Li Ku Khumbisa Ku Yini Wuprofeta Leli Li Nga Ka Nhlawutelo?

 1. Hi xini xiboho lexi vanhu hinkwavu va faneleke va xi yentxa?

HI XINI xiboho xa lisima lexi vanhu va faneleke va xi yentxa? Va fanele va langa swaku va ta nyima na Yehovha kumbe va ta nyima na Sathana. Leswi va nga ta swi langa, swi ta yentxa leswaku va kuma wutomi la ku kala li nga heli kumbe va dlayiwa. (Mat. 25:31-33, 46) Ka “nhlomulu wa wukulu”, vanhu va ta markariwa swaku va ponisiwa kumbe va dlayiwa. — Nhla. 7:14; 14:9-11; Ezek. 9:4, 6.

 2. a) Buku la Vaheberu 10:35-39 li hi byela swaku hi yentxa yini? b) Buku la Nhlawutelo li vulavula hi yini?

² Lerha Vaheberu 10:35-39. Loko u lange ku nyima na Yehovha u yentxe xiboho xa xinene funtshi swoswi u navela ku pfuna van’wana swaku na vona va yentxa xiboho xa xinene. Swaku u kota ku yentxa leswo, u nga tirhisa leswi nga ka buku la Nhlawutelo. Buku leli li vulavula hi leswi swi nga ta yentxekela lava kalaka va nga mu yingisi Yehovha, li tlhela li vulavula hi minkateko leyi nga ta kumiwa hi lava va mu yingisaka. I swa lisima ku djondza mintiyiso leyi ya lisima, hikusa ku yentxa leswo swi ta hi pfuna ku tama hi tirhela Yehovha. Se, hi nga tirhisa leswi hi nga swi djondza swaku hi pfuna van’wana kuva na vona va tirhela Yehovha.

 3. Hi ta bula hi yini ka djondzo leyi?

³ Ka djondzo leyi, hi ta hlamula swivutiso leswi: Ku ta yentxeka yini hi lava va nyimaka ni Mfumu wa Xikwembu? Ku ta yentxeka yini hi lava nyimaka ni xiharhi xa ku chavisa hintamu xa ku pshuka lexi ku vulavuliwaka hi xona ka buku la Nhlawutelo?

 4. I vamani lava Yohani a nga va vona na va nyime na Yesu amatilweni?

⁴ Mupostolo Yohani a vone mintlawa yimbirhi ya vanhu lava nyimaka na Yehovha, lava va nga ta kuma wutomi la ku kala li nga heli. Ntlawa wa ku sungula wu ni 144.000 wa vanhu. (Nhla. 7:4) Vanhu lava va langiwile lani misaveni swaku va ya fuma na Yesu amatilweni.Va ta fuma misava hinkwayu na Yesu. (Nhla. 5:9, 10; 14:3, 4) Yohani a va vona na va nyime na Yesu amatilweni ka Nhava ya Siyoni. — Nhla. 14:1.

 5. Ku ta yentxeka yini hi lava 144.000 lava va nga sala?

⁵ Ku sukela ka nkama wa vapostolo ku ta fikela swoswi, ku ni vanhu va vanyingi lava nga langiwa swaku va ya hanya matilweni. (Luk. 12:32; Rom. 8:17) Yohani a byeliwe swaku ka lava va nga ta ya matilweni, i vatsongo lava a va ta va va ha hanya lani misaveni ka masiku ya wugamu. Na ku nge se sungula nhlomulu wa wukulu, Yehovha a ta ‘markara’ “lava nga sala”, kuva a va komba swaku wa ha va yamukela. (Nhla. 7:2, 3; 12:17) Loko nhlomulu wa wukulu se wu sungulile, lava va nga sala ka lava va 144.000 va ta yisiwa tilweni swaku va ya tipatsa ni lava va nga fa na va tshembekile. Va ta ya fuma na Yesu ka Mfumu wa Xikwembu. — Mat. 24:31; Nhla. 5:9, 10.

6-7. a) Hi wini ntlawa wa wumbirhi lowu Yohani a nga wu vona, naswona hi tiva yini hi wona? b) Hi mhaka muni swi li swa lisima ku va hi twisisa buku la Nhlawutelo ndzima 7, ku nga na mhaka swaku hi langiwe swaku hi hanya tilweni kumbe lani misaveni?

