“Icho Chiuta Wagumanya Pamoza . . . ”

Dango la Mozesi likatenge para mwanalume wakukhumba kupata muwoli wake wakeneranga kulemba kalata yachipati. Ivi vikawovwiranga kuti nthengwa zileke kumara bweka. Ndipouli mu nyengo ya Yesu ŵalongozgi ŵachisopa ŵakachitiska kuti chiŵe chipusu kupatana. Ŵanalume ŵakalekanga ŵawoli ŵawo pa vifukwa vyambura kupulikikwa. (nwtsty mazgu ghakulongosora mavesi Mrk 10:4, 11) Yesu wakati Yehova ndiyo wakambiska nthengwa. (Mrk 10:2-12) Mfumu na muwoli ŵakuŵa “thupi limoza” ndipo ŵakwenera kupatana yayi. Chifukwa chimoza pera icho nthengwa yingamalira ‘mbuzaghali.’—Mt 19:9.

Mazuŵa ghano, ŵanandi ŵakuwona nthengwa nga umo Yesu wakayiwoneranga yayi, kweni ŵakuyiwona nga umo Ŵafarisi ŵakayiwoneranga. Ŵanthu ŵanandi mu charu ichi para ŵasangana na suzgo mu nthengwa ŵakuchimbilira kuyimazga. Ndipouli Ŵakhristu ŵakuviwona mwakupepuka yayi vilapo vya nthengwa. Iwo ŵakuyezgayezga kulondezga ulongozgi wa mu Baibolo para ŵasangana na suzgo. Wonelerani vidiyo ya mutu wakuti Chitemwa na Ntchindi Vikuzenga Nthengwa, pamanyuma zgorani mafumbo agha:

• 

  Kasi fundo ya pa Zintharika 15:1 yingamovwirani wuli mu nthengwa yinu ndipo chifukwa wuli njakuzirwa?

• Kasi fundo ya pa Zintharika 19:11 yingamovwirani wuli kuti muchepeske masuzgo?

• Para mu nthengwa yinu muli masuzgo, kasi mukwenera kujifumba mafumbo wuli pambere mundaghanaghane vyakuti yimare?

• Kasi fundo ya pa Mateyu 7:12, yingamovwirani wuli kuŵa mfumu panji muwoli muwemi?