Kupenja Mazgoro Ghakukhorweska

Kasi ningasungilira wuli umoyo wane?

Kasi ningacitaci kuti mbumba yane yiŵe yakukondwa?

Ningacita wuli kuti nikhaliske pa nchito?

KASI muli kujifumbapo mafumbo agha? Kasi mazgoro ghakukhorweska mukaghasanga? Mabuku ghakujumpha 2,000 ghakulembeka cilimika cilicose agho ghakupeleka ulongozgi pa nkhani izi kweniso zinyake zakuzirwa. Pa cilimika, ŵaŵazgi ŵa ku Britain pera ŵakumara ndarama zakukwana mapaundi 80 miliyoni (pafupifupi madola 150 miliyoni gha ku U.S.) kugura mabuku agho ghakupeleka ulongozgi wa umo ŵangacitira na masuzgo pa umoyo wawo. Ku United States, awo ŵakuguliska mabuku ghakupeleka ulongozgi ŵakusanga ndarama pafupifupi $600 miliyoni pa cilimika. Ndimwe mwekha yayi mukupenja ulongozgi uwemi wa umo mungacitira mu umoyo winu.

Pakuyowoya za ulongozgi uwo ukusangika mu mabuku agha, mulembi munyake wakati: “Mabuku ghanandi agho ghakulembeka sono ghakuwerezga waka ivyo vili kulembeka kale.” Mbunenesko, ulongozgi uwo ukusangika mu mabuku agha ukuwerezga waka vinjeru ivyo vili kulembeka mu limoza mwa mabuku gha mwaka comene. Buku ili ndimoza mwa mabuku agho ghathandazgika comene pa caru cose. Ndipo lang’anamulika lose panji kacigaŵa waka mu viyowoyero 2,400. Nakuti makope ghakujumpha 4.6 biliyoni ghasindikizgika. Buku ili ni Baibolo.

Baibolo likuti: “Malembo ghose ghakupelekeka na Ciuta ghakwanduliraso kusambizga, na kucenya, na kunozga, na kulanga uko kuli mu urunji.” (2 Timote 3:16) Mbunenesko, Baibolo kuti likalembeka kuŵa buku lakupeleka waka ulongozgi yayi. Comene likalembeka kuti livumbure khumbo la Ciuta ku ŵanthu. Ndipouli, likulongosora umo tingacitira na masuzgo agho tikusangana nagho, ndipo likuti awo ŵalondezgenge ulongozgi wake ŵasangenge candulo. (Yesaya 48:17, 18) Kwali munthu ngwa fuko uli, mtundu, panji masambiro, para walondezga ulongozgi wa mu Baibolo wakovwirika.