Mungacita Wuli Kuti Muŵe Nadi Munthu Wauzimu?

MPOSITOLE Paulosi wakalemba kuti: “Kughanaghanira vya thupi ndi nyifwa, kweni kughanaghanira vya mzimu mbumoyo na mtende.” (Ŵaroma 8:6) Mwakuyowoya mazgu agha, mpositole Paulosi wakalongora kuti kuŵa munthu wauzimu ni nkhani iyo munthu wakwenera kuyitora mwamaseŵera yayi. Ni nkhani ya umoyo na nyifwa. Kweni kasi munthu wauzimu wakusanga wuli ‘umoyo na mtende’? Kuyana na umo Baibolo likuyowoyera, munthu wanthena wakuŵa na mtende nanga mpha nyengo yasono. Wakuŵa na mtende mu mtima ndiposo na Ciuta. Kweniso kunthazi wazamusanga umoyo wamuyirayira. (Ŵaroma 6:23; Ŵafilipi 4:7) Nchakuzizwiska yayi kuti Yesu wakati: “Mba mwaŵi ŵakavu mu mzimu.”—Mateyu 5:3.

Umo mukuŵazgira magazini iyi nchilongolero cakuti mukukhumba kuŵa munthu wauzimu, ndipo mukucita cinthu camahara comene. Ndipouli, ŵanthu ŵali na maghanoghano ghakupambana comene pa nkhani iyi. Mwantheura mungafumba kuti: Kasi munthu uyo ngwauzimu nadi wakuŵa wuli? Ndipo kasi munthu wakwenera kucitaci kuti waŵe nadi wauzimu?

‘Maghanoghano gha Khristu’

Mpositole Paulosi wakati wayowoya kuzirwa ndiposo vyandulo vya kuŵa munthu wauzimu, wakayowoyaso umo munthu uyo ngwauzimu nadi wakuŵira. Pakulembera Ŵakhristu ŵa mu msumba wakale wa Korinte, Paulosi wakalongosora mphambano pakati pa munthu wathupi, kung’anamura munthu uyo wakucita makhumbiro gha thupi, na munthu wauzimu, uyo wakuzirwiska vinthu vyauzimu. Paulosi wakalemba kuti: “Munthu wa thupi la kawiro kuti wakupokera vya mzimu wa Ciuta cara; cifukwa mbucindere kwa iyo.” Kweni wakayowoyaso kuti munthu wauzimu wakuŵa na ‘maghanoghano gha fumu [Khristu].’—1 Ŵakorinte 2:14-16.

Kuŵa na ‘maghanoghano gha Khristu’ comene kukung’anamura ‘kuyana mu mtima kwakulingana na bambiro la Khristu Yesu.’ (Ŵaroma 15:5; Ŵafilipi 2:5) Mukuyowoya kunyake, munthu wauzimu ni uyo wakughanaghana nga ni Khristu, ndipo wakucita nga ni umo Yesu wakacitiranga. (1 Petros 2:21; 4:1) Para maghanoghano gha munthu ghayana comene na Khristu, nayo wakuŵa wauzimu comene ndipo nchipusu kuti wasange ‘umoyo na mtende.’—Ŵaroma 13:14.

Umo Mungamanyira ‘Maghanoghano gha Khristu’

Ndipouli, kuti munthu waŵe na maghanoghano gha Khristu, wakwenera kughamanya dankha. Mwantheura, cinthu cakwamba ico munthu wakwenera kucita kuti wakure mwauzimu nkhumanya umo Yesu wakaghanaghaniranga. Kweni kasi mungamanya wuli maghanoghano gha munthu uyo wakaŵako vilimika 2,000 ivyo vyajumpha? Kuti tizgore fumbo ili, tifumbe kuti, kasi mukamanya wuli za ŵanthu ŵakumanyikwa ŵa mu caru cinu awo ŵakaŵako kale comene? Nchakumanyikwirathu kuti panji mukacita kuŵazga mu mabuku. Mwakuyana waka, kuŵazga mdauko wa Yesu ni nthowa yikuru ya kumanyira maghanoghano ghake.—Yohane 17:3.

