Ŵanthu ŵa Yehova Ŵakutemwa Urunji

 1. Kasi Yosefe wakakumana na chiyezgo wuli, ndipo wakachita wuli?

YOSEFE mwana wa Yakhobe, wakasangana na chiyezgo chikuru. Mwanakazi wakamuphalira kuti: “Gona nane.” Mwanakazi uyu wakaŵa muwoli wa bwana wake, Potifara. Kweni Yosefe wakakana. Mazuŵa ghano, ŵanyake ŵangajifumba kuti, ‘Chifukwa wuli Yosefe wakakana?’ Panyengo iyi Potifara wakaŵa kutali. Kweniso Yosefe wakaŵa muzga mu nyumba iyi; ndipo chikaŵa chakumanyikwirathu kuti mwanakazi uyu wamutambuzgenge para wamukana. Kweni nipera Yosefe wakalutilira kukana nangauli mwanakazi uyu wakakoseranga chomene. Chifukwa wuli wakakana? Iyo wakati: “Ningachitirachi uheni ukuru uwu na kunangira Chiuta?”—Gen. 39:7-12.

 2. Kasi Yosefe wakamanya wuli kuti kuchita uleŵi nkhwananga kwa Chiuta?

² Kasi Yosefe wakamanya wuli kuti Chiuta wake wakuwona uleŵi kuti ‘mbuheni ukuru’? Panyengo iyi kukaŵavya Dango la Mozesi, ilo limoza mwa malango ghake likaŵa lakuti “ungaleŵanga chara,” ndipo likazakalembeka pati pajumpha vyaka pafupifupi 200. (Eks. 20:14) Ndipouli, Yosefe wakamumanyanga makora Yehova, ndipo wakamanyanga kuti wangazomerezga yayi kuti ŵanthu ŵachitenge uleŵi. Mwachiyelezgero, wakamanyanga kuti Yehova wakapanga nthengwa kuti yiŵenge pakati pa mwanalume yumoza na mwanakazi yumoza. Kweniso wakwenera kuti wakapulika kuti Yehova wakanjilirapo kaŵiri kose kuti wavikilire abuya ŵake a Sara, apo ŵanthu ŵanyake ŵakakhumbanga kuchita nawo uleŵi. Ulendo unyakeso, Chiuta wakachita mwakuyana waka kuti wavikilire Rabeka muwoli wa Yisake. (Gen. 2:24; 12:14-20; 20:2-7; 26:6-11) Apo Yosefe wakaghanaghanirangapo pa nkhani izi, wakamanya umo Chiuta wakuwonera nkhani iyi. Chifukwa chakuti Yosefe wakatemwanga Chiuta, iyo wakatemwangaso fundo zake zaurunji, ndipo wakaŵikapo mtima kuzilondezga.

 3. Kasi tidumbiskanenge vichi?

³ Kasi mukuwutemwa urunji? Tikukayika yayi kuti mukuwutemwa. Kweni pakuti tose tili ŵambura urunji, para tingaleka kuŵa maso, tingamba kutolera kawonero ka charu pa nkhani ya icho ntchiwemi na icho ntchiheni. (Yes. 5:20; Rom. 12:2) Ntheura mu nkhani iyi, tiwonenge kuti urunji ni vichi, kweniso umo tikupindulira para tikutemwa urunji. Kufuma apo, tiwonenge vinthu vitatu ivyo tingachita kuti titemwenge chomene fundo zaurunji za Yehova.

 4. Kasi ni maghanoghano wuli ghakubudika agho ŵanthu ŵanandi ŵali nagho pa nkhani ya urunji?

⁴ Para ŵanthu ŵakughanaghana za munthu murunji, ŵanandi ŵakughanaghana za munthu uyo wakujitemwa, wakutemwa kusanga vifukwa ŵanji, kweniso wakuwona kuti iyo pera ndiyo wakuchita makora vinthu kuluska ŵanji. Kweni mikhaliro iyi Chiuta wakukondwa nayo yayi napachoko. Apo Yesu wakaŵa pa charu chapasi, wakasuska mwankhongono ŵalongozgi ŵa chisopa chifukwa ŵakajiwonanga kuti iwo mbarunji. (Muph. 7:16; Luka 16:15) Munthu uyo wakulondezga fundo zaurunji za Yehova, wakughanaghanapo yayi kuti iyo ndiyo wakuchita makora pera kuluska ŵanyake.

