Ŵakamangara ku Khoti

1, 2. (a) Kasi ŵalara ŵa chisopa cha Chiyuda ŵakachita wuli na ntchito ya kupharazga? Kasi ŵapositole ŵakachita wuli? (b) Kasi ŵapositole ŵakakanirachi kupulikira dango lakuti ŵaleke kupharazga?

MASABATA ghachoko waka kufuma pa Pentekoste 33 C.E., mpingo Wachikhristu ukaŵa kuti wamba waka, ndipo Satana wakakhalapo waka yayi. Pambere mpingo uwu undakhazikike, wakakhumba kuwuparanya nyengo yeneyiyo. Wakaŵika maghanoghano ghaheni mu ŵalara ŵa chisopa cha Chiyuda kuti ŵakanizge Ŵakhristu kupharazga. Kweni ŵapositole ŵakagongowa yayi, ŵakalutilira kupharazga. Ntheura ŵanthu ŵanandi, ŵanalume na ŵanakazi, “ŵakagomezga Fumu.”—Mil. 4:18, 33; 5:14.

² Ŵalwani ŵakaŵaleka waka yayi ŵapositole, ŵakakora wose na kuŵajalira mu jele. Kweni usiku, mungelo wa Yehova wakajura milyango ya jele, ndipo kukati kwacha, ŵapositole ŵakasangika kuti ŵakupharazga. Ŵakaŵakoraso na kuŵatolera panthazi pa ŵeruzgi. Ŵeruzgi ŵakaŵapa mulandu wakuti ŵaswa dango, chifukwa ŵakaŵakanizga kupharazga. Ŵapositole ŵakazgora mwachikanga kuti: “Tikwenera kupulikira Chiuta nga muwusi m’malo mwa ŵanthu.” Ŵeruzgi ŵakatukutwa chomene, mwakuti “ŵakakhumbanga kuŵakoma” ŵapositole. Vikati vyafika apa, msambizgi wa Dango wakuchindikika na ŵanthu wose, zina lake Gamaliyeli wakaŵasoka ŵeruzgi, wakati: “Muchenjere. . . Kulimbana nawo yayi ŵanthu aŵa, kweni muŵaleke waka.” Ŵeruzgi ŵakapulikira nadi, ndipo ŵakaŵaleka ŵapositole. Kasi ŵapositole ŵakachita wuli? Sono ndipo ŵakakhuka chomene, ndipo “ŵakalutilira kwambura kuleka kusambizga na kupharazga makani ghawemi ghakuyowoya vya Khristu, Yesu.”—Mil. 5:17-21, 27-42; Zinth. 21:1, 30.

3, 4. (a) Kwamba kale, kasi Satana wakuŵawukira wuli ŵanthu ŵa Chiuta? (b) Kasi tisambirenge vichi mu Mutu uwu na yiŵiri yapanthazi?

³ Mulandu uwu, mu 33 C.E. ukaŵa wakwamba kunjira mu khoti chifukwa chakuti ŵalwani ŵakawukira Ŵakhristu. Kweni uku kukaŵa kwamba waka. (Mil. 4:5-8; 16:20; 17:6, 7) M’paka muhanya uno, Satana wakuyezga kukanizga ntchito ya kupharazga kwendera mu ŵanthu awo ŵakutinkha unenesko. Ŵakususka aŵa, ŵakubatika ŵanthu ŵa Chiuta milandu iyi na iyi. Umoza ngwakuti tikutimbanizga mtende, ŵakuti tili ŵakusuzga. Unyake ngwakuti tikuwukira boma. Kweniso unyake ngwakuti tikuchita malonda nyumba na nyumba. Nyengo zinyake ŵabali ŵithu ŵakumangara ku khoti, kukasuska mautesi agha. Kasi ichi chawovwira? Kasi milandu iyo yadumulika kumasinda yikumovwirani wuli? Tiyeni tiwonepo milandu yichoko waka iyo yawovwira ‘kuvikilira na kukhozgera makani ghawemi mwakuyana na dango.’—Fil. 1:7.

⁴ Mu Mutu uwu, tiwonenge ivyo tachita kuti tiŵe ŵanangwa kupharazga. Mu mitu yiŵiri yapanthazi, tisambirenge vya milandu iyo tikaluta nayo ku khoti na chilato chakuti tileke kunjiramo mu vyakuchitika vya charu, na kulondezga ivyo Ufumu wa Chiuta ukutisambizga.

