“Iwe Uzamuŵa na Ine mu Paradiso”

 1. Kwati kwakhala pachoko waka kuti Yesu wafwe, kasi wakayowoya vichi kwa chigeŵenga chinyake icho wakakhomeka nacho pamoza? (Luka 23:39-43)

YESU na vigeŵenga viŵiri ivyo wakakhomeka navyo pamoza, ŵakasuzgika chomene apo ŵakafwanga pachoko na pachoko. (Luka 23:32, 33) Vigeŵenga vyose viŵiri ivi vikamunyozanga Yesu, ndipo vikalongolerathu kuti vikaŵa vimoza mwa ŵasambiri ŵake yayi. (Mat. 27:44; Mrk. 15:32) Kweni chigeŵenga chinyake chikasintha, ndipo chikati: “Yesu, muzakanikumbuke para mukunjira mu Ufumu winu.” Yesu wakazgora kuti: “Nadi nkhukuphalira muhanya uno, iwe uzamuŵa na ine mu Paradiso.” (Ŵazgani Luka 23:39-43.) Palije ukaboni wakuti chigeŵenga ichi chikazomera uthenga wakukhwaskana na “Ufumu wakuchanya,” uwo Yesu wakapharazganga apo wakachitanga uteŵeti wake pa charu chapasi. Ndipo Yesu wakayowoyapo yayi kuti munthu uyu wazamunjira mu Ufumu wakuchanya. (Mat. 4:17) Yesu wakayowoyanga vyakukhwaskana na charu chapasi cha Paradiso icho chikwiza munthazi. Chifukwa wuli tikuyowoya nthena?

 2. Kasi tikumanya wuli kuti chigeŵenga icho chikapera nacho chikafuma mu mtundu wa Ŵayuda?

² Ntchakuwonekerathu kuti chigeŵenga icho chikapera chikafuma mu fuko la Yuda. Chigeŵenga ichi chikati kwa chigeŵenga chinyake: “Kasi ukopa Chiuta chara chifukwa chakuti wapokera cheruzgo chakuyana na cha munthu uyu?” (Luka 23:40) Ŵayuda ŵakasopanga Chiuta yumoza pera, kweni ŵanthu ŵamitundu ŵakasopanga ŵachiuta ŵanandi. (Eks. 20:2, 3; 1 Kor. 8:5, 6) Vigeŵenga ivi viŵenge kuti vikafuma mu ŵanthu ŵamitundu, chigeŵenga ichi mphanyi chikafumba kuti: “Kasi ukuŵawopa yayi ŵachiuta?” Kweniso Yesu wakatumika ku ŵanthu ŵamitundu yayi kweni ku “mberere zakuzgeŵa za nyumba ya Israyeli.” (Mat. 15:24) Ndipo Chiuta wakavumbura ku Ŵaisrayeli kuti wazamuwuska ŵakufwa. Chigeŵenga icho chikapera, chikwenera kuti chikamanyanga fundo iyi ndipo mazgu ghake ghakalongora kuti Yehova wamuwuskenge Yesu kuti wazakawuse mu Ufumu wa Chiuta. Munthu uyu wakagomezgangaso kuti Chiuta wazamumuwuska.

 3. Kasi chigeŵenga icho chikapera chikwenera kuti chikaghanaghaniranga vichi apo Yesu wakayowoya vya Paradiso? Longosorani. (Genizesi 2:15)

³ Pakuŵa Muyuda, chigeŵenga icho chikapera chikwenera kuti chikamanyanga vyakukhwaskana na Adamu na Eva kweniso Paradiso uyo Chiuta wakaŵikamo ŵanthu aŵa. Ntheura chigeŵenga ichi chikwenera kuti chikamanya kuti Paradiso uyo Yesu wakalayizga, ghazamuŵa malo ghawemi agho ghazamuŵa pa charu chapasi.—Ŵazgani Genizesi 2:15.

