Langutela Armajedoni hi Kunavela Lokukulu!

1-2. a) Hi mhaka muni Armajedoni kuli mahungu yotsakisa ka vanhu? b) Hi swihi swivutiso leswi hingata bula hi swona ka djondzo leyi?

KUNGAVA leswaku u tshama u twa vanhu va vula leswaku Armajedoni i nyimpi ya misava hinkwayu leyi ka yona kungata bulukela mabomba ya makulu kumbe mhangu yayikulu ya ntumbuluku? Kuhambana ni leswo, Bibele li djondzisa leswaku Armajedoni i nchumu wa kutsakisa. (Nhla. 1:3) Nyimpi ya Armajedoni ayi teli kuta helisa vanhu kambe yi tela kutava ponisa! Swita yendlekisa kuyini?

² Bibele li kombisa leswaku nyimpi ya Armajedoni yita ponisa vanhu hi kuhelisa mimfumu ya misava. Yita yendla leswo hi kuhelisa vanhu hinkwavu vobiha ivi yi ponisa lavolulama. Naswona yita sirhelela misava ya hina ka lava vayi wonhaka. (Nhla. 11:18) Leswaku hiwu twisisa kuyampsa ntiyiso lowu, ahi kambisiseni swivutiso leswi landzelaka: I yini Armajedoni? I mpsini swingata yendleka loko yi li kusuhi hintamu ni kufika? Hi fanele hi yendla yini leswaku na hina hi pona? Hingaswi kotisa kuyini kutshama na hi tshembekile leswi Armajedoni yi tshinelaka?

 3. a) Rito lelinge Armajedoni li vula yini? b) Hikuya hi Nhlavutelo 16:14, 16, hiswi tivisa kuyini leswaku Armajedoni ahi ndhawu yokarhi leyinga kona laha misaveni?

³ Lerha Nhlavutelo 16:14, 16. Rito lelinge “Armajedoni” lo humelela kan’we ntsena ka Bibele naswona li sukela ka rito la Xiheberu leli vulaka Ntshava ya Mejido. (Nhla. 16:16) Mejido aku li doropa leli ali kumeka ka Israyele wa khale. (Yoxu. 17:11) Kambe Armajedoni ahi ndhawu yokarhi leyinga kona laha misaveni. Kuvula ntiyiso i xiyimu lexingata vaka kona loko “tihosi ta misava hinkwayu” ti nhlengeletiwa akuva ti lwa na Yehovha. (Nhla. 16:14) Hambileswo, ka nhlokomhaka leyi, rito lelinge “Armajedoni” li tlhela li tirhisiwa kukombetela ka nyimpi leyingata landzela loko tihosi ta misava hinkwayu se ti hlengeletiwile. Hiswi tivisa kuyini leswaku Armajedoni i ndhawu ya kufanekisela? Xosungula, ntshava ya Mejido ayi zanga yiva kona. Xa wumbirhi, Mejido i ndhawu yayitsongo ngopfu naswona “tihosi ta misava hinkwayu”, masonchwa ni matlhari ya wona amange yeneli ka yona. Xa wunharhu, hilaha hingataswi vona ha kona ka djondzo leyi, nyimpi ya Armajedoni yita sungula loko “tihosi” ta misava ti hlasela vanhu va Xikwembu lava tshamaka ka tindhawu ta ku hambanahambana.

 4. Hi mhaka muni Yehovha a yendle leswaku kuva ni kuyelana ka nyimpi ya yena leyikulu yawugamu ni Mejido?

⁴ Hi mhaka muni Yehovha a yendle swaku kuva ni kuyelana a xikarhi ka nyimpi leyikulu ya wugamu ni Mejido? Minkameni ya Bibele tinyimpi tatinyingi ati lweliwa a Mejido ni le kusuhi ni nkova wa Yizriyele. Minkama yin’wana Yehovha a apfuna vanhu va yena leswaku va hlula ka tinyimpi toleto. Hi xikombiso, ‘kusuhi ni mati ya Mejido’, Xikwembu xi pfune wanuna wa Muyisrayele lweyi aali muyavanyisi, lweyi a avitaniwa Baraka akuva a hlula masonchwa ya Vakanana lawa ama rhangeliwa hi Sisera. Baraka ni muprofeta waxisati Debora vamu khense hintamu Yehovha hi mhaka leswi ava pfuneke kuhlula hi ndlela ya singita. Kutani va yimbelele va ku: ‘Tinyeleti ti lwile kusukela tilweni, ti lwe na Sisera . . . Xinambyana lexi tsutsumaka xa Kixoni xiva khukhulile’. — Vaava. 5:19-21.