 5. Chifukwa wuli ŵapharazgi ŵakakolekanga m’ma 1930? Kasi awo ŵakadangiliranga pakupharazga ŵakachitapo vichi?

⁵ M’ma 1930, mu misumba na vigaŵa vinandi ku United States of America, ŵakatenge Ŵakaboni ŵa Yehova ŵakwenera kutora dankha chikalata chakuŵazomerezga kupharazga. Kweni ŵabali ŵithu ŵakakana kutora vikalata ivi. Chikalata chikumara ntchito para pajumpha nyengo. Ntheura ŵabali ŵakawona kuti palije boma panji wamazaza uyo wakwenera kujandizga dango la Yesu lakuti Ŵakhristu ŵapharazgenge uthenga wa Ufumu. (Mrk. 13:10) Ntheura ŵapharazgi ŵanandi ŵakaŵakora na kuŵajalira mu jele. Awo ŵakadangiliranga pakupharazga ŵakamangara ku khoti. Ŵakakhumbanga kulongora kuti boma likuŵapoka wanangwa wakuti ŵasopenge mwakufwatuka. Mu 1938 khoti likadumura mulandu wakuzirwa chomene. Ntchivichi chikachitika?

6, 7. Ntchivichi chikachitikira Newton Cantwell na mbumba yake?

⁶ Pa Chiŵiri mulenji, Epulero 26, 1938, ŵapayiniya ŵapadera 5 ŵakaluta mu msumba wa New Haven, Connecticut. Ŵakanozgeka kukapharazga zuŵa lose. Pakaŵa Newton Cantwell, wa vyaka 60; muwoli wake, Esther; na ŵana ŵawo, Henry, Russell, na Jesse. Kweni ŵakamanyaso kuti panji ŵamuwera yayi. Chifukwa? Ŵakakorekapo kanandi waka, ndipo ŵakamanyanga kuti ŵangakakorekaso. Kweni ŵakagongowa yayi. Ŵakalutilira kupharazga uthenga wa Ufumu. Ŵakenda pa magalimoto ghaŵiri. Newton wakendeska galimoto iyo mukaŵa mabuku na magiramu, ndipo mwana wawo Henry wa vyaka 22, wakendeska iyo yikaŵa na vyakukuzgira mazgu. Ivyo ŵakaghanaghananga vikachitika nadi. Mu maora ghachoko waka, ŵapolisi ŵakaŵasanga.

⁷ Russell wa vyaka 18 ndiyo wakamba kukoleka, ndipo kufuma apo Newton na Esther. Jesse, wa vyaka 16 wakaŵa patali, ndipo wakawonanga apo ŵapolisi ŵakatoranga ŵapapi ŵake na mukuru wake. Henry wakapharazganga mu chigaŵa chinyake cha tawuni, ntheura Jesse wakakhala yekha. Ndipouli, wakatora giramu na kulutilira kupharazga. Madoda ghaŵiri gha mpingo wa Katolika ghakazomera kutegherezga nkhani ya Mubali Rutherford ya mutu wakuti “Enemies,” panji kuti “Ŵalwani.” Kweni pambere yindamare, madoda ghakathukira mwakuti ghakakhumbanga kumutimba. Jesse wakawukapo chisisi, kweni nyengo yichoko waka, ŵapolisi ŵakamukora. Ntheura Jesse nayo ŵakamujalira. Ŵapolisi ŵakamusanga na mulandu yayi Mudumbu Cantwell, kweni Mubali Cantwell na ŵana ŵake. Ndipouli, ŵakaŵafumiska pa belu zuŵa lenelilo.

 8. Chifukwa wuli khoti likadumura kuti Jesse Cantwell wakakhumbanga kutimbanizga mtende?

⁸ Pakati pajumpha myezi yichoko waka, mu Seputembala 1938, Mubali Cantwell na mbumba yake ŵakachemeka ku khoti mu msumba wa New Haven. Newton, Russell na Jesse ŵakapika mulandu wakuti ŵakapemphanga vyakupeleka kwambura chikalata. Nangauli Jesse wakati wachitenge apilu ku khoti likuru chomene mu Connecticut, kweni ŵakamupa mulandu wakuti wakakhumbanga kutimbanizga mtende. Chifukwa? Madoda agho ghakategherezga nkhani pa giramu ghakati nkhani iyi yikayowoyera viheni chisopa chawo na kuŵajokora. Ŵalara mu mpingo withu ŵakachitapo kanthu. Ŵakatolera nkhani iyi ku Khoti Likuru Chomene mu United States.

