Kasi Tingachita Wuli Kuti Chiuta Wakondwenge na Kusopa Kwithu?

Nga umo tawonera kale mu sambiro 13, ni visopa vyose yayi ivyo vikumukondweska Chiuta. Ndipouli, ntchamachitiko kumusopa umo mweneko wakukhumbira. Kasi ‘nkhusopa’ wuli uko Chiuta wakukondwa nako? (Yakobe 1:27) Wonani ivyo Baibolo likusambizga.

1. Kasi kusopa kwithu kukwenera kujintha pa vichi?

Kusopa kwithu kukwenera kujintha pa fundo za mu Baibolo. Yesu wakati: “Mazgu ghinu mbunenesko.” (Yohane 17:17) Matchalitchi ghanandi ghakukana unenesko wa mu Mazgu gha Chiuta, Baibolo. M’malo mwake, ghakusambizga maghanoghano gha ŵanthu na mitheto. Yehova wakukondwa yayi na wose awo ‘ŵakuzerezga dango la Chiuta.’ (Ŵazgani Mariko 7:9.) Kweni tikukondweska Chiuta para tikuchita ivyo Baibolo likuyowoya na kulondezga fundo zake.

2. Kasi tikwenera kumusopa wuli Yehova?

Pakuti iyo ni Mlengi withu, tikwenera kumusopa na mtima wose. (Chivumbuzi 4:11) Ivi vikung’anamura kuti tikwenera kumutemwa na kumusopa iyo pera kwambura kugwiliskira ntchito vikozgo panji vinthu vinyake.—Ŵazgani Yesaya 42:8.

Kusopa kwithu kukwenera kuŵa ‘kutuŵa, na kwakuzomerezgeka’ kwa Yehova. (Ŵaroma 12:1) Ivi vikung’anamura kuti tikwenera kupulikira malango ghake. Mwachiyelezgero, awo ŵakutemwa Chiuta ŵakulondezga malango ghake pa nkhani ya nthengwa. Iwo ŵakukana nkharo ziheni nga kukhweŵa hona, minkhwala yakutimbanizga wongo panji kuloŵera.a

3. Chifukwa wuli tikwenera kusopa Yehova pamoza na Ŵakhristu ŵanyithu?

Maungano ghithu ghakutipa mwaŵi ‘wakulumba Yehova mukati mu mpingo.’ (Salimo 111:1, 2) Nthowa yimoza iyo tikuchitira nthena, ni para tikwimba sumu za kumulumba. (Ŵazgani Salimo 104:33.) Yehova wakukhumba kuti tisangikenge pa maungano chifukwa wakutitemwa kweniso wakumanya kuti ghangatovwira kuti tizakasange umoyo wamuyirayira. Para tili pa maungano tikukhozgana yumoza na munyake.

MANYANI VINANDI

4. Tikwenera yayi kugwiliskira ntchito vikozgo pakusopa

VIDIYO: Kasi Chiuta Wakuzomerezga Kugwiliskira Ntchito Vikozgo Pakumusopa? (3:26)

• Kasi ntchivichi chikachitika apo ŵanthu ŵa Chiuta mu nyengo yakale ŵakagwiliskira ntchito vikozgo pakusopa?

Ŵanthu ŵanyake ŵakugomezga kuti ŵangaŵa pafupi chomene na Chiuta para ŵakugwiliskira ntchito vikozgo pakumusopa. Kweni ivi vikupangiska kuti ŵatalikirane na Chiuta. Ŵazgani Ekisodo 20:4-6 na Salimo 106:35, 36, kufuma apo dumbiskanani mafumbo agha:

• Kasi ni vikozgo panji vinthu wuli vinyake ivyo muli kuwonapo kuti ŵanthu ŵakugwiliskira ntchito pakusopa?

• Kasi Yehova wakujipulika wuli para ŵanthu ŵakugwiliskira ntchito vikozgo pakumusopa?

• Kasi imwe mukuwona kuti ntchakwenelera kugwiliskira ntchito vikozgo?

5. Tikufwatulika ku visambizgo vyautesi para tikusopa Yehova pera

VIDlYO: Unenesko Ukanifwatura (5:16)

Ŵazgani Salimo 91:14, kufuma apo dumbiskanani fumbo ili:

• Kasi Yehova wakulayizga kuti watichitirenge vichi para tikusopa iyo pera kulongora kuti tikumutemwa?

6. Tikusopa Chiuta para tili pa maungano gha mpingo

Tikulumba Yehova kweniso kukhozga ŵanyithu para tikwimba na kuzgorapo pa maungano. Ŵazgani Salimo 22:22, kufuma apo dumbiskanani mafumbo agha:

• Kasi mukakondwa kuti ŵabali na ŵadumbu ŵakazgorapo pa maungano?

• Kasi namwe mungatemwa kunozgekera kuti mukazgorepo?

7. Yehova wakukondwa para tikuphalirako ŵanyithu ivyo tikusambira

Pali nthowa zinandi za umo tingapharazgira ŵanyithu unenesko wa mu Baibolo. Ŵazgani Salimo 9:1 na 34:1, kufuma apo dumbiskanani fumbo ili:

• Kasi mwasambira vichi mu Baibolo ivyo mukukhumba kukaphalirako ŵanyinu?

MWAKUDUMURA

Tikukondweska Mlengi withu para tikusopa iyo pera, kumulumba pa maungano gha mpingo, na para tikuphalirako ŵanyithu ivyo tasambira.

Kuweleramo

• Kasi tingachita wuli kuti tisopenge Chiuta mwakuzomerezgeka?

• Chifukwa wuli tikwenera kusopa Yehova pera?

• Chifukwa wuli tikwenera kusopera lumoza na ŵanyithu awo nawo ŵakukhumba kukondweska Chiuta?

SANGANI FUNDO ZAKUSAZGIKIRA

Mu nkhani yakuti “Nkhuteŵeteraso Vikozgo Yayi,” wonani umo mwanakazi munyake wakakondwera wati wafwatuka ku kusopa vikozgo.

“Baibolo Likusintha Umoyo wa Ŵanthu” (Gongwe la Mulinda, Julayi 1, 2011)

Wonani ivyo vingamovwirani kuti muzgorengepo pa maungano gha mpingo.

“Lumbani Yehova Mukati mu Mpingo” (Gongwe la Mulinda, Janyuwale 2019)

Wonani umo munyamata munyake wakasangira chandulo wakati wasangikapo pa maungano gha mpingo nangauli chikaŵa chipusu yayi.

Yehova Wakanovwira (3:07)

Ŵanthu ŵanandi ŵakugomezga kuti munthu wakumanyikwa kuti ni Mkhristu para wakugwiliskira ntchito mphinjika, kweni kasi tikwenera kuyigwiliskira ntchito pakusopa?

“Chifukwa Wuli Ŵakaboni ŵa Yehova Ŵakusopa Kwambura Mphinjika?” (Nkhani ya pa Intaneti)