“Muŵenge Ŵamoyo”

1-3. Chifukwa wuli Ŵayuda awo ŵakaŵa ku Babuloni mitima yawo yikasweka? (Wonani chithuzi chakwamba.)

ŴAYUDA awo ŵakaŵa ku wuzga ku Babuloni mitima yikasweka. Chifukwa ntchakuti kwa vyaka 5 Ezekiyeli wakachima kuti Yerusalemu waparanyikenge, kweni ŵanthu ŵakagomezganga yayi kuti ivi vingachitika. Ezekiyeli wakachita vimanyikwiro vinandi, wakayowoya ntharika zinandi, ndipo wakapharazga mauthenga ghanandi ghakukhwaskana na kuparanyika kwa Yerusalemu. Nipera ŵazga ŵara ŵakagomezga yayi kuti Yehova wangazomerezga kuti Yerusalemu waparanyike. Nanga ni apo ŵakapulika kuti msumba wazingilizgika na ŵasilikari ŵa Babuloni, ŵakalutilira kugomezga kuti ŵanthu ŵa mu Yerusalemu ŵangaparanyika yayi.

² Kweni sono pakati pajumpha vyaka viŵiri kufuma apo ŵasilikari ŵakambira kuzingilizga msumba, munthu munyake uyo wakachimbira ku Yerusalemu wakiza na uthenga ku Babuloni wakuti: “Msumba wabwangandulika!” Uthenga uwu ukaŵagulura nkhongono Ŵayuda awo ŵakaŵa ku wuzga. Ŵakapulikiska yayi kuti msumba wakutemweka, tempile lituŵa, charu chiwemi, vyose vyabwangandulika! Ŵakathikirathu lusoko.—Ezek. 21:7; 33:21.

³ Apo ŵanthu aŵa ŵakaŵa kuti ŵathika lusoko, Ezekiyeli wakawona mboniwoni iyo yikapeleka chigomezgo. Kasi mboniwoni iyi yikaŵa na uthenga wuli ku ŵazga aŵa? Kasi mboniwoni iyi yikuŵakhwaska wuli ŵanthu ŵa Chiuta mazuŵa ghano, ndipo tingasanga wuli chandulo na mboniwoni iyi? Tiyeni tiwone ivyo Yehova wakavumbulira Ezekiyeli kuti timanye.

 4. Kasi Ezekiyeli wakawona vichi chomene mu mboniwoni iyo wakapokera?

⁴ Ŵazgani Ezekiyeli 37:1-10. Mu mboniwoni, Ezekiyeli wakaŵikika mukati mwa dambo lakuzura na viwangwa. Panji pakukhumba kuti Ezekiyeli wayipulikiske mboniwoni iyi, Yehova wakamuphalira kuti ‘wende kuzingilizga’ viwangwa ivyo vikaŵa waka limbwalimbwa. Apo Ezekiyeli wakendanga mu dambo, wakawona vinthu viŵiri vyakukhwaskana na viwangwa: unandi wa viwangwa kweniso umo vikaŵira. Wakawona kuti “vikaŵa vinandi chomene” ndipo “vikaŵa vyakomira pepetu.”

 5. Kasi Yehova wakaphalira Ezekiyeli kuti wachite vinthu wuli viŵiri, ndipo ntchivichi chikachitika Ezekiyeli wati wavichita?

⁵ Yehova wakaphalira Ezekiyeli kuchita vinthu viŵiri ivyo vikapangiska kuti vinthu viyambe kuwelerapo pachokopachoko. Chakwamba wakamuphalira kuti: “Chima pa viwangwa ivi,” uyowoye kuti “muŵenge ŵamoyo.” (Ezek. 37:4-6) Ezekiyeli wakati wachima waka, “pakamba kupulikikwa chongo, kulira kwakugumanyana kwa viwangwa, viwangwa vikamba kukumana pamoza.” Kufuma apo, “misipa na minofu” vikiza ku viwangwa, ndipo “chikumba chikavibenekelera.” (Ezek. 37:7, 8) Chachiŵiri, wakaphalirika kuti: “Chima ku mphepo,” uyowoye kuti “uputire” pa mathupi agha. Ezekiyeli wakati wachima, “mvuchi ukanjira mwa iwo. Iwo ŵakaŵa ŵamoyo, ndipo ŵakimilira. Ŵakaŵa chiwuru chikuru chomene cha ŵasilikari.”—Ezek. 37:9, 10.

