Mazgu gha Yehova Ngamoyo

Fundo Zikuru za Cigaŵa Caciŵiri ca Buku la Ezekiel

MUKAŴA mu Disembala, cilimika ca 609 B.C.E. Themba la Babulone likaŵa kuti lanozgeka kuparanyirathu Yerusalemu. Kumanyuma kose, uthenga wa Ezekiel ku ŵazga awo ŵakaŵa ku Babulone ukaŵa na mutu wakuti: kuparanyika kwa msumba wawo wakutemweka, Yerusalemu. Kweni panyengo iyi, ucimi wa Ezekiel ukasintha, ndipo ukamba kuyowoya za kuparanyika kwa ŵamitundu awo ŵakakondwa cifukwa ca soka ilo likawira ŵanthu ŵa Ciuta. Kufuma pa nyengo iyi, pakajumpha myezi 18, Yerusalemu wakaparanyika, ndipo ucimi wa Ezekiel ukaŵa na mutu wakuti: kwambaso kwa kusopa kwaunenesko.

Mu Ezekiel 25:1–48:35 muli maucimi agho ghakuyowoya za kuparanyika kwa ŵamitundu awo ŵakaŵa pafupi na Israyeli ndiposo za kuwombokwa kwa ŵanthu ŵa Ciuta.a Kuwuskako Ezekiel 29:17-20, vipaturo vyose vili kulembeka mwakuyana na nyengo iyo vinthu vikacitikira ndiposo ndondomeko yake. Kweni mavesi ghanayi agha ghali kulembeka mwakuyana na mitu ya ucimi. Pakuti mazgu gha mu buku la Ezekiel nagho ghali kulembeka mwakukhuŵirizgika na mzimu wa Ciuta, “ngamoyo, ndipo ngakuphinda, [ngankhongono].”—Ŵahebere 4:12.

‘CARU CIZAMUZGOKA NGA NI MUNDA WA EDENI’

(Ezekiel 25:1–39:29)

Cifukwa ca kuwonerathu umo ŵamitundu ŵazamucitira para Yerusalemu wawa, Yehova wakatuma Ezekiel kuti wayowoyerethu za kuparanyika kwa Amoni, Moabu, Edomu, Filisitiya, Tyre, na Sidoni. Eguputo wazamupokeka usambazi wake. ‘Faro, themba la Eguputo na ciwuru cake’ ŵakayelezgereka na ntheta la sidare ilo lizamudumulikira pasi na “lupanga lwa themba la Babulone.”—Ezekiel 31:2, 3, 12; 32:11, 12.

Pakati pajumpha myezi yinkhondi na umoza kufuma apo Yerusalemu wakaparanyikira mu cilimika ca 607 B.C.E., yumoza uyo wakapona wakaphalira Ezekiel kuti: “Msumba wawa.” Ezekiel ‘wakaŵaso mbuwu cara,’ wakambaso kuyowoya ku ŵazga. (Ezekiel 33:21, 22) Wakaŵa na ucimi wakuti ŵazga ŵazamuweleraso kwawo. Yehova ‘wazamwimika muliska yumoza pacanya pa iwo, muteŵeti wake Davide.’ (Ezekiel 34:23) Edomu wazamuzgoka mayiyi, kweni caru ca Yuda cizamuzgoka “nga ndi munda wa Edeni.” (Ezekiel 36:35) Yehova wakalayizga kuti wazamuvikilira ŵanthu ŵake awo ŵazamuwera ku wuzga kuti “Gogi” waleke kuŵaparanya.—Ezekiel 38:2.

Mafumbo gha m’Malemba Ghazgoleka:

29:8-12—Mphawuli apo Caru ca Eguputo cikazgoka mayiyi kwa vilimika 40? Pamasinda pa kuparanyika kwa Yerusalemu mu cilimika ca 607 B.C.E., Ŵayuda ŵanji awo ŵakaleka kuluta ku wuzga ŵakacimbilira ku Eguputo nangauli mprofeti Yeremiya wakaŵacenjezga kuti ŵangacitanga nthena yayi. (Yeremiya 24:1, 8-10; 42:7-22) Kucita nthena kukaŵawovwira yayi cifukwa Nebukadinezara wakakathereskaso caru ca Eguputo. Pakwenera kuti pakaŵa pamasinda pa kuthereskeka uku apo caru ca Eguputo cikaŵira mayiyi kwa vilimika 40. Nangauli mabuku gha ŵanthu ŵakulemba mdauko ghakuyowoyapo yayi za nkhani iyi, kweni tingaŵa na cisimikizgo kuti ivi vikacitika nadi, cifukwa Yehova wakufiska mazgu ghake.—Yesaya 55:11.

