Kuzirwa kwa Makani Ghaweme

“Yehova wandiphakazga kupharazga makani ghaweme ku ŵakuzika; wandituma kuyakakurunga ŵakupyoka-mtima, . . . kusanguruska wose awo ŵakutengera.”—YESAYA 61:1, 2.

1, 2. (a) Kasi Yesu wakajiphara yekha kuti ninjani, ndipo mwauli? (b) Kasi makani ghaweme agho Yesu wakapharazganga ghakaŵa na vintu wuli viweme?

ZUŴA linyake pa Sabata, kukwambilira kwa uteŵeti wake, Yesu wakanjira mu sunagoge mu Nazarete. Kuyana na umo nkani yikuyowoyera, “likapika kwa iyo buku la mprofeti Yesaya. Ndipo wakati wabanula buku, wakasanga malo penepapo pali kulembeka, ‘Mzimu wa Fumu wuli pa ine, cifukwa yiri kundiphakazga kupharazga makani ghaweme.’” Yesu wakarutilira kuŵazga uthenga uwu. Wakakhala pasi, ndipo wakati: ‘Muhanya uno malembo agha ghafiskika.’—Luka 4:16-21.

² Mwanteura, Yesu wakajiphara yekha kuti ni mupharazgi uyo wakayowoyekerathu, enya, muyowoyi wa makani ghaweme na musanguruski. (Mateyu 4:23) Mwee, nawo mbuwemi wa makani agho Yesu wakapharazganga! Wakaphalira ŵapulikizgi ŵake kuti: “Ndine kungweruka kwa caru: uyo wakurondezga ine kuti wati wendenge mu cisi cara, kweni wati waŵenge na kungweruka kwa umoyo.” (Yohane 8:12) Wakatiso: “Usange mukukhalirira mu mazgu ghane, ipo muli ŵasambiri ŵane nadi; ndipo muti mumanyiskenge unenesko, ndipo unenesko uti umuzgorani ŵanangwa.” (Yohane 8:31, 32) Enya, Yesu wakaŵa na “mazgu gha umoyo wa muyirayira.” (Yohane 6:68, 69) Ungweru, umoyo, na wanangwa, vyose ivi ni vintu vyakuzirwa nkanira!

 3. Ni makani wuli ghaweme agho ŵasambiri ŵa Yesu wakapharazganga?

³ Pamanyuma pa Pentekoste wa 33 C.E., ŵasambiri ŵakarutizga ncito yakupharazga iyo Yesu wakacitanga. Ŵakapharazga ‘makani ghaweme gha ufumu’ ku Ŵaisrayeli na ku ŵamitundu wuwo. (Mateyu 24:14; Milimo 15:7; Ŵaroma 1:16) Awo ŵakazomera uthenga uwu ŵakamba kumanya Yehova Ciuta. Ŵakafwatuka ku wuzga wa cisopo na kuŵa mtundu upya wauzimu, “Ŵaisrayeli ŵa Ciuta,” awo ŵali na mwaŵi wa kuwusa pamoza na Fumu yawo Yesu Kristu kucanya. (Ŵagalatiya 5:1; 6:16; Ŵaefeso 3:5-7; Ŵakolose 1:4, 5; Civumbuzi 22:5) Ivi vikaŵa vitumbiko vyapadera nkanira!