⁶ Loko se a vone ntlawa wa vanhu lava nga ta hanya tilweni, Yohani a game a vona “xitshungu xa xinyingi” lexi kalaka xi nga konteki. (Nhla. 7:9, 10) Hi djondza yini hi vanhu lava? Yohani a byeliwe leswi: “Vanhu lava va huma ka nhlomulu wa wukulu naswona va hlampse timpahla ta vona ta ku leha va tibasisa hi ngati ya Xinyempfana.” (Nhla. 7:14) Loko se xi pone nhlomulu wa wukulu “xitshungu xa xinyingi”, xi ta tikhorisa hi minkateko ya Xikwembu lani misaveni hi masiku ni masiku. — Pis. 37:9-11, 27-29; Swi. 2:21, 22; Nhla. 7:16, 17.

⁷ A ku na mhaka kumbe hi langiwe ku hanya lani misaveni kumbe ku ya hanya tilweni, hinkwerhu hi ta ku vona ku hetiseka ka swiprofeto leswi nga ka buku la Nhlawutelo ndzima 7. Phela lowu ku ta va nkama wa ku tsakisa ka hinkwerhu, ku nga na mhaka swaku hi ta hanya tilweni kumbe lani misaveni. Hi ta tsaka hintamu hi mhaka ya leswi hi nga langa ku nyima ni Mfumu wa Yehovha. Kasi buku la Nhlawutelo li hi byela yini hi nhlomulu wa wukulu? — Mat. 24:21.

 8. a) Nhlomulu wa wukulu wu ta sungulisa ku yini? b) Lava va kalaka va nga mu tirheli Yehovha va ta yentxa yini loko wu ta sungula?

⁸ Hilani hi nga swi vona hi kona ka djondzo leyi nga hundza, mimfumu yi ta dumela Babilona wa Mukulu, ku nga wukhongeli hinkwalu la mavunhwa, funtshi leswo a swi nge te hlwela. (Nhla. 17:16, 17) Lawa ku ta va masungulu ya nhlomulu wa wukulu. Ku nga va swaku leswo swi ta yentxa swaku ku va ni vanhu va vanyingi lava lavaka ku tirhela Yehovha? Ihim. Buku la Nhlawutelo ndzima 6 li kombisa swaku ka nkama wolowo wa ku karhata, hinkwavu lava kalaka va nga mu tirheli Yehovha va ta lavetela ku vhikeliwa ka mintlawa ya politika ni vaxavisi va misava lava fanisiwaka ni tinhava. Leswi va kalaka va nga nyimi ni Mfumu wa Xikwembu, ka Yehovha vona i valala. — Luk. 11:23; Nhla. 6:15-17.

 9. a) Impsini leswi vanhu va Yehovha va nga ta tama va swi yentxa hi nkama wa nhlomulu wa wukulu? b) I yini leswi matiko ya manyingi ma nga ta swi yentxa?

⁹ Leswi nga ta yentxeka ka nhlomulu wa wukulu a swi nga ta va karhata lava tirhelaka Yehovha hi ku tshembeka. Ku ta va vona ntsena lava nga tama va tirhela Yehovha va tlhela va nga pfumeli ku nyima ni “xiharhi xa ku chavisa hintamu”. (Nhla. 13:14-17) Phela leswo, swi ta yentxa swaku lava kalaka va nga nyimi na Yehovha va kwata swa wugamu. Hi mhaka leyo, matiko ya manyingi ma ta tipatsa swaku ma dumela vanhu va Yehovha misaveni hinkwayu. Bibele li li leswi nga ta yentxekela vanhu va Yehovha, i ku dumeliwa hi Gogo na Magogo. — Ezek. 38:14-16.

10. Hi ku ya hi Nhlawutelo 19:19-21, Yehovha a ta yentxa yini loko a vona vanhu va yena va dumeliwa?

¹⁰ Yehovha a ta yentxa yini loko a vona vanhu va yena va dumeliwa? Yena hi yexe a li: “Ni ta kwata hintamu.” (Ezek. 38:18, 21-23) Nhlawutelo ndzima 19 yi hi byela leswi nga ta gama swi yentxeka. Yehovha a ta rhuma N’wana wa yena Yesu swaku a vhikela vanhu va yena a tlhela a dlaya lava yentxaka minchumu ya ku biha. Yesu a ta lwa na a pfuniwa hi “masonchwa ya le tilweni” ku nga tintsumi ni lava va 144.000. (Nhla. 17:14; 19:11-15) A nyimpi ya Armajedoni yi ta gamisa ku yini? Yi to hela loko se ku dlayiwile hinkwavu lava yentxaka minchumu ya ku biha!  — Lerha Nhlawutelo 19:19-21.

