Mungafwatuka ku Wuzga

Blessinga wakaluta ku Europe ndipo wakagomezganga kuti wamusanga ntchito yakunozga ŵanthu sisi. Kweni wakati watchayika kwa mazuŵa 10, na kughanaghanira nkhaza izo ŵabali ŵake ŵakamuchitiranga ku kwake, mwanakazi uyu wakachichizgika kwamba uhule.

Usiku uliwose Blessing wakeneranga kusanga ndalama pafupifupi mayuro 300 kuti wakwaniske kupeleka ngongoli ya mayuro 40,000 kwa abwana wake.b Iyo wakati: “Nkhaghanaghananga waka vyakugwentha, kweni nkhawopanga kuti ŵangakasuzga banja lakwithu. Nkhasoŵa chakuchita ndipo mahara ghakanimalira.” Nkhani ya mwanakazi uyu njimoza mwa nkhani za ŵanthu mamiliyoni ghanandi awo ŵakuchita bizinesi ya uhule pa charu chose.

Vyaka pafupifupi 4,000 ivyo vyajumpha, Yosefe wakaguliskika ku Eguputo na ŵakuru ŵake ndipo wakazgoka muzga. Mwakupambana na Blessing, pakwamba ŵabwana ŵa Yosefe ŵakamuchitiranga nkhaza yayi. Kweni pamasinda wati wakana kugonana na muwoli wa bwana wake, vinthu vikasintha ndipo ŵakamupusikizgira kuti wakakhumbanga kukolelera muwoli wa bwana wake. Ntheura ŵakamukaka na kumuŵika mu jele.—Genizesi 39:1-20; Salimo 105:17, 18.

Yosefe wakaŵa muzga wa mu nyengo yakale, apo Blessing wakaŵa muzga wa mu nyengo yithu yino. Kweni wose ŵakaguliskika kuŵa ŵazga. Kaluso kakuguliska ŵanthu nga ni katundu na chilato chakusangirapo ndalama kakamba ni kale chomene.

Para mu charu mwachitika nkhondo, chikuŵa chipusu chomene kuti ŵanthu ŵaguliske ŵanyawo. Buku linyake likuti Themba Thutmose III la Eguputo ulendo umoza pera likakora ŵazga 90,000 kufuma ku Kenani pa nkhondo iyo yikachitika. Ŵaeguputo ŵakaŵagwiliskanga ntchito ŵazga aŵa mu migodi, ŵakazenganga matempele na kujima migelo.

Mu Ufumu wa Ŵaroma, ŵanthu ŵanandi nawo ŵakakolekanga wuzga ndipo nyengo zinyake maufumu ghakatchayananga kulimbirana ŵazga. Buku linyake likuyowoya kuti mu nyengo ya Ŵakhristu ŵakwambilira, hafu ya chiŵerengero cha ŵanthu mu Romu ŵakaŵa ŵazga. Ŵazga ŵanandi ku Eguputo na ku Romu ŵakaŵasuzganga uheni chomene. Nakuti ŵazga ŵa ku Romu awo ŵakagwiranga ntchito mu migodi ŵakakhalanga waka na umoyo vyaka pafupifupi 30.

Ndipouli, ŵanthu ŵakalutilira kuyuzga ŵanyawo. Mwachiyelezgero, mu vyaka vya m’ma 1500 m’paka 1800, kuguliska ŵanthu yikaŵa bizinesi yankhongono ndipo yikafika paheni chomene pakati pa vyaru vya mu Africa na America. Lipoti la UNESCO likuti: ‘Kafukufuku wakulongora kuti ŵanthu pafupifupi 30 miliyoni, ŵanalume, ŵanakazi na ŵana ŵakaguliskikanga.’ Ndipo ŵanandi mwa ŵanthu aŵa ŵakafwanga pakwambuka nyanja ya Atlantic. Olaudah Equiano, uyo nayo wakaŵa muzga pa nyengo iyo kweni wakapona wakati: “Vikaŵa vinthu vyakofya chomene na vyakusuzga kuvilongosora kuwona umo ŵanakazi ŵakaliliranga, uku ŵanji ŵakufwa mu nthowa.”

Chachitima ntchakuti m’paka sono ŵanthu ŵanandi ŵachali mu wuzga. Mwachiyelezgero, kafukufuku munyake wakulongora kuti ŵanthu 21 miliyoni, ŵanalume, ŵanakazi na ŵana ŵakugwira ntchito nga mbazga ndipo ŵakupokera ndalama zichoko chomene apo ŵanji ŵakupokapo chilichose yayi. Ŵazga ŵa mazuŵa ghano ŵakugwira ntchito mu migodi, mafakitare, mu mashopu, mu nyumba za ŵanthu ndipo ŵanji ŵakuchita uhule. Nangauli boma likukanizga, kweni vikulongora kuti ŵanandi ŵakulutilira kuchita ivi.

