Kuzunura Malemba Mwakwenelera

MALEMBA ndigho lufura lwa urongozgi uwo ukuperekeka pa maungano ghithu gha mpingo. Malemba gha mu Baibolo ndigho ghakuŵaso fundo zikuru izo tikuyowoya para tili mu uteŵeti wa m’munda. Ndipouli, kuti igho ghagwire makora ncito yake, cikuthemba pa umo ise tikughazunulira.

Ni vinandi ivyo vikukhumbikwa kuruska kuzunura waka lemba na kupempa yunji kuti muŵazgire lumoza lemba. Para mukuzunura lemba, yezgayezgani kuti mufiske vilato viŵiri ivi: (1) Pangiskani yunji kuŵa wakunweka na ivyo muŵazgenge, na (2) kurongosora cifukwa ico mukuŵazgira lemba ilo. Mungafiska vilato ivi mu ntowa zakupambana-pambana.

Fumbani. Ntowa iyi njiweme comene usange ŵategherezgi ŵinu ŵakulimanya yayi zgoro la fumbo linu. Fumbani mu ntowa yakuti ŵantu ŵarangurukepo pa fumbo linu. Yesu wakafumbanga mwa ntowa iyi. Peneapo Ŵafarisi ŵakiza kwa iye mu tempele na kumufumba pamaso pa ŵantu za kapulikiskiro kake ka Malemba, Yesu wakaŵafumba iwo kuti: “Kasi mukuti wuli na Kristu? ni mwana wa njani?” Iwo ŵakazgora kuti: “Wa Davide.” Yesu wakarutirizga kuŵafumba kuti: ‘Ipo cifukwa ncici Davide mwakufunyilirika wakamuzunura kuti “Fumu”?’ Wakati wafumba fumbo ili wakarutilizga mwakuzunura mazgu gha Salmo 110:1. Ŵafarisi ŵakaŵavya cakuti ŵayowoye. Ndipouli, mzinda wa ŵantu ukategherezga mwakukondweskeka ku ivyo Yesu wakayowoyanga.—Mat. 22:41-46.

Para muli mu uteŵeti wa m’munda, mungagwiriskira ncito mafumbo ghanteura agha: “Imwe na ine tose tili na mazina. Kasi Ciuta naye wali na zina? Zgoro la fumbo ili likusangika pa Salmo 83:18.” “Kasi lizamuŵapo boma lakuti liwuse ŵantu wose pa caru capasi? Wonani umo fumbo ili likuzgorekera pa Daniel 2:44.” “Kasi Baibolo likurongosora nadi za mikhaliro iyo yiliko mu nyengo yithu yino? Yerezgerani na mikhaliro iyo yikurongosoreka pa 2 Timote 3:1-5 ndipo wonani usange mukuzomerezga kuti yikucitika nadi.” “Kasi kusuzgika na nyifwa vizamumara? Zgoro lakusangika mu Baibolo liri pa Civumbuzi 21:4, 5.”

Pakuyowoya nkani, kugwiriskira ncito mafumbo mwakwenelera pakuzunura malemba ghakuti muŵazge kungapangiska ŵategherezgi kunweka comene kuŵazga malemba ghanteura agho, nangauli ghangaŵa kuti ŵakughamanya kale. Kasi iwo ŵanganweka nadi? Vyose vikuthemba umo mufumbirenge. Kuti ŵanweke, fumbani mafumbo agho ghangaŵa ghacovwiro kwa iwo. Nangauli nkani iyo mukuyowoya yingaŵa yakukondweska ŵategherezgi, kweni ndipera, maghanoghano ghawo ghangaŵa kunyake para mukuŵazga malemba ghakuti iwo ŵakughamanya kale. Kuti maghanoghano ghawo ghaleke kuŵa kunyake, imwe mukwenera kunozgekera makora comene nkani yinu kuti yiŵafike mtima ŵategherezgi.

Yowoyani Cakumara-mahara. Yowoyani cakumara-mahara, ndipo pamanyuma pake ŵazgani lemba ilo liri na zgoro la cakumara-mahara ico. Kweni fumbani mwamahara kuti ŵategherezgi ŵaleke kughanaghana kuti lemba ilo muŵazgenge liri na mazgoro ghose gha vyakumara-mahara vyawo. Kanandi ncigaŵa cicoko waka ca lemba ico cikupereka zgoro ku fumbo ilo lafumbika. Ndipouli, mungafumba ŵategherezgi kuti ŵarangurukepo pa lemba ilo muŵazgenge, ndiposo ŵawone urongozgi uwo ungaŵawovwira pakumazga cakumara-mahara.

Mwa ntowa yakuyana waka, mungayowoya dango la Ciuta la kakhaliro, ndipo pamanyuma pake zunurani nkani ya mu Baibolo kuti murongosore candulo cakurondezgera dango ilo. Usange lemba ilo muŵazgenge liri na fundo ziŵiri (panji zinandi) izo zikukolerana na nkani iyo mukuyowoya, mungacita mwakuyana na ŵayowoyi ŵanji awo ŵakuphalira ŵategherezgi kuti ŵazimanye fundo zapadera zanteura izo. Usange cakumara-mahara ico mwanguzunura ncinonono ku ŵategherezgi, munganwekeska mitima yawo mwakusacizga ntowa zakupambana-pambana zakumazgira cakumara-mahara ico, ndipo pamanyuma pake ŵazgani lemba kuti ndilo lirongore umo cakumara-mahara ico cingamazgikira mwakugwiriskira ncito cimanyisko cake.