 5. Kuyana na Baibolo, kasi urunji ni vichi? Pelekani viyelezgero.

⁵ Urunji ni mukhaliro wakuzirwa chomene. Mwakudumura tingati urunji chikung’anamura kuchita icho Yehova Chiuta wakuti ntchiwemi. Mu Baibolo, mazgu ghakuti “urunji,” ghakuyowoya zakulondezga fundo zapachanya za Yehova. Mwachiyelezgero, Yehova wakalangura kuti ŵamalonda ŵagwiliskirenge ntchito ‘vyakupimira uzito vyaunenesko.’ (Doto. 25:15) Lizgu la Chihebere ilo lili kung’anamurika kuti “vyaunenesko,” lingang’anamurikaso kuti “vyaurunji.” Lekani Mkhristu uyo wakukhumba kuŵa murunji kwa Chiuta, wakwenera kuchita vinthu mwaunenesko pa bizinesi yake. Munthu uyo wakutemwa urunji, wakutinkha kuwona munthu munyake wakuchitirika vinthu vyambura urunji. Pambere wandasankhe chinthu, munthu murunji wakughanaghanirapo dankha umo Yehova wachiwonerenge. Wakuchita nthena kuti ‘wamukondweskenge pa chilichose.’—Kol. 1:10.

 6. Chifukwa wuli tikwenera kugomezga fundo za Yehova pa nkhani ya icho ntchiwemi na chiheni? (Yesaya 55:8, 9)

⁶ Baibolo likuyowoya kuti Yehova ndiyo ni Mwenecho wa urunji. Pa chifukwa ichi, iyo wakuchemeka kuti ni “malo [ghakukhalamo] gha urunji.” (Yer. 50:7) Pakuŵa Mlengi, Yehova pera ndiyo wali na wenelero wakumanya icho ntchiwemi na chiheni. Chifukwa chakuti tili ŵakwananga kweniso ŵambura kufikapo, tingamanya makora yayi chiwemi na chiheni. Kweni Yehova chifukwa chakuti ni murunji, wakumanya makora chomene pakati pa chiwemi na chiheni. (Zinth. 14:12; ŵazgani Yesaya 55:8, 9.) Ndipouli, tingafiska kuchita icho ntchiwemi pamaso pa Yehova chifukwa chakuti tili kulengeka mu chikozgo chake. (Gen. 1:27) Ndipo tikutemwa chomene kuchita icho ntchiwemi pamaso pake. Chifukwa chakuti tikuŵatemwa Adada ŵithu aŵa, tikuchiskika kuŵayezga kuyana na umo tingafiskira.—Efe. 5:1.

 7. Chifukwa wuli tikukhumbikwira fundo zakugomezgeka? Yowoyani chiyelezgero.

⁷ Tikupindura para tikulondezga fundo za Yehova pa nkhani ya icho ntchiwemi na chiheni. Chifukwa wuli tikuyowoya nthena? Ghanaghanirani waka umo vingaŵira usange banki yiliyose yingajiŵikiranga yekha nkhongono ya ndalama yake panji usange kampani yiliyose yakuzenga yingenderanga malango ghake ghakazengero kwambura kulondezga malango gha boma. Ntchakuwonekerathu kuti vinthu vingalongosoka yayi. Kweniso usange dokotala waliyose wangenderanga waka umo iyo waghanaghanira pakovwira ŵalwari, kuleka fundo izo ŵachipatala ŵali kukhazikiska, mbwe ŵalwari ŵanyake ŵangafwa. Ivi vikulongora waka kuti nanga ni ŵanthu para ŵakhazikiska fundo zakugomezgeka zakuchitira vinthu, awo ŵakulondezga ŵakuvikilirika. Mwakuyana waka, fundo za Chiuta pa nkhani ya icho ntchiwemi na chiheni zikutivikilira.