29:18—Ni mwauli umo ‘mitu yose yikazgokera vipara na viŵegha vyose vikafyopokera’? Mulimo wa kuzingirizga msumba wa Tyre ukaŵa wakuvuska comene mwakuti mitu ya ŵasilikari ŵa Nebukadinezara yikazgoka vipara cifukwa ca kukwentheka na visoti. Kweniso viŵegha vyawo vikafyopoka cifukwa ca kunyamura vinthu vyakuzengera vigongwe na malinga.—Ezekiel 26:7-12.

Ivyo Tikusambirapo:

29:19, 20. Cifukwa cakuti ŵanthu ŵa ku caru ca Tyre ŵakacimbira na usambazi wawo, Themba Nebukadinezara wakasanga malipiro ghacoko comene pa mulimo uwo wakacita. Nangauli Nebukadinezara wakaŵa muwusi wakujikuzga ndiposo wakasopanga vikozgo, Yehova wakamupa caru ca Eguputo kuŵa “malipiro gha nkhondo yake.” Kasi nchakwenelera yayi nthena kuti nase titolere ivyo Ciuta wakacita, mwa kupeleka msonkho ku maboma cifukwa ca milimo iyo ghakuticitira? Kwali ŵalongozgi ŵa caru ŵali na nkharo wuli, kwali ndarama ŵakuzigwiliskira nchito wuli, kweni tikwenera kupeleka nipera.—Ŵaroma 13:4-7.

33:7-9. Mulinda wa mazuŵa ghano, awo Mbakhristu ŵakuphakazgika, ndiposo mabwezi ghawo, ŵakwenera kulutilira kupharazga makani ghawemi gha Ufumu na kucenjezga ŵanthu za “suzgo yikuru” iyo yikwiza.—Mateyu 24:21.

33:10-20. Kuti tizakapone tikwenera kuleka nthowa ziheni na kwamba kulondezga ivyo Ciuta wakukhumba. Nthowa ya Yehova “njakurunjika.”

36:20, 21. Cifukwa cakuti Ŵaisrayeli, awo ŵakaŵa “ŵanthu ŵa Yehova” ŵakaleka kufiska ivyo ŵakeneranga kucita, ŵakafipiska zina la Ciuta ku ŵamitundu uko ŵakaŵa. Tileke kuŵa ŵasopi ŵa Yehova zina pera.

36:25, 37, 38, NW. Paradiso wauzimu uyo tilimo mazuŵa ghano wali na ‘mskambo wa ŵanthu ŵakupatulika.’ Mwantheura, tikwenera kuyezgayezga kuti tileke kuwufipiska.

38:1-23. Nchakukhozga kumanya kuti Yehova wazamuponoska ŵanthu ŵake kwa Gogi, wa caru ca Magogi. Gogi ni zina ilo liri kupika kwa “Fumu ya caru cino,” uyo ni Satana Dyabulosi, kwambira apo wakapondomoskekera kucanya. Caru ca Magogi ni caru capasi uko Satana na viŵanda vyake ŵali kuponyeka.—Yohane 12:31; Civumbuzi 12:7-12.

“UŴIKE MTIMA ŴAKO PA IVYO NDITIKULONGORE IWE”

(Ezekiel 40:1–48:35)

Cikaŵa cilimika ca 14 kufuma apo msumba wa Yerusalemu ukaparanyikira. (Ezekiel 40:1) Kukakhala vilimika 56 kuti ŵasutuke ku wuzga. (Yeremiya 29:10) Panyengo iyi, Ezekiel wakaŵa pafupi kufika pa msinkhu wa vilimika 50. Mu mboniwoni, wakatolekera ku caru ca Israyeli. Wakaphalirika kuti: “Mwana wa munthu, laŵiska na maso ghako, upulike na makutu ghako, uŵike mtima wako pa ivyo nditikulongore iwe.” (Ezekiel 40:2-4) Ezekiel wakwenera kuti wakakondwa comene apo wakalongoreka mboniwoni ya tempele liphya.

Tempele laucindami ilo Ezekiel wakawona mu mboniwoni likaŵa na milyango 6, vipinda vyakuryeramo 30, malo Ghakupatulika, ndiposo malo Ghakupatulika Comene. Mu tempele ili mukafuma maji agho ghakazgoka mronga ukuru. (Ezekiel 47:1) Ezekiel wakawonaso mboniwoni ya malo agho fuko lililose likapika, kwambira kumafumiro gha dazi mpaka kumanjiliro. Malo agho ghakaŵa pakati pa fuko la Yuda na Benjamini ghakaŵa gha ŵakaronga. “Malo ghatuŵa gha Yehova” na “muzi” uwo ukacemekanga “Ciuta wali penepapo” vikaŵa mu malo gha pakati pa Yuda na Benjamini.—Ezekiel 48:9, 10, 15, 35.