 5. Hi kwini kuhambana loku kunga kona exikarhi ka Armajedoni ni nyimpi leyi Baraka ayi lweke?

⁵ Baraka na Debora va gamese lisimu la vona hi marito lawa: “Onge valala va wena hinkwavu vanga fa, We Yehovha, Kambe lavakurhandzaka a va fane ni dlambu loko li huma hi kuvangama ka lona.” (Vaava. 5:31) Hi kufanana, ka nyimpi ya Armajedoni valala va Xikwembu na vona vata helisiwa kasi lava rhandzaka Xikwembu vata ponisiwa. Kambe ku ni kuhambana lokukulu xikarhi ka tinyimpi leti ta timbirhi. Ka nyimpi ya Armajedoni vanhu va Xikwembu avangata lwa kumbe kutamela matlhari. ‘Matimba ya vona matava kona hi kuva vatshama varhulile ni kukombisa kutshemba’ Yehovha ni tintsumi ta yena. — Esa. 30:15; Nhla. 19:11-15.

 6. Yehovha angaha tirhisa yini leswaku a hlula valala va yena ka Armajedoni?

⁶ Yehovha angaha tirhisa yini leswaku a hlula valala va yena ka Armajedoni? Angaha tirhisa tindlela to hamabanahambana. Hi xikombiso, angaha tirhisa kutsekatseka ka misava, a nisa mpfula ya marhalani ni xingwalangwandza kumbe kuhatima ka tilo. (Yobo 38:22, 23; Ezek. 38:19-22) Angaha yendla swaku valala va yena va dlayana hi xivona. (2 Tikro. 20:17, 22, 23) Naswona angaha tirhisa tintsumi ta yena leswaku ti dlaya vanhu hinkwavu vobiha. (Esa. 37:36) Hambiloko Yehovha o tirhisa ndlela yihi na yihi, lexi hixi tivaka hileswaku ata hlula naswona valala vakwe hinkwavu atava helisa ivi a ponisa vanhu volulama. — Swi. 3:25, 26.

7-8. a) Hikuya hi 1 Vatesalonika 5:1-6, hi xihi xitiviso lexi kalaka xinga tolovelekanga lexi tihosi ta misava tingataxi yendla? b) Hi mhaka muni xitiviso lexo xita va ni khombo ngopfu?

⁷ Na “siku la Hosi [Yehovha]” lingase fika vata huwelela vaku: “Kurhulile, aku na xa kukarhata”. (Lerha 1 Vatesalonika 5:1-6.) Ka 1 Vatesalonika 5:2 “siku la Yehovha” li kombetela ka ‘nhlomulu lowukulu’. (Nhla. 7:14) Hitaswi tivisa kuyini swaku nhlomulu lowukulu wu le kusuhi ni kusungula? Bibele yi li kuta va ni xitiviso lexi kalaka xinga tolovelekanga. Xitiviso xolexo xita va xikombiso xa kusungula ka nhlomulu lowukulu.

⁸ Xitiviso xolexo xa ku, “Kurhulile, aku na xa kukarhata” i khale na xi profetiwile swaku xita va kona. Hi mhaka muni tihosi ta misava tita humesa xitiviso lexo? Kunga va swaku varhangeli va wukhongeli na vona vatati seketela? Ahanti. Hina haswi tiva swaku loko tihosi ta misava tita huwelela ti ku, “Kurhulile, aku na xa kukarhata” kuta va kuli mavunhwa lama huhuteliweke hi madimona. Xitiviso lexo xita va ni khombo hintamu hikusa xita yendla vanhu va titwa va sirhelelekile nakuve nhlomulu wochavisa lowungasi tshamaka wuva kona wuta va wu li kusuhi. Lowo i ntiyiso, hikusa “hi wona nkama lowu kuwonheka kungatavawela henhla hi xitshuketa, kufana ni kulun’wa ka wansati lweyi angakusuhi ni kuveleka n’wana”. Kutani, kuta humelela yini hi malandza ya Xikwembu yotshembeka? Leswi hi kalaka hingaswi tivi hi kukongoma swaku nhlomulu lowukulu wuta sungula siku muni, swingaha yendleka hi hlamala loko wu sungula, kambe hita va hi lunghekile.