 8. Kasi awo ŵakutemwa urunji ŵazamusanga vitumbiko wuli?

⁸ Yehova wakutumbika awo ŵakuyezgayezga kulondezga fundo zake. Iyo wakulayizga kuti: “Ŵarunji ŵazamuhara charu chapasi, ndipo ŵazamukhala mwenemumo muyirayira.” (Sal. 37:29) Ghanaghanirani waka umo ŵanthu ŵazamuŵira ŵakukolerana, ŵamtende kweniso ŵakukondwa, panyengo iyo waliyose wazamulondezganga fundo za Yehova. Yehova wakukhumba kuti namwe muzakaŵemo mu charu chiphya ichi. Nadi, tose tili na vifukwa vyakupulikikwa vyakutemwera urunji! Kasi tingachita wuli kuti tiwutemwenge chomene mukhaliro uwu? Tiyeni tiwone vinthu vitatu.

 9. Kasi ntchivichi chingatovwira kuti titemwenge urunji?

⁹ Chinthu chakwamba: Temwani uyo wali kupanga fundo zaurunji. Kuti titemwe urunji, tikwenera kutemwa dankha Yehova, uyo wali kuŵika fundo zaurunji pa nkhani ya icho ntchiwemi na chiheni. Para tikutemwa chomene Yehova, ndipo tiŵengeso ŵakukhumbisiska chomene kulondezga fundo zake. Mwachiyelezgero, Adamu na Eva ŵaŵenge kuti ŵakatemwanga Yehova, mphanyi ŵakaleka yayi kupulikira fundo zake.—Gen. 3:1-6, 16-19.

10. Kasi Abrahamu wakachita wuli kuti wamanye makora maghanoghano gha Yehova pa nkhani yinyake?

¹⁰ Ise tikukhumba yayi kuwerezgaso ivyo Adamu na Eva ŵakachita. Tingagega kuchita nthena, para tikulutilira kusambira vya Yehova, kuwonga mikhaliro yake, kweniso kuyezgayezga kumanya maghanoghano ghake. Usange tichitenge nthena, timutemwenge chomene Yehova. Ghanaghanirani vya Abrahamu. Iyo wakamutemwanga Yehova na mtima wose. Nanga ni apo wakapulikiskanga yayi ivyo Yehova wakasankha kuchita, wakamugalukira yayi. M’malo mwake, wakayezgayezga kuti wamumanye makora Yehova. Mwachiyelezgero, Abrahamu wati wamanya kuti Yehova wakukhumba kuparanya Sodomu na Gomora, pakwamba wakafipanga mtima kuti panji “Mweruzgi wa charu chose chapasi” wangaparanya ŵarunji pamoza na ŵaheni. Abrahamu wakawonanga kuti ntchiwemi yayi kuchita nthena. Ntheura mwakujiyuyura, wakamufumba mafumbo Yehova. Yehova wakamuzgora mwakuzikira mafumbo ghake. Paumaliro, Abrahamu wakamanya kuti Yehova wakusanda mtima wa munthu waliyose, kweniso kuti wakulanga ŵaheni pamoza na ŵawemi yayi.—Gen. 18:20-32.

