Ico Ŵanandi Ŵakutondekera Kujiyuyura

MAZUŴA ghano, ŵanthu ŵanandi ŵangawona nga kujiyuyura nkhwambura kukhumbikwa. Kanandi awo ŵakuwoneka kuti mbapacanya ndiposo awo ŵakuwoneka kuti vinthu vikuŵayendera makora ŵakujikuzga, ndipo ŵakukosera kuti ŵenderenge vyawo pera. Ŵanthu ŵanandi ŵakudokera umoyo wa ŵasambazi, kuti wa ŵanthu ŵakujiyuyura yayi. Ŵanthu awo vinthu vikuŵayendera makora kanandi ŵakutemwa kujithumbwa. M’malo mwa kujiyuyura, iwo ŵakujiŵikamo kuti vinthu vikuŵayendera makora cifukwa cakuti ŵali na mahara.

Munthu munyake wakumanyikwa wa ku Canada wakati “nkharo ya ‘ine ndine’” ndiyo njakuzara mu caru cakwake. Ŵanji ŵakuwona kuti tikukhala na ŵanthu awo ŵakutemwa comene kujikondweska kuluska cilicose ndiposo kuti ŵanandi mbakujitemwa. Kukhala na ŵanthu ŵanthena, kungapangiska kuti kuŵe kwakusuzga kuzomerezga kuti kujiyuyura nkhwakukhumbikwa.

Mbunenesko kuti ŵanthu ŵanandi ŵangazomerezga kuti kujiyuyura nkhuwemi, cifukwa nchipusu kukhala na munthu wakujiyuyura. Ndipouli, mu caru cakutemwa kuphalizgana ici, ŵanji ŵakopa kuti usange ŵangaŵa ŵakujiyuyura, ndikuti ŵawonekenge nga mbakupusa.

Mazgu gha Ciuta ghakayowoyerathu kuti mu mazuŵa ghithu agha, ŵanthu ŵazamuŵa “ŵakujitunthumuska” ndiposo “ŵakujiŵikamo.” (2 Timote 3:1, 2) Kasi mukuzomerezga yayi kuti ucimi uwu ukufiskika? Kasi mukuwona kuti kujiyuyura kungaŵa na candulo cilicose? Panji mukuwona kuti munthu wakujiyuyura ngwakupusa, ndipo nchipusu kumugololera?

Fundo njakuti Baibolo likuyowoya vifukwa viwemi vyakuŵira wakujiyuyura. Likuyowoya umo tingawonera mwakwenelera mukhaliro wa kujiyuyura, ndiposo likulongora kuti kujiyuyura kwanadi nchimanyikwiro cakuti munthu ni muwemi, kuti ngwakupusa yayi.

[Cithuzithuzi pa peji 3]

Kasi tikwenera kuwona wuli vinthu ivyo tikucita makora?