Ivyo Tingachita Kuti Tisazgireko Uteŵeti Withu

NYENGO yikati yakwana kuti Yesu watume ŵasambiri ŵake kukapharazga vya Ufumu wa Chiuta, wakaŵaphalira kuti: “Vuna njinandi chomene, kweni ŵantchito mbachoko.” Ntchito yikaŵa yikuru chomene, ntheura wakati: “Lombani Mwenecho wa vuna kuti watume ŵantchito ku vuna yake.” (Mat. 9:37, 38) Yesu wakaphalira ŵasambiri ŵake umo ŵangachitira uteŵeti wawo. Ŵasambiri ŵakenera kuchita uteŵeti uwu mwaluŵiro, chifukwa Yesu wakati: “Muzamumara chara kuzingilira misumba ya Israyeli, pambere Mwana wa munthu wandize.”—Mat. 10:23.

² Mazuŵa ghano napo ŵantchito ŵanandi ŵakukhumbikwa kuti ŵapharazgenge. Makani ghawemi gha Ufumu ghakwenera kupharazgika pambere umaliro undafike ndipo nyengo iyo yakhalako njichoko chomene. (Mrk. 13:10) Munda ukwimira charu, ndipo nga umo vikaŵira na Yesu na ŵasambiri ŵake, nase tili na ntchito yikuru ndipo ntchito iyi yakura chomene. Tili ŵachoko chomene pakuyaniska na ŵanthu mabiliyoni awo ŵali mu charu, kweni tikugomezga kuti Yehova watovwirenge. Makani ghawemi gha Ufumu ghapharazgikenge dankha pa charu chose chapasi ndipo umaliro wizenge pa nyengo yakwenelera iyo Yehova waŵika. Kasi ntchito yakupharazga Ufumu wa Chiuta yiŵenge pakwamba mu umoyo withu kuti tiyichite mwakukwana? Kasi ni vinthu wuli ivyo tikukhumba kuchita pakuteŵetera Yehova?

³ Yesu wakayowoya ivyo Yehova wakukhumba kwa muteŵeti wake waliyose, wakati: “Utemwenge Yehova Chiuta wako na mtima wako wose na umoyo wako wose na maghanoghano ghako ghose na nkhongono zako zose.” (Mrk. 12:30) Tose tikwenera kuteŵetera Chiuta na umoyo withu wose. Para tikulimbikira kuteŵetera Yehova, tikulongora kuti tajipeleka kwa iyo na mtima wose. (2 Tim. 2:15) Pali mauteŵeti ghanandi agho waliyose wangachita kuyana na umo vinthu viliri kwa iyo. Tiyeni tiwonepo mauteŵeti ghanyake agho ghalipo, ndipo muwone ivyo mungachita kuti namwe muchite uteŵeti uwo.

⁴ Waliyose uyo wakutemwa unenesko wakwenera kupharazga makani ghawemi. Iyi ni ntchito yakuzirwa iyo Yesu wakaphalira ŵasambiri ŵake kuti ŵachitenge. (Mat. 24:14; 28:19, 20) Kanandi msambiri wa Yesu Khristu wakwamba kuphalira ŵanyake makani ghawemi para waghapulika waka. Ndimo Andireya, Filipu, Koroneliyo, na ŵanthu ŵanyake ŵakachitira. (Yoh. 1:40, 41, 43-45; Mil. 10:1, 2, 24; 16:14, 15, 25-34) Kasi ichi chikung’anamura kuti munthu wangapharazga makani ghawemi uku wandabatizike? Enya. Para munthu wazomerezgeka waka kuŵa mupharazgi wambura kubatizika, nayo wakwamba kupharazga nyumba na nyumba. Kweniso, wangachita mauteŵeti ghanyake kuyana na umo vinthu viliri pa umoyo wake.