11. Hi wini nchumu wa lisima hintamu lowu nga ka buku la Nhlawutelo lowu nga ta yentxeka?

¹¹ Pimisa hi leswi vanhu va ku tshembeka va nga ta titwisa xiswona loko va huluka nkama lowu Yehovha a nga ta helisa vanhu lava yentxaka swa ku biha! Phela swi ta tsakisa hintamu. Hambileswi ku nga ta tsakiwa atilweni nkama lowu Babilona wa Mukulu a nga ta helisiwa swa wugamu, leswi nga ta landzela swi ta yentxa swaku ku tsakiwa hintamu ku tlhela ku biwa ni minkulungwana. (Nhla. 19:1-3) Phela hi nkama wolowo ku ta va na ku yentxeka nchumu wa lisima hintamu, ku nga “muchadu wa Xinyempfana”. — Nhla. 19:6-9.

12. Hi ku ya hi buku la Nhlawutelo 21:1, 2, muchadu wa Xinyempfana wu ta yentxeka nkama muni?

¹² Muchadu wa Xinyempfana wu ta yentxeka nkama muni? Hinkwavu lava 144.000 va ta va tilweni na nyimpi ya Armajedoni yi nga se sungula, kambe wu ta va wu nga se fika nkama wa muchadu wa Xinyempfana. (Lerha Nhlawutelo 21:1, 2.) Muchadu wa Xinyempfana wu ta yentxeka loko nyimpi ya Armajedoni se yi helile, funtshi na vanhu lava yentxaka swa ku biha se va helisiwile. — Pis. 45:3, 4, 13-17.

13. Ku ta yentxeka yini ka muchadu wa Xinyempfana?

¹³ Ku ta yentxeka yini ka muchadu wa Xinyempfana? Ku fana ni leswi muchadu wu tlhanganisaka wanuna ni wansati, muchadu lowu wa ku fanekisela wu ta tlhanganisa Hosi Yesu ni “noivha” wa yena ku nga lava 144.000. Muchadu wolowo wu ta yentxa swaku ku va ni Mfumu wa nyuwani lowu nga ta fuma misava hinkwayu hi 1.000 wa malembe. — Nhla. 20:6.

14-15. Buku la Nhlawutelo 21 li va fananisa ni yini lava 144.000? (Vona mufoto wa pajina la ku sungula.)

¹⁴ Buku la Nhlawutelo ndzima 21 li fananisa lava 144.000 ni doropa la ku xonga hintamu, leli vitaniwaka swaku i “Jerusalema wa Nyuwani”. (Nhla. 21:2, 9) Doropa lolelo li yakiwe henhla ka 12 wa maribye lawa ku nga tsaliwa “12 wa mavito ya 12 wa vapostolo va Xinyempfana.” Hi mhaka muni Yohani a tsakile nkama a nga vona swilo leswi? A tsakile hikusa ka lin’we la maribye wolawo a ku tsaliwe vito la yena. Phela leswo a swi tsakisa! — Nhla. 21:10-14; Efe. 2:20.

¹⁵ Doropa leli a li nga fani ni ma’wana. Lona a li yakiwe hi woru la linene, a li ni 12 wa swipfalu leswi nga yentxiwa hi maperola. A maparedi ya kona a ma xongiseliwe hi maribye ya lisima hintamu, funtshi doropa leli a li pimiwe kahle. (Nhla. 21:15-21) Kambe Yohani a vone swaku a ku ni lexi a xi chota. A li: “A ni yi vonanga tempele ndzeni ka doropa hikusa Yehovha Xikwembu xa Matimba Hinkwawu ni Xinyempfana, hi vona tempele ya doropa leli. Naswona doropa leli a li lavi dlambu kumbe n’weti leswaku wu voninga, hikusa ku phatima ka Xikwembu ka li voningela naswona Xinyempfana i gezi la doropa leli.” (Nhla. 21:22, 23) Lava va lumbaka Jerusalema wa Nyuwani va ta va na Yehovha. (Heb. 7:27; Nhla. 22:3, 4) Se Yehovha na Yesu i tempele la doropa leli.