 9. Kunga va leswaku Yehovha ata tekela kuhelisa misava ya Sathana hi nkama wun’we?

⁹ Yehovha angata tekela kuhelisa misava ya Sathana hi nkama wun’we hilaha a yendleke ha kona ankameni wa Nowa. Kambe ata sungula hi kuhelisa xiyenge xin’we xa misava ya Sathana ivi hi wugamu a helisa lexingata sala. Kusungula ata helisa Babilona Lwenkulu kunga wukhongeli hinkwalu la mavunhwa. Kutani, Armajedoni yita helisa hinkwaswu leswingata sala, leswi katsaka politika, valwi va tinyimpi ni fambiselo la wuxavisi. Swoswi, ahi buleni hi swiyendlakalo leswi swimbirhi swa lisima.

10. Hikuya hi Nhlavutelo 17:1, 6; 18:24, hi mhaka muni Yehovha a lava kuhelisa Babilona Lwenkulu?

¹⁰ Siku leli ‘muwoswi lwenkulu . . . angatayavanyisiwa halona’. (Lerha Nhlavutelo 17:1, 6; 18:24.) Babilona Lwenkulu a yendle swaku vanhu votala vangahali hloniphi vito la Xikwembu hi kudjondzisa vanhu mavunhwa. Kufana ni wansati wa nghwavani, wukhongeli la mavunhwa ali tshembekanga ka Yehovha hileswi li seketelaka mimfumu ya misava. Li tshikelela vanhu li tlhela liva dlela male ya vona. Naswona li dlaye vanhu votala kupatsa ni malandza man’wani ya Yehovha. (Nhla. 19:2) Yehovha atamu helisisa kuyini Babilona Lwenkulu?

11. I yini “xivandzana xopshuka”, naswona Yehovha ataxi tirhisisa kuyini leswaku a helisa Babilona Lwenkulu?

¹¹ Yehovha ata tirhisa 10 wa timhondzo ta “xivandzana xopshuka” leswaku a lovisa ‘muwoswi lwenkulu’. Xivandzana xolexo xi fanekisela Nhlanganu wa Matiko, kasi timhondzo ta 10 ti fanekisela mimfumu leyi seketelaka a nhlanganu wolowo. Hi nkama lowu Xikwembu xiwu vekiseke tihosi ta misava tita hlasela Babilona wofanekisela naswona ‘titayendla leswaku ava xisiwana ni kusala na angayambalanga nchumu’. Titamu tekela swilo swa yena hinkwaswu ti tlhela ti kombisa wubihi la yena ka vanhu hinkwavu. (Nhla. 17:3, 16) Vanhu lava seketelaka Babilona Lwenkulu vata hlamala loko va vona swaku a lovisiwile hi xihantla, ingi hiloko ayo lovisiwa hi siku lin’we hikusa a atshamela kutibyela a ku: ‘Nitshama laha, mina Nkosikazi! Ani wansati wa mufelakazi, aningegami hi kuvona mahlomulu!’ — Nhla. 18:7, 8.

12. I mpsini leswi Yehovha angata kala anga pfumeleli matiko leswaku maswi yendla, naswona hi mhaka muni?

¹² Yehovha angema pfumeleli matiko kuhelisa vanhu va yena hikusa vona va nyimela vito la yena naswona va yingise xilerhiso xakwe xa kuhuma ka Babilona Lwenkulu. (Mint. 15:16, 17; Nhla. 18:4) Naswona va tihita leswaku va pfuna van’wana akuva va baleka aBabilona Lwenkulu. Hi mhaka leyo, lava tirhelaka Yehovha vanga kala ‘vangaweliwi hi maxangu ya yena [Babilona Lwenkulu]’. Hambileswi malandza ya Yehovha mangata sirheleliwa loko kulovisiwa Babilona lwenkulu swita lava ma tiyisa lipfumelo la wona leswaku mata kota kutiyiselela leswi swingata humelela.

