Kasi Mungaŵa Paubwezi na Chiuta?

Yehova wakukhumba kuti mumumanye makora. Chifukwa wuli? Wakumanya kuti para mwamanya mikhaliro yake, umo wakuchitira vinthu, kweniso chifukwa icho wakalengera ŵanthu mbwenu muŵenge nayo paubwezi. Kasi vingachitika kuti muŵe paubwezi na Chiuta? (Ŵazgani Salimo 25:14.) Kasi mungachita wuli kuti muŵe paubwezi na Chiuta? Baibolo likuzgora mafumbo agha kweniso likulongosora uwemi wakuŵa paubwezi na Yehova.

1. Kasi Yehova wakumupemphani vichi?

Baibolo likuti “sendelerani kwa Chiuta, ndipo iyo wasendelerenge kwa imwe.” (Yakobe 4:8) Kasi fundo iyi yikung’anamurachi? Yehova wakumupemphani kuti muŵe nayo paubwezi. Ŵanyake ŵakuwona kuti vingachitika yayi kuti ŵaŵe paubwezi na Chiuta chifukwa chakuti ŵandamuwonepo. Kweni kwizira mu Baibolo Yehova wali kutiphalira vyose vyakukhwaskana na mikhaliro yake na chilato chakuti tisendelere kwa iyo. Para tikuŵazga Baibolo tikuŵa paubwezi wakukhora na Yehova nangauli tindamuwonepo.

2. Chifukwa wuli Yehova ni mubwezi muwemi kuluska waliyose?

Yehova wakumutemwani chomene kuluska munthu waliyose. Wakukhumba kuti mukondwenge na kuyowoyeskana nayo palipose apo mwakhumbira. Baibolo likuti: “Muthulirani vyose ivyo mukwenjerwa navyo, chifukwa wakumupwelelerani.” (1 Petrosi 5:7) Yehova ngwakunozgeka kumovwirani, kumusanguluskani kweniso kutegherezga para mukuyowoya nayo.—Ŵazgani Salimo 94:18, 19.

3. Kasi Yehova wakukhumba kuti ŵabwezi ŵake ŵachitenge vichi?

Yehova wakutemwa ŵanthu wose, “kweni wakuŵa mubwezi wa ŵakunyoloka.” (Zintharika 3:32) Yehova wakukhumba kuti ŵateŵeti ŵake ŵachitenge vinthu ivyo iyo wakutemwa na kutinkha ivyo iyo wakutinkha. Ŵanthu ŵanyake ŵakuti ŵangakwaniska yayi kuchita vyose ivyo Yehova wakukhumba na kutinkha ivyo iyo wakutinkha. Ndipouli, Yehova wakutipulikiska. Iyo wakuŵa paubwezi na waliyose uyo wakumutemwa kweniso uyo wakuyezgayezga kumukondweska.—Salimo 147:11; Milimo 10:34, 35.

MANYANI VINANDI

4. Abrahamu wakaŵa mubwezi wa Yehova

Nkhani ya mu Baibolo ya Abrahamu (uyo wakachemekangaso Abramu) yikutovwira kumanya ng’anamuro lakuŵa mubwezi wa Chiuta. Ŵazgani nkhani ya Abrahamu pa Genizesi 12:1-4. Kufuma apo dumbiskanani mafumbo agha:

• Kasi Yehova wakaphalira Abrahamu kuti wachite vichi?

• Kasi Yehova wakamulayizga vichi Abrahamu?

• Kasi Abrahamu wakachita vichi?

5. Kasi Yehova wakukhazga vichi ku ŵabwezi ŵake?

Kanandi tikukhazga vinthu viwemi kufuma ku ŵabwezi ŵithu.

• Kasi imwe mungakhumba kuti ŵabwezi ŵinu ŵamuchitirani vichi?

Ŵazgani 1 Yohane 5:3, kufuma apo dumbiskanani fumbo ili:

• Kasi Yehova wakukhumba kuti ŵabwezi ŵake ŵachitenge vichi?

Kuti timupulikire Yehova, tikwenera kusintha nkharo zithu kweniso umo tikuchitira vinthu. Ŵazgani Yesaya 48:17, 18, kufuma apo dumbiskanani fumbo ili:

• Chifukwa wuli Yehova wakukhumba kuti ŵabwezi ŵake ŵachitenge vinthu viwemi?