9, 10. (a) Kasi Khoti Likuru Chomene mu U.S. likadumura wuli mulandu wa Mubali Cantwell na mbumba yake? (b) Kasi tikovwirika wuli na ivyo Khoti likadumura?

⁹ Kwamba pa Malichi 29, 1940, Mulara wa Ŵeruzgi, Charles E. Hughes na ŵeruzgi ŵanyake 8, ŵakategherezga ivyo wakayowoya Mubali Hayden Covington, loya wa Ŵakaboni ŵa Yehova.a Loya wa boma nayo wakayowoyapo kukhozgera kuti Ŵakaboni ŵakatimbanizganga mtende. Mweruzgi yumoza wakamufumba, wakati: “Asi Yesu nayo ŵanthu ŵakamususkanga?” Loya wa boma uyu wakati: “Nkhanira, nakuti para nkhukumbuka makora, Baibolo lane likuyowoyaso ivyo ŵakamuchitira Yesu chifukwa cha uthenga uwo wakapharazganga.” Apa ndipo pakagona nkhani! Kwambura kumanya, loya wa boma uyu wakalongora kuti Ŵakaboni ŵa Yehova ŵakaŵa ku chigaŵa cha Yesu, ndipo iyo wakaŵa ku chigaŵa cha awo ŵakeruzga Yesu. Pa Meyi 20, 1940, Khoti likadumura mulandu, kukolerana na Ŵakaboni.

¹⁰ Kasi ivyo Khoti likadumura pa mulandu uwu vyawovwira wuli? Vyawovwira kuvikilira wanangwa wakuti ŵanthu ŵasopenge mwakufwatuka. Ntheura palije boma panji chigaŵa cha boma icho chili na mazaza kukanizga kusopa. Kweniso Khoti likasanga kuti pa ivyo wakachita Jesse, “pakaŵavya chakutimbanizga mtende.” Ntheura ivyo Khoti likadumura, mbukaboni wakuti Ŵakaboni ŵa Yehova mbatimbanizgi yayi. Ndiposo ivyo Khoti likadumura apa vyawovwira chomene ŵateŵeti ŵa Chiuta. Kasi ise vikutovwira wuli? Loya munyake uyo ni Kaboni, wakati: “Pakuti tili ŵanangwa kusopa kwambura chakujandizga, ise Ŵakaboni mazuŵa ghano tikupharazga uthenga uwo ukuŵapa ŵanthu chigomezgo kulikose uko tikukhala.”

11. Kasi ŵabali ŵithu ŵakachita vichi ku Canada, ndipo chifukwa wuli?

¹¹ M’ma 1940, Ŵakaboni ŵa Yehova ku Canada ŵakasuzgika chomene. Ntheura mu 1946 ŵakapharazga mazuŵa 16 kuti ŵanthu ŵamanye vyakuti boma likuŵajandizga kusopa. Ŵakapelekanga kapepara ka mutu wakuti, Quebec wakukhozga soni Canada yose chifukwa cha kutinkha Chiuta na Khristu kweniso wanangwa withu (Quebec’s Burning Hate for God and Christ and Freedom Is the Shame of All Canada.) Kapepara aka kakaŵa na mapeji ghanayi. Kakavumbura kuti ŵaliska ŵakatumanga ŵanthu kuti ŵawukirenge Ŵakaboni. Kakayowoya nkhaza izo ŵapolisi ŵakachitanga, kweniso kuti ŵanthu bweka nawo ŵakaŵawukiranga. Kapepara aka kakati: “Ŵakaboni ŵa Yehova ŵachali kukoleka kwambura vifukwa. . . . Mu msumba wa Greater Montreal, Ŵakaboni ŵali kuŵajulira milandu yakujumpha 800.”