 6. Kasi Yehova wakayowoya vichi ivyo vikawovwira Ezekiyeli kupulikiska mboniwoni iyi?

⁶ Kufuma apo, Yehova wakamuvumbulira Ezekiyeli ng’anamuro la mboniwoni iyi, wakati: “Viwangwa ivi ni nyumba yose ya Israyeli.” Nadi, Ŵayuda awo ŵakaŵa ku wuzga ŵakati ŵapulika kuti Yerusalemu wabwangandulika, ŵakajiwona nga kuti ŵafwa kale. Ntheura ŵakatengera kuti: “Viwangwa vithu ni vyakomira, chigomezgo chithu chamara. Tadumulikirathu.” (Ezek. 37:11; Yer. 34:20) Yehova wakapulika kulira kwawo, ndipo wakavumbura kuti mu mboniwoni iyi muli uthenga wakupa chigomezgo ku mtundu wa Israyeli.

 7. Mwakuyana na Ezekiel 37:12-14, kasi Yehova wakavumbura vichi kwa Ezekiyeli, ndipo ivi vikaŵapa chigomezgo wuli ŵanthu awo ŵakaŵa ku wuzga?

⁷ Ŵazgani Ezekiyeli 37:12-14. Kwizira mu mboniwoni iyi, Yehova wakaŵasimikizgira Ŵayuda awo ŵakaŵa ku wuzga kuti waŵawuskenge, waŵawezgerenge ku charu chawo, na kuŵakhazika kwenekura. Nakuti Yehova wakaŵachemaso kuti “ŵanthu ŵane.” Mazgu agha ghakwenera kuti ghakaŵakhozga chomene ŵazga ŵakuthika lusoko ŵara! Kasi ŵangagomezga wuli kuti layizgo lakuwezgerapo vinthu ili lizamufiskika nadi? Chifukwa Yehova ndiyo wakalayizga. Iyo wakati: “Ine, Yehova, nayowoya, ndipo nachichita.”

 8. (a) Kasi “nyumba yose ya Israyeli” yikaŵa nga yafwa munthowa wuli? (b) Kasi lemba la Ezekiyeli 37:9 likulongora kuti ntchivichi chikapangiska kuti Ŵaisrayeli ŵaŵe nga mbakufwa? (Wonani mazgu ghamusi.)

⁸ Kasi chigaŵa chakofya cha mboniwoni iyi chikafiskika wuli pa mtundu wa Israyeli? Mtundu wa Israyeli ukamba kale kubwanganduka mu 740 B.C.E., apo ufumu wa mafuko 10 ukaparanyika, ndipo ŵanthu ŵake ŵakatolekera ku wuzga. Pakati pajumpha vyaka pafupifupi 130, ŵanthu ŵa ku Yuda nawo ŵakatolekera ku Babuloni. Ntheura “nyumba yose ya Israyeli” yikaŵa ku wuzga. (Ezek. 37:11) Apa tingati ŵazga wose pamoza ŵakaŵa ŵakufwa nga ni viwangwa ivyo Ezekiyeli wakawona mu mboniwoni.a Nakuti mungaluwanga yayi kuti Ezekiyeli wakawona viwangwa vyakomira waka yayi, kweni vikaŵa vyakomira nkhanira “pepetu.” Ichi chikulongora kuti ŵakaŵa ŵakufwa mwauzimu nyengo yitali chomene. Uwu mbunenesko, chifukwa para tingasazga pamoza vyaka ivyo Ŵaisrayeli na Ŵayuda ŵakaŵira ku wuzga, kufuma mu 740 m’paka mu 537 B.C.E., vikajumpha 200.—Yer. 50:33.

