Ŵategherezgi Ŵakhwimiskike na Kukhozgeka

NANGAULI ŵakukumana na masuzgo ghanandi, ŵateŵeti ŵa Ciuta ŵakwenera kusanga cikhuŵirizgo mu mpingo Wacikristu. Kuti ŵacite ici, ŵarara ŵakwenera kuwoneseska kuti nkani na urongozgi wawo nvyakukhozga. Ŵarara ŵakwenera kuŵa “nga ni malo ghakubisamamo mpepo na kudinganyamo cimpupulu, nga ndi mironga mu malo gha cinkamwa na mfwiri wa cijarawe mu caru cakuvuska.”—Yes. 32:2.

Usange ndimwe murara, kasi nkani zinu zikupereka mupumulo na cipembuzgo? Kasi zikupereka nkongono ku awo ŵakuyezgayezga kuteŵetera Yehova mwakugomezgeka? Kasi zikukhozga ŵabali kuti ŵarutirizge kucita khumbo la Ciuta mwambura kupwererako kantu za kuleka kukondweskeka kwa ŵantu panji suskano? Wuli usange ŵanji ŵa ŵategherezgi ŵinu mbakusuzgika mu maghanoghano, ŵakusuzgika kuti ŵasange ndarama, panji ŵali na matenda ghambura munkhwara? ‘Mungakhozga ŵabali na mlomo winu.’—Job 16:5.

Gwiriskirani ncito mwaŵi winu nga ni muyowoyi kovwira ŵabali kuti ŵaŵe na cigomezgo ndiposo kuti ŵasange nkongono kufuma kwa Yehova.—Rom. 15:13; Efe. 6:10.

Kumbuskani Ŵategherezgi Ivyo Yehova Wacita. Ntowa yiweme comene yakukhwimiskira ŵategherezgi nkuŵarongora umo Yehova wakavwilira ŵantu ŵake mu nyengo ya masuzgo.—Rom. 15:4.

Yehova wakaphalira Moses kuti ‘wakhwimiske’ na ‘kukhozga’ Joshua, apo Ŵaisrayeli ŵakaŵa ŵacali ŵandanjire mu Caru ca Layizgano, ceneico panyengo iyo cikaŵa mu mawoko gha ŵarwani. Ni mwauli umo Moses wakacitira ici? Pamaso pa Joshua, Moses wakakumbuska ŵantu wose vintu ivyo Yehova wakaŵacitira penepapo ŵakafumanga mu Egupto. (Dute. 3:28; 7:18) Moses wakayowoyaso umo Yehova wakaperekera Ŵaamori mu mawoko ghawo. Ndipo pamanyuma pake Moses wakaromba Joshua kuti: ‘Waŵe wankongono na wakukhwima mtima.’ (Dute. 31:1-8) Para mukukhumba kukhwimiska ŵabali ŵinu, kasi mukuŵavwira kuti ŵasange nkongono mwa kukumbuka ivyo Yehova waŵacitira?

Nyengo zinyake ŵantu ŵakuzizikika comene na masuzgo agho ŵakumana nagho mwakuti ŵakukayika usange ŵazamusangwapo na vitumbiko vya Ufumu mu umoyo wawo. Ŵakumbuskani za kugomezgeka kwa vilayizgo vya Yehova.—Josh. 23:14.

Mu vyaru vinyake maboma ghakuŵika dango lakukanizga ŵabali ŵithu kupharazga makani ghaweme. Mu mikhaliro ya nga ni iyi, ŵarara ŵangawovwira ŵasopi ŵanyawo kuti ŵasange nkongono kufuma ku ivyo ŵapostole ŵa Yesu Kristu ŵakakumana navyo. (Mil. 4:1–5:42) Ndiposo kurongosora umo Ciuta wakacitira vintu mwamahara, nga ni umo vyalembekera mu buku la Esther, kuzamovwira ŵabali kuti ŵaŵe na cikanga.

Nyengo zinyake ŵantu ŵanyake ŵakufika pa maungano gha mpingo kweni ŵakuruta pantazi cara. Iwo ŵangaghanaghana kuti Ciuta wangaŵagowokera cara cifukwa ca vintu viheni ivyo ŵakacitanga kale. Mutepanji mungarongosora umo Yehova wakacitira na Themba Manase. (2 Mid. 33:1-16) Panji mungayowoya za ŵantu ŵa mu Korinte wakale awo ŵakasinta umoyo wawo, kuŵa Ŵakristu, ndipo ŵakacemeka ŵarunji pamaso pa Ciuta.—1 Kor. 6:9-11.

Kasi ŵanji ŵakughanaghana kuti masuzgo agho ŵakukumana nagho ncirongolero cakuti Ciuta wakuŵatemwaso cara? Mungaŵakumbuska ivyo Job wakakumana navyo na umo wakatumbikikira cifukwa ca kugomezgeka kwake kwa Yehova. (Job 1:1-22; 10:1; 42:12, 13; Sal. 34:19) Ŵasanguluski ŵautesi ŵa Job ŵakayowoya kuti Job wakwenera kuti wakacita cintu cinyake ciheni. (Job 4:7, 8; 8:5, 6) Mwakupambanako, penepapo ŵakakhozganga ŵasambiri na “kuŵaciska kukhalira mu cipulikano,” Paulos na Barnaba ŵakati: “Na visuzgo vinandi kukwenerera ise kunjira mu Ufumu wa Ciuta.” (Mil. 14:21, 22) Mwakuyana waka, mungakhozga awo ŵali mu viyezgo mwakuŵaphalira kuti kuzizipizga nkhwakukhumbikwa kwa Ŵakristu wose ndipo nkhwakuzirwa comene pamaso pa Ciuta.—Zinth. 27:11; Mat. 24:13; Rom. 5:3, 4; 2 Tim. 3:12.