⁵ Para mupharazgi wabatizika, wakwamba kuchita ivyo wangafiska kuti wawovwire ŵanyake kumanya makani ghawemi. Ŵanalume na ŵanakazi, wose ŵali na ntchito ya kupharazga. Tili na mwaŵi ukuru kuchitako ntchito ya kupharazga Ufumu wa Chiuta. Waliyose uyo wangasazgirako uteŵeti wake waŵenge wakukondwa.

⁶ Panji mukuteŵetera mu mpingo uwo kanandi ukufiska kupharazga chigaŵa chake chose, ndipo ŵanthu ŵanandi ŵapulikapo makani ghawemi. Para ndimo viliri, mungaghanaghana za kusazgirako uteŵeti winu. Mungasamira ku chigaŵa chinyake uko kukukhumbikwira ŵapharazgi ŵanandi. (Mil. 16:9) Usange ndimwe mulara panji muteŵeti wakovwira, pangaŵa mpingo unyake mu charu chinu uwo ukukhumbikwira kuti mukawovwireko. Mulaŵiliri winu wa dera wangasachizga umo mungawovwilira mpingo unyake mu dera linu. Para mukukhumba kukateŵetera ku chigaŵa chinyake mu charu chinu, mungalembera kalata ofesi kuti yimuphalirani ivyo vikukhumbikwa.

⁷ Kasi mungatemwa kukateŵetera ku charu chinyake? Usange ni nthena, mukwenera kughanaghanirapo chomene. Phalirani ŵalara mu mpingo winu, chifukwa ichi chikhwaskenge imwe na awo mulutenge nawo. (Luka 14:28) Para mukughanaghana kuti mwamuteŵeterako nyengo yichoko waka, chingaŵa chiwemi kuteŵetera mu charu chinu.

⁸ Mu vyaru vinyake, ŵabali awo ŵakulaŵilira mu mpingo ŵakuŵa kuti ŵasambira sono unenesko. Ŵalara awo mbasono ŵakujiyuyura na kuzomerezga kuti ŵalara awo ŵateŵetera nyengo yitali, awo ŵiza kuzakawovwira mpingo wawo ndiwo ŵalongozgenge. Usange ndimwe mulara ndipo mukukhumba kusamira ku charu chinyake, kumbukani kuti chilato chinu ntchakuti mukapoke maudindo gha ŵabali yayi. Kweni mukwenera kukateŵetera nawo lumoza. Mukawovwire ŵabali kuti ŵanwekerenge na kuzomera mauteŵeti mu mpingo. (1 Tim. 3:1) Zikirani usange mukuwona kuti vinthu vinyake vikuchitika mwakupambana na umo mukuchitira kukwinu. Wovwirani ŵabali na maluso agho muli nagho. Usange mwachita nthena, ŵabali ŵazamulongozga makora mpingo para imwe mwawelera kwinu.

⁹ Pambere ofesi ya mu charu chinu panji ya charu chinyake yindamupani mazina gha mipingo iyo mungakateŵeterako, Komiti ya Uteŵeti ya Mpingo winu yikwenera kulemba kalata yakumulongosorani. Kalata iyi njakukhumbikwa, kwali ndimwe mulara, muteŵeti wakovwira, mupayiniya panji mupharazgi. Komiti ya uteŵeti yizamutumizga kalata yakumulongosorani pamoza na kalata yinu ku ofesi ya charu icho mukukhumba kukateŵetera.

¹⁰ Kuti muchite vinandi mu uteŵeti, mungasambira chiyowoyero chinyake, nga ntchiyowoyero cha mawoko. Para mukukhumba kusambira chiyowoyero chinyake, phalirani ŵalara na mulaŵiliri winu wa dera. Ŵangamukhozgani na kusachizga ivyo mungachita. Ofesi yikuzomerezga kuti mu madera ghanyake muŵe sukulu yakusambizga viyowoyero vinyake kuti yovwire ŵapharazgi na ŵapayiniya kuti ŵapharazgirenge ŵanthu awo ŵakuyowoya viyowoyero vinyake.