13. a) I mani Gogo? b) Hikuya hi Ezekiyele 38:2, 8, 9, i mpsini leswingata yendla swaku nyimpi ya Armajedoni yi sungula?

¹³ Kuhlaseliwa hi Gogo. (Lerha Ezekiyele 38:2, 8, 9.) Loko wukhongeli hinkwalu la mavunhwa li lovisiwile kuta sala wugandzeli lin’we ntsena amisaveni. I vanhu va Yehovha ntsena vangata sala. Hi mhaka leyo, Sathana ata kwata ngopfu naswona ata kombisa mahlundzu ya yena hi kutirhisa “mimoya . . . leyi [huhuteliweke] ya chaka” kunga mavunhwa lama humaka ka madimona leswaku ma hlengeleta ntlawa wa matiko akuva wu hlasela vanhu va Yehovha. (Nhla. 16:13, 14) Ntlawa wolowo wa matiko wu vitaniwa ‘Gogo wa tiko la Magogo.’ Loko ntlawa wolowo wu hlasela vanhu va Yehovha kuta va kuli masungulu ya nyimpi ya Armajedoni. — Nhla. 16:16.

14. I mpsini leswi Gogo angataswi tsumbula ka Armajedoni?

¹⁴ Gogo ata tshemba “voko la [yena ] la nyama” kunga masonchwa ya yena ya ntamu. (2 Tikro. 32:8) Kasi hina hita tshemba Yehovha Xikwembu xa hina kambe swoleswo swita tikomba kuli wuphunta ka vanhu va matiko. Hi mhaka muni hi vula leswo? Hikusa hambileswi Babilona Lwekulu anga ni ntamu lowukulu, swikwembu swa yena aswingatamu sirhelela ka “xivandzana” ni ka 10 wa timhondzo! (Nhla. 17:16) Gogo ata pimisa leswaku atahi hlula hi kuvevuka, ata ta ‘kufana ni marhefu lama funengetaka tiko’ akuva a hlasela vanhu va Yehovha. (Ezek. 38:16) Kambe hi kuhantlisa, Gogo ata vona leswaku ange hluli. Kufana ni leswi humeleleke Faro alwandle lopshuka, na yena ata tsumbula swaku lweyi a lwaka na Yena i Yehovha. — Ekso. 14:1-4; Ezek. 38:3, 4, 18, 21-23.

15. I mpsini leswi Kreste angataswi yendla ka nyimpi ya Armajedoni?

¹⁵ Kreste ni tintsumi ta yena vata sirhelela vanhu va Xikwembu, ivi va lovisa mimfumu ya matiko ni masonchwa ya yona. (Nhla. 19:11, 14, 15) Kambe i mpsini swingata humelela hi Sathana nala lwenkulu wa Yehovha, lweyi a hembeleke matiko a tlhela ama yendla ma hlasela vanhu va Xikwembu ka nyimpi ya Armajedoni? Yesu atamu cukumetela ka xikhele xa kuyenta, yena ni madimona ya yena ivi amu khiyelela kuza kuhundza 1000 wa malembe. — Nhla. 20:1-3.

16. a) Hingaswi kombisisa kuyini leswaku haxi tiva Xikwembu? b) Kuta humelela yini hi vanhu lava tivaka Xikwembu ka Armajedoni?