Pakuyowoya za Yesu, pali mabuku ghanayi agho ghakulongosora za iyo. Mabuku agha ni Mateyu, Marko, Luka na Yohane. Kuŵazga nkhani za mu mabuku agha mwakupwelelera kumovwiraninge kuti mumanye umo Yesu wakaghanaghaniranga, wunthu wake wa mukati, ndiposo ivyo vikamupangiskanga kuti wacite vinthu. Usange mukuŵa na nyengo ya kughanaghanira pa nkhani za Yesu, mukuŵa na cithuzithuzi ca wunthu wake. Nanga ni para mukujiwona kuti mukulondezga kale Khristu, kuŵazga na kughanaghanirapo nkhani izi kumovwiraninge kuti mulutilire ‘kukura mu ucizi na mu kumanya Fumu yithu na Mponoski Yesu Khristu.’—2 Petros 3:18.

Apo tili na fundo iyi mu maghanoghano, tiyeni tisande malemba ghanyake mu Baibolo kuti tiwone ico cikacitiska Yesu kuti waŵe munthu wauzimu. Pamanyuma, jifumbani umo mungalondezgera mikhaliro iyo wakalongora.—Yohane 13:15.

Uzimu na “Vipambi vya Mzimu”

Mulembi wa Baibolo, Luka, wakayowoya kuti mzimu utuŵa ukiza pa Yesu apo wakati wabapatizika. Kweniso wakati Yesu wakaŵa ‘wakuzura na mzimu utuŵa.’ (Luka 3:21, 22; 4:1) Yesu nayo wakaphalira ŵasambiri ŵake mwakuwerezgawerezga kukhumbikwa kwa kulongozgeka na mzimu utuŵa wa Ciuta. (Genesis 1:2; Luka 11:9-13) Nchifukwa wuli ici nchakukhumbikwa comene? Cifukwa mzimu wa Ciuta wuli na nkhongono iyo yikusintha kaghanaghaniro ka munthu mwakuti kambe kuyana na ka Khristu. (Ŵaroma 12:1, 2) Mzimu utuŵa ukovwira munthu kuti waŵe na mikhaliro nga ni “kutemwa, cimwemwe, mtende, kuzizipizga, wezi, uwemi, magomezgeko, kuzika, kujikora.” Mikhaliro iyi, iyo Baibolo likuti ni “vipambi vya mzimu,” ndiyo yikuŵa na munthu uyo ngwauzimu nadi. (Ŵagalatiya 5:22, 23) Mwakudumura, munthu wauzimu ni uyo wakulongozgeka na mzimu wa Ciuta.

Pa nyengo yose ya uteŵeti wake, Yesu wakalongora vipambi vya mzimu. Wakalongora mikhaliro nga ni citemwa, lusungu, na uwemi ku ŵanthu awo ŵakawonekanga kuŵa ŵapasi. (Mateyu 9:36) Mwaciyelezgero, wonani nkhani iyo mpositole Yohane wakalemba. Tikuŵazga kuti: “Para [Yesu] wakadumurangapo, wakawona munthu waciburumutira mumo wakababikira.” Ŵasambiri ŵa Yesu nawo ŵakamuwona munthu uyu, kweni ŵakaghanaghananga kuti ngwakwananga. Ŵakafumba kuti: “Kasi wakananga ndi njani, munthu uyu, panji ŵapapi ŵake?” Ŵazengezgani ŵa munthu uyu nawo ŵakamuwona, kweni ŵakatenge ni munthu wakupemphapempha. Ŵakati: “Asi ndi mweneuyo wakakhalanga na kupempha?” Kweni Yesu wakawona kuti munthu uyu wakakhumbikwiranga wovwiri. Wakayowoya nayo na kumucizga.—Yohane 9:1-8.

Kasi nkhani iyi yikumuphalirani vici za maghanoghano gha Khristu? Cakwamba, Yesu wakazerezganga yayi ŵanthu awo ŵakawonekanga kuti mbapasi, kweni wakaŵalengeranga lusungu. Caciŵiri, wakayezgayezganga kovwira ŵanji. Kasi namwe mukujiwona kuti mukulondezga umo Yesu wakacitiranga? Kasi mukuwona ŵanthu nga umo Yesu wakaŵawoneranga, kuŵapa wovwiri wakuti ŵaŵe na cilindizga ciwemi ca munthazi? Panji, kasi mukutemwa ŵekha awo ŵakusanga makora na kuzerezga ŵakavu? Usange mukuwona ŵanthu nga umo Yesu wakaŵawoneranga, mukucita makora cifukwa mukulondezga ciyelezgero cake.—Salmo 72:12-14.