12. (a) Kasi ŵalwani ŵakachita wuli na upharazgi wapadera uwu? (b) Kasi ŵabali ŵakapika milandu wuli? (Wonani mazgu ghamusi)

¹² Bwana mulara wa chigaŵa cha Quebec, (zina lake Premier Maurice Duplessis) na muliska mulara wa mpingo wa Katolika, (zina lake Cardinal Villeneuve) ŵakati ŵawona ivyo vikaŵa pa kapepara aka, ŵakakolerana kuwukira Ŵakaboni “kwambura kuŵalengera lusungu.” Milandu ya Ŵakaboni yikasazgikira kufuma pa 800 kufika pa 1,600. Mudumbu munyake uyo wakaŵa mupayiniya, wakati: “Ŵapolisi ŵakatikoranga kanandi waka.” Ŵakaboni awo ŵakasangikanga kuti ŵakupeleka kapepara aka ŵakaŵajuliranga mulandu wa “kuwukira.”b

13. Kasi mbanjani ŵakaŵa ŵakwamba kweruzgika mulandu wa kuwukira boma? Kasi khoti likadumura wuli?

¹³ Mu 1947, Mubali Aimé Boucher na ŵana ŵake ŵasungwana Gisèle, wa vyaka 18, na Lucille, wa vyaka 11, ndiwo ŵakaŵa ŵakwamba kweruzgika pa mulandu wa kuwukira boma. Iwo ŵakapeleka kapepara ka Quebec’s Burning Hate kufupi na famu yawo mu chigaŵa cha mapiri, kumwera kwa msumba wa Quebec. Kweni vikawonekerathu kuti ŵakaŵa ŵakutimbanizga mtende yayi. Mubali Boucher wakaŵa munthu waka, wakuzika, ndipo icho wakamanyanga ukaŵa ulimi. Wakafikanga ku tawuni kamozakamoza, pa hachi na gileta. Ndipouli, nkhaza zinyake izo kakayowoya kapepara aka, nayo zikamusanga pamoza na mbumba yake. Mweruzgi uyo wakadumura mulandu uwu wakatinkhanga Ŵakaboni. Ntheura wakakana kupulika ukaboni uwo ukalongolerathu kuti Mubali Boucher wakaŵavya mulandu. Kweni wakakorapo waka fundo iyo ŵakayowoya awo ŵakamukaka, yakuti kapepara kakakhuŵirizganga thinkho, ntheura Boucher wakaŵa na mulandu. Apa vikuyana waka na kudumura kuti: Ni mulandu kuyowoya unenesko. Khoti likadumura kuti Aimé na Gisèle ŵakawukira boma, ndipo Lucille nayo wakakhala mu jele mazuŵa ghaŵiri. Ŵabali ŵakachita apilu ku Khoti Likuru Chomene mu Canada, ndipo likawupokelera mulandu uwu.

14. Kasi ŵabali ŵakachitanga wuli apo ŵakasuzgikanga mu Quebec?

¹⁴ Uku ivi vikuchitika, ŵabali na ŵadumbu mu Quebec ŵakalutilira kupharazga uthenga wa Ufumu. Ŵakachita ivi nangauli kukaŵa vivulupi na nkhaza. Kweni ŵakasuzgikira pa kanthu. Vyaka vinayi kufuma apo ŵakambira kupeleka kapepara mu 1946, Ŵakaboni mu Quebec ŵakasazgikira kufuma pa 300 kufika pa 1,000.c

15, 16. (a) Kasi Khoti Likuru Chomene mu Canada likadumura wuli mulandu wa Mubali Boucher na mbumba yake? (b) Kasi ŵabali ŵithu na ŵanthu ŵanyake ŵawovwirika wuli na ivyo Khoti likadumura?

¹⁵ Mu Juni 1950, Khoti Likuru Chomene mu Canada likadumura mulandu, kukhozgera Ŵakaboni. Pakaŵa ŵeruzgi wose 9 pakudumura mulandu wa Mubali Aimé Boucher. Mulandu uwu ukadumulika pakati pajumpha myezi 6, pa Disembala 18, 1950. Chifukwa wuli Khoti likakhozgera Ŵakaboni? Loya wa Ŵakaboni, Mubali Glen How, wakalongosora kuti Khoti nalo likazomera fundo yakuti munthu wakupika mulandu wa “kuwukira boma” usange wawuska vivulupi, panji wakukana kupulikira boma. Ndipouli, mu kapepara aka “mukaŵavya vyanthena, kweni kakalongosora waka ivyo vikachitikanga.” Pamanyuma, Mubali How wakati: “Nkhajiwonera nekha kuti Yehova wakatilwera.”d

¹⁶ Ivyo Khoti Likuru Chomene likadumura ukaŵa ukaboni wakuti Ufumu wa Chiuta ndiwo watonda. Milandu yose 122 iyo ŵakakhumbanga kweruzga Ŵakaboni pa nkhani ya kuwukira boma, yikamalira papo. Kweniso ŵanthu mu Canada na vyaru vinyake ivyo vili pasi pa British Commonweath, nawo ŵakaŵa ŵanangwa kuyowoyapo pa ivyo boma likuchita. Chinyake ntchakuti mu Quebec, ŵa Tchalitchi na boma ŵakaleka kulimbana na Ŵakaboni ŵa Yehova.e

