Kasi Ndalama Ni Msisi wa Mtundu Uliwose wa Vinthu Vyakupweteka?

Yayi. Baibolo likuyowoyapo yayi kuti ndalama ni ziheni, panji kuti ndizo zikupangiska masuzgo ghose. Mazgu ghakuti “ndalama ni msisi wa mtundu uliwose wa vinthu vyakupweteka” agho ŵanthu ŵakutemwa kuyowoya, ngambura kumalizgika ndipo ndimo ghali kulembekera yayi mu Baibolo. Baibolo likuti “kutemwa ndalama ni msisi wa mtundu uliwose wa vinthu vyakupweteka.”a—1 Timote 6:10.

• Kasi Baibolo likuti wuli pa nkhani ya ndalama?

• Chifukwa wuli Baibolo likuchenjezga vya kutemwa ndalama?

• Kasi tingasanga phindu wuli para tikulondezga ulongozgi wa mu Baibolo pa nkhani ya ndalama?

• Mavesi gha mu Baibolo ghakuyowoya vya ndalama

Baibolo likuyowoya kuti usange tagwiliskira ntchito ndalama mwamahara, zingatovwira ndipo zingaŵa nga “ntchivikiliro.” (Mupharazgi 7:12) Nakutiso Baibolo likulumba awo ŵali na mtima wakupa, ndipo nyengo zinyake vyawanangwa ivyo ŵakupeleka ku ŵanji zingaŵa ndalama.—Zintharika 11:25.

Kweni Baibolo likutichenjezgaso pa nkhani yakuŵika mtima withu wose pa kupanga ndalama. Likuti: “Umoyo winu uŵenge wambura kutemwa ndalama, uku mukukhorwa na vinthu ivyo vilipo.” (Ŵahebere 13:5) Apa sambiro ndakuti tikwenera kugwiliskira ntchito ndalama mwakwenelera na kuleka kuŵika mtima withu wose pa kuzipenja. Tikwenera kukhorwa na vinthu ivyo tili navyo ndiposo ivyo ni vyakukhumbikwa chomene pa umoyo, nga ni chakurya, vyakuvwara na pakukhala.—1 Timote 6:8.

Ŵaryezi ŵazamuwusanga yayi umoyo wamuyirayira. (Ŵaefeso 5:5) Chifukwa chimoza icho ŵazamulekera kusanga umoyo wamuyirayira ntchakuti, uryezi ni mtundu unyake wa kusopa vikozgo, panji kuti kusopa kwautesi. (Ŵakolose 3:5) Chifukwa chinyake ntchakuti, apo ŵanthu aŵa ŵakuŵikapo mtima kuti ŵasange ivyo ŵakukhumba, ŵakusulako fundo ziwemi. Lemba la Zintharika 28:20 likuti: “Uyo wakuchimbilira kusambazga waŵenge wambura mulandu chara”. Nyengo zinyake ŵangapalamura milandu yikuruyikuru nga ukhuluku, uchigeŵenga, unkhungu, kwiba ŵanthu, panji kukoma munthu.

Nanga vingaŵa kuti munthu uyo wakutemwa ndalama wandambe kuchita nkharo ziheni, kweni wakusangana na masuzgo nipera pa umoyo wake. Baibolo likuti “awo ŵakukhumbisiska kuŵa ŵasambazi, ŵakuwira mu chiyezgo na chipingo ndiposo mu makhumbiro ghanandi ghauzeleza na ghakupweteka.”—1 Timote 6:9.

Para tikuleka kuswa fundo zaurunji pa nkhani ya chiwemi na chiheni chifukwa cha ndalama, mbwenu ŵanthu ŵatipenge ntchindi ndipo Chiuta watitemwenge kweniso kutovwira. Chiuta wakulayizga wose awo ŵakuyezgayezga kuti ŵamukondweskenge kuti: “Nikulekenge yayi napachoko nesi kukutaya munthowa yiliyose.” (Ŵahebere 13:5, 6) Iyo wakutisimikizgira kuti “munthu wakugomezgeka wapokerenge vitumbiko vinandi.”—Zintharika 28:20.