Rongorani Baibolo Kuti Ndilo Liri na Mazaza. Usange mwanwekeska kale mitima ya ŵategherezgi pa nkani iyo mukuyowoya, ndipo mwayowoyapo sacizgo limoza panji ghanandi ghakukhwaskana na nkani yinu, mungazunura lemba ilo mukukhumba kuŵazga mwakuyowoya kuti: “Wonani ivyo Mazgu gha Ciuta ghakuyowoya pa fundo iyi.” Ici cikurongora pakweru kuti lemba ilo muŵazgenge ndilo liri na mazaza pa nkani iyo mukudumbirana.

Yehova wakagwiriskira ncito ŵanarumi ŵa nga ni Yohane, Paulos, Luka na Petros kuti ŵalembe vigaŵa vinyake vya Baibolo. Iwo ŵakalemba waka ivyo ŵakaphalirika; kweni Yehova ndiye Mulembi. Para tikuyowoya na ŵantu awo ŵakuleka kugomezga ivyo Malemba Ghatuŵa ghakuyowoya, ndipo tikukhumba kuŵazga lemba, nciweme kuti tileke kuyowoya kuti, “Petros wakalemba kuti,” panji “Paulos wakalemba kuti.” Kayowoyero kanteura aka kangapangiska kuti iwo ŵaghaneghane kuti malemba agho ni mazgu gha Ciuta yayi. Ncakuzirwa kumanya kuti Yehova wakaphalira Yeremiya ntowa ya umo wangayowoyera vipharazgo vyake mwakuyowoya kuti: “Pulikani mazgu gha Yehova.” (Yer. 7:2; 17:20; 19:3; 22:2) Kwali tikugwiriskira ncito zina la Yehova para tikuzunura malemba ghakuti tiŵazge panji yayi, pambere tindamalizge cidumbirano cithu, tikwenera kurongora pakweru kuti ivyo vili mu Baibolo ni mazgu ghake.

Manyani Ivyo Lemba Likuyowoya. Cakudanka mukwenera kumanya ivyo lemba likuyowoya pambere mundalizunure kuti muŵazge. Nyengo zinyake mungazunura mwakudunjika ivyo lemba ilo likuyowoya, kweni manyani kuti, cimanyisko cakukhwaskana na lemba ilo muŵazgenge cikukhwaskaso ivyo muyowoyenge. Mwaciyerezgero, kasi mungayowoya mazgu agho wakayowoya muntu wakuwopa Ciuta Yobu, mwakuyana na umo mungacitira para muyowoyenge mazgu agho ghakayowoyeka na yumoza wa mabwezi ghake gha utesi? Buku la Milimo likalembeka na Luka, kweni iye walikulemba mazgu agho ghakayowoyeka na Yakobe, Petros, Paulos, Filipu, Stefano na ŵangelo, ndiposo mazgu gha Gamaliyeli na Ŵayuda ŵanyake awo ŵakaŵa Ŵakristu yayi. Kasi muyowoyenge kuti ninjani uyo wakayowoya mazgu agho mwaŵazga? Manyaniso kuti masalmo ghose ghakalembeka na Davide pera yayi, ndiposo buku la Zintharika likalembeka na Solomon pera yayi. Ncakuzirwaso kumanya kuti mulembi wa Baibolo wakayowoyanga za njani ndiposo kumanya nkani iyo yikadumbikanga.

Yowoyani Mdauko wa Lemba. Ici cingaŵa cacovwiro comene usange mungarongora kuti mikhaliro iyo yikaŵapo panyengo iyo Baibolo likalembekeranga yikuyana waka na ya mu nyengo iyo mukudumbirana. Mdauko wakuyowoya za lemba ukovwiraso kuti tipulikiske mavesi ghanyake. Tiyerezgere kuti muŵazgenge lemba la Ŵahebere 9:12, 24 mu nkani yinu iyo yikuyowoya za ciwombolero. Cingaŵa ciweme kuti murongosore mwakudumura mdauko wa mavesi agha, agho ghakuyowoya za cipinda ca mkati comene ca mu cihema, ceneico cayowoyeka mu lemba ili, ico cikwimira malo agho Yesu wakanjiramo apo wakakwera kucanya. Kweni ndipera, lekani kuyowoya mdauko utali comene cifukwa ungatimbanizga cimanyisko ca vesi ilo mukukhumba kuŵazga.

Kuti murute pantazi pa kazunuliro ka malemba agho mukukhumba kuŵazga, wonani umo ŵayowoyi ŵaluso ŵakucitira. Wonani ntowa zakupambana-pambana izo ŵakuzigwiriskira ncito. Wonani umo ntowa izi ziliri ziweme. Para mukunozgekera nkani yinu, manyani malemba agho ghali na fundo zikuru, ndipo ŵikanipo pwererero lapadera kuti fundo yikuru ya lemba ilo yimanyikwe. Manyani ntowa ya umo mwamuzunulira lemba lirilose kuti likhwaske mtima ŵategherezgi. Mavesi ghose agho muŵazgenge mu nkani yinu ghakwenera kuŵazgika mwakuyana waka kuti ghakaconte mitima ya ŵategherezgi ŵinu. Peneapo luso lwinu lukuya pantazi, cizamuŵa cipusu kwa imwe kuŵika pwererero pa Mazgu gha Ciuta.