Mafumbo Ghakufumira ku Ŵaŵazgi

Kasi mu likasa la phangano mukaŵa viphapha viŵiri pera vya malibwe, panji mukaŵaso vinthu vinyake?

Mu 1026 B.C.E., apo ŵakapatuliranga tempele ilo Solomoni wakazenga, “mukaŵavye kanthu mu Likasa, ndipera viphapha viŵiri ivyo wakaŵikamo Mozesi ku Horebu para Yehova wakapangana phangano na Ŵaisrayeli, ŵati ŵafuma ku Eguputo.” (2 Midauko 5:10) Kweni nyengo zose kuti mukaŵavya kanthu yayi.

Mu “mwezi wacitatu ŵati ŵafuma mu Eguputo Ŵaisrayeli,” ŵakanjira mu mapopa gha Sinayi. (Exodus 19:1, 2) Kufuma apo Mozesi wakakwera mu Phiri la Sinayi ndipo wakapokera malibwe ghaŵiri apo pakalembeka Dango. Iyo wakati: “Ndipo nkhazgoka na kwikha mu lupiri, na kuŵika mawe mu likasa ilo nkhacita; ghali mwenemumo nga ndi umo Yehova wakandiwuzgira.” (Duteronome 10:5) Ili likaŵa likasa lakukolerapo waka, panji bokosi, ilo Yehova wakaphalira Mozesi kuti wapange mwakuti waŵikemo malibwe gha Dango. (Duteronome 10:1) Pa nyengo yira, likasa la phangano likaŵa kuti lindambeko kugwira nchito mupaka kuzakafika kuumaliro wa 1513 B.C.E.

Nyengo yicoko waka Ŵaisrayeli ŵakati ŵawombokwa kufuma mu Eguputo, ŵakamba kudinginyika cifukwa ca cakurya. Ntheura Yehova wakaŵapa mana. (Exodus 12:17, 18; 16:1-5) Nyengo yeneyira, Mozesi wakaphalira Aroni kuti: “Tora ciŵiya, uthiremo Mana wakuzura omer, uŵike pamaso pa Yehova kuti kusungikire mafuko ghinu.” Nkhani iyi yikuti: “Umo Yehova wakanenera kwa Mozesi, ntheura ndimo Aroni wakaciŵika panthazi pa Ukaboni [bokosi lakusungamo vinthu vyakuzirwa], kuti cisungike.” (Exodus 16:33, 34) Tikukayika yayi kuti Aroni wakathiramo mana mu ciŵiya nyengo yira, kweni wakalindilira dankha mpaka Mozesi wakamalizga Likasa na kuŵikamo malibwe, kufuma apo ndipo wakaŵikanga ciŵiya ca mana panthazi pa Ukaboni.

Umo tawonera kale, likasa la phangano likamara kupangika kuumaliro wa 1513 B.C.E. Ndodo ya Aroni ŵakayiŵika mu Likasa lira pamanyuma pa cigaruka ca Kora na ŵanyake. Mpositole Paulosi wakuzunura “likasa la Phangano . . . umo mukaŵa ciŵiya ca golide cakuŵa na mana, na ndodo ya Aroni iyo yikasundanga, na mawe ghapapati gha phangano.”—Ŵahebere 9:4.

Ciuta wakaŵapa mana Ŵaisrayeli apo ŵakaŵa mu mapopa vilimika 40. Kweni wakaleka kuŵapa “ŵakati ŵarya vya caru” ca layizgano. (Joshua 5:11, 12) Ndodo ya Aroni ŵakayiŵika mu likasa la phangano kuti ciŵe cimanyikwiro panji ukaboni wa kwimikana na fuko la kugaruka. Ici cikulongora kuti nyengo yose iyo ŵakaŵira mu mapopa ndodo yikaŵa mwenemura. Ipo tingati Ŵaisrayeli ŵakafumiskamo ndodo ya Aroni na ciŵiya ca mana mu likasa la phangano pamanyuma pakuti ŵanjira mu Caru ca Layizgano panji pambere ŵandapatulire tempele ilo Solomoni wakazenga.