Kupharazga mu Nyengo Yalero

 4. Kasi lero ncito ya kupharazga yikufiskika mwauli?

⁴ Lero, Ŵakristu ŵakuphakazgika, pamoza na “mzinda ukuru” uwo ni “mberere zinyake,” ŵarutilira kucita ncito iyo pakwamba yikapika kwa Yesu. (Civumbuzi 7:9; Yohane 10:16) Cakufumapo cake caŵa cakuti makani ghaweme ghakupharazgika pacaru cose kuruska kale. Ŵakaboni ŵa Yehova ŵaruta mu vyaru na vigaŵa 235 kuti ‘ŵapharazge makani ghaweme ku ŵakuzika; . . . ŵakurunge ŵakupyoka-mtima, ŵathuwuske kusutulika kwa ŵamagoli na kujurika kwa nyumba ya magoli kwa awo mbakukakika; ŵathuwuske cirimika ico Yehova wakuca naco na zuŵa la kuwezgera nduzga la Ciuta withu; ŵasanguruske wose awo ŵakutengera.’ (Yesaya 61:1, 2) Ncito ya kupharazga ya Ŵakristu yikurutilira kupereka vitumbiko na cisangurusko ku ŵantu ŵanandi awo ‘ŵali mu suzgo.’—2 Ŵakorinte 1:3, 4.

 5. Kasi Ŵakaboni ŵa Yehova ŵakupambana wuli na matcharitchi gha visopo pa nkani ya kupharazga makani ghaweme?

⁵ Mbunenesko kuti matcharitchi ghanandi gha visopo ghakusambizga ntowa zakupambana-pambana za kapharazgiro. Ŵanandi ŵakutuma ŵamishonale ku vyaru vinyake kuti ŵakanyengelere ŵantu. Mwaciyerezgero, The Orthodox Christian Mission Center Magazine yikuyowoya ivyo ŵamishonale ŵa tcharitchi la Orthodox ŵakucita ku Madagascar, kumwera kwa Africa, Tanzania, na Zimbabwe. Ndipouli, nga ni umo matcharitchi ghanyake ghakucitira, ŵantu ŵanandi mu tcharitchi la Orthodox ŵakupharazga cara. Mwakupambana na iwo, Ŵakaboni wose ŵakujipatulira ŵakufwilirapo kupharazga. Ŵakumanya kuti kuthuwuska makani ghaweme ncirongolero ca cipulikano cawo ceneko. Paulos wakati: “Na mtima muntu wakupulikana kufika ku urunji, ndipo na mlomo wakuzomera kufika ku mponokwa.” Usange cipulikano cikuleka kutuma muntu kucita mulimo, mbwenu ndikuti ncakufwa.—Ŵaroma 10:10; Yakobe 2:17.

Makani Ghaweme Agho Ghali na Vitumbiko Vyamuyirayira

 6. Ni makani wuli ghaweme agho ghakupharazgika lero?

⁶ Ŵakaboni ŵa Yehova ŵakupharazga makani ghaweme kuruska makani ghose. Ŵakujura Mabaibolo ghawo na kurongora ŵantu kuti Yesu wakapereka umoyo wake, ndipo wali kujura ntowa yakuti ŵantu ŵasenderere kwa Ciuta mwakuti zakwananga zawo zigowokereke, na kuzakaŵa na umoyo wamuyirayira. (Yohane 3:16; 2 Ŵakorinte 5:18, 19) Ŵakupharazga kuti Ufumu wa Ciuta wuli kukhazikiskika kucanya pasi pa Themba lakuphakazgika Yesu Kristu, nakuti sono-sono apa Ufumu uwu uzamuwuskapo uheni pacaru capasi na kucipanga kuŵa Paradiso. (Civumbuzi 11:15; 21:3 4) Pakufiska ucimi wa Yesaya, iwo ŵakuyowoya na ŵanyawo kuti sono ‘ncirimika ico Yehova wakuca naco’ apo ŵantu ŵacali kupokera makani ghaweme. Ndiposo ŵakucenjezga ŵantu kuti sono-sono apa “zuŵa la kuwezgera nduzga la Ciuta” lizenge apo Yehova wazamudumura ŵaheni.—Salmo 37:9-11.