¹⁶ Hambiloko hi li va khale na hi tiva ntiyiso kumbe haha ku sungula kudjondza, leswaku hi pona ka Armajedoni hi fanele hi tiva Xikwembu ni kuva lava yingisaka “Evhangeli ya Hosi ya hina Yesu”. Hita va hi tiva Xikwembu loko hi tiva leswi xiswi rhandzaka, leswi xi kalaka xingaswi rhandzi ni minawu ya xona. Naswona hi kombisa leswaku hamu tiva Yehovha loko himu rhandza, himu yingisa hi tlhela hi gandzela yena ntsena. (1 Yoh. 2:3-5; 5:3) Loko hi kombisa leswaku haxi tiva Xikwembu hita va ni lunghelo la ‘kutiviwa hi xona’ naswona xitahi ponisa ka Armajedoni! (1 Kor. 8:3) Hi mhaka muni hi vula leswo? Hikusa ‘kutiviwa hi xona’, swi vula swaku ha yamukeleka ka xona.

17. Swi vula yini kuyingisa mahungu yotsakisa “ya Hosi ya hina Yesu”?

¹⁷ Evhangeli kumbe mahungu yotsakisa ya Hosi ya hina Yesu”, yi katsa mintiyiso hinkwayu leyi Yesu ayi djondziseke leyi kumekaka ka Rito la Xikwembu. Hiva hi yingisa mahungu yotsakisa loko hima tirhisa awuton’wini la hina. Kuyingisa koloko swi katsa kurhangisa ntirho wa Yehovha awuton’wini la hina, kuhanya hi minawu ya yena yolulama ni kuchumayela mahungu yotsakisa ya Mfumu wa Xikwembu. (Mat. 6:33; 24:14) Xin’wana lexi katsekaka i kuseketela vamakwavu va Kreste lava totiweke loko vali karhi va yendla mintirho ya vona ya lisima. — Mat. 25:31-40.

18. Malandza ya Xikwembu lama totiweke mataswi kotisa kuyini kuhakela wunene leli ma kombisiweke lona?

¹⁸ Kungali khale, malandza ya Xikwembu lama totiweke mata kota kuhakela wunene leli ma kombisiweke lona hi “tinyempfu tin’wana”. (Yoh. 10:16) Swita kotekisa kuyini? Na Armajedoni yingase sungula, hinkwavu lava 144.000 vata va va pfuxiwile leswaku vaya hanya matilweni tani hi vanhu va moya lavanga fiki. Vona vata va xikan’we ni tintsumi letingata helisa Gogo ti tlhela ti sirhelela “xitshungu lexikulu” xa vanhu va Yehovha. (Nhla. 2:26, 27; 7:9, 10) Xitshungu lexikulu xita tsaka ngopfu hi leswi xingatava xi seketele malandza ya Yehovha loko maha li laha misaveni.

19-20. Hambiloko hi kumana ni mindzingo, hingaswi kotisa kuyini kutshama na hi tshembekile leswi Armajedoni yinga kusuhi?

¹⁹ Leswi hi hanyaka ka masiku lawa yawugamu ya kukarhata, malandza yotala ya Xikwembu ma kumana ni mindzingo yotala. Hambileswo, hingaswi kota kutiyisela nahi tsakile. (Yak. 1:2-4) Lexingatahi pfuna kuyendla leswo, i kuva hi khongela swi huma mbilwini. (Luk. 21:36) Kambe kukhongela ntsena aswi yenelanga. Hi fanele hi djondza Rito la Xikwembu siku ni siku hi tlhela hi yanakanyisisa hi lona. Leswo swi katsa kudjondza ni kupimisa hi wuprofeta lelingata hetiseka kungali khale. (Pis. 77:12) Loko hi yendla swilo leswi hinkwaswu, hi tlhela hi yendla hinkwaswu leswi hingaswi kotaka ka ntirho wochumayela, hita yendla leswaku lipfumelo ni ntshembo wa hina swi tiya!

²⁰ Pimisa hi ntsaku lowu ungata va na wona loko Babilona Lwenkulu ata va a lovisiwile, naswona Armajedoni yi hundzile! Nakambe pimisa hi leswi ungata tsakisa xiswona loko vanhu hinkwavu se va hlonipha vito la Xikwembu ni mfanelo ya xona ya kufuma. (Ezek. 38:23) Hi mhaka leyo, lava va tivaka Xikwembu ivi va yingisa N’wana wa xona ni kutiyisela kuya fika makumu va langutela Armajedoni hi kunavela lokukulu. — Mat. 24:13.