Nchamacitiko Kuti Ŵanthu Wose Ŵazakacindikane

“Tipange caru ciphya, caru ciwemi comene umo muzamuŵa nchindi zambura kumara.”—HARRY TRUMAN, PULEZIDENTI WA KU AMERICA KU SAN FRANCISCO CALIFORNIA, U.S.A., EPULERO 25, 1945.

NKHONDO Yaciŵiri ya Caru Cose yikati yamara, Pulezidenti Truman mwakuyana waka na ŵanthu ŵanandi, wakagomezganga kuti ŵanthu ŵangasambirapo pa ivyo vikacitika, ndipo ŵangapanga “caru ciphya,” umo waliyose wangapika nchindi. Cakucitiska citima nchakuti, vinthu ivyo vikucitika sono vikulongora kuti nchindi palijirethu. Ŵanthu ŵakucindikana yayi, cifukwa ico cikucitiska suzgo ili, kuti mbanthu yayi, kweni mulwani wawo mulara.

Ico Cikucitiska Suzgo

Baibolo likuti mulwani uyu ni Satana Dyabulosi, mungelo muheni uyo kufuma ku mtendeko wa munthu wakakayika usange Ciuta wakuwusa mwakwenelera. Kwambira apo Satana wakayowoyeskana na Heva mu munda wa Edeni, cilato cake nchakuti ŵanthu ŵaleke kuteŵetera Mlengi wawo. (Genesis 3:1-5) Wonani ico cikacitika Adamu na Heva ŵati ŵapulikira Dyabulosi! Ŵati ŵatondeka kupulikira dango la Ciuta lakuti ŵaleke kurya vipasi vya mu khuni lakukanizgika, cinthu cakwamba nchakuti wose ŵaŵiri “ŵakabisama pamaso pa Yehova Ciuta.” Cifukwa wuli? Adamu wakati: “Nkhopa cifukwa nkhaŵa nkhuli; ntheura nkhabisama.” (Genesis 3:8-10) Ubwezi wa Adamu na Ŵadada ŵake ŵakucanya na umo mweneko wajiwoneranga vikasintha. Wakaŵa na soni ndipo wakaŵaso wakufwatuka yayi pamaso pa Yehova.

Nchifukwa wuli Dyabulosi wakakhumba kuti Adamu waleke kucindikika? Cifukwa munthu wali kulengeka mu cikozgo ca Ciuta, ndipo Satana wakukondwa comene kuwona munthu wakutondeka kulongora ucindami wa Ciuta. (Genesis 1:27; Ŵaroma 3:23) Fundo iyi yikutovwira kupulikiska cifukwa ico ŵanthu ŵakuyuyulira ŵanyawo. Satana uyo ni “ciuta wa caru cino” ndiyo wakuthandazga mzimu uwu, “mu nyengo iyo munthu yumoza wakuwusa pacanya pa munyake kujipweteka iye mwene,” panji kupweteka ŵanyake. (2 Ŵakorinte 4:4; Mupharazgi 8:9; 1 Yohane 5:19) Kasi ici cikung’anamura kuti ŵanthu ŵangacindikanaso yayi?

Yehova Wakucindika Cilengiwa Cake

Wonaniso umo vinthu vikaŵira m’munda wa Edeni pambere Adamu na Heva ŵandanange. Ŵakaŵa na vyakurya vinandi, nchito yakukhorweska, na mwaŵi wa umoyo uwemi wamuyirayira, pamoza na ŵana ŵawo. (Genesis 1:28) Umo ŵakakhaliranga vikalongoranga khumbo la Ciuta la kucindika ŵanthu.

Kasi Yehova wakaleka kucindika ŵanthu, Adamu na Heva ŵati ŵananga? Cara. Ŵakacita soni cifukwa ŵakamanya kuti ŵali nkhuli, kweni Ciuta wakaŵaghanaghanira. Mwacitemwa, Ciuta wakaŵapangira “minjilira ya vikumba,” m’malo mwa mahamba gha mkuyu agho ŵakasona ŵekha. (Genesis 3:7, 21) M’malo mwa kuŵaleka na soni zawo, Ciuta wakaŵacindika.