 7. Ncakucitika wuli ico cikurongora kuti Ŵakaboni ŵa Yehova mbakukolerana, ndipo ncifukwa wuli?

⁷ Agha ni makani ghekha ghaweme agho ghali na vitumbiko vyamuyirayira kwa ŵantu awo ŵakukhala mu caru ici umo mukucitika ngozi na masoka. Awo ŵakuzomera makani agha ŵakunjira mu ubali wakukolerana wa pacaru cose wa Ŵakristu, ŵeneawo ŵakuzomera cara kuti ŵapatukane cifukwa ca mtundu, fuko na usambazi panji ukavu. Iwo ‘ŵavwara citemwa, ico ncikondo ca ukongorekwa.’ (Ŵakolose 3:14; Yohane 15:12) Ici cikawoneka mu caru cinyake ca mu Africa cirimika camara. Zuŵa linyake namulenji mu msumba ukuru mu caru ico ŵantu ŵakasokwa na mphoroporo. Gulu linyake likakhumbanga kuti lipoke boma. Apo vintu vikafika pakuti fuko linyake kuwukira linyake, ŵantu ŵanyake ŵakakalipira mbumba ya Ŵakaboni cifukwa ca kusunga mu nyumba yawo Ŵakaboni ŵa fuko linyake. Mbumba yira yikazgora kuti: “Tikusunga Ŵakaboni ŵa Yehova pera mu nyumba yithu.” Kwa iwo, kupambana fuko cikaŵa cifukwa yayi; cakuzirwa kwa iwo cikaŵa citemwa ca Cikristu na kusanguruska awo ŵakusuzgika. Mwanakazi munyake uyo mpaubali na mbumba iyo wakati: “Ŵantu mu visopo vyose ŵakupereka Mkristu munyawo ku suzgo. Kweni Ŵakaboni ŵa Yehova ŵekha ndiwo ŵakuleka kucita ici.” Pali vyakucitika vinandi mu vyaru umo mukucitika nkondo za mafuko, vyeneivyo vikurongora kuti Ŵakaboni ŵa Yehova ‘ŵakutemwa nadi ŵabali wose.’—1 Petros 2:17.

Makani Ghaweme Ghakusinta Umoyo wa Ŵantu

8, 9. (a) Ni mikhaliro wuli iyo awo ŵazomera makani ghaweme ŵakusinta? (b) Ni vyakucitika wuli ivyo vikurongora kuti makani ghaweme ghali na nkongono?

⁸ Makani ghaweme ghakukolerana na umo Paulos wakayowoyera kuti ngacandulo mu ‘umoyo uno, na uwo ukwiza.’ (1 Timote 4:8) Makani agha ghakupereka cilindizga ceneko pera yayi, kweniso ghakusinta ‘umoyo sono.’ Ŵakaboni ŵa Yehova ŵakurongozgeka na Mazgu gha Ciuta, Baibolo, mwakuti umoyo wawo uyane na khumbo la Ciuta. (Salmo 119:101) Wuntu wawo ukuzgoka upya penepapo ŵakuyezga kuŵa na mikhaliro ya nga ni urunji na kugomezgeka.—Ŵaefeso 4:24.

⁹ Mwaciyerezgero, wonani umo umoyo wa Franco ukaŵira. Wakaŵa muntu mukari. Para vintu mu nyumba vyabudika, wakakwiyanga kwambura kukoreka, wakaswanga na kubwangandula vintu. Muwoli wake wakamba kusambira Baibolo na Ŵakaboni ŵa Yehova, ndipo nkaro ya Cikristu iyo Franco wakawona, pacoko-na-pacoko yikamovwira kuti wasinte. Nayo wakamba kusambira Baibolo na Ŵakaboni, pamanyuma pake wakamba kurongora vipasi vya mzimu nga ni mtende na kujikora. (Ŵagalatiya 5:22, 23) Iye njumoza wa ŵantu 492 awo ŵakabapatizika ku Belgium mu 2001. Wonaniso umo umoyo wa Alejandro ukaŵira. Munyamata uyu wakazgoŵera kumwa munkhwara wakuzweteska wongo. Iye wakazerezeka mupaka kufika pa kutora vintu vya mu nkando na kukaguriska mwakuti wasangepo kopara la kugulira munkhwara uwu. Apo wakafika pa virimika 22, Ŵakaboni ŵa Yehova ŵakamupempa kuti ŵacite nayo sambiro la Baibolo, wakazomera. Wakaŵazganga Baibolo zuŵa na zuŵa na kwamba kufika pa maungano gha mpingo. Wakaleka mukhaliro wake mwakuti pambere yindakwane myezi yinkondi na umoza, wakamba kupharazga—iye njumoza wa ŵantu 10,115 awo ŵakapharazganga cirimika camara ku Panama.