 9. Kasi ivyo vikachitikira mtundu wa Israyeli wakale na “Israyeli wa Chiuta” vikuyana wuli?

⁹ Mauchimi ghakuyowoya vya kuwezgerapo vinthu ghakukhwaskana na Ŵaisrayeli, nga agho Ezekiyeli wakayowoya, ghali na kufiskika kunyake kukuru. (Mil. 3:21) Nga umo mtundu wa Israyeli ‘ukakomekera’ na kukhala nga ngwakufwa kwa nyengo yitali, ndimo “Israyeli wa Chiuta” nayo wakaŵira nga wakomeka na kukhala mu wuzga kwa nyengo yitali. Israyeli wa Chiuta uyu ni mpingo wa Ŵakhristu ŵakuphakazgika. (Gal. 6:16) Nakuti wuzga wa Ŵakhristu ŵakuphakazgika ukatora nyengo yitali chomene, mwakuti umoyo wawo wauzimu ukayananga waka na viwangwa “vyakomira pepetu.” (Ezek. 37:2) Nga umo tasambilira mu mutu uwo wajumpha, wuzga wa Ŵakhristu ŵakuphakazgika ukamba m’ma 100 C.E. ndipo ukatora vyaka mahadiredi ghanandi, nga umo Yesu wakayowoyera mu ntharika ya Ufumu ya tirigu na duru—Mat. 13:24-30.

10. (a) Kasi lemba la Ezekiyeli 37:7, 8 likati ntchinthu wuli chizamuchitikira ŵanthu ŵa Chiuta? (b) Ni vichi ivyo vikwenera kuti vikawovwira kuti chipulikano cha ŵazga ŵakopa Chiuta chambe kuweleramo pachokopachoko?

¹⁰ Yehova wakayowoyerathu kuti ŵanthu ŵake ŵazamuŵaso ŵamoyo mwauzimu pachokopachoko. (Ezek. 37:7, 8) Kasi ni vinthu wuli vinyake ivyo vikaŵapa chigomezgo ŵanthu ŵakopa Chiuta awo ŵakaŵa ku wuzga chakuti layizgo lakuti ŵazamuwelera ku Israyeli lifiskikenge nadi? Chinyake icho chikaŵapa chigomezgo ni mauchimi agho ntchimi zakwambilira zikayowoya. Chiyelezgero, Yesaya wakaphalira ŵazga ŵakukhalapo, “mphapu yakupatulika,” kuti ŵazamuwelera ku charu chawo. (Yes. 6:13; Yobu 14:7-9) Mauchimi ghanandi ghakuyowoya vya kuwezgerapo vinthu agho Ezekiyeli wakalemba, nagho ghakaŵapanga chigomezgo. Chinyakeso ntchakuti ŵazga ŵara nkhongono zikakweranga pakuwona ŵanalume ŵachipulikano nga ni ntchimi Daniyeli ku Babuloni. Kweniso chigomezgo chawo chakuti wawelerenge nadi ku charu chawo chikakhozgeka ŵakati ŵawona kuti Babuloni waparanyika mu 539 B.C.E.

11, 12. (a) Kasi vinthu vikamba kuwelerapo wuli pachokopachoko pakati pa “Israyeli wa Chiuta”? (Wonaniso bokosi lakuti ““Kusopa Kutuŵa—Kwawezgekerapo Pachokopachoko.”) (b) Kasi mazgu gha pa Ezekiyeli 37:10 ghakuwuska fumbo wuli?