17. Kasi maboma ghanyake ghakuchita wuli kuti tileke kupharazga?

¹⁷ Ŵateŵeti ŵa Yehova mazuŵa ghano ŵakuchita ivyo ŵakachitanga Ŵakhristu ŵakale. Iwo ‘ŵakusaska mazgu gha Chiuta yayi.” (Ŵerengani 2 Ŵakorinte 2:17.) Kweni maboma ghanyake ghakutifyenya na malango ghakwendeskera malonda. Iwo ŵakukhumba waka kujandizga ntchito yithu. Tiyeni tiwone milandu yiŵiri iyo yikavumbura usange Ŵakaboni ŵa Yehova mbakusaska malonda panji mbateŵeti.

18, 19. Kasi boma la Denmark likachita wuli kuti ŵabali ŵaleke kupharazga mwakufwatuka?

¹⁸ Denmark. Pa Okutobala 1, 1932, boma likakaka dango lakuti munthu watorenge dankha chikalata para wakukhumba kuguliska mabuku. Kweni ŵabali ŵithu ŵakadumura yayi vikalata ivi. Machero ghake, ŵabali 5 ŵakapharazganga mu tawuni ya Roskilde, makilomita 30 kumanjiliro gha dazi kwa msumba ukuru wa charu ichi, wa Copenhagen. Pakuwera, ŵakasanga kuti mupharazgi yumoza, August Lehmann palije. Wakakoleka chifukwa ŵakatenge wakuguliska mabuku kwambura chikalata.

¹⁹ Pa Disembala 19, 1932, Lehmann wakachemeka ku khoti. Wakazomera kuti wakapelekanga mabuku ku ŵanthu, kweni wakaguliskanga yayi. Ŵakhoti ŵakakolerana nayo. Ŵakati: “Munthu uyu ngwakusoŵerwa yayi, ndipo palije phindu ilo wakusanga na ntchito yake, nakuti wakaŵavya maghanoghano ghakuti wasangepo phindu, m’malo mwake, wakuchita ntchito iyi na ndalama zake.” Khoti likaŵakhalira kumanyuma Ŵakaboni, ndipo likati ntchito iyo wakuchita Lehmann “ni malonda yayi.” Kweni ŵalwani ŵakakhumba chomene kuti ŵanthu ŵa Chiuta ŵaleke kupharazga mu Denmark. (Sal. 94:20) Mwimiliri wa boma pa nkhani iyi wakamangaraso ku Khoti Likuru Chomene. Kasi ŵabali ŵakachita wuli?

20. Kasi Khoti Likuru Chomene mu Denmark likadumura wuli mulandu? Kasi ŵabali ŵakachitapochi?

²⁰ Mu sabata iyo Khoti Likuru Chomene likanozgekeranga kupulikizga mulandu, Ŵakaboni mu charu chose cha Denmark ŵakakoleska kupharazga. Pa Chinayi, Okutobala 3, 1933, Khoti likapharazga ivyo likadumura. Likakolerana na ivyo khoti lichoko likadumura, kuti Lehmann wakaŵavya mulandu. Ntheura Ŵakaboni ŵakaŵa ŵanangwa kupharazga. Pakuwonga Yehova chifukwa cha kuŵawovwira pa mulandu uwu, ŵabali na ŵadumbu ŵakakhuka kupharazga. Kwambira apo Khoti likadumulira mulandu uwu, ŵabali ŵithu mu Denmark ŵakupharazga kwambura kujandizgika na boma.

21, 22. Kasi Khoti Likuru Chomene mu U.S. likadumura wuli mulandu wa Mubali Murdock?

²¹ United States. Pa Sabata, Febuluwale 25, 1940, mupayiniya zina lake Robert Murdock, Jr., na Ŵakaboni ŵanyake 7, ŵakaŵakora apo ŵakapharazganga mu msumba wa Jeannette, kufupi na Pittsburgh, mu chigaŵa cha Pennsylvania. Mulandu ukaŵa wakuti ŵakaguliskanga mabuku kwambura chikalata. Ŵabali ŵakachita apilu ku Khoti Likuru Chomene, ndipo likawupokelera mulandu wawo.

