Sendelerani kwa Ciuta
Kasi Yehova Wakujipulika Nga Umo Ise Tikujipulikira?
PARA zgoro ndakuti enya, fumbo linyake ndakuti: Kasi nkharo yithu yikukhwaska wuli Ciuta? Apa tikung’anamura kuti, kasi ivyo tikucita vingakondweska Ciuta panji kumukwiyiska? Ŵakusanda ŵanyake ŵakale ŵakuti yayi. Iwo ŵakati palije uyo wangapangiska Ciuta kuti wakondwe panji kukwiya cifukwa cakuti Ciuta wakujipulika nga umo taŵanthu tikujipulikira yayi. Kweni Baibolo likusambizga cinthu cinyake cakupambana na maghanoghano agha. Ilo likusambizga kuti ivyo tikucita vikumukhwaska comene. Wonani mazgu agho ghakusangika pa Salmo 78:40, 41.
Salmo 78 likuyowoya umo Ciuta wakacitira na mtundu wa Israyeli. Yehova wakati waŵawombora Ŵaisrayeli ku wuzga mu Eguputo, wakaŵa nawo paubwezi wapadera. Wakaŵalayizga kuti para ŵalutilirenge kupulikira malango ghake, ŵaŵenge ‘usambazi wake wapadera’ ndipo waŵagwiliskirenge nchito kuti wafiske khumbo lake. Ŵaisrayeli wakazomerezga ndipo wakacita nawo phangano. Kasi Ŵaisrayeli ŵakacita ivyo ŵakapangana na Ciuta?—Exodus 19:3-8.
Wamasalmo wakati: “Nkhenekanandi ŵakamugalukira mu mapopa!” (Vesi 40) Vesi lakulondezgapo likuyowoyaso kuti: “Kaŵirikaŵiri ŵakamusosomora Ciuta.” (Vesi 41) Wonani kuti mulembi uyu wakulongosora kuti ŵakamugalukira mwakuwerezgawerezga. Ŵakamba kumugalukira ŵati ŵanjira waka mu mapopa, wati waŵawombora waka ku Eguputo. Ŵanthu ŵakamba kumunyunyutira Ciuta, ndiposo ŵakamba kukayikira usange wakuŵapwelelera nadi. (Maŵazgo 14:1-4) Buku linyake lakovwira ŵakung’anamura Baibolo likuti mazgu ghakuti “ŵakamugalukira” ghakung’anamura “kuti ‘ŵakanonopeska mitima yawo kwa Ciuta’ panji ‘ŵakamukana Ciuta.’” Pakuti Yehova ngwalusungu, wakaŵagowokeranga para ŵalongora kupera. Kweni pamanyuma ŵakaweleranga ku nthowa zawo na kumugalukiraso, ndipo Yehova wakaŵagokerangaso para ŵapera.—Salmo 78:10-19, 38.
Kasi Yehova wakajipulikanga wuli apo nyengo na nyengo ŵanthu ŵake ŵakamugalukiranga? Vesi 40 likuti, ‘ŵakamukalipiskanga mtima.’ Mu Baibolo linyake mazgu gha mu vesi ili ghali kung’anamulika kuti, “ŵakamucitiskanga citima.” Buku linyake lakulongosora Baibolo likuti: “Ng’anamuro la mazgu agha ndakuti ivyo Ŵahebere ŵakacitanga vikamucitiskanga citima nga umo nkharo ya mwana wambura kupulikira ndiposo wakugaluka yikucitiskira citima ŵapapi.” Nga umo mwana wakugaluka wangaŵinyiskira mtima wa ŵapapi ŵake, Ŵaisrayeli ŵakugaluka nawo ‘ŵakamutopokeska moyo Mutuŵa wa Israyeli.’—Vesi 41.
Kasi tingasambiraci mu salmo ili? Tikusambiramo kuti Yehova wakutemwa ŵanthu ŵake awo ŵakumusopa ndipo wakucita nawo daka mwaluŵiro yayi. Pa nyengo yeneiyo pera, nchamahara comene kumanya kuti ivyo tikucita vikukhwaska comene Yehova. Kasi kumanya fundo iyi kukumukhwaskani wuli? Kasi kukumuciskani kuti mucitenge ico nchiwemi?
M’malo mwa kusankhira dala vinthu viheni na kuŵinyiska mtima wa Yehova, tingasankha kucita vinthu viwemi kuti tikondweske mtima wake. Ndipo ici ndico wakupempha ŵanthu awo ŵakumusopa, wakuti: “Mwana wane, khala wavinjeru na kukondwereska mtima wane.” (Zintharika 27:11) Palije cinthu cakuzirwa ico tingamupa Yehova kuluska kucita vinthu viwemi na kukondweska mtima wake.
Vyaputala vya mu Baibolo ivyo Mungaŵazga mu Julayi:
[Mazgu Ghakukhozgera pa peji 10]
Palije cinthu cakuzirwa ico tingamupa Yehova kuluska kucita vinthu viwemi na kukondweska mtima wake