¹¹ Kasi ntchito yakuwezgerapo vinthu pachokopachoko iyi yikachitika wuli pa “Israyeli wa Chiuta,” uwo ni mpingo wa Ŵakhristu ŵakuphakazgika? Ŵakhristu aŵa ŵakati ŵakhala mu wuzga vyaka vinandi chomene, “chongo, kulira kwakugumanyana kwa viwangwa,” chikamba kupulikikwa apo ŵanthu ŵakopa Chiuta ŵakamba kukhozgera kusopa kutuŵa. Mu vyaka vya m’ma 1500, William Tyndale wakang’anamulira Baibolo mu Chingelezi. Ŵalara ŵa tchalitchi la Katolika ŵakakwiya chomene kuwona kuti ŵanthu bweka nawo ŵamba kuŵazga Baibolo. Ntheura ŵakamukoma Tyndale. Nangauli Tyndale wakakomeka, kweni ŵanthu ŵanyake ŵachikanga ŵakalutilira kung’anamura Baibolo mu viyowoyero vinyake, ntheura ŵanthu ŵanandi ŵakaŵazganga Mazgu gha Chiuta.

¹² Pamanyuma, Charles T. Russell na ŵanyake ŵakamba kuŵikapo mtima kuti ŵawezgerepo unenesko wa mu Baibolo. Apa vikaŵa nga kuti “misipa na minofu” vikwiza ku viwangwa. Magazini ya Zion’s Watch Tower na mabuku ghanyake ghakawovwira ŵanthu ŵamitima yiwemi kumanya unenesko wa mu Baibolo, ndipo ŵakamba kwiza ŵekha na kujibatika ku Ŵakhristu ŵakuphakazgika. Kukwambilira kwa 1900, ŵanthu ŵa Chiuta ŵakakhozgekaso chomene na vinthu nga “Sinema Yakulongora Chilengiwa” kweniso buku lakuti The Finished Mystery. Pakati pajumpha nyengo yichoko waka, nyengo yakuti Chiuta wawovwire ŵanthu ŵake kuti ‘ŵimilire’ yikakwana. (Ezek. 37:10) Kasi ivi vikachitika pawuli, ndipo vikachitika wuli? Zgoro tikulisanga para tawona ivyo vikachitika ku Babuloni.

13. (a) Kasi mazgu gha pa Ezekiyeli 37:10, 14 ghakafiskika wuli kwambira mu 537 B.C.E.? (b) Kasi ni malemba wuli agho ghakulongora kuti ŵanthu ŵanyake ŵa ufumu wa mafuko 10 ŵakawelera ku Israyeli?

¹³ Kwambira mu 537 B.C.E., Ŵayuda awo ŵakaŵa ku Babuloni ŵakawona kufiskika kwa mboniwoni iyi. Yikafiskika wuli? Yehova wakaŵawuska na kuŵawovwira ‘kwimilira’ apo wakaŵawombora ku wuzga na kuŵazomerezga kuwelera ku Israyeli. Ŵaisrayeli ŵakukwana 42,360 kweniso ŵanthu ŵa mitundu yinyake ŵakukwana 7,000 ŵakanyamuka ku Babuloni kuti ŵakazengeso Yerusalemu na tempile na kukhazikika mu charu cha Israyeli. (Ezir. 1:1-4; 2:64, 65; Ezek. 37:14) Pakati pajumpha vyaka pafupifupi 70, ŵazga pafupifupi 1,750 ŵakalongozgana na Ezira apo wakaweleranga ku Yerusalemu. (Ezir. 8:1-20) Ntheura Ŵayuda wose awo ŵakawelera ku Yerusalemu ŵakajumpha 44,000, ichi chikaŵa nadi “chiwuru chikuru chomene.” (Ezek. 37:10) Chinyakeso ntchakuti Mazgu gha Chiuta ghakulongora kuti ŵanthu ŵa mu ufumu wa mafuko 10, awo ŵasekuru ŵawo ŵakakoleka wuzga na Ŵaasiriya m’ma 700 B.C.E., nawo ŵakawelera ku Israyeli kuti ŵakawovwire pakuzenga tempile.—1 Mid. 9:3; Ezir. 6:17; Yer. 33:7; Ezek. 36:10.