Khuŵirizgani ŵategherezgi kuti ŵaghanaghanire umo Yehova wafiskira vilayizgo vyake mu umoyo wawo. Mwakuŵakumbuska, ŵangawona ivyo Yehova waŵacitira, nga ni umo wakalayizgira. Pa Salmo 32:8, tikuŵazga kuti: “Tindikurunjikizge na kukusambizga ntowa iyo ukwenera kwendamo; tindikurongozge na jiso lane.” Mwakukumbuska ŵategherezgi ŵinu umo Yehova wakuŵarongozgera panji umo ŵakuŵakhozgera, muŵapangiskenge kuti ŵawone pa iwo ŵekha kuti Yehova wakuŵapwererera ndiposo kuti waŵavwirenge nadi mu viyezgo vilivyose ivyo ŵakukumana navyo mazuŵa ghano.—Yes. 41:10, 13; 1 Pet. 5:7.

Sangwani na Ivyo Ciuta Wakucita Sono. Para mukukhumba kukhwimiska ŵabali ŵinu, ŵaphalirani ivyo Yehova wakucita panyengo yasono. Kuyowoya mwakurongora kukondweskeka na vintu ivi kungacitiska ŵategherezgi ŵinu kuti ŵajipulike mwakuyana waka mu mitima yawo.

Awonani umo Yehova wakutovwilira kutonda masuzgo agho tikukumana nagho. Iye wakutirongora ntowa yiweme ya umo tikwenera kukhalira. (Yes. 30:21) Wakurongosora ivyo vikucitiska kuti kuŵe kuswa-marango, kuwura-urunji, ukavu, urwari, na nyifwa ndiposo wakutiphalira umo wazamumazgira vintu vyose ivi. Wakutizingirizga na ubali wacitemwa. Wali kutipa cawanangwa cakuzirwa ca lurombo. Wali kutipa mwaŵi wa kuŵa Ŵakaboni ŵake. Wakujura maso ghithu mwakuti tiwone kuti Kristu wali kukhazikika kale pa cizumbe kucanya ndiposo kuti agha ni mazuŵa gha umaliro gha caru ici.—Civ. 12:1-12.

Kusazgirapo apa, tiliso na maungano gha mpingo, gha dera, na gha cigaŵa. Para kayowoyero kinu kakurongora kuti mukuwongera vintu ivi, mbwenu mukhozgenge cisimikizgo ca ŵanji ca kuwungana na ŵabali ŵawo nyengo zose.—Heb. 10:23-25.

Malipoti agho ghakurongora kuti Yehova wakutumbika uteŵeti wa m’munda naghoso ghakutikhozga. Mu virimika vya mu handiredi lakudanga peneapo Paulos na Barnaba ŵakarutanga ku Yerusalemu, “ŵakasekereska comene ŵabali wose” mwakuŵaphalira umo ŵamitundu ŵakazgokera. (Mil. 15:3) Imwe namwe mungakondweska ŵabali mwakuŵaphalira vyakukumana navyo vyakukhozga.

Ntowa yinyake yakukhwimiskira ŵabali ndiyo kuŵavwira kuti ŵamanye kuti ivyo ŵakucita ni vintu vyakuzirwa comene. Ŵawongani cifukwa ca ivyo ŵakucita mu uteŵeti Wacikristu. Wongani awo ŵakutondeka kucita ivyo ŵakukhumba mu uteŵeti cifukwa ca ucekuru na matenda kweni ŵakuzizipizga mwakugomezgeka. Ŵakumbuskani kuti Yehova wakuruwa yayi citemwa ico ŵakurongora pa zina lake. (Heb. 6:10) Kurongora cipulikano para tikuyezgeka ncintu cakuzirwa comene. (1 Pet. 1:6, 7) Ŵabali ŵakukhumbikwira kukumbuskika za ici.

Iŵani na Maghanoghano gha Cilindizga ca Muntazi Para Mukuyowoya. Cintu cikuru ico cikukhwimiska ŵantu awo ŵakutemwa Ciuta ni vilayizgo vya vintu ivyo vikwiza. Nyengo zinyake ŵanandi awo ŵakutegherezga nkani yinu ŵaŵa ŵakupulika mazgu agha nyengo na nyengo. Kweni mwakurongora mzimu wakuwongera penepapo mukuyowoya za vilayizgo ivi, mungapangiska kuti viŵe vyakukondweska, vyakusimikizgirika, ndiposo kupangiska mitima ya ŵategherezgi kuwongera. Kugwiriskira ncito ivyo mukusambira mu Sukulu ya Uteŵeti wa Ciuta kungamovwirani kucita ici.

Yehova iye mwene ndiye wakukhwimiska na kupereka nkongono ku ŵantu ŵake. Ndipouli, imwe namwe mungavwirana naye. Mungacita ici para mukuyowoya nkani pampingo.