 4. Kasi mazgu agho Yesu wakaphalira chigeŵenga ghakwenera kutichiska kughanaghanirapo vichi?

⁴ Mazgu agho Yesu wakaphalira chigeŵenga ghakwenera kutichiska kughanaghanirapo umo umoyo uzamuŵira mu Paradiso. Nakuti tingasambirako fundo yinyake yakukhwaskana na Paradiso ku muwuso wa mtende wa Themba Solomoni. Ndipo tikwenera kukhazga kuti Yesu uyo ni mukuru chomene kuluska Solomoni, wazamuteŵetera pamoza na awo wazamuwusa nawo kuti pa charu chapasi vinthu viŵeso makora. (Mat. 12:42) Ntchakupulikikwa kuti ŵa “mberere zinyake” ŵakwenera kunweka na ivyo ŵakukhumbikwira kuchita kuti ŵaŵe ŵakwenelera kuzakakhala kwamuyirayira mu paradiso.—Yoh. 10:16.

 5. Kasi mukughanaghana kuti umoyo uzamuŵa wuli mu Paradiso?

⁵ Kasi ntchivichi chikwiza mu maghanoghano ghinu para mukughanaghanira umo umoyo uzamuŵira mu Paradiso? Panji mukughanaghanira vya paki yakutowa nga umo ukaŵira munda wa Edeni. (Gen. 2:7-9) Panji mukukumbukira vya uchimi uwo ukalembeka na Mika wakuti munthu wa Chiuta “waliyose wazamukhala musi mwa khuni lake la mpheska na musi mwa khuni lake la mkuyu.” (Mika 4:3, 4) Panyake mukukumbukiraso mavesi gha mu Baibolo agho ghakuyowoya kuti kuzamuŵa vyakurya vinandi. (Sal. 72:16; Yes. 65:21, 22) Ntheura nyengo zinyake mungajiwona kuti muli mu munda wakutowa mwakhala pa thebulu ilo pali vyakurya vinandi vyakunowa. Kweniso mukuthuta mphepo ziwemi izo zili na kasungu kawemi ka makuni na maluŵa. Ndipo mukupulikaso ŵamumbumba yinu na ŵabwezi ŵinu, kusazgapo na awo ŵawuskika ŵakuseka apo ŵakuchezga lumoza. Vyose ivi ni maloto waka yayi. Tikwenera kugomezga kuti vinthu vyose ivi vizamuchitika pa charu chapasi. Kweniso mu Paradiso tizamusangwaso kugwira ntchito yiwemi.

 6. Kasi tizamuchita vichi mu Paradiso? (Wonani chithuzi.)

⁶ Yehova wali kutilenga mu nthowa yakuti tikondwenge na mulimo withu. (Muph. 2:24) Chomenechomene mu nyengo ya Muwuso wa Yesu wa Vyaka 1,000, tizamutangwanika chomene. Awo ŵazamupona pa suzgo yikuru kweniso ŵanthu mamiliyoni ghanandi awo ŵazamuwuskika, ŵazamukhumbikwira vyakuvwara, vyakurya kweniso malo ghakukhala. Kuti ŵazakaŵe na vinthu vyose ivi, tizamukhumbikwira kugwira ntchito. Nga umo vikaŵira na Adamu na Eva kuti ŵakeneranga kulima mu munda wa Edeni, nase tizamuŵa na mwaŵi wakugwira ntchito yiwemi yakuzgora charu kuŵa Paradiso. Ghanaghaniraniso umo vizamunozgera kusambizga ŵanthu mamiliyoni ghanandi awo ŵazamuwuskika, awo ŵakumanya vichoko chomene vyakukhwaskana na Yehova na khumbo lake, kweniso kovwira ŵanthu ŵakugomezgeka awo ŵakaŵako pambere Yesu wandize pa charu chapasi kuti ŵamanye ivyo vikachitika kufuma apo ŵakafwira.

 7. Kasi tili na chigomezgo wuli, ndipo chifukwa wuli?

⁷ Tili na chigomezgo chose kuti umoyo mu Paradiso uzamuŵa wamtende, tizamuŵa na vyose ivyo tikukhumbikwira, kweniso kuchita vinthu mu ndondomeko. Chifukwa wuli? Chifukwa chakuti Yehova wali kulongora kale chiyelezgero cha umo umoyo uzamuŵira pasi pa muwuso wa Mwana wake. Nkhani ya muwuso wa Themba Solomoni ndiyo ntchakuwonerapo.

 8. Kasi mazgu agho ghakusangika pa Salimo 37:10, 11, 29 ghakafiskika wuli pamanyuma pakuti themba Davide laghalemba? (Wonani “Mafumbo Ghakufuma ku Ŵaŵazgi” mu magazini iyi.)