¹¹ Ŵapharazgi wose ŵakwenera kumanya ivyo vikukhumbikwa kuti munthu waŵe mupayiniya wakanyengo, wanyengozose, wapadera, kweniso kuti wachite mauteŵeti ghanyake ghanyengozose. Mupayiniya wakwenera kuŵa wakubatizika, wankharo yiwemi, uyo wangafiska maora agho ghakukhumbikwa. Komiti ya Uteŵeti ya Mpingo ndiyo yikuzomerezga awo ŵakukhumba kuchita upayiniya wakanyengo na wanyengozose, ndipo ofesi ndiyo yikwimika ŵapayiniya ŵapadera.

¹² Ŵapayiniya ŵakanyengo ŵangateŵetera kwa mwezi umoza, kwa myezi yinandiko, panji kwa nyengo yitaliko, kuyana na umo vinthu viliri pa umoyo wawo. Ŵapharazgi ŵanandi ŵa Ufumu ŵakutemwa kuchita upayiniya wakanyengo mu nyengo ya Chikumbusko, panji mu mwezi uwo mulaŵiliri wa dera wakuchezgera mpingo wawo. Ŵanyake ŵakuchita upayiniya wakanyengo para ŵali pa holide. Ŵapharazgi awo ŵakusambira sukulu ŵangachita upayiniya wakanyengo para sukulu zajara. Ŵapharazgi ŵangachita upayiniya wakanyengo wa maora ghachoko mu mwezi wa Malichi na Epulero chaka chilichose panji pa nyengo iyo mulaŵiliri wa dera wakuchezgera mpingo wawo. Usange muli na nkharo yiwemi, ndipo mungafiska maora agho ghakukhumbikwa, nakuti mukuwona kuti mungachita upayiniya wakanyengo kwa mwezi umoza panji yinandi, ŵalara ŵazamuzomerezga kuti muchite uteŵeti uwu.

¹³ Kuti muŵe mupayiniya wanyengozose, mukwenera kufiska maora agho ghakukhumbikwa pa chaka. Para ndimwe mupayiniya wanyengozose, mukwenera kuteŵetera na mpingo winu. Ŵapayiniya awo ŵakulimbikira kupharazga ni thumbiko ku mpingo, ŵakuchiska ŵanji kuti nawo ŵalimbikirenge kupharazga kweniso kuti ŵaŵe ŵapayiniya. Pambere ŵalara ŵandazomerezge kuti muŵe mupayiniya wanyengozose, mukwenera kuŵa mupharazgi wa nkharo yiwemi, ndiposo pakwenera kujumpha myezi pafupifupi 6 kufuma apo mukabatizikira.

¹⁴ Ŵapayiniya ŵapadera ŵakusankhika pa ŵapayiniya ŵanyengozose awo ŵakuchita makora chomene mu uteŵeti. Ŵakwenera kukateŵetera kulikose uko ofesi yingaŵatuma. Kanandi, ŵakutumika ku chigaŵa icho chili kutali na mpingo, uko ŵangasanga ŵanthu ŵakunweka na kwambiska mipingo yiphya. Nyengo zinyake, ŵapayiniya ŵapadera ŵakutumika ku mipingo iyo yikukhumbikwira wovwiri kuti yifiske kupharazga chigaŵa chake chose. Ŵapayiniya ŵanyake ŵapadera awo mbalara, ŵakutumika kuti ŵakawovwire mipingo yichokoyichoko, nanga yingaŵa kuti yikukwaniska kupharazga chigaŵa chake chose. Ŵapayiniya ŵapadera ŵakupika ndalama zichoko waka kuti ziŵawovwirenge pa umoyo wawo. Ŵanyake ŵakuchita upayiniya wapadera wakanyengo.

