Bbalaza, Novemba 2
Nahabweki, omuli inywe obu haraaba haroho omuntu weena arukwetaaga amagezi, leka aikale naasaba Ruhanga, habwokuba agabira boona atarukubiihirwa, kandi galimuheebwa.—Yak. 1:5; ftn.
Nkooku kirukwolekwa omu bigambo eby’ekyahandiikirwe ekya kiro kinu, Yahwe tayesigaliza amagezi ge. N’okugonza agagabira abandi. Wetegereze ekintu ekindi, Yahwe obu aha amagezi, akikora “atarukuhana” rundi ekirukumanyisa ngu tatuserramu ensobi. Tagonza twehurre kubi ngu habwokuba nuwe turukwesiga kutuha obuhabuzi. Oihireho naatwekambisa kumusaba obuhabuzi. (Nfu. 2:1-6) Kandi itwe? Nitusobora kwegera hali Yahwe kuraba omu kugaba amagezi gaitu? (Zab. 32:8) Abantu ba Yahwe baine emigisa nyingi ey’okugabiraho abandi ebi beegere. Ekyokurorraho, tukira kutendeka abahyaka omu buheereza. N’okugumiisiriza abagurusi, batendeka abaheereza omu kitebe hamu n’ab’oruganda ababatiziibwe kumanya omulingo basobora kuhikiirizaamu obujunaanizibwa bwabo omu kitebe. Abo abaine obukugu omu kwombeka n’okudaabiriza bakoonyera omu kutendeka abandi kukora emirimo ey’ekorwa ha byombeko by’ekitebe. w24.09 28-29 ¶11-12
Kyakabiri, Novemba 3
Mukafooka abarukugonzebwa hali itwe.—1 Bas. 2:8.
Ow’oruganda, kusobora kufooka omugurusi, osemeriire ‘okutabaho ekyokuhanwa,’ ekirukumanyisa ngu abandi omu kitebe nibakubazaaho kurungi habw’engeso zaawe enungi. (1 Tim. 3:2) Ekindi, osemeriire kuba noobazibwaho kurungi abo ab’aheeru. Abantu abatarukuheereza Yahwe nibasobora kubazaaho kubi enyikiriza zaawe baitu tibasemeriire kuba n’ensonga yoona ey’okukubazaaho kubi habw’okutaba mwesigwa rundi habw’engeso zaawe. (Dan. 6:4, 5) Wekaguze, ‘Nimbazibwaho kurungi omu kitebe n’aheeru y’ekitebe?’ Obu oraaba oli muntu ‘agonza oburungi,’ serra ebirungi omu bantu kandi obasiime habw’emiringo yabo enungi. (Tit. 1:8) Ekindi, kikusemeza kukorra abandi ebirungi, noobu kyetaagisa kukora ebirukukiraho. Habwaki omulingo gunu mukuru muno hali abagurusi? Habw’okuba bakozesa kurungi obwire bwabo kugarramu abandi amaani omu kitebe n’okuhikiiriza obujunaanizibwa bwabo. (1 Pet. 5:1-3) Noobu kiraaba nukwo kiri, okusemererwa oku batunga omu kuheereza abandi kukirra hara okwefeereza oku bakora.—Ebik. 20:35. w24.11 20-21 ¶3-5
Kyakasatu, Novemba 4
Okugaba kuleeta okusemererwa kwingi kukira okuheebwa.—Ebik. 20:35.
Abaheereza bakora emirimo y’amaani omu bitebe. Omukwenda Paulo yaroraga abasaija banu abeesigwa nk’ab’omuhendo. Ekyokurorraho, obu akaba naahandiikira Abakristaayo omu Firipi, akaramukya abaheereza n’abagurusi. (Baf. 1:1) Ab’oruganda baingi ababatiziibwe, ka babe bato rundi bakuru batunga okusemererwa kwingi okuruga omu kuheereza nk’abaheereza omu kitebe. Ekyokurorraho, Devan akaba aine emyaka 18 nambere yakomiirwe kuheereza nk’omuheereza omu kitebe. Ha rubaju orundi, ow’oruganda arukwetwa Luis akakomwa kuheereza nk’omuheereza omu kitebe obu akaba ali nk’omu myaka 50. Akabazaaho enyehurra baingi ei batunga naagamba ati: “Nyine omugisa gw’amaani muno kuheereza nk’omuheereza omu kitebe, kukira muno obu nteekerezaaho okugonza ab’oruganda na banyaanya itwe barukunyoleka.” Obu oraaba oli w’oruganda ow’abatiziibwe kandi tokafookere muheereza omu kitebe, habwaki otakifoora kigendererwa kyawe? w24.11 14 ¶1-3