Kuyowoya Mwakusimikizga

PARA muntu wakuyowoya mwakusimikizga, ŵanyake ŵakuwona kuti iye wakugomezga nadi ivyo wakuyowoya. Paulos wakayowoyanga mwakusimikizga mu uteŵeti. Iye wakalembera ŵantu awo ŵakapulikana ku Tesalonika kuti: “Ivangeli litu kuti likiza kwa imwe mu mazgu pera cara, kweni . . . na mu uconteko ukuru [kusimikizga kukuru, NW].” (1 Tes. 1:5) Kusimikizga kwanteura uko kukarongoreka mu kayowoyero na nkaro yake ndiposo mu ntowa iyo wakayowoyera unenesko wa mu Baibolo.

Kuyowoya mwakusimikizga kukupambana na kuyowoya mwakusacizga, kugomezga vintu ivyo vilije ukaboni, panji kuyowoya mwakutalulira. M’malo mwake, para muntu wakuyowoya mwakusimikizga ivyo vili mu Mazgu gha Ciuta, ici cikurongora kuti wali na cipulikano cikuru.—Heb. 11:1.

Nyengo Izo Mungayowoya Mwakusimikizga. Ncintu cakuzirwa kuyowoya mwakusimikizga para muli mu uteŵeti wa m’munda. Kanandi ŵantu ŵakutemwa kuwona umo mukuyowoyera kuruska uthenga uwo mukuyowoya. Iwo ŵakuwona umo mukujipulikira na ivyo mukuyowoya. Kuyowoya kwinu mwakusimikizga, uko nkhwankongono comene kuruska mazgu igho ghene, kungarongora kuti muli na cintu cakuzirwa comene ico mukukhumba kuŵaphalira.

Mukweneraso kuyowoya mwakusimikizga para mukuyowoya na ŵantu ŵa cipulikano cimoza na cinu. Mpostole Petros wakalemba karata yake yakudanga yakufunyilirika ‘kuti waciske na kusimikizga kuti uwu ndiwo ucizi weneco wa Ciuta.’ Wakaphalira ŵabali ŵake kuti: ‘Ŵimilire [“ŵaleke kusunkunyika,” NW].’ (1 Pet. 5:12) Apo wakalemberanga mpingo wa ku Roma, mpostole Paulos wakayowoya mwakusimikizga ndipo mpingo wula ukasanga candulo cikuru. Iye wakalemba kuti: “Ndakhorwa ine kuti nanga ndi nyifwa, panji umoyo, nesi ŵangelo, nesi maufumu, nesi ivyo viriko, nesi ivyo vikwiza, nesi mazaza, nesi kuzontoka, nesi kunyang’amira, nesi cakwatika cinyake, citi cimanyenge cara kutipatula ku kutemwa kwa Ciuta, uko kuli mwa Kristu Yesu Fumu yitu.” (Rom. 8:38, 39) Paulos wakalembaso karata ya kuciska yakuyowoya za kukhumbikwa kwa kupharazga ku ŵantu, ndipo mwampu wake mu mulimo uwu ukaŵa ukaboni wakukwanira kuti wakaŵa wakusimikizga kuti mulimo uwu ukaŵa wakuzirwa. (Mil. 20:18-21; Rom. 10:9, 13-15) Ŵarara ŵa Cikristu nawo ŵakwenera kuŵa ŵakusimikizga nteura para ŵakusambizga kufuma mu Mazgu gha Ciuta.

Pa nyengo za kusambira na nyengo zinyake, ŵapapi ŵakwenera kuyowoya mwakusimikizga para ŵakudumbiskana vintu vyauzimu na ŵana ŵawo. Kuti ŵacite mwanteura, iwo ŵakukhumbikwira kumutemwa Ciuta na mitima yawo yose. Apo ndipo pekha ŵangayowoya mwakusimikizga ku ŵana ŵawo, ‘pakuti ivyo viri kuzara mu mtima ndivyo mlomo ukuyowoya.’ (Luka 6:45; Dute. 6:5-7) Kuyowoya mwakusimikizga kwanteura uko kovwirenge ŵapapi kuŵa ciyerezgero ciweme ca “cipulikano cambura kupusikizga.”—2 Tim. 1:5.

Mukukhumbikwira kuyowoya mwakusimikizga para ŵanji ŵafumba za cipulikano cinu. Munyinu wa kusukulu, musambizgi, panji munyinu uyo mukugwira naye ncito wangazizwa cifukwa cakuti mukusangwa nawo yayi mu viphikiro vinyake. Para mungazgora mwakusimikizga na kurongosora makoraghene, iye wangakhorwa na kuzirwiska cipulikano cinu ca kuzikika mu Baibolo. Uli usange muntu munyake wakumunyengelerani kuti mucite ukhaliro uheni—wa nga ni utesi, kugwiriskira ncito munkhwara wakuzweteska wongo, panji kucita uzaghali? Ncakuzirwa kuti muyowoye makoraghene kuti visuzge vitewuli, mucitenge yayi ukhaliro uwo, kwali wanyengelere wuli. Ici cikukhumbikwira kuti muyowoye mwakusimikizga pa nyengo iyo mukukana. Pa nyengo iyo Yosefe wakakananga kucita uzaghali na muwoli wa Potifara, Yosefe wakayowoya kuti: “Kasi ndingacita uli uheni uwu ukuru, na kwanangira Ciuta?” Peneapo mwanakazi yura wakakoserezga, Yosefe wakacimbira na kufuma mu nyumba.—Gen. 39:9, 12.