⁸ Themba Davide likakhuŵilizgika na mzimu kulemba vya umo umoyo uzamuŵira para themba la vinjeru na lakugomezgeka layamba kuwusa. (Ŵazgani Salimo 37:10, 11, 29.) Kanandi tikuŵazgira ŵanthu lemba la Salimo 37:11, para tikudumbiskana nawo vya Paradiso uyo wakwiza munthazi. Tili na vifukwa viwemi vyakuchitira nthena chifukwa Yesu wakakora mazgu gha pa lemba ili pa Upharazgi wake wa pa Phiri, kulongora kuti lemba ili lizamufiskikaso kunthazi. (Mat. 5:5) Kweni mazgu gha Davide ghakalongoraso umo umoyo uzamuŵira mu nyengo ya Themba Solomoni. Apo Solomoni wakawusanga Israyeli, ŵanthu ŵa Chiuta ŵakakhalanga mu mtende, kweniso mu charu “chakwenda mkaka na uchi.” Chiuta wakati: “Usange mwamulutilira kwenda mu malanguro ghane . . . , Namuŵika mtende mu charu, mwamugona pasi kwambura munthu wakumofyani.” (Lev. 20:24; 26:3, 6) Malayizgo ghose agha ghakafiskika mu nyengo ya muwuso wa Solomoni. (1 Mid. 22:9; 29:26-28) Ndipo Yehova wakalayizga kuti ŵanthu ŵaheni, “ŵazamuŵakoso chara.” (Sal. 37:10) Ntheura mazgu agho ghakusangika pa Salimo 37:10, 11, 29 ghakafiskikapo mu nyengo yakale ndipo ghazamufiskikaso munthazi.

 9. Kasi fumukazi ya ku Sheba yikayowoya vichi vya muwuso wa Themba Solomoni?

⁹ Fumukazi ya ku Sheba yikapulika vyakukhwaskana na mtende na usambazi uwo ukaŵa mu mtundu wa Israyeli apo Solomoni wakaŵa themba. Yikenda ulendo utali kuluta ku Yerusalemu kuti yikajiwonere yekha. (1 Mathe. 10:1) Yikati yendera ufumu wa Solomoni, yikati: “Ivyo nkhaphalirika vikukwana yayi na hafu. . . . Mbakukondwa ŵanthu ŵako, ndipo mbakukondwa ŵateŵeti ŵako awo ŵakwimilira pamaso pako nyengo zose, kupulika vinjeru vyako!” (1 Mathe. 10:6-8) Kweni umo vinthu vikaŵira mu nyengo ya Solomoni, ntchiyelezgero waka cha ivyo Yehova wazamuchitira ŵanthu, pasi pa muwuso wa Mwana wake Yesu.

10. Kasi Yesu ni mukuru kuluska Solomoni mu nthowa wuli?

¹⁰ Yesu ni mukuru kuluska Solomoni mu nthowa zinandi. Solomoni wakaŵa wambura kufikapo, ndipo wakachita zakwananga zikuru izo zikapangiska ŵanthu ŵa Chiuta kuti ŵanjire mu masuzgo. Kweni Yesu ni muwusi wakufikapo uyo wakwananga yayi. (Luka 1:32; Heb. 4:14, 15) Yesu wakalutilira kugomezgeka nangauli Satana wakamuyezga na viyezgo vikuru chomene. Khristu wali kulongora kuti wazamunangapo yayi panji kuchita chinthu chilichose icho chingapweteka awo wakuŵawusa. Ni mwaŵi wapadera chomene kuti Yesu ni themba lithu.

11. Kasi mbanjani awo ŵazamovwira Yesu pakuwusa?

¹¹ Yesu wazamugwira ntchito pamoza na ŵa 144,000, kuti ŵawovwire ŵanthu na kufiska khumbo la Yehova kulazga ku charu chapasi. (Chivu. 14:1-3) Ŵanthu aŵa nawo ŵakasanganapo na viyezgo na masuzgo ghanandi apo ŵakaŵa pa charu chapasi, ntheura ŵazamuŵa ŵawusi ŵalusungu kweniso ŵakupulikiska. Kasi awo ŵazamuwusa na Yesu ŵazamuchita mulimo wuli chomene?

