Daniel na Baji Lake la Ungano

YESU wakacenya ŵalongozgi ŵakujikuzga ŵa cisopo ŵeneawo ŵakakwiya ŵati ŵawona kuti ŵana ŵakulumba Ciuta. Yesu wakaŵafumba kuti: “Kasi mulive kuŵazga kale, [kuti] ‘Mu milomo ya ŵabonda na ŵakonkha muli kujinozgera malumbo’?”—Mateyu 21:15, 16.

Mwana wa vilimika vinkhondi na cimoza zina lake Daniel, mweneuyo wakuwungana na mpingo wa ciyowoyero ca Cirasha ku Germany, nchiyelezgero ciwemi ico cikulongora kuti ŵana ŵacoko ŵacali kulumba Yehova. Pamoza na anyina na mudumbu wake, ŵakaluta ku ungano wa cigaŵa wa Ŵakaboni ŵa Yehova uwo ukacitikira ku Duisburg. Aka kakaŵa kakwamba kuti ŵaŵe pa ungano ukuru nthena. Cinthu cilicose cikaŵa cacilendo: hotelo, unandi wa ŵategherezgi, kutegherezga ungano mazuŵa ghatatu, ubapatizo, kweniso seŵero. Kasi Daniel wakaŵa na nkharo wuli? Nkharo yake yikaŵa yiwemi comene.

Ungano wati wamara ŵakawelera kukaya, ndipo pa Mande Daniel wakawuka mulenjilenji kuti walute ku sukulu. Kweni kasi nchivici ico cikaŵa cicali pa jekete lake? Pakaŵa baji lake la ungano wa cigaŵa. Anyina ŵakaphalira Daniel kuti: “Ungano wuli kumara. Muhanya wuno ungavura baji.” Kweni Daniel wakati: “Nkhukhumba kuti waliyose wamanye uko nkhaŵa na kumanya ivyo nili kusambira.” Ntheura wakasangwa kuvwara baji lake, zuŵa lose apo wakaŵa ku sukulu. Apo asambizgi ŵake ŵakamufumba za baji lake, wakaŵalongosolera pulogiramu ya ungano.

Mwakucita ntheura, Daniel wakalondezganga ciyelezgero ca ŵasepuka na ŵasungwana ŵanandi comene awo kwamba kale ŵakulumba Yehova.