11. Kasi Abrahamu wakalongora wuli kuti wakamutemwanga Yehova kweniso kumugomezga?

¹¹ Abrahamu wakakhwaskika chomene na ivyo wakadumbiskana na Yehova, vyakukhwaskana na misumba ya Sodomu na Gomora. Tikukayika yayi kuti apa Abrahamu wakamba kuŵatemwa chomene na kuŵachindika Adada ŵake aŵa kuluska pakwamba. Vyaka vyati vyajumphapo, Abrahamu wakayezgeka chomene usange wakumugomezga Yehova. Yehova wakamuphalira kuti wapeleke sembe mwana wake wakutemweka Yisake. Kweni pakuti pa nyengo iyi Abrahamu wakaŵa kuti wakumumanya makora chomene Chiuta wake, wakasuzgika na kufumba vinandinandi yayi. Abrahamu wakambapo waka kuchita ivyo Yehova wakamuphalira. Kweni nipera, ghanaghanirani waka umo vikamuŵinyiranga mu mtima, apo wakanozgekeranga kukachita ivyo wakaphalirika! Abrahamu wakwenera kuti wakaghanaghanirapo chomene pa ivyo wakasambira vya Yehova. Wakamanya kuti Yehova wangachita yayi chinthu chambura urunji panji kuchita vinthu mwambura chitemwa. Kuyana na ivyo mpositole Paulosi wakayowoya, Abrahamu wakawona kuti Yehova wangamuwuska mwana wake wakutemweka Yisake. (Heb. 11:17-19) Nakuti, Yehova wakaŵa kuti walayizga kale kuti Yisake waŵenge dada wa mtundu ukuru, kweni pa nyengo iyi Yisake wakaŵavya ŵana. Abrahamu wakamutemwanga Yehova, ntheura wakagomezganga kuti Adada ŵake ŵakuchanya aŵa ŵachitenge vinthu mwaurunji. Nangauli chikaŵa chakusuzga, kweni chifukwa chakuti wakaŵa na chipulikano, wakapulikira.—Gen. 22:1-12.

12. Kasi tingamuyezga wuli Abrahamu? (Salimo 73:28)

¹² Kasi tingamuyezga wuli Abrahamu? Nga ni Abrahamu, nase tikwenera kulutilira kusambira vya Yehova. Para tachita nthena, timutemwenge chomene na kuŵa nayo paubwezi. (Ŵazgani Salimo 73:28.) Njuŵi yithu yisambizgikenge kuwona vinthu nga umo Yehova wakuviwonera. (Heb. 5:14) Ndipo para munyake wakutikopa kuti tichite vinthu viheni, tikanenge. Tikanirengethu nanga nkhughanaghana kuchita vinthu viheni ivyo vingakwiyiska Adada ŵithu kweniso ivyo vingananga ubwezi withu na iwo. Kweni kasi tingalongoraso wuli kuti tikutemwa urunji?

13. Kasi tingachita wuli kuti tilondezgenge urunji? (Zintharika 15:9)

¹³ Chinthu chachiŵiri: Zuŵa lililose muchitenge vinthu ivyo vingamovwirani kuti mutemwenge chomene urunji. Para munthu wakukhumba kuti thupi lake liŵe la nkhongono, wakwenera kulimbikira chomene kuchita maseŵero ghakukhozga thupi zuŵa lililose. Mwakuyana waka, pakukhumbikwira chitatata kuti munthu wambe kutemwa icho ntchiwemi pamaso pa Yehova. Uwemi wake ngwakuti waliyose wa ise wangafiska kuchita nthena. Yehova ni muwemi, ndipo wakukhazga kuti tichitenge vinandi kuluska ivyo tingafiska yayi. (Sal. 103:14) Iyo wakutisimikizgira kuti “wakutemwa uyo wakulondezga urunji.” (Ŵazgani Zintharika 15:9.) Usange tili na chilato chinyake icho tikukhumba kufiska pakuteŵetera Yehova, tikulimbikira kuti m’paka tifiske. Ndimo viliriso na para tikukhumba kulondezga urunji. Para taŵikapo mtima Yehova watovwirenge mwakuzikira, ndipo tambenge kulondezga urunji mwakukwana.—Sal. 84:5, 7.