¹⁵ Komiti ya Uteŵeti ya Wupu Wakulongozga ndiyo yikwimika ŵamishonale. Kufuma apo, Komiti ya Munthavi ya mu charu chawo yikuŵatuma mu vigaŵa ivyo muli ŵanthu ŵanandi. Ŵakovwira chomene pa ntchito ya kupharazga na kukhozga mpingo. Ŵamishonale kanandi ŵakupika mwaŵi wa kusambira Sukulu ya Ŵapharazgi ŵa Ufumu. Ŵakuŵapa nyumba na ndalama zichoko waka zakuti ziŵawovwirenge pa umoyo wawo.

¹⁶ Ŵalaŵiliri ŵa dera ŵakwimikika na Wupu Wakulongozga. Ŵakuteŵeterapo dankha nga ni movwiri wa mulaŵiliri wa dera kuti ŵasambizgike na kuŵa na luso. Ŵabali aŵa ŵakutemwa kupharazga kweniso ŵakutemwa Ŵakhristu ŵanyawo. Mbapayiniya awo ŵakulimbikira kupharazga, ŵakutemwa kuŵerenga Baibolo, ŵakuyowoya makora nkhani, kweniso ŵakumanya kusambizga. Ŵakulongora vipambi vya mzimu, ŵakuchita vinthu mwamahara kweniso mwaumanyi. Para mulaŵiliri wa dera ngwakutora, muwoli wake wakwenera kuŵa mupayiniya wa nkharo yiwemi, wakukhala makora na ŵanthu, kweniso wakutemwa kupharazga. Wakujilambika kwa mfumu wake, ni muyowoyeri wa mfumu wake yayi. Wakutegherezga para ŵanyake ŵakuyowoya. Ŵalaŵiliri ŵa dera na ŵawoli ŵawo nyengo zose ŵakuŵa ŵakutangwanika, ntheura awo ŵakukhumba uteŵeti uwu ŵakwenera kuŵa ŵambura kulwaralwara. Ŵapayiniya ŵakuchita kupempha yayi kuti ŵaŵe ŵalaŵiliri ŵa dera. Kweni ŵangaphalira mulaŵiliri wa dera kuti ŵakukhumba mulimo uwu. Iyo waŵawovwirenge kuti ŵamanye ivyo vikukhumbikwa.

¹⁷ Sukulu ya Ŵapharazgi ŵa Ufumu: Ŵapharazgi ŵa Ufumu ŵanandi ŵakukhumbikwa kuti ŵapharazge mu vigaŵa ivyo mukupharazgika viŵi yayi na kovwira mipingo kuti yikhore mwauzimu. Ŵabali ŵambura kutora, ŵadumbu ŵambura kutengwa, na awo ŵali mu nthengwa ŵangapempha kuti ŵasambireko Sukulu ya Ŵapharazgi ŵa Ufumu. Para ŵamara kusambira sukulu iyi, ŵapharazgi aŵa ŵakutumika mu charu chawo kuti ŵakachite upayiniya wanyengozose mu vigaŵa ivyo mukukhumbikwira ŵapharazgi ŵanandi. Kweni ŵanyake ŵangapika mauteŵeti ghanyake mu charu chawo panji mu charu chinyake. Ŵanyake ŵangatumika kukachita upayiniya wapadera wanyengozose panji wakanyengo. Ŵapayiniya awo ŵakukhumba kukasambira sukulu iyi ŵangamanya ivyo vikukhumbikwa para ŵangaŵapo pa ungano wa awo ŵakukhumba sukulu iyi, uwo ukuŵa pa ungano wa chigaŵa.

¹⁸ Sukulu ya Giliyadi: Ŵabali ŵambura kutora, ŵadumbu ŵambura kutengwa, na awo ŵali pa nthengwa ŵakusankhika kuluta ku sukulu iyi, kweni ŵakwenera kumanya kuyowoya Chingelezi kweniso awo ŵakuchita uteŵeti wanyengozose. Ŵabali na ŵadumbu aŵa ŵangawovwira chomene pa ofesi kweniso pa ntchito ya kupharazga. Ŵakuŵa kuti ŵalongora kale kuti ŵakukondwa kuteŵetera ŵabali ŵawo ndipo ŵakovwira ŵanyawo kuti ŵasambire na kulondezga ulongozgi wa mu Baibolo na uwo gulu la Chiuta likupeleka. Komiti ya Munthavi ndiyo yikuphalira ŵabali na ŵadumbu kuti ŵapemphe sukulu iyi. Awo ŵasambira sukulu iyi ŵakutumika kukapharazga panji kukateŵetera pa ofesi ya munthavi mu charu chinyake panji mu charu chawo.