12. Kasi ni mulimo wuli uwo Yehova wazamupa ŵa 144,000?

¹² Ntchito iyo Yesu na awo wazamuwusa nawo ŵazamuchita, njikuru chomene kuluska ntchito iyo wakapika Solomoni. Themba la Israyeli ili, likapweleleranga ŵanthu mamiliyoni mu charu chimoza pera. Kweni awo ŵazamuwusa mu Ufumu wa Chiuta, ŵazamupwelelera ŵanthu mabiliyoni pa charu chose chapasi. Uwu ni mwaŵi wapadera chomene uwo Yehova wazamupeleka ku ŵa 144,000!

13. Kasi ni mulimo wuli wapadera uwo awo ŵazamuwusa na Yesu ŵazamuŵa nawo?

¹³ Nga ni Yesu, ŵa 144,000 ŵazamuŵa mathemba na ŵasembe. (Chivu. 5:10) Pasi pa Dango la Mozesi, ŵasembe ndiwo chomene ŵakaŵa na mulimo wakovwira ŵanthu kuŵa na umoyo uwemi kweniso kuŵa paubwezi wakukhora na Yehova. Dango likaŵa “muzgezge wa vinthu viwemi ivyo vikwiza,” ntheura ntchakupulikikwa kuyowoya kuti awo ŵamuwusa na Yesu, ŵazamovwira ŵanthu ŵa Chiuta kulutilira kuŵa na umoyo uwemi kweniso kuŵa paubwezi wakukhora na Yehova. (Heb. 10:1) Tikumanya yayi umo mathemba na ŵasembe aŵa ŵazamuyowoyeskerananga na ŵanthu awo ŵazamuŵawusa mu Ufumu pa charu chapasi. Mulimose umo Yehova wazamunozgera, tili na chigomezgo chose kuti mu Paradiso, awo ŵazamukhala pa charu chapasi ŵazamupokera ulongozgi uwo ukukhumbikwa.—Chivu. 21:3, 4.

14. Kasi pali ubali wuli pakati pa ŵa “mberere zinyake” na ŵabali ŵa Khristu?

¹⁴ Yesu wakachema gulu la ŵanthu awo wamuwusa nawo kuti “kamskambo kachoko.” (Luka 12:32) Wakayowoyaso za gulu lachiŵiri, ilo wakalichema kuti “mberere zinyake.” Magulu ghose ghaŵiri agha ghakupanga mskambo umoza wakukolerana. (Yoh. 10:16) Magulu agha ghakugwilira kale lumoza, ndipo ghazamulutiliraso kugwilira lumoza ntchito para charu chazakazgoka Paradiso. Kweni panyengo iyo awo ŵali mu “kamskambo kachoko” ŵazamuŵa kuti ŵali kuchanya, ndipo awo mba “mberere zinyake” ŵazamuŵa na chigomezgo chakukhala na umoyo kwamuyirayira pa charu chapasi. Ndipouli, pali vinthu vinyake ivyo ŵa mberere zinyake ŵakwenera kuchita kuti ŵaŵe ŵakwenelera kuzakakhala mu Paradiso.

15. (a) Kasi ŵa mberere zinyake ŵakugwira wuli ntchito na ŵabali ŵa Khristu? (b) Kasi mungamuyezga wuli mubali uyo wali mu nyumba iyo ŵakuguliskiramo mankhwala? (Wonani chithuzi.)

¹⁵ Chigeŵenga chila chikapera, chikafwa pambere chindapike mwaŵi wakulongora kuti chikuwonga chomene ivyo Khristu wakachichitira. Kweni ise taŵamberere zinyake tili na mwaŵi yinandi sono yakulongolera umo tikujipulikira na ivyo Yesu wakatichitira. Mwachiyelezgero, tikulongora kuti tikumutemwa na umo tikuchitira vinthu na ŵabali ŵake ŵakuphakazgika. Yesu wakayowoya kuti wazamweruzga mberere kuyana na umo zikuchitira na ŵabali ŵake aŵa. (Mat. 25:31-40) Tingawovwira ŵabali ŵa Khristu para tikulimbikira kuŵawovwira pa mulimo wa kupharazga na kuzgora ŵanthu kuŵa ŵasambiri. (Mat. 28:18-20) Lekani tikwenera kugwiliskira ntchito mwaluso ivyo tikusambizgira ŵanthu Baibolo ivyo ŵabali ŵa Khristu ŵakutipa, nga buku la Mungakondwa na Umoyo Kwamuyirayira! Para mulije munthu uyo mukusambira nayo Baibolo pasono, mungachita makora kujiŵikira chilato cha kusambira Baibolo na ŵanthu ŵanandi umo mungakwaniskira.