14. Kasi ‘chakuvwara chakujivikilira pa chifuŵa cha urunji’ ntchivichi, ndipo chifukwa wuli tikwenera kuchivwara?

¹⁴ Mwachitemwa, Yehova wakutikumbuska kuti tingawonanga kulondezga urunji kuti ni mphingo yayi. (1 Yoh. 5:3) M’malo mwake, tiwonenge kuti ntchivikiliro icho tikukhumbikwira zuŵa na zuŵa. Kumbukani vyankhondo vyauzimu ivyo mpositole Paulosi wakalongosora. (Efe. 6:14-18) Kasi ntchakuvwara wuli icho chikavikiliranga msilikari pamtima? Chikaŵa ‘chakuvwara chakujivikilira pa chifuŵa cha urunji,’ icho chikwimira fundo zaurunji za Yehova. Nga umo chakuvwara cha pa chifuŵa chikavikililiranga mtima wa msilikari, fundo zaurunji za Yehova zingavikilira mtima withu wakuyelezgera, uwo ni wunthu withu wamukati. Lekani ntchakuzirwa chomene kuti pa vyakuvwara vithu vyankhondo paŵengeso chakuvwara chakujivikilira pa chifuŵa cha urunji!—Zinth. 4: 23.

15. Kasi mungavwara wuli chakuvwara chakujivikilira pa chifuŵa cha urunji?

¹⁵ Kasi mungavwara wuli chakuvwara chakujivikilira pa chifuŵa cha urunji? Mungavwara para mukughanaghanira fundo za Chiuta pakusankha vinthu zuŵa na zuŵa. Para mukughanaghanira nkhani izo mungachezga na ŵanyinu, sumu izo mungategherezga, vyakusanguluska ivyo mungawonelera, panji mabuku agho mungaŵerenga, chakwamba mujifumbenge kuti: ‘Kasi ni vichi ivyo ninjizgenge mu mtima wane? Kasi Yehova wakondwenge navyo? Panji kasi vikukhuŵilizga vinthu ivyo Yehova wakutinkha nga nkhugonana, mbembe, uryezi, panji munthu kujighanaghanira yekha?’ (Fil. 4:8) Usange vyakusankha vinu vikukolerana na khumbo la Yehova, mtima winu uvikilirikenge ku vinthu viheni.

16-17. Kasi lemba la Yesaya 48:18 likutisimikizgira wuli kuti tingalondezga fundo zaurunji za Yehova kwamuyirayira?

¹⁶ Kasi mukufipa mtima kuti zuŵa linyake mungazakatondeka kulutilira kulondezga fundo zaurunji za Yehova? Ghanaghanirani chiyelezgero icho Yehova wakayowoya, icho chikusangika pa Yesaya 48:18. (Ŵazgani.) Yehova wakulayizga kuti urunji withu ungaŵa “nga ni majigha gha nyanja.” Yelezgerani kuti mwayimilira pa mchenga mu mphepete mwa nyanja, mukuwonelera majigha ghakutimba uku na uku. Apo mukujipulika makora chifukwa cha malo agha, kasi mungamba kughanaghana kuti zuŵa linyake majigha ghangazakaleka pa nyanja? Yayi! Chifukwa mukumanyirathu kuti majigha agha ghachita nthena kwa vyaka vinandi chomene, ndipo ghalutilirenge kuchita nthena.

¹⁷ Urunji winu ungayana waka na majigha gha pa nyanja! Kasi ungayana wuli? Para mukukhumba kusankha chakuchita, chakwamba ghanaghanirani dankha icho Yehova wangatemwa kuti muchite. Para mwamanya, ndicho muchite. Nanga vingaŵa kuti ivyo mwasankha ni vyakusuzga, Adada ŵinu ŵachitemwa ŵaŵenge namwe nyengo zose na kumupani nkhongono zakumovwirani kuti mulutilire kulondezga fundo zaurunji zuŵa lililose.—Yes. 40:29-31.

18. Chifukwa wuli tikwenera yayi kweruzga ŵanji na fundo zithu?

¹⁸ Chinthu chachitatu: Lekerani Yehova kuti ndiyo weruzgenge. Apo tikuyezgayezga kulondezga fundo zaurunji za Yehova, tikwenera yayi kweruzga ŵanji na kuwona kuti ise ndise tili ŵarunji. Ni udindo withu yayi kuwona usange ŵanji ŵakuchita ivyo Yehova wakukhumba kuti ŵachitenge. Tikumbukenge kuti Yehova ndiyo ni “Mweruzgi wa charu chose chapasi.” (Gen. 18:25) Wandapeleke kwa ise udindo uwu. Nakuti Yesu wakati: “Lekani kweruzga kuti muleke kweruzgika.”—Mat. 7:1.b