¹⁹ Kuteŵetera pa Beteli ni mwaŵi wapadera chomene. Zina lakuti Beteli likung’anamura “Nyumba ya Chiuta.” Zina ili ndakwenelera nadi chifukwa pa Beteli ndipo pakuchitikira ntchito ya Chiuta. Ŵabali na ŵadumbu awo ŵakuteŵetera pa Beteli ŵakuchita ntchito yakuzirwa chomene ya kusindikizga, kung’anamura, ndiposo kutumizga mabuku agho ghakulongosora Baibolo. Wupu Wakulongozga, uwo ukulaŵilira na kupeleka ulongozgi ku mipingo pa charu chose, ukuwonga chomene ntchito iyo ŵabali na ŵadumbu aŵa ŵakuchita. Ŵabali na ŵadumbu ŵanandi awo ŵakung’anamura mabuku ŵakukhala ku chigaŵa icho kuli chiyowoyero icho ŵakung’anamura. Ivi vikovwira kuti ŵapulikenge umo ŵanthu ŵakuyowoyera zuŵa lililose. Kweniso ŵakuwona usange ŵanthu ŵakupulika ivyo ŵakung’anamura.

²⁰ Ntchito zinandi izo zikuchitika pa Beteli zikukhumba ŵanthu ŵankhongono. Lekani awo ŵakuchemeka ku Beteli ŵakwenera kuŵa ŵabali ŵakujipeleka, ŵakubatizika awo mbawukirano, ŵambura kulwaralwara, ndiposo ŵankhongono. Para mukukhumba kukateŵetera pa Beteli mu charu chinu, fumbani ŵalara ŵa mpingo winu kuti mumanye ivyo vikukhumbikwa.

²¹ Kuzenga nyumba zakusoperamo na zakuchitiramo ntchito zinyake za Ufumu mbuteŵeti wakupatulika. Ntchito iyi yikuyana waka na ya kuzenga tempile la Solomoni. (1 Mathe. 8:13-18) Ŵabali na ŵadumbu ŵanandi ŵakumalira nyengo yawo na vyuma vyawo kovwira pa ntchito iyi.

²² Kasi namwe mungawovwirapo pa ntchito iyi? Para ndimwe mupharazgi wakubatizika, ndipo mukukhumba kuchitako ntchito iyi, ŵabali awo ŵakulaŵilira ntchito ya kuzenga mu chigaŵa chinu ŵazamuwonga chomene wovwiri winu. Ndipo mbakunozgeka kumusambizgani nanga mungaŵa na maluso ghachoko. Mungaphalira ŵalara kuti namwe mukukhumba kuchitako ntchito iyi. Ŵapharazgi ŵanyake ŵakubatizika ŵakujipeleka kuzenga nyumba zakusoperamo na zakuchitiramo ntchito zinyake mu vyaru vinyake.