Apo Yehova wakalongozganga mtundu wa Israyeli, wakalongora ciwuravi ku ŵana ŵalanda, vyokoro, na ŵalendo, ŵanthu awo kanandi ŵakucindikika yayi. (Salmo 72:13) Mwaciyelezgero, Ŵaisrayeli para ŵakuvuna vipasi vyawo, mu makuni gha maolive na mpheska, ŵakaphalirika kuti ŵaleke kuweleramo umo ŵavunamo. Ciuta wakalangura kuti ivyo vyakharamo “viŵenge vya mulendo, na vya mwana muranda mburawiske, na vya cokoro.” (Duteronome 24:19-21) Kulondezga malango agha, kukawovwira kuti ŵanthu ŵaleke kupempheska nakuti waliyose waŵe na mulimo wakucindikika, na ŵakavu wuwo.

Yesu Wakacindikanga Ŵanji

Apo Mwana wa Ciuta, Yesu Khristu wakaŵa pano pa caru capasi, wakacindikanga ŵanji. Mwaciyelezgero, apo wakaŵa mu Galileya, wakakumana na munthu uyo wakaŵa na vyoni thupi lose. Mwakuyana na Dango la Mozesi, kuti ŵanji ŵaleke kwamburako vyoni, munthu wa vyoni wakeneranga kucemerezga kuti: “Ndafipirwa! Ndafipirwa!” (Leviticus 13:45) Kweni, munthu uyu wakacemerezga cara pakukumana na Yesu. M’malo mwake, wakawa kavunama na kumuŵeyelera Yesu kuti: “Fumu, usange mukukhumba mungamanya kunditozga.” (Luka 5:12) Kasi Yesu wakacita nayo wuli? Yesu wakamukalipira cara munthu uyu cifukwa cakuti waleka kulondezga Dango, panji kumulaŵiska waka nesi kumucimbira. M’malo mwake, wakamucindika munthu wa vyoni mwa kumukhwaska na kuyowoya kuti: “Nkhukhumba, tozgeka.”—Luka 5:13.

Nyengo zinyake, Yesu wakacizganga ŵanthu kwambura kuŵakhwaska ndipo nyengo zinyake wakacizganga ŵanthu nanga ŵangaŵa patali. Kweni mu cakucitika ici, Yesu wakasankha kumukhwaska munthu uyu. (Mateyu 15:21-28; Marko 10:51; Luka 7:1-10) Cifukwa cakuti munthu uyu wakaŵa na “vyoni thupi lose,” palije kukayika kuti wakakhala vilimika vinandi kwambura munthu kumukhwaska. Munthu uyu wakwenera kuti wakapembuzgika comene kuwona munthu munyake wamukhwaska! Wakakhumbanga nadi kuti wacizgike, kweni wakaŵavya cilindizga cakuti munthu wangamukhwaska. Palije kukayika kuti nthowa iyo Yesu wakamucizgira munthu uyu, yikawezgerapo cinthu cinyake cakuzirwa comene, ico ni nchindi zake. Kasi cingaŵa camahara kugomezga kuti ŵanthu ŵangacindikana mazuŵa ghano? Usange ni nthena, ŵangacindikana wuli?

Dango Ilo Likucindika Ŵanthu

Yesu wakapeleka dango ilo ŵanthu ŵanandi ŵakuliwona kuti ndapadera comene pa kakhaliro ka ŵanthu: “Ntheura vyose ivyo mukukhumba kuti ŵanthu ŵamucitirani, vyeneivyo namwe muŵacitirenge.” (Mateyu 7:12) Dango ili, likuciska munthu waliyose kuti wacindikenge munyake, na cigomezgo cakuti nayoso ŵamucindikenge.

Mdauko ukulongora kuti kulondezga dango ili kukwiza kwekha yayi, ndipo kanandi ivyo vikucitika vikuŵa vyakupambana na dango ili. Munthu uyo zina lake tamuthya Harold wakuti: “Kanandi nkhatemwanga kuyuyura ŵanji. Na mazgu ghacoko waka, nkhacitiskanga ŵanthu kuhangayika maghanoghano, kulengeskeka ndipo nyengo zinyake kulira.” Kweni cinthu cinyake cikamovwira Harold kuti wasinthe umo wakacitiranga na ŵanji. Wakuti “Ŵakaboni ŵa Yehova ŵakamba kunipharazgira. Para nkhukumbuka umo nkhayowoyeranga nawo na ivyo nkhaŵacitiranga, citima cikunikora. Kweni kuti ŵakaleka cara, pacoko na pacoko, unenesko wa mu Baibolo ukanicontha mtima, ndipo nkhakhuŵirizgika kusintha.” Pa nyengo yasono, Harold ni mulara mu mpingo wa Cikhristu.