16. Kasi tikwenera kuchita vichi sono kuti tinozgekere kuzakakhala mu Ufumu wa Chiuta?

¹⁶ Tikwenera kulindilira m’paka apo tizamukhalira mu Paradiso yayi, kuti tiŵe na mikhaliro ya ŵanthu awo Yehova wakukhumba kuti ŵazakakhale mu charu chiphya. Sono nthena tingagwilirapo ntchito kuti tiŵenge ŵanenesko mu kayowoyero, vyakuchita vithu, kweniso kuŵa na umoyo wambura kukhumba vinandi. Ndipo tingaŵa ŵakugomezgeka kwa Yehova, kwa munyithu wa mu nthengwa, kweniso ku Ŵakhristu ŵanyithu. Usange tikupulikira Yehova sono mu charu chiheni ichi, chizamuŵaso chipusu kumupulikira mu Paradiso. Tingasambiraso maluso na mikhaliro yinyake kuti tilongore kuti tikunozgekera kuzakakhala mu charu chiphya. Wonani mu magazini iyi nkhani yakuti: “Kasi Ndimwe Ŵakunozgeka ‘Kuzakahara Charu’?”

17. Kasi tikwenera kufipa mtima chifukwa cha zakwananga izo tikachita kumasinda? Longosorani.

¹⁷ Tikweneraso kufwilirapo kuleka kujiyimba mulandu chifukwa cha zakwananga izo tikachita kumasinda. Mbunenesko kuti tikwenera yayi “kuchitira dala kwananga” chifukwa cha sembe yakuwombora. (Heb. 10:26-31) Kweni para tapera nadi zakwananga zikuru izo tikachita, kupenja wovwiri uwo Yehova wakupeleka, na kusintha nkharo yithu, tisimikizgenge kuti Yehova watigowokera na mtima wose. (Yes. 55:7; Mil. 3:19) Kumbukani mazgu agho Yesu wakaphalira Ŵafarisi kuti: “Nkhizira kuzakachema ŵanthu ŵarunji chara, kweni ŵakwananga.” (Mat. 9:13) Sembe yakuwombora njankhongono chomene ndipo njakukwana kubenekelera zakwananga zithu zose.

18. Kasi mungatemwa kuzakayowoyeskana vichi na chigeŵenga icho chikafwa pamoza na Yesu?

¹⁸ Jiwonani kuti muli mu Paradiso, ndipo mukuyowoyeskana na chigeŵenga icho chikayowoya na Yesu. Tikukayika yayi kuti mose mungawonga chomene sembe iyo Yesu wakapeleka. Ndipo mungachifumba chigeŵenga kuti chimuphaliraniko vinandi ivyo vikachitika mu maora ghaumaliro gha umoyo wa Yesu ndiposo umo chikajipulikira na zgoro la Yesu. Kweni nachoso chingamufumbani umo vinthu vikaŵira kukhala mu mazuŵa ghaumaliro mu charu cha Satana ichi. Nadi, uzamuŵa mwaŵi wapadera kusambira Mazgu gha Chiuta na ŵanthu ŵanthena aŵa.—Efe. 4:22-24.

19. Chifukwa wuli umoyo mu Paradiso uzamuŵa wambura kuvuska? (Wonani chithuzi cha pa chikopi.)

¹⁹ Umoyo mu Paradiso uzamuŵa wakuvuska yayi panji kuti wambura kunozga. Nyengo zose tizamukumananga na ŵanthu ŵakukondweska kweniso tizamuŵa na mulimo uwemi. Kuluska vyose, zuŵa lililose tizamuŵamanyanga makora Adada ŵithu ŵakuchanya na kusangwa na ivyo ŵatipa. Nyengo zose pazamuŵanga vinthu vinyake vyakuti tisambire vya iwo kweniso pazamuŵaso vinandi vyakuti tisambire vyakukhwaskana na chilengiwa chawo. Apo tizamulutilira kukhala na umoyo, tizamukhozgangaso chomene chitemwa chithu pa iwo. Tikuwonga chomene Yehova na Yesu chifukwa cha layizgo ilo ŵatipa lakuti tingazakakhala kwamuyirayira mu Paradiso.