6. Kasi Yehova wakovwira wuli ŵabwezi ŵake?

VIDIYO: Yehova Wanichitira Vikuru Chomene (3:20)

• Kuyana na ivyo mwawona mu vidiyo, kasi Yehova wakamovwira wuli mwanakazi uyu kuti waleke kughanaghana vinthu viheni kweniso kusuzgika maghanoghano?

Ŵazgani Yesaya 41:10, 13, kufuma apo dumbiskanani mafumbo agha:

• Kasi Yehova waŵalayizga vichi ŵabwezi ŵake wose?

• Kasi mukughanaghana kuti Yehova wangaŵa mubwezi muwemi? Chifukwa wuli?

7. Tikwenera kuyowoyeskana na Yehova kuti ubwezi withu ukhore

Para ŵanthu ŵakuyowoyeskana ndipo ubwezi wawo ukukhora chomene. Ŵazgani Salimo 86:6, 11, kufuma apo dumbiskanani mafumbo agha:

• Kasi tingayowoyeskana nayo wuli Yehova?

• Kasi Yehova wakuyowoya nase wuli?

MWAKUDUMURA

Yehova wakukhumba kuti muŵe nayo paubwezi, ndipo wangamovwirani kuti musendelere kwa iyo.

Kuweleramo

• Kasi Yehova wakovwira wuli ŵabwezi ŵake?

• Chifukwa wuli Yehova wakukhumba kuti ŵabwezi ŵake ŵachitenge vinthu viwemi?

• Kasi mukughanaghana kuti ntchakusuzga kuti ŵanthu ŵaŵe paubwezi na Yehova? Chifukwa wuli?

SANGANI FUNDO ZAKUSAZGIKIRA

Kasi kuŵa paubwezi na Chiuta kungamovwirani wuli?

“Yehova Ndiyo Ni Chiuta Uyo Tikwenera Kumumanya” (Gongwe la Mulinda, Febuluwale 15, 2003)

Wonani ivyo mungachita kuti muŵe paubwezi na Chiuta.

“Kasi Ningachita Wuli Kuti Niŵe Paubwezi na Chiuta?” (Mazgoro gha Ivyo Ŵachinyamata Ŵakufumba, Buku Lachiŵiri, mutu 35)

Wonani umo mwanakazi munyake wakasinthira umoyo wake chifukwa chakuŵa paubwezi na Yehova.

“Nkhawopanga Chomene Nyifwa!” (Gongwe la Mulinda Na. 1 2017)

Wonani ivyo ŵachinyamata ŵanyake ŵakuyowoya vyakukhwaskana na Yehova.

Kasi Kuŵa Paubwezi na Chiuta Chikung’anamurachi? (1:46)

6. Para munthu wabatizika wakuŵa mu mbumba ya Yehova

Para munthu wabatizika wakuŵa mu mbumba ya pa charu chose iyo njakukolerana. Nangauli tikufuma mu vyaru panji mitundu yakupambanapambana, kweni tose tikuchita vyakuyana waka ndipo tikwendera fundo za Yehova. Ŵazgani Salimo 25:14 na 1 Petrosi 2:17, kufuma apo dumbiskanani fumbo ili:

• Kasi munthu wakuŵa paubwezi wuli na Yehova kweniso Ŵakhristu ŵanyake para wabatizika?

2. Kasi tingachita wuli kuti tikondwenge na umoyo sono?

Yehova wali kutilenga kuti tiŵenge na “njara yauzimu,” lekani tikukhumba kumumanya na kumusopa. (Ŵazgani Mateyu 5:3-6.) Iyo wakukhumba kuti tiŵenge paubwezi wakukhora na iyo, “kwenda mu nthowa zake zose, kumutemwa,” na kumuteŵetera ‘na mtima withu wose.’ (Dotoronome 10:12; Salimo 25:14) Para tikuchita ivi tiŵenge ŵakukondwa nangauli tikusangana na masuzgo. Para tikusopa Yehova tikuŵa na umoyo uwemi kweniso wakukhorweska.