Ciyelezgero ca Harold nchilongolero cakuti “mazgu gha Ciuta ngamoyo, ndipo ngakuphinda [ngankhongono], ngakuthwa kwakuluska lupanga lwa uyi kosekose, ghakuporota ghasuke ghapatulanye pakati umoyo na mzimu, na malungo na mongo wuwo, ghapusu kuvumbula maghanoghano na madazgo gha mtima.” (Ŵahebere 4:12) Mazgu gha Ciuta ghali na nkhongono za kuconthera mtima wa munthu, na kusintha maghanoghano na nkharo yake. Kuti ticindike ŵanji, fundo iyo yingatovwira njakuti tiŵe na mtima wa kuŵawovwira m’malo mwa kuŵanyoza, kuŵacindika m’malo mwa kuŵayuyura.—Milimo 20:35; Ŵaroma 12:10.

Nchindi Zakwenelera Zizamuŵaposo

Ŵakaboni ŵa Yehova ŵali na khumbo la kucindika ŵanyawo lekani ŵakukhuŵirizgika kuphalirako ŵanji za cilindizga ciwemi ico cikusangika mu Baibolo. (Milimo 5:42) Palije nthowa yiwemi yakulongolera nchindi ku ŵanji kuluska kuŵaphalira “makani ghawemi gha vinthu viwemi.” (Yesaya 52:7) “Vinthu viwemi” vikusazgapo kuvwara “wunthu uphya” uwo ungakoma “kukhumba kuheni” kwa kuyuyura ŵanji. (Ŵakolose 3:5-10) Kweniso khumbo la Yehova ndakuti mwasonosono apa wawuskepo vinthu na nkharo yose yiheni yambura kucindika ŵanthu, pamoza na uyo wakucitiska, Satana Dyabulosi. (Daniel 2:44; Mateyu 6:9, 10; Civumbuzi 20:2, 10) Panyengo iyo caru cose capasi “camukuzura na kumumanya Yehova,” penepapo ndipo ŵanthu wose ŵazamucindikana.—Yesaya 11:9.

Tikumupemphani kuti musambire za cilindizga ciwemi ici. Mwa kuwungana na Ŵakaboni ŵa Yehova, muzamuwona mwekha kuti kulondezga malango gha mu Baibolo kukovwira kuti ticindike ŵanji. Ndipo muzamusambira umo Ufumu wa Ciuta mwasonosono apa wizirenge na ‘caru ciphya, ciwemi comene’ umo muzamuŵa “nchindi zambura kumara,” ndipo muzamuŵavya uyo wazamuleka kucindika munyake.

[Bokosi/Cithuzithuzi pa peji 6]

Ŵakacindikika Cifukwa ca Kugomezgeka Kwawo

Mu Nkhondo Yaciŵiri ya Caru Cose, Ŵakaboni ŵa Yehova ŵakujumpha 2,000 ŵakatumizgika ku misasa ya Nazi yakusuzgirako ŵanthu cifukwa ca cipulikano cawo. Wati wawona umo Ŵasambiri ŵa Baibolo ŵakagomezgekera, Gemma La Guardia Gluck uyo wakaŵa mu jere la ku Ravensbrück mu buku lake la My Story wakuti: “Panyengo yinyake ŵapolisi ŵa Nazi ŵakucemeka Gestapo ŵakapharazga kuti waliyose wa Ŵasambiri ŵa Baibolo uyo wangaleka cipulikano cake na kusayina kuti waleka nadi, waŵenge mwanangwa ndipo wayuzgikengeso yayi.” Pakuyowoya za awo ŵakakana kusayina, wali kulemba kuti: “Ŵakasankha kulutilira kusuzgika na kulindilira zuŵa ilo ŵazamuwombokwa kwamuyirayira.” Nchifukwa wuli ŵakakana kusayina? Magdalena uyo wazunurika mu nkhani yakwamba, ndipo sono wali na vilimika 80, wakuti: “Kuŵa wakugomezgeka kwa Yehova kukaŵa kwakuzirwa comene kuluska kucita cilicose kuti tiŵe ŵamoyo. Tikacindikika cifukwa cakuti tikagomezgeka.”a

[Mazgu ghamusi]

[Cithuzithuzi pa peji 5]

Yesu wakacindikanga awo wakaŵacizganga

[Cithuzithuzi pa peji 7]

Ŵakaboni ŵa Yehova ŵakucindika ŵanji mwa kuŵaphalira “makani ghawemi gha vinthu viwemi”