19. Kasi Yosefe wakalongora wuli kuti wakugomezga kuti Yehova ni Mweruzgi muwemi?

¹⁹ Tiyeni tighanaghanireso vya Yosefe, uyo wakaŵa munthu murunji. Iyo wakeruzganga ŵanji yayi, nanga ŵangaŵa awo ŵakamuchitira vinthu viheni chomene. Mwachiyelezgero, nyengo yinyake ŵakuru ŵake ŵakamuchitira nkhaza, kumuguliska ku wuzga, na kukateta kwa adada ŵawo kuti Yosefe wafwa. Pati pajumpha vyaka, Yosefe wakakumanaso na mbumba yakwake. Kweni panyengo iyi wakaŵa munthu wamazaza, ndipo wakaŵa na wanangwa wose wakuŵakhawuliska ŵakuru ŵake ŵara. Nakuti ŵakuru ŵake ŵakawopanga kuti ndimo wachitirenge nadi nangauli panyengo iyi ŵakaŵa kuti ŵajinyumwa pa ivyo ŵakachita. Kweni Yosefe wakaŵasimikizgira kuti: “Mungopanga yayi. Kasi ine natora malo gha Chiuta?” (Gen. 37:18-20, 27, 28, 31-35; 50:15-21) Mwakujiyuyura Yosefe wakalekera nkhani iyi Yehova kuti ndiyo weruzge.

20-21. Kasi tingachita wuli kuti tigege kujiwona kuti ise ndise ŵarunji?

²⁰ Nga ni Yosefe, nase tikulekera Yehova kuti ndiyo weruzgenge. Mwachiyelezgero, tikulimbana navyo yayi kuti m’paka timanye chifukwa icho ŵabali panji ŵadumbu ŵithu ŵakuchitira vinthu vinyake. Ise tingawona yayi ivyo vili mu mtima wa munthu; “Yehova [pera] ndiyo wakusanda makhumbiro” gha munthu. (Zinth. 16:2) Iyo wakutemwa ŵanthu ŵamitundu yose, ŵamitheto yakupambanapambana kweniso awo ŵakulira kwakupambanapambana. Ndipo Yehova wakutichiska kuti nase ‘tijure mitima yithu.’ (2 Kor. 6:13) Tikwenera kuŵatemwa ŵabali na ŵadumbu ŵithu wose, m’malo mwa kuŵeruzga.

²¹ Ichi chikung’anamuraso kuti nanga ni awo ŵali kuwaro kwa mpingo panji kuti Mbakaboni yayi, tikwenera yayi kuŵeruzga. (1 Tim. 2:3, 4) Kasi muli kumweruzgapo mubali winu uyo ni Kaboni yayi, na kuyowoya kuti, “Uyu wazamuzomerapo yayi unenesko”? Kuchita nthena, nkhujikuzga kweniso kujiwona kuti ndise ŵarunji chomene. Yehova wachali kupeleka mwaŵi ku “ŵanthu wose” kuti ŵang’anamuke mtima. (Mil. 17:30) Nyengo zose tikumbukenge kuti Yehova wakuwona kuti ŵanthu awo ŵakujiwona kuti mbarunji kuluska ŵanyawo, mbarunji yayi.

22. Chifukwa wuli mwaŵikapo mtima kutemwa urunji?

²² Usange tikutemwa fundo zaurunji za Yehova tiŵenge ŵakukondwa kweniso kuŵa chiyelezgero chiwemi ku ŵanji ndipo ŵatitemwenge kweniso kutemwa Yehova. Mphanyi talutilira kuŵa na “njara na nyota yaurunji.” (Mat. 5:6) Manyani kuti Yehova wakukondwa namwe apo mukuyezgayezga chomene kuchita urunji. Nangauli ŵanthu mu charu ichi ŵakuhenipirahenipira, imwe kugongowa yayi. Nyengo zose mukumbukenge kuti “Yehova wakutemwa ŵarunji.”—Sal. 146:8.