sungula a fa na a tshembekile. Loko ku li swaku swi ta yentxekisa xileswo, swi ta koteka swaku vanhu hinkwavu va hoyozela vanhu lava va va tivaka loko va pfuxiwa hi ku landzelelana ka vona. Ku nga na mhaka swaku ku pfuxiwa ka vafi ku ta yentxekisa ku yini lani misaveni, Bibele li li ku pfuxiwa ka lava nga ni ntshembo wa ku hanya tilweni ku yentxeka hi ndlela ya ku hleleka, se a hi kanakani swaku ni ku pfuxiwa ka lava nga ni ntshembo wa ku hanya lani misaveni ku ta yentxeka hi ndlela leyi fanaka. — 1 Kor. 14:33; 15:23.
c Ntlhamuselo lowu i matwisiselo ya nyuwani ya mhaka leyi nga ka buku leli nge: Nyikela Nyingiso Eka Vuprofeta Bya Daniyele! ndzima 17, ni Murindzi wa 1 ka Julho wa 1987 mapaj. 21-25 (hi Xitsonga).
d Ku hambana ni wuprofeta la Daniyele 12:2, marito lama nge: “Lava ku lulama “ ni lama nge: “Lava kalaka va nga lulamanga” lawa ma nga ka Mintirho 24:15, ku patsa ni lama nge: “Lava a va yentxa swa swinene” ni “lava a va yentxa swa ku biha” lama nga ka Yohani 5:29 ma vulavula hi leswi vanhu va nga swi yentxa na va nge se fa.