Makani Ghaweme ni Thumbiko ku Ŵakuzika

10. Mbanjani awo ŵakuzomera makani ghaweme, ndipo kaghanaghaniro kawo kakusinta wuli?

¹⁰ Yesaya wakayowoyerathu kuti makani ghaweme ghapharazgikenge ku ŵakuzika. Kasi ŵakuzika aŵa mbanjani? Ni awo ŵakuyowoyeka mu buku la Milimo kuŵa ‘ŵakwimikikira umoyo wa muyirayira.’ (Milimo 13:48) Aŵa mbantu ŵakuyuyulika, kwali ŵaŵe ŵasambazi panji ŵakavu awo mitima yawo yikuzomera uthenga wa unenesko. Ŵantu aŵa ŵakumanya kuti kucita khumbo la Ciuta kuli na vitumbiko vikuru comene kuruska cilicose ico caru cingapereka. (1 Yohane 2:15-17) Kasi Ŵakaboni ŵa Yehova ŵakukhorweska wuli mitima ya ŵantu aŵa para ŵakupharazga?

11. Mwakuyana na Paulos, kasi tikwenera kucita wuli para tikupharazga makani ghaweme?

¹¹ Awonani ciyerezgero ca mpostole Paulos uyo wakalembera Ŵakorinte kuti: ‘Para nkiza kwa imwe, kuti nkiza cara na kazirwiro ka mazgu panji ka vinjeru pa kumupharazgirani camucindindi ca Ciuta. Cifukwa nkapima kuti ndireke kumanya kantu kanyakeso mwa imwe, kweni Yesu Kristu pera, uyo wakapayikika.’ (1 Ŵakorinte 2:1, 2) Paulos wakakhumba cara kuzizika ŵapulikizgi ŵake na kusambira kwake. Wakasambizga visambizgo vyakufuma kwa Ciuta, visambizgo ivyo lero vilikulembeka mu Baibolo. Awonaniso mazgu gha Paulos kwa mupharazgi munyake Timote: “Pharazga mazgu; uŵe mcanya.” (2 Timote 4:2) Enya, Timote wakenera kupharazga “mazgu,” uthenga wa Ciuta. Paulos wakalemberaso Timote kuti: “Uŵe na mwampu kujirongora wakurumbika kwa Ciuta, wancito wambura kukhozgeka soni, wakurunjika makora mazgu gha unenesko.”—2 Timote 2:15.

12. Ni mwauli umo Ŵakaboni ŵa Yehova lero ŵakurondezgera mazgu na ciyerezgero ca Paulos?

¹² Ŵakaboni ŵa Yehova ŵakurondezga ciyerezgero ca Paulos, na mazgu ghake kwa Timote. Iwo ŵakumanya kuti Mazgu gha Ciuta ghali na nkongono, ndipo ŵakughagwiriskira ncito makora para ŵakurongora ŵanyawo mazgu ghakwenelera gha cilindizga na cisangurusko. (Salmo 119:52; 2 Timote 3:16, 17; Ŵahebere 4:12) Enya, ŵakugwiriskira ncito makora mabuku ghakusambizga Baibolo mwakuti awo mbakukondweskeka ŵapulikiske makora. Kweni, kanandi ŵakurongora ŵantu mazgu ghakufuma mu Malemba. Ŵakumanya kuti ŵantu awo mbakuzika ŵakhorwenge na Mazgu gha Ciuta. Kugwiriskira ncito Mazgu gha Ciuta mu ntowa iyi kukukhozgaso cipulikano cawo.