Nkhaza izo zikuchitika mu charu zikupangiska ŵanthu ŵanandi kukwiya na kukhumba kuti vinthu visinthe kuti ŵazga ŵafwatuke. Mwachiyelezgero, mu vyaka vya ma 2 B.C.E., munthu munyake zina lake Spartacus wakadangilira ŵazga ŵakukwana 100,000 pakuwukira muwuso wa nkhaza wa Ŵaroma. Ndipouli, vikaphura kanthu yayi. Mu 1700 C.E. ŵazga ku chirwa chinyake ku Hispaniola ŵakagalukira mabwana ghawo chifukwa cha nkhaza izo ŵakaŵachitiranga. Nkhaza izo ŵazga ŵakakumananga nazo mu minda ya mijuŵa (zinde) zikapangiska kuti mu charu cha Haiti muchitike nkhondo iyo yikatora vyaka 13. Ndipo paumaliro mu 1804 vikapangiska kuti charu cha Haiti chiŵe na wanangwa wakujiwuska chekha.

Kweni pa ŵanthu wose awo ŵaŵapo ŵazga, Mbaisrayeli pera awo ŵakafwatukirathu ku wuzga ku Eguputo. Mtundu wose, ŵanthu pafupifupi 3 miliyoni ŵakafwatuka ku wuzga. Iwo ŵakeneranga kufwatuka nadi. Baibolo likulongosora umo vikaŵira ku Eguputo likuti, ‘ŵakaŵagwiliskanga ntchito yinonono, ya wuzga.’ (Ekisodo 1:11-14) Nakuti Farawo wakafika pakuŵika dango lakuti mwana mwanalume waliyose wa Ŵaisrayeli wakomeke kuwopera kuti ŵangandana chomene.—Ekisodo 1:8-22.

Nkhani ya kufwatuka ku wuzga ya Ŵaisrayeli njapadera chomene chifukwa Yehova wakanjilirapo kuŵafwatura. Chiuta wakaphalira Mozesi kuti: “Nkhumanya makora vyakuŵinya vyawo. Nikhilirenge kwenekura kuti nkhaŵathaske.” (Ekisodo 3:7, 8) Kufuma nyengo yira, Ŵayuda pa charu chose cha chapasi ŵakuchita Paska chaka chilichose kukumbukira zuŵa ili.—Ekisodo 12:14.

Baibolo likuti: “Kwa Yehova Chiuta withu kulije ubendezi.” Likutiso Chiuta wakusintha yayi. (2 Midauko 19:7; Malaki 3:6) Chiuta wakatuma Yesu pa charu chapasi kuti ‘wazakapharazge kufwatuka kwa ŵakukoleka, . . . na kufwatura ŵakuyuzgika.’ (Luka 4:18) Kasi vesi ili likuyowoya za kufwatuka ku vichi? Yesu wakatumika kuti wazakafwature ŵanthu ku wuzga wa kwananga na nyifwa. Pamasinda, iyo wakati: “Unenesko umufwaturaninge.” (Yohane 8:32) Nakuti mazuŵa ghano, unenesko uwo Yesu wakasambizga ukufwatura ŵanthu ŵanandi mu nthowa zinandi.—Ŵazgani bokosi lakuti “Wakafwatuka ku Wuzga Unyake.”

Chiuta wakawovwira Yosefe na Blessing kuti ŵafwatuke ku wuzga. Ŵazgani Genizesi chaputara 39 m’paka 41 kuti mumanye vinandi pa nkhani ya Yosefe. Nkhani ya kufwatuka ku wuzga ya Blessing nayo yingamukhozgani chomene.

Blessing wakati wafuma mu charu icho wakakhalanga, wakaluta ku Spain. Apo wakaŵa ku charu ichi, wakasangana na Ŵakaboni ŵa Yehova ndipo ŵakamba kumusambizga Baibolo. Pamasinda wakaŵikapo mtima kuti wasinthe, ndipo wakaleka uhule na kwamba ntchito yinyake ndipo ŵabwana ŵake ŵakamuzomerezga kuti wawezgengeko ngongoli pachokopachoko. Zuŵa linyake, Blessing wakapokera foni kufuma kwa ŵabwana ŵake. Ŵabwana ŵake ŵakamugowokera ngongoli yose kweniso ŵakamupempha kuti waŵagowokere pa vyose iyo ŵakamuchitira. Chifukwa wuli ŵakamugowokera? Nawo ŵakamba kusambira Baibolo na Ŵakaboni ŵa Yehova. Blessing wakati: “Unenesko ukufwatura nadi ŵanthu mu nthowa zakuzizika.”

Yehova chitima chikamukora chomene apo Ŵaisrayeli ŵakasuzgikanga ku Eguputo. Ndimo wakujipulikiraso mazuŵa ghano para vinthu vyambura urunji vikuchitika. Nadi, kuti ŵanthu ŵazakafwatukirethu ku wuzga pakwenera kuŵa kusintha kukuru chomene pa charu chapasi. Ndivyo Chiuta walayizga kuti wachitenge. Baibolo likuti: “Kuli machanya ghaphya na charu chapasi chiphya ivyo tikulindilira kuyana na layizgo lake, ndipo mu ivi muzamukhala urunji.”—2 Petrosi 3:13.