Khozgerani Fundo za Yehova

Yehova wali kuŵika fundo izo ŵanthu ŵakwenera kwendera. Mwachiyelezgero, iyo wakuti nthengwa yikwenera kuŵa pakati pa mwanalume na mwanakazi ndipo nja umoyo wose. (Mt 19:4-6, 9) Iyo wakutinkha mtundu uliwose wakugonana kwambura kuzomerezgeka. (1Ko 6:9, 10) Iyo wakutipaso fundo izo zikutovwira nanga mpha nkhani ya kavwaliro na kujitozga ivyo vikutovwira kuti tipambanenge na ŵanthu ŵanyake.—Do 22:5; 1Ti 2:9, 10.

Mazuŵa ghano, ŵanthu ŵanandi ŵakukana kulongozgeka na fundo za Yehova. (Ro 1:18-32) Iwo ŵakuchita waka ivyo ŵanthu ŵanandi ŵakuchita pa nkhani ya kavwaliro, kujitozga na nkharo. Ŵanthu aŵa ŵakuchita vinthu viheni na kunena awo ŵakulondezga fundo za mu Baibolo.—1Pe 4:3, 4.

Pakuti ndise Ŵakaboni ŵa Yehova, ipo tikwenera kulutilira kukhozgera fundo za Chiuta. (Ro 12:9) Tingakhozgera wuli? Tikwenera kulutilira kuchita icho ntchakwenelera pamaso pa Chiuta na kulongora makhaliro ghawemi zuŵa na zuŵa. Mwachiyelezgero, pa nkhani ya vyakuvwara na kujitozga tingajifumba kuti: ‘Kasi ivyo nkhusankha vikulongora kuti nkhwendera fundo za Yehova panji za charu? Kasi vyakuvwara na umo nkhujitozgera vikulongora kuti ndine Mkhristu uyo wakopa Chiuta?’ Kweniso pambere tindasankhe pulogiramu ya pa TV panji filimu kuti tiwonelere tingajifumba kuti: ‘Kasi Yehova wangakondwa nayo? Kasi filimu panji pulogiramu iyi yikukhozgera fundo za njani? Kasi vyakusanguluska ivyo nkhutemwa vingapangiska kuti nileke kutinkha viheni? (Sa 101:3) Kasi vingakhuŵazga ŵamumbumba panji ŵanthu ŵanyake?’—1Ko 10:31-33.

Chifukwa wuli ntchakuzirwa kuti nyengo zose tilondezge fundo za Yehova? Sonosono apa Yesu waparanyenge wose awo ŵakuchita viheni. (Eze 9:4-7) Kweni ŵekha awo ŵakuchita khumbo la Yehova ndiwo ŵazamupona. (1Yo 2:15-17) Ntheura tiyeni tilutilire kukhozgera makhaliro ghawemi mwakuti awo ŵakuwona viwemi ivyo tikuchita ŵalumbe Chiuta.—1Pe 2:11, 12.

WONELERANI VIDIYO YAKUTI ŴANI ŴABWEZI ŴA YEHOVA—MWANALUME YUMOZA, MWANAKAZI YUMOZA, NA KUZGORA MAFUMBO AGHA:

• Chifukwa wuli ntchakuzirwa kuti tilondezgenge fundo za Yehova?

• Chifukwa wuli ŵapapi ŵakwenelera kusambizga ŵana fundo za Yehova apo ŵachali ŵachoko?

• Kasi ŵana na ŵalara wuwo ŵangawovwira wuli ŵanthu kusanga chandulo na fundo za Yehova?