Uzimu na Lurombo

Mabuku gha Mateyu, Marko, Luka, na Yohane ghakulongora kuti kanandi Yesu wakalombanga kwa Ciuta. (Marko 1:35; Luka 5:16; 22:41) Apo Yesu wakaŵa pa caru capasi, wakapatulanga nyengo ya kulomba. Musambiri Mateyu wakalemba kuti, Yesu “wakati wawezga mizinda, wakakwelera mu lupiri kuya kalomba pa yekha.” (Mateyu 14:23) Pa nyengo iyo Yesu wakayowoyeskananga na ŵawiske kwayekha, wakakhozgekanga comene. (Mateyu 26:36-44) Mazuŵa ghano, ŵanthu awo ŵakutemwa nadi vinthu vyauzimu ŵakupatura nyengo ya kuyowoyeskana na Ciuta. Ŵakumanya kuti kucita nthena kukukhozga ubwezi wawo na Mlengi ndipo ŵakuŵa na maghanoghano ghakuyana na Khristu.

Kanandi Yesu wakalombanga nyengo yitali. (Yohane 17:1-26) Mwaciyelezgero, pambere wandasankhe ŵanalume 12 awo ŵakazakaŵa ŵapositole ŵake, Yesu ‘wakaluta ku lupiri kuya kalomba; ndipo wakacerezga usiku wose mu kulomba Ciuta.’ (Luka 6:12) Nangauli ŵakuchezera usiku wose kulomba yayi, kweni awo ŵakutemwa nadi vinthu vyauzimu ŵakucita nga umo Yesu wakacitiranga. Pambere ŵandasankhe vinthu vikuru vyakuti ŵacite, ŵakupatura nyengo ya kulomba Ciuta kuti waŵawovwire na mzimu wake utuŵa mwakuti ŵasankhe vinthu ivyo vikhozgenge umoyo wawo wauzimu.

Kweniso, Yesu wakalombanga mwakufumira pasi pa mtima. Nase ndimo tikwenera kucitira. Wonani umo Luka wakalembera za umo Yesu wakalombera pa usiku wakuti namacero wafwenge. Wakalemba kuti: “Mumo wakaŵira mu kulimbalimba wakafwililira mu kulomba: ndipo mavuci ghake ghakaŵa nga ndi mathonyezi ghakuru gha ndopa ghakuthonyera pasi.” (Luka 22:44) Nyengo zose Yesu wakafwilirangapo kulomba, kweni cifukwa cakuti pa nyengo iyi wakakumana na ciyezgo cikuru comene, wakalomba ‘mwakufwilirapo’ comene ndipo lurombo lwake lukazgoreka. (Ŵahebere 5:7) Ŵanthu awo ŵakutemwa nadi vinthu vyauzimu ŵakucita nga ni umo Yesu wakacitiranga. Para ŵakumana na viyezgo vikuru, ŵakulomba ‘mwakufwilirapo’ comene kuti Ciuta waŵape mzimu utuŵa, kuŵalongozga na kuŵawovwira.

Pakuti Yesu wakatemwanga kulomba, nchakuzizika yayi kuti ŵasambiri ŵake ŵakakhumbanga kutolera ciyelezgero cake. Mwantheura, ŵakamupempha kuti: “Fumu, mutisambizge kulomba.” (Luka 11:1) Mazuŵa ghano napo, ŵanthu awo ŵakuzirwiska vinthu vyauzimu ndipo ŵakukhumba kulongozgeka na mzimu utuŵa wa Ciuta, ŵakulomba Ciuta nga ni umo Yesu wakacitiranga. Munthu uyo ngwauzimu nadi, wangakhala yayi kwambura kulomba.