²² Pa Meyi 3, 1943, Khoti ili likapharazga ivyo likadumura, ndipo likakhalira kumanyuma Ŵakaboni. Ilo likati chikaŵa chakwenelera yayi kutora chikalata, chifukwa vikuyana waka na “kulipira kuti usange wanangwa uwo boma lapeleka kale.” Khoti likati dango la msumba uwu likaŵa lambura ntchito, chifukwa “likaŵafyenyanga ŵanthu na kuŵapoka wanangwa pa nkhani ya kusopa.” Ŵeruzgi ŵanandi ŵakaŵa ku chigaŵa cha Ŵakaboni, ndipo pakudumura, Justice William O. Douglas wakati, Ŵakaboni ŵa Yehova “ntchito yawo nkhupharazga pera yayi, nesi kupeleka waka mabuku. Iwo ŵakuchita vyose viŵiri. Ivyo ŵakuchita nkhusopa, nga umo vikuŵira mu matchalitchi na kupharazga pa gome.”

23. Kasi ivyo khoti likadumura mu 1943 vikovwira wuli mazuŵa ghano?

²³ Ivyo Khoti Likuru Chomene likadumura apa vyaŵawovwira chomene ŵanthu ŵa Chiuta. Uwu mbukaboni wakuti tili ŵateŵeti ŵa Chiuta, tili ŵakusaska malonda yayi. Pa zuŵa lenelili, mu 1943, pa milandu 13, Khoti ili likakhalira kumanyuma Ŵakaboni ŵa Yehova pa milandu 12, kusazgapo wa Mubali Murdock. Ivyo khoti likadumura pa milandu iyi vichali kovwira para ŵanthu ŵakukhumba kutilekeska kupharazga pakweru panji nyumba na nyumba.

24. Kasi tikuchita wuli para boma latikanizga kupharazga?

²⁴ Tikuwonga para boma likutizomerezga kupharazga uthenga wa Ufumu mwakufwatuka. Kweni para latikanira kupharazga, tikuleka yayi. Tikusintha waka nthowa yakupharazgira. Tikuchita nga mbapositole. Iwo ŵakati, “tikwenera kupulikira Chiuta nga muwusi m’malo mwa ŵanthu.” (Mil. 5:29; Mat. 28:19, 20) Kweniso tikukhalapo waka yayi. Tikumangara ku khoti kuti boma litizomerezge kuchita ntchito yithu. Tiyeni tiwone.

25, 26. Kasi ku Nicaragua kukachitika vichi kuti ŵabali ŵadandawure ku Khoti Likuru Chomene? Kasi nkhani yikamara wuli?

²⁵ Nicaragua. Pa Novembala 19, 1952, Mubali Donovan Munsterman, uyo wakaŵa mishonale kweniso mulaŵiliri wa munthavi, wakaluta ku ofesi ya Immigration mu Managua, msumba ukuru wa charu ichi. Wakachemeka na Captain Arnoldo García, uyo wakaŵa mulara pa ofesi iyi. Wakaphalira Donovan kuti Ŵakaboni ŵa Yehova wose mu Nicaragua “ŵakanizgika kupharazga visambizgo vyawo na kuchita chilichose chakukhwaskana na mpingo wawo.” Mubali wakafumba chifukwa, ndipo Captain García wakati, Ŵakaboni ŵandapemphe ku boma kuti liŵazomerezge kuchita ntchito yawo. Kweniso wakati Ŵakaboni ŵakukhozgera vyakuti munthu waleke kuŵa na katundu wake na wake, kweni ivyo wali navyo viŵe vya waliyose. Mbanjani ŵakaŵayowoyera ivi? Ŵaliska ŵa tchalitchi la Katolika.

²⁶ Mwaluŵiro, Mubali Munsterman wakadandawura ku unduna wakuwona vya boma na chisopa, kweniso kwa Pulezidenti Anastasio Somoza García, ndipouli, palije icho chikachitika. Ntheura ŵabali ŵakasintha nthowa yakusopera. Ŵakajara Nyumba ya Ufumu na kwamba kuwungana mu magulu. Ŵakaleka kupharazga mu misewu, kweni ŵakaleka yayi kupharazga uthenga wa Ufumu. Pa nyengo iyi, ŵakadandawuraso ku Khoti Likuru Chomene mu Nicaragua. Ŵakapempha kuti boma liŵafwature, ŵambeso kusopa pakweru. Madandawuro gha Ŵakaboni ghakalembeka mu manyuzipepara ghanandi, ndipo Khoti Likuru Chomene likazomera kupulika mulandu uwu. Kasi vikamara wuli? Pa Juni 19, 1953, Khoti likapharazga ivyo likakolerana, ndipo likakhalira kumanyuma Ŵakaboni. Likasanga kuti Ŵakaboni ŵakapokeka wanangwa wakuti ŵayowoyenge maghanoghano ghawo, kuchita mwakuyana na njuŵi yawo, na kuyowoya ivyo ŵakugomezga. Kweniso likadumura kuti paŵeso mtende pakati pa boma na Ŵakaboni.

