Wa Ha Khumbuka?

U ti lerhe kahle tinhlokomhaka ta Murindzi wa lembe leli? A wu ta swi hlamulisa ku yini swivutiso leswi landzelaka:

Hi yini minkateko leyi u nga ta yi kuma loko u khongela, u djondza Bibele ni ku pimisa hi leswi u swi djondzaka?

Hi ta yendla swiboho swa swinene, hi va vadjondzisi va kahle, hi tiyisa lipfumelo la hina hi tlhela hi mu rhandza hintamu Yehovha. — Murindzi 01/22 mapaj. 30-31.

Ku tshemba Yehovha ni lava a va tirhisaka swaku va hi kongomisa swi nga hi pfunisa ku yini?

Swoswi i nkama wa ku hi tshemba ndlela leyi Yehovha a yendlaka swilo hi yona, hi tlhela hi yingisa nkongomiso wa madoda ni ku nyima ni swiboho leswi ma swi yendlaka. Loko hi yendla leswo, loko magamu ma fika swi ta hi vevukela ku yingisa nkongomiso, hambiloko minkama yin’wani hi nga wu twisisi. — Murindzi 02/22 mapaj. 4-6.

Ntsumi a yi lava ku vula yini loko yi byela Zakariya hi ‘ngoti ya ku pima leyi nga khomiwa hi Zerubabele’? (Zak. 4:8-10)

Leswi Zakariya a nga swi vona swi pfune Vayuda swaku va tiyiseka swaku tempele a yi ta yakiwa yi za yi hela naswona a yi ta mu tsakisa Yehovha. — Murindzi 03/22 mapaj. 16-17.

U nga swi kotisa ku yini ku va xikombiso xa xinene ka ku vulavula? (1 Tim. 4:12)

Hi nga va xikombiso xa xinene ka ku vulavula nkama hi chumayelaka, hi ku yimbelela loko hi li mintlhanganwini, hi nyikela tinhlamulu nkama ni nkama, hi vula swilo leswi nga ta tiyisa van’wana, hi vulavula ntiyiso ni ku kala hi nga hlevi vanhu van’wani. — Murindzi 04/22 mapaj. 6-9.

4 wa swiharhi swa ku chavisa (mimfumu) leswi ku vulavuliwaka hi swona ka Daniyele ndzima 7, swi twananisa ku yini ni xiharhi xa ku chavisa lexi ku vulavuliwaka hi xona ka Nhlawutelo 13:1, 2?

Xiharhi xa ku chavisa lexi ku vulavuliwaka hi xona ka Nhlawutelo 13 a xi nyimeli mfumu wun’we ntsena, wa ku fana ni Roma. Kambe xi nyimela mintlawa hinkwayu ya politika leyi fumaka vanhu. — Murindzi 05/22 paj. 9.

Hi nga swi kombisisa ku yini swaku ha ti khensa timpsalu ta Yehovha?

Loko va hi rhuketela, va hi kwatisa kumbe va hi djohela, a hi nga ta veketela xiviti kambe hi ta swi tshika ka mavoko ya Yehovha. Yena a ta helisa swilo hinkwaswu leswi nga vangiwa hi xidjoho. — Murindzi 06/22 mapaj. 10-11.

I mpsini leswi makwerhu lweyi a khongelaka mintlhanganwini a faneleke a swi khumbuka?

Xikhongelo a xi yentxeliwanga ku laya, ku djondzisa hambi ku yentxa switiviso. Makwerhu lweyi a khongelaka a nga fanelanga a “tatela marito” ngopfungopfu loko a yendla xikhongelo xa ku sungula mintlhanganu. (Mat. 6:7) — Murindzi 07/22 mapaj. 24-25.

Swi vula yini kuva “lava a va yentxa swa ku biha” va “pfukela ku yavanyisiwa”? (Yohani 5:29)

Leswo a swi vuli swona swaku va ta pfukela ku khatisiwa hi mhaka swidjoho leswi va nga swi yentxa na va nge se fa. Kambe ku yavanyisiwa loku ku vula swaku va ta ta kambeliwa ku vona swaku va swi yingisa kumbe a va swi yingisi leswi va nga ta djondzisiwa swona loko se va pfuxiwile. — Murindzi 09/22 paj. 18.

Hi xini xitiviso xa ku tsakisa lexi makwerhu J. F. Rutherford a nga xi nyikela ka kongresu leli nga va kona hi Setembro wa 1922?

Ka kongresu leli nga va kona aCedar Point, Ohio, makwerhu Rutherford a te: “Hosi se ya fuma! Naswona n’wina mu vachumayeli va yona. Hi mhaka leyo, twalisani, twalisani, twalisani Hosi ni Mfumu wa yona.” — Murindzi 10/22 mapaj. 3-5.

Hi ku ya hi Esaya 30 hi tini tindlela tinharhu leti Yehovha a ti tirhisaka swaku a hi pfuna ku tiyisela?

Yehovha a hi pfuna ku tiyisela 1) hi ku yingisa ni ku hlamula swikhongelo swa hina, 2) hi ku hi kongomisa, ni 3) ku hi katekisa swoswi ni ka nkama lowu taka. — Murindzi 11/22 paj.  9.

Hi mhaka muni hi vula swaku marito ya Tipisalema 37:10, 11, 29 ma hetisekile khale naswona ma ta hetiseka ka nkama lowu taka?

Davhida a profete hi minkateko leyi Vayisrayele a va ta yi kuma ka mfumu wa Solomoni. Yesu a tlhele a boxa marito lawa ma nga ka vhersikulu 11 na a kombetela ka paradesi ya nkama lowu taka. (Mat. 5:5; Luk. 23:43) — Murindzi 12/22 mapaj. 8-10, 14.