²³ Pali mipata yinandi chomene yakuti muchiteko ntchito ya kuzenga. Ŵapharazgi ŵakubatizika ŵankharo yiwemi awo ŵakumanyako vyakuzengazenga, ndipo ŵangajipeleka na kovwirapo pa ntchito iyo yikuchitika mu charu chawo, ŵangateŵetera mu Dipatimenti Yakuwona vya Mapulani na Kuzenga. Ŵanyake ŵangaphalirika kuti ŵakawovwirepo pa ntchito ya kuzenga ku malo gha kutaliko na kwawo kwa masabata ghaŵiri panji myezi yitatu. Kweni ofesi ndiyo yikusora ŵanthu aŵa. Ŵanthu aŵa ŵakuchemeka kuti ŵantchito ŵakujipeleka kuzenga. Awo ŵateŵeterenge nyengo yitali ŵakuchemeka kuti ŵateŵeti ŵakuzenga. Uyo wasankhika kuti wamuteŵetera ku charu chinyake wamugwiranga nga ni muteŵeti wakuzenga wa ku charu chinyake. Gulu la Kuzenga, ŵantchito ŵakujipeleka kuzenga, na ŵateŵeti ŵakuzenga ndiwo ŵakulongozga pa ntchito yiliyose ya kuzenga. Ndipo Dipatimenti Yakuwona vya Mapulani na Kuzenga ndiyo yikuŵawovwira kweniso ŵabali ŵa mu mipingo nawo ŵakovwirapo. Para Magulu gha Kuzenga ghamara ntchito ku chigaŵa chinyake ghakukazengaso kunyake mu charu chawo chenechicho.

²⁴ Para muli kujipeleka kwa Yehova, mukwenera kuti mukukhumba kumuteŵetera muyirayira. Kweni kasi mukukhumba kuchita uteŵeti wuli? Para mwamanyirathu uteŵeti uwo mukukhumba kuchita, mugwiliskirenge ntchito nkhongono zinu na vinthu vinu mwamahara. (1 Kor. 9:26) Ichi chingamovwirani kuti mukure mwauzimu, na kuŵika mtima pa vinthu ivyo ni vyakuzirwa chomene, apo mukukhumba kuchita vinandi mu uteŵeti.—Fil. 1:10; 1 Tim. 4:15, 16.

²⁵ Mpositole Paulosi wakalongora umo tingachitira apo tikuteŵetera Chiuta withu. (1 Kor. 11:1) Paulosi wakajipeleka chomene pakuteŵetera Yehova. Wakamanya kuti Yehova wamupa ntchito yinandi chomene. Wakalembera kalata ŵabali ŵa ku Korinte kuti: “Mulyango ukuru wakulongozgera ku mulimo wanijulikira.” Kasi ndimo viliriso na ise? Enya. Pali nthowa zinandi izo tingateŵetera Yehova pamoza na mpingo wake, chomenechomene kupharazga makani ghawemi gha Ufumu. Kweni nga ni Paulosi, nase tilimbanenge na “ŵakususka ŵanandi” kuti tinjire pa “mulyango ukuru” uwu. (1 Kor. 16:9) Paulosi wakaŵa wakunozgeka kujisambizga. Wonani ivyo wakayowoya, wakati: “Nkhutchaya thupi lane ndipo nkhulilongozga nga ni muzga.” (1 Kor. 9:24-27) Kasi ndimo nase tikuchitira?

²⁶ Waliyose wakuchiskika kuti wasankhirethu uteŵeti uwo wangachita kuyana na umo vinthu viliri pa umoyo wake. Ŵanandi ŵakuchita uteŵeti wanyengozose chifukwa chakuti kumasinda ŵakasankhirathu kuti ŵazamuchita. Apo ŵakaŵa ŵachoko, ŵapapi ŵawo na ŵabali ŵanyake ŵakaŵachiskanga kuti ndivyo ŵazakachite. Ntheura ŵakukondwa chomene apo ŵakuteŵetera Yehova, ndipo ŵakudandawurapo yayi. (Zinth. 10:22) Vinyake ivyo tingachita nkhupharazga sabata yiliyose, kwambiska na kuchitiska sambiro la Baibolo, ndiposo kunozgekera mwakukwana maungano gha mpingo. Chinthu chakuzirwa chomene ntchakuti tilutilire kulimbikira uteŵeti withu. Para tichitenge nthena, tichindikenge Yehova na kufiska khumbo lithu la kumuteŵetera muyirayira.—Luka 13:24; 1 Tim. 4:7b, 8.