“Kusanguruska Wose Awo Ŵakutengera”

13. Mu 2001, ni soka wuli likacitika ilo likacitiska kukhumbikwa kwa kusanguruska ŵantu?

¹³ Mu cirimika ca 2001 mukacitika masoka ghanandi, pa cifukwa ici, ŵantu ŵanandi ŵakakhumbanga cisangurusko. Mwaciyerezgero, ku United States, mu September cirimika camara vigeŵenga vikabwangandula maofesi gha World Trade Center mu New York na Pentagon pafupi na Washington, D.C. Wofi ukuru ukakora ŵantu mu caru cose ico. Mukati mu masoka gha nga ni agha, Ŵakaboni ŵa Yehova ŵakuyezgayezga kufiska ncito yawo ya “kusanguruska wose awo ŵakutengera.” Pasi apa pali vyakucitika vicoko waka ivyo vikurongora umo Ŵakaboni ŵakucitira.

14, 15. Pa vyakucitika viŵiri vyakupambana, ni mwauli umo Ŵakaboni ŵakasanguruskira ŵantu ŵacitima?

¹⁴ Kaboni munyake uyo ni mupharazgi wanyengo zose, wakafika pafupi na mwanakazi uyo wakendanga mu mpepete mwa msewu na kumufumba maghanoghano ghake pakuyowoya za ivyo vigeŵenga vikacita. Mwanakazi masozi ghakamba kuthika. Wakati wali na citima cikuru ndipo wakukhumba nga wangawovwirapo. Kaboni wakamuphalira kuti Ciuta wakufipa mtima na ise tose, ndipo wakaŵazga Yesaya 61:1, 2. Mwanakazi mtima ukazika pakupulika mazgu agha, ndipo wakayowoya kuti muntu waliyose wakaliranga na ivyo vilikucitika. Mwanakazi wakapoka trakiti ndipo wakaphalira Kaboni kuti wize ku nyumba yake wazakacezge nayo.

¹⁵ Ŵakaboni ŵaŵiri awo ŵakapharazganga ŵakakumana na mwanarume uyo wakagwiranga ncito pa shopu yake. Ŵakaboni ŵakamusanguruska na mazgu gha mu Malemba cifukwa ca ucigeŵenga uwo ukacitika pa World Trade Center. Ŵakaboni ŵakaŵazga 2 Ŵakorinte 1:3-7, penepapo pali mazgu ghakuti: ‘Cisangurusko . . . cikwandana mwa Kristu.’ Mwanarume uyo wakawonga Ŵakaboni cifukwa ca kusanguruska ŵanyawo, ndipo wakati: “Ciuta watumbike mulimo uwemi uwo mukucita.”

16, 17. Kasi mungarongosora vyakucitika viŵiri ivyo vikurongora kuti Baibolo liri na nkongono ya kovwira ŵantu awo mbacitima, panji kudandaura cifukwa ca masoka?

¹⁶ Kaboni munyake uyo wakawelerangako ku ŵantu awo ŵakanweka na mazgu gha Ciuta, wakasangana na mwanarume munyake ndipo Kaboni wakati wali na citima kuyana na umo ŵantu ŵakaŵira pamanyuma pakuti ngozi yacitika. Mwanarume uyo wakazizwa pakuwona Kaboni wapatula nyengo yakuti wawonere ŵantu mu cigaŵa ico. Mwanarume wakayowoya kuti wakagwiranga ncito pafupi na maofesi gha World Trade Center apo ucigeŵenga uwu ukacitikanga ndipo wakawona vyose umo vikacitikiranga. Wakati wafumba cifukwa ico Ciuta wazomerezgera ŵantu kusuzgika, Kaboni wakaŵazga mavesi ghanyake mu Baibolo, kusazgapo lemba la Salmo 37:39 ilo likuti: “Ciponosko ca ŵarunji cikwizira kwa Yehova; ndiye linga lawo mu nyengo ya suzgo.” Mwanarume uyo wakamuwonga comene Kaboni cifukwa cakuti wakamucezgera ndipo wakapempa kuti wakawereso.

