Chifukwa Icho Wasembe Wakalekera Tchalitchi Lake

Kasi mukababikira nkhu?

Nkhababikira ku Italy mu 1943. Nkhakulira mu muzi unyake uchoko pamoza na ŵakulu kweniso ŵadumbu ŵane, adada ŵakaŵa ŵalimi kweniso akalipentala. Ŵapapi ŵithu ŵakatisambizganga kuti titemwenge chomene Chikatolika.

Chifukwa wuli mukakhumbanga kuŵa wasembe?

Apo nkhaŵa mwana, nkhatemwanga chomene kupulikizga para ŵasembe ŵakupharazga ku tchalitchi. Mazgu ghawo ghakanikondweskanga chomene kweniso tumaluso uto wakachitanga tukaninozgeranga chomene. Ntheura nane nkhamba kughanaghana vyakuti para nakura nizakaŵe wasembe. Apo nkhaŵa na vyaka 13 amama ŵakanisangira malo ku sukulu yakugonera kuko iyo yikasambizganga ŵachinyamata kuti ŵazakaŵe ŵasembe.

Kasi mukagwiliskiranga ntchito Baibolo pakusambira?

Viŵi yayi. Apo nkhaŵa na vyaka 15, asambizgi ŵane ŵakanipa buku la Makani Ghawemi, ilo likalongosoranga za umoyo na uteŵeti wa Yesu. Ndipo nkhaŵerenga buku ili kanandi waka. Nkhati nakwaniska vyaka 18, nkhaluta ku yunivesite yinyake ya ku Romu, iyo ŵasembe ndiwo ŵakayilaŵiliranga. Tikasambiranga Chilatini, Chigiriki, history, philosophy, psychology, and theology. Nangauli tikayowoyanga mavesi gha mu Baibolo kweniso kupulika para ŵasembe ŵakupharazga ku tchalitchi, kweni kuyowoya unenesko palije uyo wakaŵa na Baibolo.

Mwati mukalaŵiranga pa sukulu, kasi namwe mukasambizgangaso?

Ntchito yane yikaŵa waka yakulaŵilira umo vinthu vikwendera pa sukulu. Kweni nyengo zinyake nkhasambizgangaso.

Chifukwa wuli mukamba kukayikira tchalitchi linu?

Pali vinthu vitatu ivyo nkhamba kukayikira. Tchalitchi likanjilirangapo chomene pa vyandyali. Ŵalongozgi kweniso ŵanthu awo ŵakakhalanga mu parishi ŵakaŵalanganga yayi para ŵachita vinthu vyawakawaka. Kweniso nkhavikayikiranga chomene visambizgo vinyake vya Chikatolika. Mwachiyelezgero, kasi Chiuta wachitemwa wangalanga wuli ŵanthu kwamuyirayira para ŵafwa? Kweniso, kasi Chiuta wakakhumbanga nadi kuti tiwerezgenge waka malurombo?a

Kasi mukachita wuli?

Nkhapempha Yehova kuti wanovwire. Nkhalombanga uku nkhulira. Nkhaguraso Baibolo la Chikatolika la Jerusalem Bible, ilo likaŵa kuti lasindikizgika waka mu Chiitaliyani, ndipo nkhamba kuŵerenga. Zuŵa linyake pa Sabata mulenji, apo nkhaŵikanga munjilira wane pa chingwe, tati tamara kupemphera, kukiza ŵanalume ŵaŵiri Ŵakaboni ŵa Yehova. Tikadumbiskana kwa nyengo yitali vyakukhwaskana na Baibolo kweniso umo Baibolo likuti tingamanyira chisopa chaunenesko.

Kasi mukajipulika wuli mwati mwachezga nawo?

Nkhakhorwa chomene na ivyo ŵakagomezganga, kweniso umo wakalongosoleranga fundo zawo pakugwiliskira ntchito Baibolo la Chikatolika. Kufuma apo kukamba kwiza Kaboni munyake zina lake Mario. Wakaŵa wakuzikira kweniso wakugomezgeka. Iyo wakizanga mlenji uliwose pa Chisulo 9 koloko, kwali kuŵe vula kwali yayi.

Kasi ŵasembe ŵanyake ŵakakondwanga nthena apo mukasambiranga Baibolo?

Nkhayezga kuŵachemerako kuti tiŵirenge lumoza para tikusambira, kweni palije uyo wakaŵikangako mahara. Kweni ine nkhakondwanga chomene kusambira. Nkhasambiranga vinthu viwemi chomene nga vyakuti, chifukwa wuli Chiuta wakuzomerezga vinthu viheni kweniso kuti tisuzgikenge? Fumbo ili ndilo likanisuzganga kwa nyengo yitali.

Kasi ŵalaraŵalara ŵa pa sukulu pinu ŵakayezgapo kuti ŵamulekiskani kusambira Baibolo?

Mu 1975, nkhaluta kanandi waka ku Rome kuti nkhaŵalongosolere ivyo nkhugomezga. Ŵalaraŵalara ŵakayezga kuti ŵasinthe ivyo nkhugomezga kweni palije uyo wakagwiliskira ntchito Baibolo. Paumaliro, pa January 9, 1976, nkhalembera kalata tchalichi la Katolika kuti ndineso wa Katolika yayi. Pakati pajumpha mazuŵa ghaŵiri, nkhafumapo pa sukulu ndipo nkhaluta kakwamba kuti nkhasope na Ŵakaboni ŵa Yehova, ndipo nkhasanga kuti ŵali pa ungano apo pakaŵa mipingo yinandi ya Ŵakaboni ŵa Yehova. Ivi vikachitikanga apa vikapambananga chomene na ivyo vikachitikanga ku ntchalitchi ilo nkhasopanga. Kaboni waliyose wakaŵa na Baibolo ndipo wakaŵerengeranga lumoza malemba para uyo wakasambizganga kunthazi wajura.

Kasi ŵabali ŵinu ŵakayipokelera wuli nkhani iyi?

Ŵanandi ŵakanisuska chomene. Kweni paumaliro nkhasanga kuti mukuru wane munyake uyo wakakhalanga ku Lombardy, cha ku mpoto kwa Italy nayo wakasambiranga Baibolo na Ŵakaboni ŵa Yehova. Nkhaluta kwa mukuru wane, ndipo Ŵakaboni ŵa Yehova ŵakanovwira kusanga ntchito kweniso malo ghakukhala. Kuumaliro wa chaka chira, nkhabatizika na kuŵa yumoza wa Ŵakaboni ŵa Yehova.

Kasi mukudandawura na ivyo mukasankha?

Napachoko pose! Pasono, nkhujipulika kuti nili paubwezi uwemi chomene na Chiuta, chifukwa nkhumumanya kwizira mu Baibolo mu malo mwakwendera waka vinjeru vya ŵanthu panji ivyo matchalitchi ghakusambizga. Ndipo nkhukhorwa para nkhusambizga ŵanthu, kweniso nkhuŵasambizga na mtima wose.