Umo Mungayowoyera Mwakusimikizga. Kayowoyero kinu kangarongora kuti muli ŵakusimikizga. Kwa nyengo zinandi, Yesu wakadidimizganga fundo zikuru mwakuyowoya kuti: “Inya, inya nadi, nkukunenera.” (Yoh. 3:3, 5, 11; 5:19, 24, 25) Kusimikizga kwa Paulos kukarongoreka mu mazgu agha: “Ndakhorwa,” “Nkumanya, ndipo nkumanya fikepo mu Fumu Yesu Kristu,” na “Nkuneneska, kuti nkuteta cara.” (Rom. 8:38; 14:14; 1 Tim. 2:7) Pakuyowoya za kukwaniriskika kwa mazgu ghake, nyengo zinyake Yehova wakafunyilira ncimi zake kuti ziyowoye mwakudidimizga kuti, “Citize nadi.” (Hab. 2:3) Para muyowoyenge za maucimi ghanteura agha, namwe mungayowoya mwakuyana na mazgu gha pacanya apa. Usange mukugomezga Yehova m’malo mwakujithemba mwekha, ndiposo para mukuyowoya na ŵanyinu mwancindi, mazgu ghinu ghakusimikizga gharongorenge kuti muli na cipulikano cikuru.

Kuyowoya mwakusimikizga kungarongorekaso mwa kuyowoya mwakukhuka ndiposo mwankongono. Kawonekero ka cisko cinu na majesica, vyose ivi vikovwira kuyowoya mwakusimikizga, nangauli kacitiro kake kangaŵa kakupambana kwa muntu na muntu. Nanga kungaŵa kuti ndimwe wasoni panji wa mazgu ghacoko pakuyowoya, kweni para ivyo muyowoyenge ni vyaunenesko ndipo mukukhumba ŵanyinu kuti ŵavimanye, mazgu ghinu gharongorenge kuti mukuyowoya mwakusimikizga.

Mwanadi, kuyowoya mwakusimikizga kukwenera kuŵa kwanadi. Para ŵantu ŵangamanya kuti tikucita mwaciphamaso, iwo ŵangaghanaghana kuti uthenga withu ngwakuzirwa yayi. Anteura mukwenera kupwererera comene pakuyowoya. Mwakuyana na unandi wa ŵategherezgi ŵinu, cingaŵa ciweme kukwezgako nkongono ya mazgu ghinu kuruska umo mukuyowoyera nyengo zose. Cilato cinu ciŵe cakuti muyowoye mwakupulikikwa makora ndiposo mwakuyana na kawiro kinu.

Ivyo Vingamovwirani Kuti Muyowoye Mwakusimikizga. Pakuti kuyowoya nkani mwakusimikizga kukukolerana na umo imwe mwakhwaskikira na nkani yinu, anteura kunozgekera nkani nkhwakuzirwa comene. Kutora nkani umo yalembekera mu cakupharazga na kuyisungilira pamtima nkhwakukwanira yayi. Mukwenera kuyimanya makora nkani yinu na kuyiyowoya mu mazgu ghinu na ghinu. Mukwenera kuŵa ŵakusimikizga nkanira kuti nkani yinu njaunenesko ndiposo ivyo mukuyowoya ni vyakuzirwa ku ŵategherezgi ŵinu. Ici cikung’anamura kuti, para mukunozgekera nkani yinu, mukwenera kughanaghanira ukhaliro uwo ŵalimo ŵategherezgi ŵinu, fundo za nkani yinu izo iwo ŵakuzimanya kale ndiposo umo yingaŵakhwaskira.

Ncipusu comene kuti ŵanyithu ŵawone kuti tikuyowoya nkani mwakusimikizga usange tikuyowoya mwambura kugotagota. Anteura, padera pa kunozgekera makora nkani, pwerererani comene umo mwamuyowoyera. Woneseskani makora vigaŵa vya nkani yinu ivyo vikukhumbikwira kukadidimizga comene, ndipo mukacite nteura mwambura kuŵazga comene pa autilayini yinu. Mwakusazgirapo, kumbukirani kuromba kwa Yehova kuti wamutumbikani. Mwa ntowa iyi ‘mungakhoma mtima mwa Ciuta withu’ kuti muyowoye mwakusimikizga kuti murongore unenesko na kuzirwa kwa uthenga winu.—1 Tes. 2:2.