¹⁷ Muntu munyake mwa ŵantu ŵanandi awo ŵakasanguruskika na Ŵakaboni ŵa Yehova pamanyuma pakuti vigeŵenga vyawukira msumba uwu, ni mwanakazi uyo Ŵakaboni ŵakakumana nayo apo ŵakenderanga ŵanyawo. Mwanakazi uyu wakadandaula comene na ivyo vikacitika, ndipo wakapulikizga apo Ŵakaboni ŵakamuŵazgira Salmo 72:12-14 kuti: ‘Wakuthaska musauci para wacema, na mukavu, na uyo walije movwiri. Wakufwira lusungu ŵakutempenta na ŵakavu, na kuponoska mizimu ya ŵasauci. Wakuwombola mizimu yawo ku kuyuzga na ukari; ndopa zawo nzakuzirwa comene mu maso ghake.’ Mwee, naco ncisangurusko ico cili mu mazgu agha! Mwanakazi uyo wakapempa Ŵakaboni kuti ŵawerezgeso kuŵazga mavesi agha, wakaŵacemera mu nyumba kuti ŵarutizge kudumbiskana. Paumaliro pa kudumbiskana, sambiro la Baibolo likambika.

18. Kasi Kaboni wakawovwira wuli ŵazengezgani ŵake apo wakacemeka kuti wapempere?

¹⁸ Kaboni munyake wakugwira ncito mu restiranti mu cigaŵa cinyake kwenekuko ŵantu pakwambilira ŵakakananga makani ghaweme gha Ufumu. Pamanyuma pakuti ucigeŵenga wacitika, cigaŵa ico cikayaghayika. Pa Cinkondi namise, pa zuŵa ilo ucigeŵenga ukacitikira, mulaŵiliri wa restiranti wakacema ŵantu wose awo ŵakaŵa mu restiranti yake kufumira pawaro kwakanyengo kacoko waka mwakuti ŵakumbukire awo ŵakapwetekeka pa zuŵa lira, ŵakacita ici uku ŵakolera ŵakandulu mu mawoko. Mwakupereka ncindi ku mutheto wawo, Kaboni nayo wakaruta na kwimilira pampepete payekha. Mulaŵiliri wa restiranti wakamanya kuti ni Kaboni wa Yehova, ndipo mutheto wati wamara, iye wakapempa Kaboni kuti wapempere. Kaboni wakazomera. Mu pempero lake wakayowoya kuti citima cakora ŵanandi ndipo wakati awo ŵakulira ŵaŵe na cilindizga. Wakayowoya za nyengo iyo ucigeŵenga uzamuŵako cara, ndipo wakayowoyaso kuti wose ŵangasenderera kwa Ciuta wa cisangurusko mwa kumanya ivyo Baibolo likuyowoya. Pamanyuma pakuyowoya kuti “Ameni,” mulaŵiliri wa restiranti, pamoza na ŵantu ŵakujumpa 60 awo ŵakaŵa pawaro ŵakawonga Kaboni, na kumuvumbatira, na kuyowoya kuti pempero likaŵa liweme comene kwakuti ŵandalipulikepo nakale.