Uzimu na Kupharazga Makani Ghawemi

Mu buku la Marko, muli nkhani iyo yikuyowoya kuti Yesu wakacizga ŵalwari kwamba mulenji mpaka usiku. Kukati kwaca, wakaluta kwayekha kukalomba, ndipo ŵasambiri ŵake ŵakiza na kumuphalira kuti ŵanthu ŵanandi ŵakamupenjanga. Mutepanji ŵanthu aŵa ŵakakhumbanga kuti waŵacizge. Kweni, Yesu wakaphalira ŵasambiri ŵake kuti: ‘Tiyeni tilutenge kunyake ku mizi yakuthyana nase, kuti nkhapharazge na uko wuwo.’ Pamasinda pake, Yesu wakalongosora cifukwa ico wakacitira nthena, wakati: “Ceneici ndico ndafumira.” (Marko 1:32-38; Luka 4:43) Nangauli Yesu wakamanyanga kuti kucizga kukaŵa kwakukhumbikwa, kweni kupharazga makani ghawemi gha Ufumu wa Ciuta ndiyo nchito iyo wakizira.—Marko 1:14, 15.

Mazuŵa ghano, kupharazgira ŵanthu za Ufumu wa Ciuta ndico nchimanyikwiro cinyake ca ŵanthu awo ŵali na maghanoghano gha Khristu. Wose awo ŵakukhumba kuŵa ŵalondezgi ŵake, Yesu wali kuŵapa dango lakuti: “Ntheura lutaninge mukasambizge mitundu yose, . . . muŵasambizge kukoleska vyose ivyo ndamulangulirani.” (Mateyu 28:19, 20) Kweniso Yesu wakayowoyerathu kuti: “Makani ghawemi gheneagha gha Ufumu ghamkupharazgika mu vyaru vyose ghaŵe cipanikizgo ku mitundu yose; penepapo ndipo umaliro uti wizenge.” (Mateyu 24:14) Pakuti Mazgu gha Ciuta ghakulongora kuti mulimo wa kupharazga makani ghawemi pa caru cose ukucitika na nkhongono ya mzimu utuŵa, kucitako mulimo uwu mwamwamphu nchilongolero cakuti munthu ngwauzimu nadi.—Milimo 1:8.

Kupharazga Ufumu pa caru cose capasi kukukhumba kuti ŵapharazgi ŵaŵe ŵakukolerana. (Yohane 17:20, 21) Awo ŵakucita mulimo uwu pa caru cose ŵakwenera kuŵa ŵanthu ŵakutemwa vinthu vyauzimu pera yayi, kweni ŵakweneraso kuŵa na ndondomeko yiwemi. Kasi mungaŵamanya ŵanthu awo ŵakulondezga Khristu ndipo ŵakupharazga makani ghawemi gha Ufumu pa caru cose?

Kasi Mukucita Vinthu Ivyo Vikucitiska Munthu Kuŵa Wauzimu Nadi?

Pali vimanyikwiro vinandi vya munthu uyo ngwauzimu nadi, kweni kasi ivyo tawona kale vikumukhwaskani wuli? Kuti musange zgoro, jifumbani kuti: ‘Kasi nyengo zose nkhuŵazga Mazgu gha Ciuta na kughanaghanirapo ivyo naŵazga? Kasi nkhulongora vipambi vya mzimu mu umoyo wane? Kasi nkhutemwa kulomba nyengo zose? Kasi nkhukhumba kukolerana na ŵanthu awo ŵakupharazga makani ghawemi gha Ufumu wa Ciuta pa caru cose?’

Kujisanda mwakufumira pasi pa mtima winu kungamovwirani kuti muwone usange ndimwe nadi munthu wauzimu. Tikumuciskani kuti sono nthe mucitepo kanthu mwakuti muŵe na ‘umoyo na mtende.’—Ŵaroma 8:6; Mateyu 7:13, 14; 2 Petros 1:5-11.

[Bokosi/Vithuzithuzi pa peji 5]

VIMANYIKWIRO VYA MUNTHU WAUZIMU

◆ Wakutemwa Mazgu gha Ciuta

◆ Wakulongora vipambi vya mzimu

◆ Wakulomba kwa Ciuta nyengo zose ndiposo mwakufumira pasi pa mtima

◆ Wakupharazga makani ghawemi gha Ufumu