Masalimo

1 Ngwakukondwa* munthu uyo wakwendera fundo za ŵaheni chara,

Uyo wakwimiliramo chara mu nthowa ya ŵakwananga,+

Nanga nkhukhala pamoza na ŵakugoska.+

 2 Kweni wakukondwa na dango la Yehova,+

Wakuŵazga dango ili na kughanaghanirapo* muhanya na usiku.+

 3 Waŵenge nga ni khuni ilo lapandika musi mwa tumilonga twa maji,

Khuni ilo likupambika vipambi mu nyengo yake,

Ilo mahamba ghake ghakufota chara.

 4 Ŵaheni ndimo ŵaliri yayi.

Ŵali nga ni mwelero uwo ukuyegheka na mphepo.

 5 Lekani ŵaheni ŵimenge chara para ŵakweruzgika,+

Ŵakwananga nawo ŵimenge chara mu wumba wa ŵarunji.+

 6 Pakuti Yehova wakumanya nthowa ya ŵarunji,+

Kweni nthowa ya ŵaheni yimalenge.+