Muzi Ukwandula na Makani Ghaweme

19. Ncakucitika wuli ico cikurongora kuti ŵanji ŵakumanya kuti Ŵakaboni ŵa Yehova ŵali na mikhaliro yiweme?

¹⁹ Mu mazuŵa agha, nga ni umo ŵanandi ŵakuyowoyera, mizi iyo yili na Ŵakaboni ŵa Yehova yikwandula comene. Kasi ŵantu awo mbamtende, awo mbakugomezgeka na ŵa mikhaliro yiweme ŵangacitiska cara kuti ŵanji nawo ŵacite vintu viweme? Mu caru cinyake ca pakati pa Asia, Ŵakaboni ŵakakumana na mwanarume munyake uyo walikuleka ncito ya ulonda mu caru ico. Mwanarume uyu wakayowoya kuti wakatumika kuti wasande visopo vyakupambana-pambana. Apo wakati wasanda Ŵakaboni ŵa Yehova, wakatoreka mtima na kugomezgeka kwawo na nkaro yawo yiweme. Wakadokera cipulikano cawo cakukhora na visambizgo vyawo vyakufuma mu Malemba. Mwanarume uyu wakazomera kusambira Baibolo.

20. (a) Kasi ncito ya Ŵakaboni ŵa Yehova cirimika camara yikurongoraci? (b) Ncivici cikurongora kuti pacali ncito yinandi yakuti yicitike, ndiposo tikuyiwona wuli ncito yithu ya kupharazga?

²⁰ Kufuma mu vyakucitika vicoko ivyo vyazunurika mu nkani iyi, tingawona kuti Ŵakaboni ŵa Yehova ŵakatangwanika comene mu cirimika ca 2001.a Ŵakadumbiskana na ŵantu ŵambura mapendeko, ŵakasanguruska ŵanandi awo ŵakatengeranga, ndipo upharazgi wawo ukapambika vipambi. Pakaŵa ŵantu 263,431 awo ŵakajipatulira kwa Ciuta mwa kubapatizika. Ciŵerengero ca ŵapharazgi pacaru cose cikakwera na 1.7 peresenti. Pakaŵaso ŵantu 15,374,986 awo ŵakafika pa Cikumbusko ca nyifwa ya Yesu, ico cikurongora kuti pacali ncito yinandi yakuti yicitike. (1 Ŵakorinte 11:23-26) Tiyeni tirutilire kupenja ŵakuzika awo ŵangategherezga makani ghaweme. Tiyeni tirutilire kusanguruska “ŵakupyoka-mtima” apo cirimika ico Yehova wakuca naco cicali waka. Mwee, nako nkukondweska kwa ncito iyo tikucita! Mwaunenesko, tose tikukolerana na mazgu gha Yesaya: “Tindisekerere comene mwa Yehova, mzimu wane tiukondwe mwa Ciuta wane.” (Yesaya 61:10) Mphanyi Ciuta warutilira kutigwiriskira ncito apo wakufiska mazgu ghaucimi agha: “Yehova Ciuta tiwamezgere urunji na marumbo pamaso pa mitundu yose.”—Yesaya 61:11.

[Mazgu ghamusi]

Kasi Mukukumbuka?

• Kasi ŵakuzika ŵakandula wuli na makani ghaweme agho Yesu wakapharazganga?

• Ni mwaŵi wuli uwo ukapika kwa awo ŵakazomera ncito ya kupharazga ya ŵasambiri ŵa Yesu ŵakwambilira?

• Kasi awo ŵakuzomera makani ghaweme ŵandula nagho wuli lero?

• Kasi tikuwuwona wuli mwaŵi wakuzirwa wa kupharazga?

[Chati pa peji 29-32]

LIPOTI LA CIRIMIKA CA UTEŴETI CA 2001 LA ŴAKABONI ŴA YEHOVA PACARU COSE

(Mu magazini yakusindikizga ndimo vikuwoneka makora)

[Vithuzithuzi pa peji 25]

Ŵakaboni ŵa Yehova nyengo zose ŵakukumbuka mulimo wawo wa kupharazga

[Vithuzithuzi pa peji 27]

Awo ŵakuzomera makani ghaweme ŵakuŵa mu ubali wakukolerana wa pacaru cose