Mafumbo gha m’Malemba Ghazgoleka:

40:3–47:12—Kasi tempele la mu mboniwoni iyi likwimiraci? Tempele likuru ilo Ezekiel wakawona mu mboniwoni kuti likazengeka nadi yayi. Likwimira tempele lauzimu la Ciuta, ndondomeko yake ya kusopa kutuŵa kwa mazuŵa ghano. (Ezekiel 40:2; Mika 4:1; Ŵahebere 8:2; 9:23, 24) Mboniwoni iyi yikufiskika mu “mazuŵa gha ku umaliro,” apo mulimo wa ŵapristi uli kwengeka. (2 Timote 3:1; Ezekiel 44:10-16; Malaki 3:1-3) Ndipouli, yizamufiskika kaumaliro mu Paradiso. Mboniwoni iyi yikapangiska Ŵayuda awo ŵakaŵa ku wuzga kuŵa na cigomezgo cakuti ŵazamuweleraso ku caru cawo na kwambaso kusopa kwaunenesko ndiposo kuti mbumba yiliyose yamuŵaso na ciharo ca malo.

40:3–43:17—Kasi kupima tempele kukung’anamuraci? Kupima tempele nchilongolero cakuti khumbo la Yehova la kusopa kwaunenesko lizamufiskika kwambura kutondeka.

43:2-4, 7, 9—Kasi “vitanda vya mathemba ghawo” ivyo vikeneranga kufumiskikamo mu tempele vikwimiraci? Nchakuwonekerathu kuti vitanda ivi vikwimira vikozgo. Mathemba gha ku Yerusalemu pamoza na ŵanthu ŵawo ŵakafipiska tempele la Ciuta na vikozgo ndipo ŵakavizgora mathemba ghawo.

43:13-20—Kasi jochero la mu mboniwoni ya Ezekiel likwimiraci? Jochero ili likwimira khumbo la Ciuta lakukhwaskana na sembe ya Yesu Khristu. Cifukwa ca sembe iyi, Ŵakhristu ŵakuphakazgika ŵakupimika kuŵa ŵarunji ndipo ŵa “mzinda ukuru” ŵakupimika kuŵa ŵatuŵa pamaso pa Ciuta. (Civumbuzi 7:9-14; Ŵaroma 5:1, 2) Mutepanji ndico cifukwa cake mu mboniwoni iyi mulije “nyanja ya mkuŵa,” panji kuti maji ghanandi agho ghakaŵa mu cibeseni ico cikaŵa mu tempele la Solomoni, agho ŵaprisiti ŵakagezanga.—1 Mathemba 7:23-26.

44:10-16—Kasi ŵapristi ŵakimiranga anjani? Ŵapristi ŵakimiranga Ŵakhristu ŵakuphakazgika ŵa mazuŵa ghano. Ŵakengeka mu cilimika ca 1918 apo Yehova wakakhala pasi mu tempele lake lauzimu “nga ndi mwengi na mutozgi.” (Malaki 3:1-5) Awo ŵakaŵa ŵatuŵa panji kuti awo ŵakalapa ndiwo ŵakeneranga kulutizga mulimo uwo ŵakapika. Pamasinda pake, ŵakeneranga kujisungilira “kwambura kabanga kakufuma ku caru,” na kuŵa ciyelezgero ku ŵa “mzinda ukuru,” awo ŵakimilika na mafuko gha upristi yayi.—Yakobe 1:27; Civumbuzi 7:9, 10.

45:1; 47:13–48:29—Kasi “caru” na kugaŵika kwake vikwimiraci? Caru cikwimira mulimo uwo ŵanthu ŵa Ciuta ŵakucita. Mwambura kupwelerako kanthu uko musopi wa Yehova wangaŵa, malinga wakukoleska kusopa kwaunenesko, wali mu caru ciwemi. Kugaŵika kwa caru uku kuzamufiskika mu caru ciphya apo munthu waliyose wakugomezgeka wazamuŵa na ciharo cake ca malo.—Yesaya 65:17, 21.

45:7, 16—Kasi cithiro ico ŵanthu ŵakapelekanga kwa ŵapristi na ŵakaronga cikwimiraci? Mu tempele lauzimu, ici cikwimira kukhozgera vinthu vyauzimu, ivyo vikusazgapo kupeleka wovwiri ndiposo kulongora mzimu wakukolerana.

47:1-5—Kasi maji gha mu mronga wa mu mboniwoni ya Ezekiel ghakwimiraci? Maji agha ghakwimira vyawanangwa vyauzimu ivyo Yehova wapeleka kuti wawovwire ŵanthu kuti ŵasange umoyo. Vinthu ivi vikusazgapo sembe ya Khristu ndiposo kumanya unenesko wa Ciuta uwo wuli mu Baibolo. (Yeremiya 2:13; Yohane 4:7-26; Ŵaefeso 5:25-27) Mronga uwu ukukulirakulira kuti uŵe wakukwanira wose awo ŵakwamba sono kusopa kwaunenesko. (Yesaya 60:22) Mronga uwu uzamuŵa na maji ghanandi comene mu muwuso wa Yesu wa vilimika 1000, ndipo maji ghake ghazamusazgapo kupulikiska vinthu vinyake kufuma mu “mabuku” agho ghazamujulika.—Civumbuzi 20:12; 22:1, 2.