16. Vanhu lava va nga ta fumiwa hi Mfumu wa Xikwembu ka 1.000 wa malembe va ta va ni wutomi la ku tshamisa ku yini?

¹⁶ Swi ta va tsakisa lava va nga ta fuma na Yesu tilweni ku vona doropa leli. Lava nga ta hanya lani misaveni na vona swi ta va tsakisa. Hikusa aJerusalema wa Nyuwani a ta yentxa swaku va kuma minkateko ya yinyingi ka 1.000 wa malembe lawa ku nga ta fuma Mfumu wa Xikwembu. Yohani a vone minkateko leyi na yi xika ku fana ni “nambu wa mati ya wutomi”. Ka matlhelo hamambirhi ya nambu ku ni “minsinya ya wutomi” leyi humesaka matluka lawa ‘ma hanyisaka matiko.’ (Nhla. 22:1, 2) Vanhu hinkwavu va ta tikhorisa hi minchumu leyi ya yinene. Hi kutsongokutsongo va ta ya va suseliwa xidjoho, a ku nga ha ta vabyiwa, a ku nga ha ta twiwa ku vava funtshi a ku nga ha ta va ni ku rila hi ku vaviseka. — Nhla. 21:3-5.

17. Hi ku ya hi Nhlawutelo 20:11-13, i vamani lava va nga ta tikhorisa hi minkateko leyi?

¹⁷ I vamani lava nga ta tikhorisa hi minkateko leyi? I xitshungu xa xikulu lexi nga ta pona ka Armajedoni ku patsa ni vana lava nga ta psaliwa ka misava ya nyuwani. Buku la Nhlawutelo ndzima 20 li hi tshembisa swaku lava nga fa va ta pfuxiwa. (Lerha Nhlawutelo 20:11-13.) “Lava ku lulama” lava nga fa khale ni “lava kalaka va nga lulamanga” ku nga lava nga fa na va nga djondzisiwanga hi ta Yehovha, hinkwavu va ta pfuxiwa swaku va tlhela va hanya lani misaveni. (Mint. 24:15; Yoh. 5:28, 29) Indje leswo swi vula swaku hinkwavu lava nga fa va ta pfuxiwa swaku va hanya ka 1.000 wa malembe? Ihim. Hinkwavu lava nga yala ku tirhela Yehovha na va nga se fa, a va nga ta pfuxiwa. Va nyikiwe nkama, kambe va kombise swaku a va swi lavi ku hanya ka paradesi lani misaveni. — Mat. 25:46; 2 Tes. 1:9; Nhla. 17:8; 20:15.

18. Ku ta yentxeka yini hi vanhu nkama ku nga ta hela 1.000 wa malembe?

¹⁸ Nkama ku nga ta hela 1.000 wa malembe, hinkwavu lava va nga ta va na va hanya lani misaveni, va ta va na va nga ha na xidjoho. Hinkwavu va ta va va chunsekile ka xidjoho lexi hi nga xi kuma ka Adamu. (Rom. 5:12) Xidjoho lexi hi nga xi kuma ka Adamu, xi ta va na xi helisiwile. Hi mhaka leyo, loko ku hela 1.000 wa malembe, hinkwavu lava va nga ta va na va hanya lani misaveni va ta va na va nga ha na xidjoho. — Nhla. 20:5.

19. Hi mhaka muni hi fanele hi ringiwa loko ku hela 1.000 wa malembe?

¹⁹ Hinkwerhu ha swi tiva swaku Yesu a tshame na a tshembekile minkama hinkwayu hambileswi a nga ringiwa hi Sathana. Indje vanhu hinkwavu va ku kala va nga na xidjoho va ta swi kota ku tshembeka loko Sathana a va ringa? Mun’wana ni mun’wana a ta tihlamulela nkama Sathana a nga ta humesiwa ka xikhele xa ku yenta loko ku hela 1.000 wa malembe. (Nhla. 20:7) Lava nga ta tshembeka hi nkama lowu hi nga ta ringiwa ka wugamu, va ta kuma wutomi la ku kala li nga heli va tlhela va hanya na va chunsekile. (Rom. 8:21) Kasi lava nga ta kala va nga xi yingisi Xikwembu, va ta dlayiwa swa wugamu xikan’we na Sathana ni Madimoni na yena. — Nhla. 20:8-10.

20. U titwisa ku yini hileswi u nga twisisa wuprofeta leli nga ka buku la Nhlawutelo?

²⁰ U titwisa ku yini hileswi u nga twisisa wuprofeta leli nga ka buku la Nhlawutelo? Phela swa tsakisa ku twisisa wuprofeta leli la ku hlamalisa! Leswo swi nga ha ku yentxa u lava ku rhamba van’wani swaku na vona va djondza hi ta Xikwembu. (Nhla. 22:17) Leswi se hi nga djondza hi leswi swi nga ta yentxeka ka nkama lowu taka, hi tsakile funtshi hi lava ku hlaya leswi Yohani a nga swi vula nkama a nga te: “Amen! Tana Hosi Yesu.” — Nhla. 22:20.