“Mwana Wali na Wanangwa Wakuti Wakure Mwauzimu”

PA Disembala 9, 2008, wupu wa Swedish Academy for the Rights of the Child ukaŵa na ungano wa mutu wakuti, “Mwana Wali na Wanangwa Wakuti Wakure Mwauzimu.” Ŵanandi awo ŵakayowoyapo maghanoghano ghawo ŵakaŵa ŵa Church of Sweden, Ŵasilamu, visopa vinyake Vyacikhristu, na mawupu gha wanangwa wa ŵanthu.

Pa ungano uwu muliska munyake wakati: “Nkhani za mu Baibolo ni zakuzirwa comene pa umoyo wauzimu wa ŵana, mwakuti nchakusuzga kuti munthu walongosore makora kuzirwa kwake.” Kasi nkhani za mu Malemba zikovwira wuli ŵana mwauzimu?

Muliska uyu wakati: “Mu nkhani izi muli fundo izo mwana wangaghanaghanirapo na kulanguruka payekha.” Wakati zinyake mwa nkhani izo zingawovwira [mwana] kughanaghanira pa vinthu vyakuzirwa mu umoyo wake ni “nkhani ya Adamu na Eva, ya Kayini na Abelu, ya Davide na Goliyati, ya kubabika kwa Yesu, ya wakusonkheska msonkho, Zakeyu, ntharika ya mwana wakuzgeŵa ndiposo ya Musamariya muwemi.” Nkhani izi, ndizo wakati ŵana ŵangasambira umo ŵakwenera kuwonera nkhani ya “uryarya, kugowokerana, kuphepiskana, thinkho, kuyuyura ŵanji, kuphemana, na citemwa ceneko.” Wakasazgirapo kuti: “Munthu wangasambirako vinandi ku nkhani izi. Ivyo vikacitika vingaŵa nga vyacitikira iyo.”

Nchiwemi nadi kukhuŵilizga ŵana kuti ŵaŵazgenge Baibolo. Ndipouli, kasi ŵana ŵangafiska ‘kughanaghanirapo na kulanguruka paŵekha’ ivyo ŵakuŵazga mu Malemba na kuvipulikiska?

Nanga mbalara ŵakukhumbikwira munthu wakuti waŵalongosolere nkhani za mu Malemba. Mwaciyelezgero, Baibolo likutiphalira za munthu uyo ‘wakaghanaghanirapo na kulanguruka payekha’ kweni wakatondeka kupulikiska vinthu vyauzimu. Munthu uyu wakaŵa nthunguli ya ku Etiyopiya. Wakaŵazganga ucimi wa Yesaya, kweni wakatorangapo kanthu yayi. Pakuti wakakhumbanga kupulikiska ucimi uwu, wakazomera apo msambiri Filipu wakajipeleka kuti wamulongosolere. (Mil. 8:26-40) Nga umo vikaŵira na mu Etiyopiya yura, tose, comenecomene ŵana, tikukhumbikwira munthu wakuti watilongosolere nkhani za mu Malemba.

Baibolo likucenjezga kuti: “Undere ukuvungika mu mtima wa mwana.” (Zinth. 22:15) Ŵana ŵakukhumbikwira ulongozgi, ndipo ŵapapi ŵali na udindo wa kuŵasambizga nkharo ndiposo vinthu vyauzimu kufumira mu Malemba na ivyo vikusambizgika mu mpingo Wacikhristu. Ŵana ŵali na wanangwa wa kusambizgika mu nthowa iyi. Kufuma waka pa ubonda, ŵakukhumbikwira wovwiri kuti ŵalimanye makora Baibolo mwakuti ŵakure mwauzimu na kuŵa “ŵakukhwima, awo mu kucita, ŵali kuzgoŵezga nkhongono zawo zakamanyiro kupambaniska pakati pa cakwenelera na cakubudika.”—Heb. 5:14.