47:12—Kasi makuni gha vipasi ghakwimiraci? Makuni agha ghakwimira vinthu vyauzimu ivyo Ciuta wapeleka kuti ŵanthu ŵaŵeso ŵakufikapo.

48:15-19, 30-35—Kasi muzi wa mu mboniwoni ya Ezekiel ukwimiraci? Muzi wakucemeka kuti “Ciuta wali penepapo” wuli mu “malo gha tumilimo,” kulongora kuti ghakwimira cinthu cinyake pa caru capasi. Muzi uwu ukulongora kuti ukwimira ulaŵiliri uwo ŵanthu awo ŵazamuhara “caru ciphya” caurunji ŵakusangwa nawo. (2 Petros 3:13) Miryango iyo yili kosekose yikulongora kuti muzi uwu ngwambura kusuzga kunjiramo. Ŵalaŵiliri ŵa ŵanthu ŵa Ciuta ŵakwenera kuŵa ŵakufikirika.

Ivyo Tikusambirapo:

40:14, 16, 22, 26. Makuni gha mikama agho ghakaŵa pa miryango ya tempele ili ghakulongora kuti awo mbakunyoroka ndiwo ŵakuzomerezgeka kunjira. (Salmo 92:12) Ici cikutisambizga kuti Yehova wakuzomerezga kusopa kwithu pekha usange tili ŵakunyoroka.

44:23. Tikuwonga comene cifukwa ca uteŵeti uwo ŵapristi ŵa mazuŵa ghano ŵakuticitira. “Muzga wa magomezgeko na wa vinjeru” wakupeleka cakurya cauzimu panyengo yake, ico cikutovwira kuti tipambaniskenge pakati pa vituŵa na vyambura kupatulika mu maso gha Yehova.—Mateyu 24:45.

47:9, 11. Visambizgo ivyo tikusambira, nchigaŵa cakuzirwa ca maji gha mu mronga wa mu mboniwoni, ndipo vyacizga comene ŵanthu mazuŵa ghano. Kose uko maji agha ghakufika, ŵanthu ŵakuŵa ŵamoyo mwauzimu. (Yohane 17:3) Kweni awo ŵakukana maji ghaumoyo agha ŵazamupelekeka ku “mcere,” panji kuti kuparanyikirathu. Antheura, nchakukhumbikwa comene kuti tiyezgeyezgenge ‘kurunjika makora mazgu gha unenesko.’—2 Timote 2:15.

“Ndirunjiske Utuŵa wa Zina Lane Likuru”

Pamanyuma pa kuwuskapo themba laumaliro la mu mbumba ya Davide, Ciuta waunenesko wakazomerezga kuti pajumphe kanyengo pambere Uyo “ndi mweneco” wa uthemba wandize. Ndipouli, Ciuta wakaluwa yayi phangano lake na Davide. (Ezekiel 21:27; 2 Samuel 7:11-16) Ucimi wa Ezekiel ukuyowoya mazgu ghakuti, “muteŵeti wane Davide,” uyo wakeneranga kuzakaŵa “muliska” na “themba.” (Ezekiel 34:23, 24; 37:22, 24, 25) Mweneco uyo wakuyowoyeka apa ni Yesu Khristu, uyo sono wakuwusa kucanya. (Civumbuzi 11:15) Yehova ‘wazamutuŵiska zina lake likuru’ kwizira mu Ufumu wakuwusika na Mesiya.—Ezekiel 36:23.

Sonosono apa, wose awo ŵakufipiska zina lituŵa la Ciuta, ŵazamuparanyikirathu. Kweni awo ŵakutuŵiska zina la Yehova mwa kumusopa mwakuzomerezgeka, ŵazamupokera umoyo wamuyirayira. Mwantheura, tiyeni timwe maji ghanandi ghaumoyo agho ghakwenda mazuŵa ghano, ndipo kusopa kwaunenesko kuŵe pakwamba mu umoyo withu.

[Mazgu ghamusi]

[Cithuzithuzi pa peji 22]

Kasi mronga wa maji ghaumoyo wa mu mboniwoni ya Ezekiel ukwimiraci?

[Cithuzithuzi pa peji 23]

Tempele laucindami la mu mboniwoni ya Ezekiel

[Kulongosora Cithuzithuzi]

Pictorial Archive (Near Eastern History) Est.