14. (a) Kasi mazgu gha pa Ezekiyeli 37:24 ghakutovwira wuli kumanya nyengo iyo kufiskika kukuru kwa uchimi wa Ezekiyeli kukachitikira? (b) Ntchivichi chikachitika mu 1919? (Wonaniso bokosi lakuti “Uchimi wa ‘Viwangwa Vyakomira’ na wa ‘Ŵakaboni Ŵaŵiri’— Kasi Ghakukolerana Wuli?”)

¹⁴ Kasi chigaŵa ichi cha uchimi wa Ezekiyeli chikafiskikaso wuli? Ivyo Yehova wakavumbulira Ezekiyeli mu uchimi unyake wakuyanako na uwu, vikulongora kuti kufiskika kukuru kwa uchimi wakuwezgerapo vinthu uwu kuzamuchitika para Yesu Khristu, uyo ni Davide Mulara, wamba kuwusa nga ni Themba.b (Ezek. 37:24) Ndivyo vikachitika nadi mu 1919, apo Yehova wakaŵika mzimu wake pa ŵanthu ŵake. Ŵanthu aŵa ‘ŵakaŵa ŵamoyo’ ndipo ŵakafwatulika ku wuzga wa Babuloni Mukuru. (Yes. 66:8) Pamasinda Yehova wakaŵazomerezga kuti ŵakhale mu “charu” chawo, kung’anamura mu paradiso wauzimu. Ipo kasi ŵanthu ŵa Yehova mazuŵa ghano ŵazgoka wuli “chiwuru chikuru chomene”?

15, 16. (a) Kasi ŵanthu ŵa Yehova mazuŵa ghano ŵazgoka wuli “chiwuru chikuru chomene”? (b) Kasi uchimi wa Ezekiyeli uwu ukutovwira wuli para takumana na viyezgo? (Wonani bokosi lakuti “Wovwiri Wakuti Tiyimilireso.”)

¹⁵ Pakati pajumpha nyengo yichoko waka kufuma apo Khristu wakimikira muzga wakugomezgeka mu 1919, ŵateŵeti ŵa Chiuta ŵakamba kuwona ivyo wakachima Zekariya. Zekariya wakaŵa ntchimi pakati pa ŵanthu awo ŵakafumanga ku wuzga, ndipo wakati: “Ŵanthu ŵanandi ndiposo mitundu yankhongono, ŵazamwiza kuzakapenja Yehova.” Pakuyowoya vya awo ŵazamupenja Yehova, Zekariya wakati ni “ŵanthu 10 ŵakufuma mu mitundu ya viyowoyero vyose.” Ŵanthu aŵa ŵazamukoleska “Muyuda,” kung’anamura Israyeli wauzimu, ndipo ŵazamuti: “Tikukhumba kuluta namwe, pakuti tapulika kuti Chiuta wali namwe mwaŵanthu imwe.”—Zek. 8:20-23.

¹⁶ Mazuŵa ghano, Israyeli wauzimu (ŵakuphakazgika awo ŵakhalako) kusazgapo “ŵanthu 10” (ŵamberere zinyake), ŵakupanga nadi “chiwuru chikuru chomene.” (Ezek. 37:10) Pakuŵa ŵankhondo ŵa Khristu mu gulu ilo likukulirakulira, tose tikulondezga waka Themba lithu Yesu, ndipo tikukhazga vitumbiko ivyo vikwiza munthazi.—Sal. 37:29; Ezek. 37:24; Fil. 2:25; 1 Tes. 4:16, 17.

17. Kasi tisambirenge vichi mu mutu wakulondezgapo?

¹⁷ Ŵanthu ŵa Chiuta ŵali na udindo ukuru chomene pa nkhani ya kuwezgerapo kusopa kutuŵa. Kasi ŵali na udindo wuli? Kuti tisange zgoro la fumbo ili, tiyeni tiwelere kumasinda na kusanda ntchito iyo Yehova wakapeleka kwa Ezekiyeli pambere Yerusalemu wandaparanyike. Tisambirenge nkhani iyi mu mutu wakulondezgapo.