27. Chifukwa wuli ŵanthu mu Nicaragua ŵakazizwa na ivyo Khoti likadumura? Kasi ŵabali ŵakawona kuti ivi vikachitika wuli?

²⁷ Ŵanthu mu Nicaragua ŵakazizwa kuti Khoti Likuru Chomene likakolerana na Ŵakaboni pa nkhani iyi. Kumanyuma uku, ŵaliska ŵakaŵa na mazaza chomene, ndipo Khoti likakhumbanga yayi kukwesana nawo. Ŵalara ŵa boma nawo ŵakaŵa na nkhongono mwakuti kanandi Khoti likazomerezganga waka ivyo ŵadumura. Ŵabali ŵithu ŵakamanya kuti ŵakatonda chifukwa Fumu yawo yikaŵavikilira, kweniso pakuti ŵakaleka yayi kupharazga.—Mil. 1:8.

28, 29. Kasi ntchivichi chikachitika ku Zaire cha m’ma 1980?

²⁸ Zaire. Mukatikati mwa ma 1980, mu charu cha Zaire, icho sono chikuchemeka Democratic Republic of Congo, mukaŵa Ŵakaboni 35,000. Pakuwona unandi wa Ŵakaboni, ŵabali ŵakamba kuzenga nyumba zinyake pa ofesi ya charu ichi. Mu Disembala 1985, mu msumba wa Kinshasa mukachitika ungano wa mitundu yose, ndipo pakiza ŵalendo 32,000 kufuma mu vyaru vinandi. Kweni vinthu vikamba kuŵahenipira ŵateŵeti ŵa Yehova. Ntchivichi chikachitika?

²⁹ Mubali Marcel Filteau, mishonale uyo wakafuma ku Quebec mu charu cha Canada, wakateŵeteranga mu Zaire nyengo iyo. Mubali uyu nayo wakasuzgika kwawo apo Duplessis wakaŵa bwana mulara mu Quebec. Pakulongosora ivyo vikachitika, wakati: “Pa Malichi 12, 1986, ŵabali awo ŵakalaŵiliranga ntchito mu charu ichi ŵakapokera kalata iyo yikati wupu wa Ŵakaboni ŵa Yehova ngwambura kuzomerezgeka na dango mu Zaire.” Pulezidenti wa charu ichi, Mobutu Sese Seko, ndiyo wakasayina kalata iyi.

30. Kasi Komiti ya Munthavi yikenera kuchita vichi? Kasi ŵakadumura kuti ŵachite vichi?

³⁰ Machero ghake, pa wayilesi ya charu ichi ŵakapharazga kuti: “Tipulikengeso vya Ŵakaboni ŵa Yehova yayi muno mu [Zaire].” Nyengo yeneyiyo, ŵanthu ŵakamba kuyuzga Ŵakaboni. Ŵakamba kunanga Nyumba za Ufumu, kuŵapoka katundu, kuŵakaka, kuŵajalira mu jele, na kuŵatimba. Na ŵana wuwo ŵakaŵajaliranga mu jele. Pa Okutobala 12, 1988, boma likapoka katundu wa gulu la Yehova, ndipo ofesi yithu yikaŵa mu mawoko gha ŵasilikari. Ŵabali ŵakamudandawulira Pulezidenti Mobutu, kweni wakaŵazgora yayi. Pa nyengo iyi, Komiti ya Munthavi yikenera kusankhapo chimoza, yikati: “Kasi tikamangare ku Khoti Likuru Chomene, panji tilindilirepo?” Mubali Timothy Holmes, uyo wakaŵa mishonale kweniso mulaŵiliri wa milimo ya Komiti ya Munthavi wakati: “Tikalaŵiska kwa Yehova kuti watipe vinjeru na kutilongozga.” Komiti yikalomba na kudumbirana nkhani iyi, ndipo yikadumura kuti nyengo iyo chikaŵa chambura kovwira kutolera nkhani iyi ku khoti. Ntheura ŵakawona kuti chikaŵa chiwemi kovwira waka ŵabali na kuwona ivyo ŵangachita kuti ntchito ya kupharazga yilutilire.

31, 32. Kasi Khoti Likuru Chomene mu Zaire likachita chikanga kudumura nkhani wuli? Kasi ivi vyaŵawovwira wuli ŵabali ŵithu?

³¹ Vyaka vikajumphapo. Suzgo yikamba kuchepa, ndipo ŵanthu ŵanandi ŵakamba kuleka kuchitira nkhaza ŵanyawo. Komiti ya Munthavi yikawona kuti iyi yikaŵa nyengo yiwemi yakutolera dandawuro lawo ku Khoti Likuru Chomene mu Zaire. Khoti likapokelera nadi dandawuro ili. Ndipo pa Janyuwale 8, 1993, vyaka 7 kufuma apo pulezidenti wakakanizgira Ŵakaboni, Khoti likadumura kuti boma likaŵabudira Ŵakaboni, ndipo ŵakazomerezgeka kusopa mwawanangwa. Apa Khoti likachita chikanga chomene. Nangauli ŵeruzgi ŵakamanya kuti ŵangajitayamo, kweni ŵakasuska ivyo pulezidenti wakadumura. Mubali Holmes wakati: “Apo mulandu ukeruzgikanga, tikawona kuti Yehova wakumanya nadi kusintha vinthu.” (Dan. 2:21) Ŵabali ŵakakhozgeka mu chipulikano. Ŵakawona kuti Fumu, Yesu, ndiyo yikawovwira ŵanthu ŵake kumanya nyengo yakuti ŵachitepo kanthu, na icho ŵangachita.

³² Pakuti sono ŵakaŵa ŵanangwa, ofesi yikazomerezgeka kuchema ŵamishonale, kuzenga maofesi ghaphya, na kupokera mabuku.f Ŵateŵeti ŵa Chiuta pa charu chose ŵakukondwa kuwona kuti Yehova wakuŵapwelelera ŵanthu ŵake.—Yes. 52:10.

33. Kasi tikusambirapo vichi pa milandu iyo tawona apa?

³³ Milandu iyo tawona yikutipa ukaboni wakuti Yesu wakuchita nadi ivyo wakalayizga, wakati: “Nizamumupani mazgu na vinjeru, ndipo wose awo ŵakumususkani ŵazamutondeka kulimbana navyo panji kuvisuska.” (Ŵerengani Luka 21:12-15.) Nyengo zinyake Yehova wakuwuska ŵanthu awo ŵakuchita nga ni Gamaliyeli kuti ŵavikilire ŵanthu ŵake, panji kuchiska ŵeruzgi na maloya ghachikanga, mwakuti urunji uchitike. Yehova wabumphiska vilwero vya ŵalwani. (Ŵerengani Yesaya 54:17.) Palije uyo wangatondeska ntchito ya Chiuta.

34. Chifukwa wuli ntchakuzizika kuti tikutonda pa milandu? Kasi uwu mbukaboni wakuti wuli? (Wonaniso bokosi la mutu wakuti “Makhoti Ghatovwira Kuti Tilutilire Kupharazga”)

³⁴ Chifukwa wuli ntchakuzizika kuti tikutonda pa milandu yose iyi? Chifukwa ni ichi: Ŵakaboni ŵa Yehova ŵakuwoneka ŵapasi na ŵambura nkhongono. Tikuvota yayi panji kukolerana na ŵandyali. Nakuti kanandi ŵabali ŵithu awo ŵakutolekera ku khoti ŵakuŵa “ŵambura kusambira ndiposo ŵanthu bweka.” (Mil. 4:13) Ntheura kuvitolera pa wunthu, palije chifukwa chakuti ŵeruzgi ŵakhalire kumanyuma ise m’malo mwa ŵavisopa na ŵandyali ŵakumanyikwa awo ŵakutisuzga. Ndipouli, kanandi makhoti ghakuŵa ku chigaŵa chithu. Uwu mbukaboni wakuti tili “pamaso pa Chiuta, kweniso nga mbanthu awo ŵatumika na Chiuta.” (2 Kor. 2:17) Ntheura nase tikuyowoya nga ni mpositole Paulosi, kuti: “Yehova ni movwiri wane; nopenge chara.”—Heb. 13:6.